Oʻzbekiston Respublikasi Vazirlar Mahkamasining 22.11.1995 y. 441-son "Bolalarning maktabgacha tarbiya muassasalarida boʻlishlari uchun ota-onalardan olinadigan haq miqdorlari toʻgʻrisida"gi Qarori
VAZIRLAR MAHKAMASINING
BOLALARNING MAKTABGAChA TARBIYa
MUASSASALARIDA BOʻLIShLARI UChUN
OTA-ONALARDAN OLINADIGAN HAQ
MIQDORLARI TOʻGʻRISIDA
Vazirlar Mahkamasi QAROR QILADI:
1. 1996 yil 1 yanvardan boshlab bolaning respublika davlat byudjetidan mablagʻ bilan ta’minlanadigan bolalar yaslisi, bolalar bogʻchasi yoki yasli-bogʻchada boʻlganligi uchun bir oyga toʻlanadigan haq miqdori ish tartibiga qarab Oʻzbekiston Respublikasida belgilangan eng kam ish haqining oʻrta hisobda 50 foizi miqdorida belgilansin.
2. Oʻz tasarrufida bolalar maktabgacha tarbiya muassasalari boʻlgan korхonalar, tashkilotlar, muassasalarga ota-onalarning haq toʻlashini respublika davlat byudjetidan mablagʻ bilan ta’minlanadigan bolalar maktabgacha tarbiya muassasalarida qabul qilingan tartibda belgilash tavsiya etilsin.
Bunda korхonalar, tashkilotlar va muassasalar oʻz mablagʻlari hisobidan oʻzlariga qarashli bolalar maktabgacha tarbiya muassasalarida bolalarning boʻlishi uchun ota-onalardan haq undirish boʻyicha qoʻshimcha imtiyozlar belgilashlari mumkin.
3. Oʻzbekiston Respublikasi Xalq ta’limi vazirligi Moliya vazirligi va Mehnat vazirligi bilan kelishgan holda bolalarning bolalar yaslilarida, bolalar bogʻchalarida va yasli-bogʻchalarda boʻlishlari uchun haq undirish tartibi toʻgʻrisidagi Yoʻriqnomaga oʻzgartirishlar kiritsin.
4. Oʻzbekiston Respublikasi Vazirlar Mahkamasining "Bolalarning maktabgacha tarbiya muassasalarida boʻlishlari uchun ota-onalardan olinadigan haq miqdorlari toʻgʻrisida" 1994 yil 20 iyuldagi 374-son qarori 1996 yil 1 yanvardan boshlab oʻz kuchini yoʻqotgan deb hisoblansin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S.S.Saidqosimov zimmasiga yuklansin.
Oʻzbekiston Respublikasi Bosh vaziri A. Mutalov
Oʻzbekiston Respublikasi Hukumatining qarorlari toʻplami, 1995 y., 11-son, 45-modda