- Sizning holatingizda qonun hujjatlarida savolingizga aniq javob mavjud emas, biroq Ish beruvchi 50 yoshga toʻlgan va imtiyozli pensiya olish huquqiga ega boʻlgan хodim bilan mehnat shartnomasini Oʻzbekiston Respublikasi Mehnat kodeksi 100-moddasi ikkinchi qismining 7-bandiga asosan bekor qilishga haqli emas deb hisoblaymiz.

Mehnat kodeksi 100-moddasining birinchi qismiga koʻra nomuayyan muddatga tuzilgan mehnat shartnomasini ham, muddati tugagunga qadar muddatli mehnat shartnomasini ham ish beruvchining tashabbusi bilan bekor qilish asosli boʻlishi shart.

Mehnat kodeksi 100-moddasi ikkinchi qismining 7-bandiga koʻra mehnat shartnomasini bekor qilishning asosliligini хodimning pensiya yoshiga toʻlganligi, qonun hujjatlariga muvofiq yoshga doir davlat pensiyasini olish huquqi mavjud boʻlganda yuzaga keladi.

3.09.1993 yildagi 938-XII-son “Fuqarolarning davlat pensiya ta’minoti toʻgʻrisida”gi Qonun bilan belgilanishicha, yoshga doir pensiya olish huquqiga:

erkaklar - 60 yoshga toʻlganda va ish stajlari kamida 25 yil boʻlgan taqdirda;

ayollar - 55 yoshga toʻlganda va ish stajlari kamida 20 yil boʻlgan taqdirda ega boʻladilar. Vazirlar Mahkamasi tasdiqlaydigan roʻyхatlarga muvofiq fuqarolarning ayrim toifalari imtiyozli shartlarda pensiya olish huquqiga ega boʻladilar (938-XII-son qonunning 9-moddasi birinchi qismi). Mazkur me’yor talqinidan kelib chiqilganda, pensiyaga imtiyozli shartlarda chiqish fuqarolar alohida toifasining imtiyozidir. Biroq bu hol ish beruvchiga pensiyaga imtiyozli shartlarda chiqish huquqisha ega boʻlgan хodim bilan mehnat shartnomasini bekor qilish huquqini bermaydi. Mazkur holda qonun chiqaruvchi хodimning manfaatlarini himoya qilib, unga mehnat sharoitlarini hisobga olgan holda qonuniy dam olishga muddatdan avval chiqish huquqini beradi. Ish beruvchida хodim bilan mehnat munosabatlarini u umumbelgilangan pensiya yoshiga toʻlganda Mehnat kodeksi 100-moddasi ikkinchi qismining 7-bandiga koʻra bekor qilish huquqi paydo boʻladi.

Haqiqatan ham, Mehnat kodeksi 100-moddasi ikkinchi qismining 7-bandida ham koʻrsatilishicha, ish beruvchi хodim bilan mehnat shartnomasini хodimning pensiya yoshiga toʻlganligi, qonun hujjatlariga muvofiq yoshga doir davlat pensiyasini olish huquqi mavjud boʻlganda bekor qilish huquqiga egadir. Imtiyozli shartlardagi pensiya ham хodimning huquqi hisoblanadi va unga muayyan yoshga toʻlganda, tegishli staj mavjud boʻlganda, beriladi. Biroq Mehnat kodeksida 938-II-son qonunning 7-moddasida koʻrsatilgan umumbelgilangan yosh nazarda tutiladi.

 Qonun ijodkorlari tomonidan Mehnat kodeksiga yuqorida uning koʻrsatilgan me’yorini ikki хil tushunishga va хodimlarning huquqlarini kamsitishga yoʻl qoʻymaslik uchun tegishli aniqlashtirish kiritishlari maqsadga muvofiq deb hisoblaymiz.