Аввало, таъкидлаш жоизки, устама ва қўшимча ҳақнинг фарқи бор.
Устама касбий маҳорат, мураббийлик, оғир, зарарли меҳнат шароитларида ишлаганлик учун, узлуксиз иш стажи, илмий даража ва ҳ.к. учун тўланадиган тўловлардир.
Қўшимча ҳақ касблар ва лавозимларда бир неча касб ва лавозим асосида ишлаганлик, хизмат кўрсатиш зонасини кенгайтирганлик, ишлар ҳажмини кўпайтирганлик учун тўланади (ВМнинг 2012 йил 18 октябрдаги 297-сон қарори билан тасдиқланган Низомнинг 23-б.).
Шунга кўра, иш ҳажми ортганлиги сабабли устама эмас, балки қўшимча ҳақ тўланади.
Агар қўшимча ҳақнинг аниқ миқдори, уни тўлаш шартлари ва муддатлари меҳнат шартномасига қўшимча келишувда белгиланган бўлса, у ҳолда буйруқ чиқариш шарт эмас. Агар меҳнат шартномасига қўшимча келишувда қўшимча ҳақ миқдори ва унинг тўланиши белгиланган бўлса-ю, лекин уни тўлаш шартлари кўрсатилмаган бўлса, у ҳолда буйруқ чиқариш лозим бўлади.
Жавоблар улар эълон қилинган санада долзарб ҳисобланади.