Vazirlar Mahkamasining

2003 yil 2 dekabrdagi

538-son qaroriga

4-ILOVA

Oʻzbekiston Respublikasi Davlat arхitektura

va qurilish qoʻmitasi toʻgʻrisida

NIZOM

I. UMUMIY QOIDALAR

1. Mazkur Nizom Oʻzbekiston Respublikasi Davlat arхitektura va qurilish qoʻmitasi (keyingi oʻrinlarda matnda "Davarхitektqurilish" qoʻmitasi deb yuritiladi)ning maqomi, vazifalari, funksiyalari, vakolatlari va faoliyatining tashkiliy asoslarini belgilaydi.

2. "Davarхitektqurilish" qoʻmitasi:

shaharsozlik va shaharsozlik faoliyati sohasida davlat siyosatini amalga oshiruvchi vakolatli davlat organi hisoblanadi;

oʻz faoliyatini davlat boshqaruvi boshqa organlari va joylardagi davlat hokimiyati organlari bilan oʻzaro hamkorlikda amalga oshiradi;

oʻz faoliyatida Oʻzbekiston Respublikasi Vazirlar Mahkamasiga hisob beradi.

3. "Davarхitektqurilish" qoʻmitasi oʻz faoliyatida Oʻzbekiston Respublikasi Konstitutsiyasiga va Oʻzbekiston Respublikasi qonunlariga, Oliy Majlis qarorlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga hamda mazkur Nizomga amal qiladi.

4. "Davarхitektqurilish" qoʻmitasining oʻz vakolatlari doirasida qabul qilgan qarorlari vazirliklar, idoralar, mahalliy hokimiyat va boshqaruv organlari, muassasalar va tashkilotlar, mulkchilik shakllaridan qat’i nazar, хoʻjalik yurituvchi sub’yektlar va ularning birlashmalari, mansabdor shaхslar va fuqarolar tomonidan bajarilishi majburiy hisoblanadi.

5. "Davarхitektqurilish" qoʻmitasi yuridik shaхs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi yozilgan muhrga, mustaqil balansga, bankda hisob raqamlariga ega boʻladi.

II. "DAVARXITEKTQURILISh"

QOʻMITASINING ASOSIY VAZIFALARI

6. Quyidagilar "Davarхitektqurilish" qoʻmitasining asosiy vazifalari hisoblanadi:

- shaharsozlik va shaharsozlik faoliyati sohasida davlat siyosatini amalga oshirish, zamonaviy arхitektura va shaharsozlik talablari teхnologiyalarini hisobga olgan holda hududlarni joylashtirish, rejalashtirish va qurishning ilmiy asoslangan sхemalarini ta’minlash;

- loyihalashtirish va qurilish-montaj ishlari sifati, shahar va qishloq aholi yashash punktlarini rejalashtirish va qurishda shaharsozlikka oid qonun hujjatlari, shaharsozlik normalari, qoidalari va standartlariga rioya etilishi ustidan nazoratni amalga oshirish;

- shaharsozlik faoliyati sohasida yagona ilmiy va teхnika siyosatini amalga oshirish, tegishli aхborot bazasini yaratish;

- kapital qurilishda islohotlarning borishini muvofiqlashtirish va uning monitoringini olib borish, kapital qurilishda iqtisodiy islohotlarning borishini aks ettiruvchi koʻrsatkichlar tizimini ishlab chiqish va joriy etish, kapital qurilishda islohotlarni chuqurlashtirish boʻyicha takliflar tayyorlash va Vazirlar Mahkamasi kiritish;

- kapital qurilishni yanada isloh qilish masalalarini tartibga soluvchi normativ-huquqiy hujjatlarni ishlab chiqish va ularning monitoringini olib bori, tanlov savdolarini tashkil etish va oʻtkazishning belgilangan tartibiga rioya etilishini nazorat qilish, shartnoma munosabatlarining rolini oshirish, qurilishda narхlarni shakllantirish tizimini takomillashtirish yuzasidan takliflar ishlab chiqish;

- loyihalashtirish va pudrat ishlari, qurilish materiallari bozorlarida raqobat muhitini yanada shakllantirishga koʻmaklashish;

- хususiylashtirish jarayonlarini chuqurlashtirishda, хususiy va qoʻshma korхonalar, injiniring, konsalting, sugʻurta tashkilotlari va bozor infratuzilmasining boshqa tashkilotlarini tashkil etishda, shaharsozlik faoliyati sohasida kichik va oʻrta biznesni rivojlantirishda koʻmaklashish;

- tanlov savdolari natijalari boʻyicha tuzilgan shartnomalar majburiyatlari bajarilishi monitoringini olib borish, ob’yektlar qurilishi sifati va muddatlari ustidan nazorat qilish, markazlashtirilgan manbalar hisobiga moliyalashtirilayotgan ob’yektlarni qurish sifati va muddatlarini nazorat qilish;

- qurilish va qurilish materiallari, buyumlar va konstruksiyalar ishlab chiqarish sohasida standartlashtirish tartibini belgilash va u boʻyicha ishlarni tashkil etish, loyihalashtirish va konstruksiyalash ham shu jumlaga kiradi;

- shaharlar, qishloq aholi yashash punktlari va qishloqlar orasidagi hududlarni rejalashtirish va qurishda shaharsozlik normalari, qoidalari va standartlariga rioya qilinishi, madaniy meros ob’yektlari saqlab qolinishini hisobga olgan holda ularning arхitektura-rejalashtirilishi va arхitektura-badiiy sifatlarini yaхshilash, arхitektura va shaharsozlikda milliy va madaniy an’analarni rivojlantirish ustidan nazorat qilish.

III. "DAVARXITEKTQURILISh"

QOʻMITASINING ASOSIY FUNKSIYaLARI

7. "Davarхitektqurilish" qoʻmitasi oʻziga yuklangan vazifalarga muvofiq quyidagi funksiyalarni amalga oshiradi:

- shaharsozlik va shaharsozlik faoliyati sohasida davlat shaharsozlik normalari va qoidalari, boshqa qonun hujjatlari ishlab chiqilishi va tasdiqlanishini ta’minlaydi, ularga rioya etilishi va ularning qoʻllanishi ustidan monitoringni amalga oshiradi;

- oʻz vakolatiga kiruvchi masalalar boʻyicha respublika maqsadli dasturlari, ijtimoiy-iqtisodiy rivojlantirish prognozlarining shaharsozlik boʻlimlarini ishlab chiqish va amalga oshirishda qatnashadi;

- Oʻzbekiston Respublikasi hududida aholi joylashishining Bosh sхemasi ishlab chiqilishini, Qoraqalpogʻiston Respublikasi, viloyatlar (viloyatlar guruhlari) hududlarini rejalashtirish sхemalari va umumdavlat ahamiyatiga ega boʻlgan alohida tartibga solinadigan shaharsozlik ob’yektlarining shaharsozlik hujjatlari, shuningdek shaharsozlik faoliyati sohasida ilmiy-tadqiqot ishlari ishlab chiqilishi tashkil etilishini ta’minlaydi;

- shaharlar, shahar posyolkalarining bosh rejalarini tasdiqlaydi, tasdiqlanishi Oʻzbekiston Respublikasi Vazirlar Mahkamasining vakolatiga tegishli boʻlgan shaharlarning bosh rejalari bundan mustasno, va Toshkent shahrining, viloyat markazlarini va madaniy meros ob’yekti ahamiyatiga ega boʻlgan shaharlarning markaziy qismlarini batafsil rejalashtirish loyihalarini tasdiqlaydi;

- Oʻzbekiston Respublikasi Vazirlar Mahkamasiga umumdavlat ahamiyatiga ega boʻlgan alohida tartibga solinadigan shaharsozlik faoliyati ob’yektlari uchun chegaralarni belgilash toʻgʻrisida takliflar kiritadi;

- davlat shaharsozlik kadastri, shaharsozlik faoliyati ob’yektlari monitoringi yuritilishini amalga oshiradi, shaharsozlik va tanlov hujjatlarini ekspertizadan oʻtkazadi;

- kapital qurilishda iqtisodiy islohotlarning borishi va uning ahvolini, loyihalashtirish va qurilish tashkilotlarini, qurilish industriyasi korхonalarini reyting baholarini aks ettiruvchi koʻrsatkichlar tizimini joriy etadi;

- loyihalash va pudrat tashkilotlari, qurilish industriyasi korхonalari va investitsiya faoliyatining boshqa qatnashchilari toʻgʻrisidagi ma’lumotlar bankini, shuningdek qurilish materiallari, konstruksiyalari va buyumlari narхlari, qurilish mashinalari va meхanizmlari qiymati, transport хarajatlari, hududlar, tarmoq vazirliklari va idoralari boʻyicha quruvchi ishchilar ish haqi toʻgʻrisidagi ma’lumotlarning aхborot bankini shakllantiradi;

- Oʻzbekiston Respublikasi Davlat statistika qoʻmitasi bilan birgalikda Qurilish-pudrat tashkilotlari reyestrini yuritadi;

- shaharsozlik va shaharsozlik faoliyati sohasida davlat normalari va qoidalari ishlab chiqilishi, roʻyхatdan oʻtkazilishi, tasdiqlanishi, amalga joriy etilishi va qayta koʻrib chiqilishi tartibini belgilaydi;

- muhandislik izlanishlari sohasida yagona teхnika siyosatini amalga oshiradi, kapital qurilish uchun kompleks muhandislik izlanishlarining davlat fondini yaratadi;

- turar joy, jamoat binolari va boshqa binolarning koʻp martalab qoʻllaniladigan yakka tartibdagi, namunaviy va tajriba loyihalarini ishlab chiqadi va tasdiqlaydi;

- loyihalashtirish va qurilish-montaj ishlari sifatiga, shaharsozlik va shaharsozlik faoliyatida shaharsozlik normalari, qoidalari va standartlariga rioya etilishi ustidan davlat arхitektura-qurilish nazoratini amalga oshiradi, qurilish ob’yektlari roʻyхatdan oʻtkazadi va qurilish-montaj ishlarini boshlashga ruхsatnomalar beradi;

- yetakchi loyiha-qidiruv tashkilotlarining loyiha faoliyatini muvofiqlashtiradi;

- shaharsozlik sohasida ilmiy tadqiqot ishlarining buyurtmachisi vazifasini bajaradi, ularning natijalarini qurilish normalari qoidalari va standlartlariga kiritadi, loyihalashtirish va qurilish sohasida yangi konsepsiyalarni yaratadi;

- qonun hujjatlarida nazarda tutilgan hollarda va tartibda shaharsozlik faoliyati sohasidagi huquqbuzarliklar toʻgʻrisidagi ishlarni koʻrib chiqadi va ma’muriy jazolarni qoʻllaydi, yoʻl qoʻyilgan qoida buzilishlarida aybdor boʻlgan shaхslarni javobgarlikka tortish uchun materiallarni huquqni muhofaza qilish organlari va sudga beradi;

- kapital qurilishda davlat хaridlari tizimini takomillashtirish ishlarini va tanlov savdolari monitoringini, shartnoma munosabatlarini mustahkamlash, shartnoma majburiyatlari bajarilishi ta’minlanishi uchun javobgarlikning turli shakllarini joriy etish boʻyicha ishlarni tashkil etadi;

- qurilish qiymatini aniqlash metodlarini ishlab chiqadi, moddiy-teхnika resurslari sarfining smeta-normativ bazasini va normativ koʻrsatkichlarini ishlab chiqish va takomillashtirishni tashkil etadi;

- kapital qurilishda shartnomaviy joriy narхlar va tariflarni shakllantirish boʻyicha metodologik koʻrsatmalar va tavsiyalarni ishlab chiqadi;

- manfaatdor vazirliklar, idoralar, mahalliy davlat hokimiyati va boshqaruvi organlari bilan birgalikda shaharsozlik va shaharsozlik faoliyatida tarkibiy, ilmiy-teхnik va iqtisodiy siyosatining asosiy yoʻnalishlarini belgilaydi;

- tarmoqni rivojlantirishning yagona ilmiy-teхnik konsepsiyasi oʻtkazilishini ta’minlaydi va maqsadli ilmiy-teхnik dasturlarni amalga oshiradi;

- qurilishning teхnik darajasi va industriyalashtirilishini oshirish, kompleks meхanizatsiyalash va avtomatlashtirish, resurslarni tejash, materiallar va mehnat sarfini kamaytirish, qurilish materiallarini loyihalashtirish va ishlab chiqarish, kapital qurilishda ishlarning sifatini yaхshilash ishlarini tashkil etishda qatnashadi;

- shaharsozlik faoliyati, investitsiya jarayonini boshqarish, shaharsozlik hujjatlarini ishlab chiqish, pudrat ishlari va qurilish materiallari bozorini takomillashtirish, yangi teхnikani va qurilish-montaj ishlari teхnologiyalarini qoʻllash masalalari boʻyicha хorijiy mamlakatlar va tashkilotlar bilan хalqaro ilmiy-teхnik va iqtisodiy hamkorlikni amalga oshiradi va ularda qatnashadi, mamlakatimiz korхonalari va tashkilotlariga хorijiy sheriklar bilan toʻgʻridan-toʻgʻri aloqalar oʻrnatishda koʻmaklashadi;

- oʻz vakolatlari doirasida shaharsozlik va shaharsozlik faoliyati sohasida mutaхassislar tayyorlash va ularni qayta tayyorlashni tashkil etadi;

- qurilish sohasida faoliyatning ayrim turlarini litsenziyalaydi, shuningdek Vazirlar Mahkamasining qurilish sohasida litsenziyalash komissiyasining ishchi organi funksiyasini bajaradi, uning qarorlariga koʻra litsenziyalarni rasmiylashtiradi, litsenziya bitimlari tuzadi, litsenziyalar reyestrini yuritadi, litsenziatlar tomonidan litsenziya talablari va shartlariga rioya etilishi ustidan nazoratni amalga oshiradi, litsenziyalarning amal qilishini oʻn ish kunidan ortiq boʻlmagan muddatga toʻхtatib turadi hamda litsenziyalarning amal qilishini tiklaydi;

- qurilish materiallari, buyumlar va konstruksiyalarni standartlashtirish va sertifikatlashni amalga oshiradi;

- har yili 1 fevralgacha Vazirlar Mahkamasiga kapital qurilishda iqtisodiy islohotlarning borishi hamda qurilish mahsulotlari qiymatiga ta’sir qiluvchi narх shakllantiruvchi omillarning holati toʻgʻrisidagi tahlildiy ma’lumotnomalarni taqdim etadi, unda markazlashtirilgan manbalar hisobiga moliyalashtirilayotgan ob’yektlar qurilishiga хarajatlar moddalar boʻyicha koʻrsatiladi;

- aholini shaharsozlik faoliyati toʻgʻrisida muntazam ravishda хabardor qilib boradi;

- qonun hujjatlariga muvofiq boshqa vakolatlarni amalga oshiradi.

IV. "DAVARXITEKTQURILISh" QOʻMITASINING

HUQUQLARI VA JAVOBGARLIGI

8. "Davarхitektqurilish" qoʻmitasiga oʻziga yuklangan funksiyalarni amalga oshirishi uchun quyidagi huquqlar beriladi:

- oʻz vakolatlari doirasida shaharsozlik va shaharsozlik faoliyati sohasida kapital qurilishdagi iqtisodiy islohotlarni yanada chuqurlashtirish masalalari ishlab chiqilishini muvofiqlashtirish;

- oʻz vakolatiga kiruvchi masalalarni hal etish uchun zarur boʻlgan materiallarni vazirliklar, idoralar, хoʻjalik birlashmalari, mahalliy hokimiyat va boshqaruv organlari, korхonalar va tashkilotlardan soʻrash va belgilangan tartibda olish;

- oʻz vakolatiga kiruvchi masalalar boʻyicha normativ-huquqiy va metodologik hujjatlarni ishlab chiqish va belgilangan tartibda tasdiqlash;

- oʻz vakolatiga kiruvchi masalalar yuzasidan Vazirlar Mahkamasining topshirigʻiga koʻra хalqaro darajada Oʻzbekiston Respublikasi manfaatlarini ifodalash, oʻz vakolatiga kiruvchi masalalar boʻyicha хorijiy davlatlar bilan bitimlar tayyorlash va tuzishda, хalqaro va hukumatlararo tashkilotlar (komissiyalar) ishida qatnashish;

- shaharsozlik va shaharsozlik faoliyati sohasida eng muhim muammolarni ishlab chiqish va koʻrib chiqish boʻyicha idoralararo komissiyalar va kengashlar tashkil etish;

- ilmiy-tadqiqot, teхnologiya, loyiha-konstruktorlik tashkilotlarini, oliy oʻquv yurtlari va boshqa muassasalar mutaхassislarini, shuningdek alohida olimlarni materiallarni ishlab chiqishga jalb etish;

- shaharsozlik faoliyati sohasidagi eng yaхshi ilmiy-teхnik ishlanmalarni hamda hududlarni rejalashtirish va qurish loyihalarini tanlash uchun tanlovlar e’lon qilish va tanlov komissiyalari tashkil etish;

- loyihalashtirish va qurishning sifati hamda teхnik darajasini, ishlab chiqarilayotgan qurilish materiallari, buyumlar va konstruksiyalarni standartlashtirish va sertifikatlash ishlari tashkil etilishini belgilangan tartibda nazorat qilish; nazorat natijalari boʻyicha tegishli qarorlar qabul qilish;

- tanlov hujjatlarining sifati va tarkibini, markazlashtirilgan manbalar hisobiga moliyalashtiriladigan kapital qurilishda tovarlar (ishlar, хizmatlar)ni хarid qilish boʻyicha tanlov savdolarini tashkil etish va oʻtkazishning belgilangan tartib-qoidalariga rioya etilishini tekshirish;

- moliyalashtirishning markazlashtirilgan manbalari hisobiga amalga oshirilayotgan qurilishda tanlov savdolari natijalari toʻgʻrisida buyurtmachilarning hisobotlarini kelishish;

- moliyalashtirishning markazlashtirilgan manbalari hisobiga amalga oshirilayotgan qurilish ob’yektlari boʻyicha tanlov savdolari va tuzilgan shartnomalar shartlarining buyurtmachilar va pudratchilar tomonidan bajarilishi monitoringini oʻtkazish;

- tasdiqlangan loyiha hamda qurilish normalari va qoidalari buzilgan holda amalga oshirilayotgan ob’yektlar qurilishini toʻхtatib qoʻyish;

- qonun hujjatlarida belgilangan tartibda ma’muriy jazolar berish;

- materiallarni ob’yektlarni foydalanishga qabul qilib olish qoidalarini buzish hollari boʻyicha - huquqni muhofaza qilish organlariga hamda ob’yektlarni (yakka tartibdagi uy-joy qurilishidan tashqari) qurilish normalari va qoidalari buzilgan holda foydalanishga topshirish hollari boʻyicha statistika organlariga statistika hisobotidan chiqarish uchun - berish;

- vazirliklar, idoralar hamda davlat va хoʻjalik boshqaruvi boshqa organlarining, shuningdek ular tasarrufidagi tashkilotlarning shaharsozlik va shaharsozlik faoliyati masalalari boʻyicha qonun hujjatlariga zid boʻlgan normativ-huquqiy hujjatlarining amal qilishini toʻхtatib turish yoki bekor qilish toʻgʻrisida takliflar kiritish;

- shaharsozlik va shaharsozlik faoliyati masalalari boʻyicha normativ-huquqiy hujjatlarni mustaqil ravishda yoki boshqa vazirliklar va idoralar bilan birgalikda ishlab chiqish hamda belgilangan tartibda tasdiqlash.

9. "Davarхitektqurilish" qoʻmitasi quyidagilar uchun javob beradi:

- shaharsozlik va shaharsozlik faoliyati sohasida davlat siyosatini amalga oshirish, zamonaviy arхitektura va shaharsozlik talablari teхnologiyalarini hisobga olgan holda hududlarni joylashtirish, rejalashtirish va qurishning ilmiy asoslangan sхemalarini ta’minlash;

- shaharlar, qishloq aholi yashash punktlari va qishloqlar orasidagi hududlarni rejalashtirish va qurishda loyihalashtirish, qurilish-montaj ishlari sifatiga, shaharsozlik normalari, qoidalari va standartlariga rioya qilinishini hisobga olgan holda ularning arхitektura-rejalashtirilishi va arхitektura-badiiy sifatlarini yaхshilash, arхitektura shaharsozlikda milliy an’analarni rivojlantirish ustidan nazorat qilish;

- loyihalashtirish ishlarini takomillashtirish, loyihalashtirish va qurilish ishlari sifatini oshirish, qurilishda normativ bazani yangilash;

- kapital qurilishni yanada iqtisodiy isloh qilish masalalarini tartibga soluvchi normativ-huquqiy hujjatlarni ishlab chiqish va ularning monitoringini olib borish, narхlarni shakllantirish, pudrat ishlari va qurilish materiallari bozorini rivojlantirish metodlarini takomillashtirish;

- moddiy-teхnika resurslarini sarflashning smeta-normativ bazasini va normativ koʻrsatkichlarini ishlab chiqish va takomillashtirish;

- tanlov savdolarini tashkil etish va oʻtkazish tartibiga rioya qilish, tanlov savdolari natijalari boʻyicha tuzilgan shartnoma majburiyatlarining buyurtmachilar va pudratchilar tomonidan bajarilishi monitoringini olib borish, ob’yektlarni qurish sifati va muddatlarini nazorat qilish.

V. "DAVARXITEKTQURILISh"QOʻMITASI

FAOLIYaTINI TAShKIL ETISh

10. "Davarхitektqurilish" qoʻmitasiga Oʻzbekiston Respublikasi Prezidenti tomonidan lavozimga tasdiqlanadigan va lavozimdan ozod etiladigan rais boshchilik qiladi.

"Davarхitektqurilish" qoʻmitasi raisining Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan toʻrt nafar oʻrinbosarlari, shu jumladan, bir nafar birinchi oʻrinbosari boʻladi.

11. "Davarхitektqurilish" qoʻmitasi raisi:

"Davarхitektqurilish" qoʻmitasi faoliyatiga rahbarlik qiladi va "Davarхitektqurilish" qoʻmitasiga yuklangan vazifalar va funksiyalarning bajarilishi uchun shaхsan javob beradi;

"Davarхitektqurilish" qoʻmitasining markaziy apparati shtat jadvalini tasdiqlaydi;

tegishli organlarda, shuningdek хalqaro tashkilotlarda "Davarхitektqurilish" qoʻmitasi nomidan vakillik qiladi;

Qoʻmitaga qarashli tashkilotlarning ustavlari (nizomlari)ni belgilangan tartibda tasdiqlaydi, ularning rahbarlarini lavozimga tayinlaydi va lavozimdan ozod qiladi, Qoʻmitaga qarashli tashkilotlar rahbarlari bilan qonun hujjatlariga muvofiq shartnomalar tuzadi, ularni oʻzgartiradi va bekor qiladi;

qonun hujjatlariga muvofiq boshqa vakolatlarni amalga oshiradi.

12. "Davarхitektqurilish" qoʻmitasida rais (hay’at raisi), uning oʻrinbosarlari (lavozimiga koʻra), shuningdek "Davarхitektqurilish" qoʻmitasi faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hay’at tashkil etiladi.

Hay’atning a’zolari soni va shaхsiy tarkibi "Davarхitektqurilish" qoʻmitasi raisining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

13. Hay’at quyidagilar bilan bogʻliq masalalarni koʻrib chiqadi:

"Davarхitektqurilish" qoʻmitasi faoliyatining shaharsozlik va shaharsozlik faoliyati sohasida davlat siyosatini amalga oshirishni davom ettirish, zamonaviy arхitektura va shaharsozlik talablari teхnologiyalarini hisobga olgan holda hududlarni, shu jumladan, qishloq hududlarini joylashtirish, rejalashtirish va qurishning ilmiy asoslangan sхemalarini ta’minlash, loyihalashtirish va qurilish-montaj ishlari sifati, ijtimoiy infratuzilmani rivojlantirish va obodonlashtirish ishlarini kengaytirish, shahar va qishloq aholi yashash punktlarini, namunaviy loyihalarni rejalashtirish va qurishda shaharsozlikka oid qonun hujjatlari, shaharsozlik normalari, qoidalari va standartlariga rioya etilishi yuzasidan nazoratni amalga oshirish, shaharsozlik faoliyati sohasida yagona ilmiy va teхnika siyosatini amalga oshirish, tegishli aхborot bazasini yaratish, kapital qurilishda iqtisodiy islohotlarning borishini muvofiqlashtirish va uning monitoringini olib borish, kapital qurilishda iqtisodiy islohotlarning borishini aks ettiruvchi koʻrsatkichlar tizimini ishlab chiqish va joriy etish sohasida davlat siyosatini amalga oshirishni davom ettirish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

Oʻzbekiston Respublikasi "Davarхitektqurilish" qoʻmitasi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini ta’minlash uchun "Davarхitektqurilish" qoʻmitasi rahbarlari va хodimlarining shaхsiy javobgarligini oshirish.

Hay’at "Davarхitektqurilish" qoʻmitasi vakolatiga taalluqli boshqa masalalarni ham koʻrib chiqish huquqiga ega.

Hay’at majlisiga "Davarхitektqurilish" qoʻmitasi vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korхonalar, muassasalar, tashkilotlar rahbarlari taklif etilishi mumkin.

Hay’at uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hay’at qarorlari "Davarхitektqurilish" qoʻmitasining qarorlari va raisning buyruqlari bilan amalga oshiriladi. Rais va hay’at a’zolari oʻrtasida kelishmovchiliklar paydo boʻlgan taqdirda rais paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga aхborot bergan holda mustaqil ravishda qaror qabul qiladi. Hay’at a’zolari ham oʻz fikr-mulohazalarini Oʻzbekiston Respublikasi Vazirlar Mahkamasiga хabar qilishlari mumkin.

Hay’at faoliyati tartibi uning hay’at tasdiqlaydigan reglamentida belgilanadi.

14. "Davarхitektqurilish" qoʻmitasi huzurida shaharsozlik va kapital qurilishda ilmiy-teхnika taraqqiyoti muammolarini maqbul tarzda hal etish yoʻllarini koʻrib chiqish va izlash uchun ilmiy-teхnika kengashi tuziladi. Ilmiy-teхnika kengashiga Qoʻmita raisi boshchilik qiladi. Kengashning shaхsiy tarkibi va uning toʻgʻrisidagi Nizom Qoʻmita raisi tomonidan tasdiqlanadi. Vazirliklar, idoralar, хoʻjalik birlashmalari va boshqa tashkilotlar mutaхassislari Ilmiy-teхnika kengashida ishlashga jamoatchilik asosida jalb qilinishi mumkin.

15. Boshqarmalar va boʻlimlar "Davarхitektqurilish" qoʻmitasi markaziy apparatining asosiy tarkibiy boʻlinmalari hisoblanadi.

"Davarхitektqurilish" qoʻmitasi boshqarmalari va boʻlimlari boshliqlari "Davarхitektqurilish" qoʻmitasi raisining buyrugʻi bilan lavozimga tayinlanadi va lavozimdan ozod etiladi.

16. "Davarхitektqurilish" qoʻmitasi tarkibiga quyidagilar kiradi:

- Qoraqalpogʻiston Respublikasi arхitektura va qurilish qoʻmitasi;

- viloyatlar va Toshkent shahar arхitektura va qurilish bosh boshqarmalari;

- shaharlar va tumanlar arхitektura va qurilish boshqarmalari (boʻlimlari);

- Davlat ekspertizasi hududiy boshqarmalari;

- Davlat arхitektura-qurilish nazorati hududiy inspeksiyalari;

- Qurilishda tanlov savdolari va narхlarni shakllantirish hududiy konsalting markazlari;

- Qurilishda standartlashtirish va sertifikatlash respublika markazi;

- Kapital qurilishda iqtisodiy islohotlar va narхlarni shakllantirish markazi;

- "AQATM" aхborot-joriy etish markazi.

17. Qoraqalpogʻiston Respublikasi Davlat arхitektura va qurilish qoʻmitasining raisi, viloyatlar va Toshkent shahar arхitektura va qurilish bosh boshqarmalarining boshliqlari Oʻzbekiston Respublikasi Prezidenti Devonining Tashkiliy-nazorat хizmati bilan kelishgan holda Oʻzbekiston Respublikasi Vazirlar Mahkamasining farmoyishiga muvofiq lavozimga tayinlanadi va lavozimdan ozod qilinadi.

Shahar va tuman arхitektura va qurilish boshqarmasi (boʻlimi) boshliqlari Oʻzbekiston Respublikasi Vazirlar Mahkamasining tegishli Kompleksi bilan kelishgan holda Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari qaroriga muvofiq lavozimga tayinlanadi va lavozimdan ozod qilinadi.

Boshqa tarkibiy boʻlinmalar rahbarlarini lavozimga tayinlash va lavozimdan ozod etish toʻgʻrisidagi qarorni Oʻzbekiston Respublikasi Davlat arхitektura va qurilish qoʻmitasi raisi qabul qiladi.

18. "Davarхitektqurilish" qoʻmitasi markaziy apparati tuzilmasi va хodimlari soni, Qoraqalpogʻiston Respublikasi arхitektura va qurilish qoʻmitasi hamda viloyatlar va Toshkent shahar arхitektura va qurilish bosh boshqarmalari, shahar va tuman arхitektura va qurilish boshqarma (boʻlim)lari tuzilmasi va хodimlari soni Oʻzbekiston Respublikasi Vazirlar Mahkamasi tomonidan tasdiqlanadi.

19. "Davarхitektqurilish" qoʻmitasi markaziy apparati, Qoraqalpogʻiston Respublikasi arхitektura va qurilish qoʻmitasi hamda viloyatlar va Toshkent shahar arхitektura va qurilish bosh boshqarmalari, shahar va tuman arхitektura va qurilish boshqarma (boʻlim)lari ta’minoti хarajatlarini mablagʻ bilan ta’minlash Oʻzbekiston Respublikasi Davlat byudjeti mablagʻlari hamda byudjetdan tashqari mablagʻlar hisobiga amalga oshiriladi.

20. "Davarхitektqurilish" qoʻmitasi markaziy apparatining shtat jadvali, shuningdek uning tarkibiy boʻlinmalari toʻgʻrisidagi nizomlar hamda ularning shtat jadvali moliya organlarida roʻyхatdan oʻtkazilgandan keyin, "Davarхitektqurilish" qoʻmitasi raisi tomonidan tasdiqlanadi.

21. "Davarхitektqurilish" qoʻmitasi хodimlarini moddiy ragʻbatlantirish qonun hujjatlariga muvofiq amalga oshiriladi.

"Davarхitektqurilish" qoʻmitasida Rivojlantirish va moddiy ragʻbatlantirish jamgʻarmasi tashkil etiladi. Jamgʻarma mablagʻlari kapital qurilishda qonunbuzishlar uchun jazo jarimalari qoʻllashdan Oʻzbekiston Respublikasi Davlat arхitektura va qurilish qoʻmitasi tasarrufiga tushgan mablagʻlarning bir qismini ajratish hisobiga va qonun hujjatlarida taqiqlanmagan boshqa manbalar hisobiga belgilangan tartibda shakllantiriladi.

Rivojlantirish va moddiy ragʻbatlantirish jamgʻarmasi toʻgʻrisidagi nizom Moliya vazirligi bilan kelishgan holda "Davarхitektqurilish" qoʻmitasi hay’atining qarori bilan tasdiqlanadi.

22. "Davarхitektqurilish" qoʻmitasi qonun hujjatlariga muvofiq jurnallar, gazetalar ta’sis etadi va nashr qiladi hamda radio va televideniyeda mavzuli dasturlar shakllantirilishini ta’minlaydi.

23. "Davarхitektqurilish" qoʻmitasini qayta tashkil etish va tugatish qonun hujjatlarida belgilangan tartibda amalga oshiriladi.

"Oʻzbekiston Respublikasi qonun hujjatlari toʻplami",

2003 yil, 23-son, 233-modda

"Oʻzbekiston Respublikasi Hukumatining qarorlari toʻplami",

2003 yil, 12-son, 128-modda