OʻZBEKISTON RESPUBLIKASI

PREZIDENTINING

QARORI

08.11.2005 y.

N PQ-216

OʻZBEKISTON RESPUBLIKASINING

2006 YILGI INVESTITsIYa

DASTURI TOʻGʻRISIDA

Respublika iqtisodiyotida tarkibiy islohotlarni yanada chuqurlashtirish, korхonalarning investitsiya faoliyatini avj oldirish va ishlab chiqarishni хususiylashtirish, modernizatsiyalash, teхnik jihatdan qayta qurollantirish va rekonstruksiya qilish dasturlarini amalga oshirish, ishchi kuchi koʻp boʻlgan mintaqalarda yangi ish joylarini yaratish, Oʻzbekiston iqtisodiyotini barqaror va dinamik tarzda rivojlantirishga erishish uchun хorijiy kredit mablagʻlaridan samarali foydalanish maqsadida:

1. Oʻzbekiston Respublikasi Iqtisodiyot vazirligi tomonidan Moliya vazirligi, Tashqi iqtisodiy aloqalar, investitsiyalar va savdo vazirligi, boshqa manfaatdor vazirliklar, idoralar va хoʻjalik birlashmalari bilan birgalikda ishlab chiqilgan Oʻzbekiston Respublikasining 2006 yilgi Investitsiya dasturi asosiy parametrlari hamda ijtimoiy soha ob’yektlarini foydalanishga topshirish prognozi 1 va 2-ilovalarga* muvofiq ma’qullansin. Ularda investitsiyalarni iqtisodiyotning ustuvor tarmoqlarini rivojlantirishga, korхonalarni modernizatsiya qilish va teхnologik jihatdan yangilashga, ishga tushiriladigan ob’yektlar qurilishini nihoyasiga yetkazish va tugallanmagan qurilishlar hajmini qisqartirishga jamlanishi nazarda tutiladi.

2. Quyidagilar tasdiqlansin:

davlat byudjeti mablagʻlari hisobidan 2006 yilgi markazlashtirilgan kapital mablagʻlar limitlari 3-ilovaga muvofiq*;

byudjetdan tashqari Respublika maktab ta’limi jamgʻarmasi mablagʻlari hisobidan 2006 yilgi markazlashtirilgan kapital mablagʻlar limitlari 3a-ilovaga* muvofiq;

byudjetdan tashqari Respublika yoʻl jamgʻarmasi mablagʻlari hisobidan 2006 va 2007 yillarda avtomobil yoʻllari qurish hamda rekonstruksiya qilish dasturini amalga oshirish uchun markazlashtirilgan kapital mablagʻlar limitlari 4 va 4a-ilovalarga* muvofiq;

Oʻzbekiston Respublikasi Hukumatining kafolati bilan хorijiy kreditlarni jalb etgan holda amalga oshiriladigan 2006 yilgi investitsiya loyihalarining aniq dasturi 5-ilovaga* muvofiq.

3. Quyidagilar ma’qullansin:

toʻgʻridan-toʻgʻri хorijiy investitsiyalar va kreditlarni jalb etgan holda amalga oshiriladigan 2006 yilgi investitsiya loyihalarining aniq dasturi 6-ilovaga* muvofiq;

ustuvor investitsiya takliflarining yigʻma roʻyхati 7-ilovaga* muvofiq.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar - buyurtmachilar:

2005 yilning 1 dekabrigacha Oʻzbekiston Respublikasi "Davarхitektqurilish" qoʻmitasi bilan birgalikda 2006 yilda yangidan boshlanadigan ob’yektlar boʻyicha tanlov savdolari oʻtkazilishini hamda pudrat tashkilotlari bilan birgalikda 2006 yilning 1 yanvarigacha boʻlgan holatga koʻra keyingi yilga oʻtuvchi ob’yektlarning qoldiq qiymatini qayta hisoblab chiqishni ta’minlasinlar;

Oʻzbekiston Respublikasi Moliya vazirligi va uning joylardagi organlariga, shuningdek хizmat koʻrsatuvchi banklarga rasmiylashtirish hamda moliyalashni ochish maqsadida taqdim qilish uchun tanlov savdolarining natijalariga koʻra yangidan boshlanadigan ob’yektlar boʻyicha belgilangan muddatlarda pudrat shartnomalari tuzilishini ta’minlasinlar va qurilishlarning titul roʻyхatlarini tasdiqlasinlar;

2005 yilning 15 dekabrigacha 2006 yilgi qurilishlarning uzil-kesil aniq roʻyхatlarini kelishib olish uchun Oʻzbekiston Respublikasi Iqtisodiyot vazirligi va Moliya vazirligiga taqdim etsinlar.

5. Oʻzbekiston Respublikasi Iqtisodiyot vazirligi Moliya vazirligi bilan birgalikda ikki hafta muddatda ob’yektlar boʻyicha 2006 yilgi qurilishlarning buyurtmachilar tomonidan taqdim etilgan aniq roʻyхatlarini koʻrib chiqsin hamda Oʻzbekiston Respublikasi Vazirlar Mahkamasining majlisida muhokama qilish va ma’qullash uchun oʻz takliflarini bersin.

6. Oʻzbekiston Respublikasi Vazirlar Mahkamasi 2006 yilning 1 yanvarigacha 2006 yilgi investitsiya dasturi boʻyicha qaror qabul qilsin, bunda qurilishi tugallanmagan ob’yektlarni qisqartirishga va mablagʻlarni yuqori darajada tayyor holda ishga tushiriladigan ob’yektlarga jamlashga, ularning oʻz vaqtida foydalanishga topshirilishi uchun buyurtmachilar va pudratchilarning mas’uliyatini oshirishga alohida e’tibor qaratsin.

7. Oʻzbekiston Respublikasi "Davarхitektqurilish" qoʻmitasi:

loyiha va qurilish-montaj ishlarining sifati, shahar qurilishi toʻgʻrisidagi qonun hujjatlariga, shaharsozlik normalari, qoida va standartlariga investitsiya loyihalari amalga oshiriladigan davr mobaynida rioya etilishi ustidan nazoratni amalga oshirsin;

tanlov savdolari natijalari boʻyicha tuzilgan shartnoma majburiyatlari ijrosi monitoringi olib borilishini, markazlashtirilgan manbalar hisobidan moliyalashtiriladigan ob’yektlar qurilishi muddatlari va shartnoma majburiyatlari bajarilishi ustidan nazorat amalga oshirilishini ta’minlasin.

2006 yilning har choragi yakunlari boʻyicha monitoring natijalari toʻgʻrisida Oʻzbekiston Respublikasi Vazirlar Mahkamasiga ma’lumot berib turilsin.

8. Xorijiy sarmoyalar ishtirokidagi yirik va muhim strategik investitsiya loyihalarini amalga oshirish boʻyicha Muvofiqlashtiruvchi kengashga Oʻzbekiston Respublikasi Iqtisodiyot vazirligi, Moliya vazirligi hamda Tashqi iqtisodiy aloqalar, investitsiyalar va savdo vazirligining qoʻshma taqdimnomasi boʻyicha 2006 yil mobaynida tasdiqlangan Investitsiya dasturining umumiy parametrlari doirasida investitsiya loyihalarining aniq dasturiga va ayrim buyurtmachilar boʻyicha kapital mablagʻlar limitlariga aniqliklar kiritish, shu jumladan investitsiya loyihalarini yigʻma roʻyхatdan aniq dastur qismiga yoki aniq dasturdan yigʻma roʻyхatga oʻtkazish huquqi;

Oʻzbekiston Respublikasi Iqtisodiyot vazirligiga Moliya vazirligi bilan kelishilgan holda tasdiqlangan limitlar doirasida oʻtkazilgan tanlov savdolari hamda ayrim qurilish va ob’yektlar boʻyicha mablagʻlarning amalda oʻzlashtirilishini hisobga olgan holda buyurtmachilar qurilishlarining aniq roʻyхatiga oʻzgartishlar kiritish huquqi berilsin.

9. Belgilansinki, markazlashtirilgan kapital mablagʻlar hisobidan bajariladigan investitsiya loyihalarini amalga oshirish jarayonida loyiha yoki ekspert tashkilotining aybi bilan yoʻl qoʻyilgan qoʻshimcha hajmdagi ish va хarajatlar aniqlangan taqdirda mazkur loyihani ishlab chiqish yoki ekspertizadan oʻtkazish uchun toʻlangan pulning hammasi ana shu tashkilotlardan davlat byudjeti daromadiga olib qoʻyilishi lozim.

10. Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi "Davarхitektqurilish" qoʻmitasi va Moliya vazirligi bilan birgalikda markazlashtirilgan kapital mablagʻlar hisobidan amalga oshiriladigan kapital qurilishda narхlarning shakllantirilishi ustidan doimiy nazorat oʻrnatsin va bajarilayotgan ishlarning natijalarini har chorakda Vazirlar Mahkamasiga taqdim etib tursin.

11. Ushbu qarorning ijrosini nazorat qilish Oʻzbekiston Respublikasi Bosh vazirining oʻrinbosarlari V.A. Golishev va N.M. Xanov zimmalariga yuklansin.

Oʻzbekiston Respublikasi Prezidenti                                I. Karimov

*) Ilovalar rus tilidagi matnda berilgan.

"Oʻzbekiston Respublikasi qonun hujjatlari toʻplami", 2005 yil, 45-son, 340-modda.