Ишдан бўшамоқчи бўлган ходим касалхонада бўлса, икки ҳафта ишлаб бериши керакми

preview

«Ходим касалхонада даволанаётганда ўз хоҳишига кўра ишдан бўшашга почта орқали ариза юборди. Иш берувчи бундай аризани қабул қилиши шартми? Ходим «касаллик таътили»дан қайтгач, икки ҳафта ишлаб бериши  керакми?

Саволларга «Нормэксперти, юрист Ленара ХИКМАТОВА жавоб берди:

Эътибор беринг
Тушунтириш 2023 йил 30 апрелдан кучга кирадиган янги МК асосида тайёрланган.

 

 – Йўқ, ходим икки ҳафта ишлаб беришга мажбур эмас. Шунингдек, у ариза бериш вақтида ишда бўлиши талаб қилинмайди. Асосийси, у аввалдан – 14 календарь кун олдин – иш берувчини ёзма шаклда огоҳлантириши керак .

У буни таътилда, хизмат сафарида, «касаллик таътилида» ва ҳоказоларда бўлиб турган вақтда амалга ошириши  мумкин. Бундан ташқари, янги Меҳнат кодексида ходим меҳнат шартномасини бекор қилиш тўғрисидаги аризани почта жўнатмасини топшириш ҳақидаги хабарнома билан юборишга ҳақли эканлиги тўғридан-тўғри белгиланган .

Бунда икки ҳафталик муддатни ҳисоблаб чиқариш иш берувчи томонидан ариза олинган санадан сўнг кейинги кунда бошланади.

Тегишинча, кўриб чиқилаётган ҳолатда касаллик вақти икки ҳафталик огоҳлантириш муддатини тўхтатмайди. У тугагандан кейин ходим ишни тугатишга ҳақли, иш берувчи эса ходимга меҳнат шартномасини бекор қилиш ҳақидаги буйруқнинг кўчирма нусхасини, меҳнат дафтарчасини ёки электрон меҳнат дафтарчасидан кўчирмани бериши ҳамда у билан ҳисоб-китобни амалга ошириши шарт .

 

Агар ходим касалхонада бўлса, ишдан бўшатиш мумкинми

Агар икки ҳафтадан сўнг ходим ҳали ҳам касалхонада бўлса ва ишдан бўшашга аризасини чақириб олмаса, қўрқмасдан у билан меҳнат шартномасини бекор қилинг. Ходимнинг вақтинча меҳнатга қобилиятсизлик даврида ишдан бўшатишга тақиқ фақат меҳнат шартномасини иш берувчининг ташаббусига кўра  бекор қилиш ҳолларига нисбатан татбиқ қилинади .

Аммо ишдан бўшатишни хотиржам ва беҳадик расмийлаштириш учун ходимнинг ҳақиқатда меҳнат шартномасини  бекор қилиш ниятига яна бир бор ишонч ҳосил қилиш мақсадида у билан алоқага чиқиб, гаплашишингиз мумкин.

 

Агар ходим меҳнат шартномасини бекор қилиш кунида ишда бўлмаса

Бундай ҳолда кейинги иш кунидан кечиктирмай ходимга қоғоз шаклидаги меҳнат дафтарчасини (агар мавжуд бўлса) олиш учун келиши ёхуд уни почта орқали юборилишига розилик бериши зарурлиги ҳақида билдиришнома юборинг .

Эътибор беринг
Иш берувчи билдиришнома юборилган кундан эътиборан меҳнат дафтарчасини бериш кечиктирилганлиги учун жавобгарликдан озод этилади. Ўз вақтида талаб қилиб олинмаган меҳнат дафтарчаси ходим мурожаат қилган кундан эътиборан уч кундан кечиктирмай берилади .

Меҳнат шартномасини бекор қилиш тўғрисидаги буйруқнинг кўчирма нусхасини ва электрон меҳнат дафтарчасидан кўчирмани почта жўнатмасини топшириш ҳақидаги билдиришнома билан юборишингиз мумкин. Ходимнинг розилигини олиш шарт эмас. Ҳар эҳтимолга қарши хатга илова қилинган ҳужжатлар ва уларнинг реквизитларини кўрсатган ҳолда рўйхатга олинг.

Юборилган ҳужжатлар йўқолган ёки бузилган тақдирда, ходим иш берувчига янги кўчирма нусхаларни бериш учун мурожаат қилишга ҳақли. Улар  ходим мурожаат қилган кундан эътиборан уч кундан кечиктирмай берилиши керак .

 

 

Меҳнат шартномасини бекор қилиш Меҳнат шартномасини бекор қилиш Меҳнат шартномасини бекор қилиш /publish/doc/text187969_ishdan_bushamoqchi_bulgan_hodim_kasalhonada_bulsa_ikki_hafta_ishlab_berishi_kerakmi