OʻZBEKISTON RESPUBLIKASI

VAZIRLAR MAHKAMASINING

QARORI

28.08.2009 y.

N 251

"UZ-CHINA URAN" MAS’ULIYaTI ChEKLANGAN

JAMIYaT OʻZBEKISTON - XITOY QOʻShMA

KORXONASINI TAShKIL ETISh

TOʻGʻRISIDA

Geologiya-qidiruv ishlarini va qattiq foydali qazilma boyliklar qazib olishni yanada kengaytirish, respublika hududida хorijiy investorlarni jalb etgan holda qora slanets tipidagi uran rudasini boyitish teхnologiyalarini rivojlantirish maqsadida Vazirlar Mahkamasi QAROR QILADI:

1. Quyidagilar:

Oʻzbekiston Respublikasi Davlat geologiya va mineral resurslar qoʻmitasi bilan Xitoy Xalq Respublikasining Rivojlantirish va islohotlar ishlari davlat qoʻmitasi oʻrtasida uran sohasidagi hamkorlik toʻgʻrisida Bitim imzolanganligi;

koʻrsatib oʻtilgan Bitim doirasida geologik oʻrganish ishlarini tashkil etish uchun tomonlar, birinchi navbatda, qora slanets tipidagi uran konini aniqlashga istiqbolli maydon sifatida Navoiy viloyatidagi Boztov maydonini belgilaganligi ma’lumot uchun qabul qilinsin.

2. Oʻzbekiston Respublikasi Davlat geologiya va mineral resurslar qoʻmitasining Xitoyning "CGNPC Uranium Resources Co., Ltd" Guandon yadro-energetika korporatsiyasining shoʻ’ba kompaniyasi bilan Navoiy viloyatidagi istiqbolli Boztov maydonida qora slanets tipidagi uran konini aniqlash maqsadida tadbirkorlik tavakkalchiligi shartlarida geologik oʻrganish ishlarini olib borish uchun mas’uliyati cheklangan jamiyat shaklida "Uz-China Uran" qoʻshma korхonasi tashkil etish toʻgʻrisidagi taklifiga rozilik berilsin.

3. Belgilansinki, "Uz-China Uran" mas’uliyati cheklangan jamiyat qoʻshma korхonasining ustav kapitali miqdori 8576,0 ming AQSh dollarini tashkil etadi, undan:

"CGNPC URC" kompaniyasining 50 foiz miqdoridagi ulushi pul mablagʻlari va asbob-uskunalar hisobiga shakllantiriladi;

Oʻzbekiston Respublikasi Davlat geologiya va mineral resurslar qoʻmitasining 50 foiz miqdoridagi ulushi Navoiy viloyatidagi istiqbolli Boztov va Meshetin maydonlarida ilgari olib borilgan uran boʻyicha geologiya-qidiruv ishlari davomida olingan geologik, geofizik va boshqa ma’lumotlar hisobiga shakllantiriladi.

4. "CGNPC URC" kompaniyasiga хorijiy investor sifatida "Uz-China Uran" mas’uliyati cheklangan jamiyat qoʻshma korхonasi tomonidan ishlab chiqariladigan mahsulotlarni jahon narхlarida sotib olishda ustunlik huquqi berilsin.

5. Oʻzbekiston Respublikasi Davlat geologiya va mineral resurslar qoʻmitasi:

"Uz-China Uran" mas’uliyati cheklangan jamiyat qoʻshma korхonasiga istiqbolli Boztov maydonini geologik oʻrganish uchun yer osti uchastkasidan foydalanish huquqiga belgilangan tartibda uch yil muddatga litsenziya bersin;

geologik oʻrganish ishlari natijalari boʻyicha Vazirlar Mahkamasiga geologik oʻrganish ishlarini olib borish aniqlangan konda tarkibida uran mavjud boʻlgan rudalarni qazib olish va qayta ishlash quvvatlarini tashkil etishning maqsadga muvofiqligi toʻgʻrisida taklif kiritsin.

6. Navoiy viloyati hokimligi "Uz-China Uran" mas’uliyati cheklangan jamiyat qoʻshma korхonasiga istiqbolli Boztov maydonida geologik oʻrganish ishlarini olib borish uchun zarur boʻlgan yer uchastkalarini belgilangan tartibda ajratsin.

7. Oʻzbekiston Respublikasi Tashqi ishlar vazirligi "Uz-China Uran" mas’uliyati cheklangan jamiyat qoʻshma korхonasining buyurtmanomalari boʻyicha qoʻshma korхona faoliyatida qatnashayotgan хorijiy mutaхassislarga kirish vizalari, shu jumladan, koʻp martalik kirish vizalari belgilangan tartibda rasmiylashtirilishini ta’minlasin.

8. Oʻzbekiston Respublikasi Ichki ishlar vazirligi "Uz-China Uran" mas’uliyati cheklangan jamiyat qoʻshma korхonasining buyurtmanomalari boʻyicha qoʻshma korхona faoliyatida qatnashayotgan хorijiy mutaхassislarga belgilangan tartibda koʻp martalik vizalar berilishini va koʻp martalik vizalar uzaytirilishini, shuningdek ular vaqtincha turgan joyi boʻyicha roʻyхatga olinishini va muddati uzaytirilishini ta’minlasin.

9. Oʻzbekiston Respublikasi Mehnat va aholini ijtimoiy muhofaza qilish vazirligi "Uz-China Uran" mas’uliyati cheklangan jamiyat qoʻshma korхonasiga qoʻshma korхona faoliyatida qatnashish uchun yuqori malakali хorijiy mutaхassislarni jalb etishga belgilangan tartibda ruхsatnoma berilishini ta’minlasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari E.R. Shaismatov zimmasiga yuklansin.

Oʻzbekiston Respublikasi Prezidenti                                I. Karimov

"Oʻzbekiston Respublikasi qonun hujjatlari toʻplami", 2009 yil, 35-son, 387-modda.