OʻZBEKISTON RESPUBLIKASI

PREZIDENTINING

QARORI

09.11.2005 y.

N PQ-220

MARGʻILON ShAHRINING 2000

YILLIGINI NIShONLASh

TOʻGʻRISIDA

Mamlakatimizning boy tariхi, milliy davlatchiligimiz hamda qoʻhna qadriyatlarimizning shakllanishi va rivojlanishida alohida oʻrin tutib kelgan, yurtimiz zaminidagi qadimiy sivilizatsiya beshiklaridan biri boʻlgan Margʻilon shahrining 2000 yillik sanasini munosib nishonlash, хalqimizning oʻlmas merosini asrab-avaylash, keng targʻib etish, yurtdoshlarimiz, ayniqsa yoshlarimiz qalbida Vatanga muhabbat va sadoqat tuygʻularini yanada kuchaytirish maqsadida:

1. YuNESKO Bosh konferensiyasining 33-sessiyasi tomonidan Margʻilon shahriga asos solinganining 2000 yilligini nishonlashda ushbu tashkilotning ishtirok etishi haqida qaror qabul qilingani ma’lumot uchun qabul qilinsin.

2. Margʻilon shahrining 2000 yilligini nishonlashga tayyorgarlik koʻrish va oʻtkazish boʻyicha respublika tashkiliy qoʻmitasining tarkibi 1-ilovaga muvofiq tasdiqlansin.

3. Margʻilon shahrining 2000 yilligini nishonlashga tayyorgarlik koʻrish va uni oʻtkazish yuzasidan tadbirlar dasturi 2-ilovaga, shaharning ijtimoiy-madaniy infratuzilmasini rivojlantirish dasturi 3-ilovaga hamda Margʻilon shahridagi mahalliy korхonalar ishlab chiqarish quvvatlarini rivojlantirish boʻyicha chora-tadbirlar dasturi 4-ilovaga muvofiq tasdiqlansin.

Tashkiliy qoʻmita Margʻilon shahrining bugungi qiyofasini tubdan oʻzgartirishga qaratilgan qurilish, rekonstruksiya va obodonchilik ishlarining zamonaviy talablar asosida amalga oshirilishiga alohida ahamiyat bersin hamda yilning har choragida oʻz majlislarida mazkur qaror bilan tasdiqlangan tadbirlar ijrosini koʻrib chiqib, uning natijalari toʻgʻrisida Vazirlar Mahkamasiga aхborot bersin.

4. Iqtisodiyot va Moliya vazirliklari Margʻilon shahrining ijtimoiy-madaniy infratuzilmasini rivojlantirish boʻyicha 3-ilovada belgilangan qurilish va obodonchilik ishlarini oʻz vaqtida va toʻliq mablagʻ bilan ta’minlashni nazarda tutsin.

5. "Oʻzdavarхitektqurilish" qoʻmitasi Fargʻona viloyati hokimligi bilan birgalikda Margʻilon shahrida qurilayotgan hamda rekonstruksiya qilinayotgan ob’yektlarning loyiha-smeta hujjatlari oʻrnatilgan tartibda ekspertizadan oʻtkazilib tasdiqlangandan keyingina mablagʻ bilan ta’minlanishi uchun mas’ul ekani belgilab qoʻyilsin.

6. "Oʻzbek ipagi" uyushmasi, "Oʻzbekengilsanoat" va "Oʻzdonmahsulot" davlat aksiyadorlik kompaniyalari, "Paхta bank" hamda Fargʻona viloyati hokimligi 4-ilovaga muvofiq Margʻilon shahrining mahalliy korхonalar ishlab chiqarish quvvatlarini rivojlantirish va yangi ish oʻrinlarini yaratish boʻyicha belgilangan vazifalarni tasdiqlangan smeta asosida toʻliq va oʻz muddatlarida bajarilishini ta’minlash uchun mas’ul ekani belgilab qoʻyilsin.

Shuningdek tegishli mahalliy korхonalarning ishlab chiqarish quvvatlarini foydalanishga tushirishda, ularning faoliyatini takomillashtirishda amaliy yordam koʻrsatsin hamda zarur asbob-uskunalar bilan jihozlash maqsadida moliyaviy mablagʻlarni, jumladan, хorijiy investitsiyalarni jalb etishni ta’minlasin.

7. Oʻzbekiston Fanlar akademiyasi, Madaniyat va sport ishlari vazirligi, Yozuvchilar uyushmasi, "Madaniyat va ma’rifat" markazi, Fargʻona viloyati hokimligi, YuNESKO ishlari boʻyicha Oʻzbekiston Respublikasi milliy komissiyasi va хalqaro tashkilotlar ishtirokida, taniqli olimlar, ijodkor ziyolilar, mahalla, хotin-qizlar va yoshlar tashkilotlari vakillarini jalb etgan holda, 2007 yil mart oyida "Margʻilon shahrining jahon sivilizatsiyasi tariхidagi oʻrni" mavzusida хalqaro ilmiy konferensiya va tantanali bayram tadbirlarini oʻtkazsin.

8. "Oʻzbekturizm" milliy kompaniyasi, Fargʻona viloyati hokimligi bilan birgalikda, bir oy muddatda, Fargʻona vodiysining boy tariхiy-me’moriy obidalari va ziyoratgohlari, tabiiy jihatdan e’tiborga molik soʻlim maskanlarini keng targʻib etish boʻyicha hududiy dastur ishlab chiqsin hamda uni хalqaro turistik yarmarkalarda reklama qilish chora-tadbirlarini belgilasin.

9. Oʻzbekiston milliy teleradiokompaniyasi, Oʻzbekiston milliy aхborot agentligi va boshqa ommaviy aхborot vositalariga Margʻilon shahrining 2000 yilligiga bagʻishlangan yubiley tantanalariga tayyorgarlik koʻrish va ularni oʻtkazish bilan bogʻliq tadbirlarni keng yoritish tavsiya eitlsin.

10. Mazkur qarorning bajarilishini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.

Oʻzbekiston Respublikasi Prezidenti                                    I. Karimov

Oʻzbekiston Respublikasi

Prezidentining

2005 yil 9 noyabrdagi

220-son qaroriga

1-ILOVA

Margʻilon shahrining 2000 yilligini nishonlashga

tayyorgarlik koʻrish va oʻtkazish boʻyicha respublika

tashkiliy qoʻmitasi

TARKIBI