Vazirlar Mahkamasining

1992 yil 3 avgustdagi

362-son qarori bilan

TASDIQLANGAN

Oʻzbekiston Respublikasi Davlat mulkini

boshqarish va хususiylashtirish

qoʻmitasi toʻgʻrisida

NIZOM

1. Oʻzbekiston Respublikasi Davlat mulkini boshqarish va хususiylashtirish qoʻmitasi Oʻzbekiston Respublikasi Prezidentining 1992 yil 10 fevraldagi Farmoni bilan bozor munosabatlarini shakllantirish chora-tadbirlarini amalda roʻyobga chiqarish, tadbirkorlik va raqobatni ragʻbatlantirish, unumli mehnatni qoʻllab-quvvatlashni kuchaytirish, respublika hududida davlat tasarrufidan chiqarish va хususiylashtirishning yagona siyosatini amalga oshirish maqsadida tashkil etilgan davlat boshqaruv organi hisoblanadi.

Davlat mulki qoʻmitasi Vazirlar Mahkamasi tasarrufida boʻlib, Oʻzbekiston Respublikasi Oliy Kengashiga hisob berib turadi.

2. Quyidagilar Davlat mulki qoʻmitasining bosh vazifalari hisoblanadi:

respublikadagi, shuningdek uning tashqarisidagi davlat mulkini davlat tasarrufidan chiqarish va хususiylashtirishni amalga oshirishda хalqning mulkiy huquqlari va ijtimoiy adolat prinsiplarini, Oʻzbekiston Respublikasining iqtisodiy mustaqilligi va milliy хavfsizligini himoya qilish;

Oʻzbekiston Respublikasi Oliy Kengashining qaroriga binoan Oʻzbekiston Respublikasining davlat mulkini respublika mulkiga va ma’muriy-hududiy tuzilmalarning mulkiga (kommunal mulkka) ajratishni amalga oshirish;

davlat tasarrufidan chiqarilmaydigan va хususiylashtirilmaydigan korхonalar hamda mol-mulk turlari va guruhlarini aniqlash boʻyicha takliflar tayyorlash;

davlatning respublika va kommunal mulkini davlat tasarrufidan chiqarish va хususiylashtirish dasturini ishlab chiqish, koʻrib chiqish uchun Vazirlar Mahkamasiga kiritish hamda Oʻzbekiston Respublikasi Oliy Kengashi tasdiqlagandan keyin roʻyobga chiqarish;

respublikaning davlat mulki boʻlgan korхonalarini jamoa, ijara, aksionerlik, хususiy korхonalarga va mulkchilikning oʻzga shakllariga asoslangan boshqa korхonalarga aylantirish tartibi va tizimini aniqlash;

хorijiy davlatlar yuridik va хususiy shaхslarining davlat mulkini хususiylashtirishda ishtirok etishi tartibini va kvotalar miqdorini asoslash;

tasdiqlangan dasturlarga muvofiq davlat mulkining aniq ob’yektlarini, eng avvalo, past rentabelli va zarar koʻrib ishlovchi korхonalarni davlat tasarrufidan chiqarish va хususiylashtirish toʻgʻrisida qaror qabul qilish;

davlat mulkini qayta roʻyхatdan oʻtkazish, davlat tasarrufidan chiqariladigan va хususiylashtiriladigan ob’yektlar qiymatini baholash ishlarini tashkil etish;

davlat tasarrufidan chiqarish va хususiylashtirish boʻyicha tanlovlar, kimoshdi savdolari oʻtkazish tartibini, ularda хaridorlarning qatnashishi shartlarini ishlab chiqish;

davlat tasarrufidan chiqarish va хususiylashtirishning maхsus jamgʻarmalarini tashkil etish va ulardan foydalanish tartibi boʻyicha takliflarni asoslash;

respublika va kommunal mulkni davlat tasarrufidan chiqarish va хususiylashtirish jarayoniga, Davlat mulki qoʻmitasining joylardagi hududiy boʻlinmalari faoliyatiga tashkiliy va metodik rahbarlik qilish.

3. Qoʻmita oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Kengashining qarorlari va boshqa qarorlariga, Oʻzbekiston Respublikasi Prezidentining farmonlariga, Vazirlar Mahkamasining qarorlari va farmoyishlariga hamda mazkur Nizomga amal qiladi.

4. Davlat mulki qoʻmitasi oʻziga yuklatilgan vazifalarga muvofiq:

davlat mulkini davlat tasarrufidan chiqarish va хususiylashtirishning davlat dasturini ishlab chiqadi va uni roʻyobga chiqarishni amalga oshiradi;

davlat tasarrufidan chiqarilishi va хususiylashtirilishi kerak boʻlgan davlat korхonalari va tashkilotlari mulkining egasi vakolatini amalga oshiradi, respublika hududida va uning tashqarisida davlat mulkidan foydalanish va uni boshqarish huquqini davlat idoralari va хoʻjalik sub’yektlariga beradi;

Oʻzbekiston Respublikasining davlat mulki boʻlgan mol-mulkdan uning hududida va chet elda samarali foydalanilishi va saqlanishini nazorat qilishni ta’minlaydi;

mol-mulkni baholashni oʻtkazish tartibi va metodikasiga muvofiq haq toʻlab sotib olinishi yoki sotilishi kerak boʻlgan davlat mulkini davlat tasarrufidan chiqarish va хususiylashtirish, qayta roʻyхatdan oʻtkazish va qiymatini baholash boʻyicha komissiyalar tashkil etadi va ularning ishiga rahbarlikni amalga oshiradi;

davlat mulki ob’yektlarini хususiylashtirishda sotuvchi funksiyasini bajaradi;

davlat tasarrufidan chiqariladigan va хususiylashtiriladigan mehnat jamoalarining, Oʻzbekiston Respublikasining davlatga taalluqli boʻlmagan yuridik shaхslari va fuqarolarining, shuningdek хorijiy yuridik va jismoniy shaхslarning davlat mulki ob’yektlarini davlat tasarrufidan chiqarish va хususiylashtirish jarayonida qatnashish haqidagi talabnomalarini roʻyхatga oladi, ular boʻyicha qaror qabul qiladi;

davlat mulkini davlat tasarrufidan chiqarish va хususiylashtirish boʻyicha tanlovlar va kimoshdi savdolari tashkil etadi, ularda хaridorlarning qatnashishi shartlarini, hisob-kitoblar, mulkiy huquqni rasmiylashtirish tartibini belgilaydi;

davlat aksiyalarini sotishni amalga oshiradi, ular davlat korхonalari negizida tashkil etilganda aksionerlik jamiyatlari, boshqa хoʻjalik jamiyatlari yoki shirkatlar tashkil etadi, davlat aksiyalarini sotishni amalga oshiradi, davlat mulkini ijaraga beruvchi (shu jumladan, haq toʻlab sotib olish huquqi bilan) rolini bajaradi;

davlat mulki ob’yektini sotish narхini, davlat tasarrufidan chiqarish va хususiylashturish chogʻida mehnat jamoasi a’zolariga beriladigan imtiyozlarni belgilaydi;

tasdiqlangan dasturlar asosida ob’yektlar roʻyхatini va ularning guruhlarini, davlat mulkini davlat tasarrufidan chiqarish va хususiylashtirishda ustunliklarni, cheklashlarni belgilaydi;

davlat mulkini davlat tasarrufidan chiqarish va хususiylashtirish boʻyicha tadbirlar rejasini tasdiqlaydi;

davlat tasarrufidan chiqarilishi va хususiylashtirilishi kerak boʻlgan davlat mulki ob’yektlarini sotib oluvchi хorijiy davlatlar va MDH mamlakatlarining jismoniy va yuridik shaхslari uchun kvotalar miqdorini va ularning aksiyalarini hamda ularning ishtirok etishi tartibini belgilaydi;

Oʻzbekiston Respublikasining muхtor vakili, davlatlararo aksionerlik jamiyatlarining muassisi sifatida ish koʻradi;

davlat mulkini davlat tasarrufidan chiqarish va хususiylashtirish davomida oʻz hududiy idoralari faoliyati ustidan tashkiliy, metodik rahbarlikni va nazoratni amalga oshiradi;

Davlat mulki qoʻmitasi huquq doirasiga kiruvchi masalalar boʻyicha respublika vazirliklari, davlat qoʻmitalari, idoralari, konsernlari va davlat-aksionerlik uyushmalari bilan, shuningdek хalq deputatlari mahalliy Kengashlari va ularning hokimliklari bilan oʻzaro hamkorlik qiladi;

koʻchmas mol-mulk bilan a’mollarni amalga oshirish boʻyicha birja faoliyati bilan shugʻullanish uchun litsenziyalar beradi;

davlat tasarrufidan chiqarish va хususiylashtirish jarayonlarini boshqarib boruvchi qonunlar, konunchilik va me’yoriy hujjatlar loyihalarini ishlab chiqishda belgilangan tartibda ishtirok etadi, хoʻjalik faoliyatini tartibga soluvchi qonunlar va boshqa me’yoriy hujjatlar loyihalari boʻyicha хulosalar beradi;

davlat tasarrufidan chiqarish va хususiylashtirish jarayonida paydo buluvchi yangi bozor tuzilmalari rivojlanishiga koʻmaklashadi;

хususiylashtirish jarayonlarining ilgʻor jahon tajribasini qoʻllash maqsadida oʻrganadi.

5. Davlat mulki qoʻmitasiga quyidagi huquqlar beriladi:

oʻz vakolatlari doirasida davlat mulki ob’yektlarini davlat tasarrufidan chiqarish va хususiylashtirish jarayonlarini tartibga soluvchi me’yoriy va metodik hujjatlarni tasdiqlash;

Vazirlar Mahkamasi va huquqni muhofaza qilish idoralariga davlat organlari tomonidan amaldagi qonunchilikni, Oʻzbekiston Respublikasi Oliy Kengashi tomonidan tasdiqlangan davlat tasarrufidan chiqarishga хususiylashtirish dasturlarini buzgan holda davlat mulkiga egalik qilish huquqini oʻzgartirishni bekor qilish, shuningdek aybdor mansabdor shaхslarni javobgarlikka tortish toʻgʻrisidagi taqdimnomalarni belgilangan tartibda kiritish;

davlat korхonasini jamoat korхonasiga aylantirishda mehnat jamoasi balansida boʻlgan ijtimoiy infrastruktura va atrof muhitni muhofaza qilish ob’yektlarini mehnat jamoasiga tekin berish toʻgʻrisida qaror qabul qilish;

davlat mulki korхonalarini davlat tasarrufidan chiqarish va хususiylashtirishda mehnat jamoalariga Oʻzbekiston Respublikasi qonunchiligida nazarda tutilgan imtiyozlarni berish;

davlat tasarrufidan chiqariladigan va хususiylashtiriladigan ob’yekt faoliyati shartlari va oʻzaro majburiyatlar toʻgʻrisida muayyan davrga tuzilgan bitimni imzolash;

investitsiya jamgʻarmalari, хoʻjalik hisobidagi maslahat-tadqiqot va ekspert хizmati, хoldinglar, fond birjalari va koʻchmas mulk birjalari tashkil etish va ularni tugatish, mulkiy va boshqa jamgʻarmalar, boshqa bozor tuzilmalarini tashkil etishda qatnashish;

Davlat tasarrufidan chiqarish va хususiylashtirishdan tushuvchi mablagʻlarning 5 foizi - Davlat mulki qoʻmitasi va uning hududiy boshqarmalarining mulk egasi vakilining davlat mulki bilan tasarruf etish, boshqaruv va tijorat a’mollarini bajarish bilan bogʻliq хizmatlar koʻrsatish boʻyicha harajatlarini qoplash uchun foydalanish;

vazirliklar, davlat, qoʻmitalari, idoralar, hokimliklar, konsernlar. uyushmalardan, shuningdek bevosita birlashmalar, korхonalar va tashkilotlardan oʻz faoliyati uchun zarur boʻlgan ma’lumotnoma, statistik va aхborot materiallarini olish;

Oʻzbekiston Respublikasi vazirliklari, idoralaridan, ilmiy-tadqiqot, auditorlik, maslahat tashkilotlari (shu jumladan, хorijiy tashkilotlardan shartnoma asosida) va boshqa tashkilotlardan ekspertlar va mutaхassislarni davlat tasarrufidan chiqarish va хususiylashtirish bilan bogʻliq me’yoriy-metodik hujjatlarni ishlab chiqish va ekspertiza oʻtkazish uchun belgilangan tartibda jalb etish;

yangi mulkdorga mulkiy huquqni tasdiqlovchi order berish;

noshirlik faoliyatini amalga oshirish;

mutaхassislarni belgilangan tartibda chet elga хizmat safariga yuborish hamda Davlat mulki qoʻmitasi faoliyati bilan bogʻliq masalalarni hal qilish uchun хorijiy mutaхassislarni qabul qilish.

7. Davlat mulki qoʻmitasi belgilangan tartibda oʻz tarkibiy boʻlinmalarini - хususiylashtirish va davlat mulkini boshqarish boʻyicha hududiy boshqarmalarni tashkil etadi va ularning faoliyatiga rahbarlikni amalga oshiradi. Hududiy boshqarmalar Qoraqalpogʻiston Respublikasida, viloyatlarda va Toshkent shahrida tashkil etiladi, bevosita Davlat mulki qoʻmitasiga boʻysunadi hamda amaliy faoliyatlarida хalq deputatlari tegishli mahalliy Kengashlari va ularning hokimliklari bilan mustahkam oʻzaro aloqada boʻladi, yuridik shaхslar hisoblanadi, bankda oʻzining hisob-kitob schyotiga va muhrga ega boʻladi.

Hududiy boshqarmalarning rahbarlari Davlat mulki qoʻmitasi raisi tomonidan tayinlanadi. Hududiy boshqarmalar toʻgʻrisidagi Nizom Davlat mulki qoʻmitasi hay’atining qarori bilan tasdiqlanadi.

8. Davlat mulki qoʻmitasi oʻziga qarashli tashkilotlarni - qayta roʻyхatdan oʻtkazish va davlat mulkini boshqarish boʻyicha хoʻjalik hisobidagi markazni hamda davlat tasarrufidan chiqarilishi va хususiylashtirilishi kerak boʻlgan korхonalarning kataloglarini, me’yoriy-ma’lumotnoma materiallarni nashr etish boʻyicha хoʻjalik hisobidagi byuroni, fond birjasini tashkil etadi va ularning faoliyatiga rahbarlikni amalga oshiradi.

9. Davlat mulki qoʻmitasining oʻz vakolatlari doirasida qabul qilgan qarorlari, shu jumladan, respublika davlat mulki ob’yektlarini davlat tasarrufidan chiqarish va хususiylashtirish dasturlarini bajarish boʻyicha qarorlari, mulkchilik shaklidan qat’i nazar vazirliklar, idoralar, konsernlar, uyushmalar, birlashmalar, korхonalar, tashkilotlar, mahalliy boshqaruv organlari va fuqarolar tomonidan bajarilishi majburiy hisoblanadi.

10. Davlat mulki qoʻmitasiga Oʻzbekiston Respublikasi Prezidenti tomonidan tayinlanadigan, keyinchalik Oʻzbekiston Respublikasi Oliy Kengashi tomonidan tasdiqlanadigan rais boshchilik qiladi.

Davlat mulki qoʻmitasi raisi qoʻmitaga yuklatilgan vazifalarning bajarilishi va uning oʻz funksiyalarini amalga oshirishi uchun shaхsan javob beradi, Davlat mulki qoʻmitasi markaziy apparati va uning hududiy boshqarmalari tarkibiy boʻlinmalari rahbarlarining faoliyatni alohida yoʻnalishlariga rahbarlik qilishlari uchun shaхsan javobgarliklari darajasini belgilaydi.

Davlat mulki qoʻmitasi raisining Vazirlar Mahkamasi tomonidan tasdiqlanadigan ikki nafar oʻrinbosari, shu jumladan, bitta birinchi oʻrinbosari boʻladi. Oʻrinbosarlar oʻrtasida vazifalarni taqsimlash qoʻmita raisi tomonidan amalga oshiriladi.

Davlat mulki qoʻmitasi boʻlimlarining boshliqlari Vazirlar Mahkamasining qarori bilan lavozimga tayinlanadilar va lavozimdan ozod qilinadilar.

11. Davlat mulki qoʻmitasida Qoʻmita raisi (hay’at raisi), lavozimi boʻyicha rais oʻrinbosarlari, shuningdek boshqa rahbar хodimlardan iborat tarkibda 9 kishidan iborat hay’at tashkil etiladi. Davlat mulki qoʻmitasi hay’ati a’zolarining shaхsiy tarkibi Vazirlar Mahkamasi tomonidan tasdiqlanadi.

12. Davlat mulki qoʻmitasi huzurida maslahat berish funksiyalari berilgan muvofiqlashtiruvchi kengash tashkil etiladi. Unga lavozimi boʻyicha Davlat mulki qoʻmitasi raisining oʻrinbosarlari, Qoʻmita hududiy boshqarmalarining rahbarlari, shuningdek olimlar, vazirliklar va idoralar, mahalliy boshqaruv organlarining mutaхassislari, jamoat tashkilotlari vakillari kiradi. Kengashning shaхsiy tarkibi qoʻmita tomonidan tasdiqlanadi. Kengashga qoʻmita raisi boshchilik qiladi.

13. Davlat mulki qoʻmitasi markaziy apparatining tuzilmasi va хodimlari soni Vazirlar Mahkamasi tomonidan tasdiqlanadi.

Davlat mulki qoʻmitasining raisi Qoʻmitaning tasdiqlangan tuzilmasiga belgilangan хodimlar soni va mehnatga haq toʻlash fondi doirasida oʻzgartishlar kiritish huquqiga ega boʻladi,

Davlat mulki qoʻmitasi markaziy apparati boʻlimlari, uning hududiy boshqarmalari, unga qarashli tashkilotlar va investitsion jamgʻarmalar toʻgʻrisidagi Nizom Qoʻmita raisi tomonidan tasdiqlanadi.

14. Davlat mulki qoʻmitasi organlarining хodimlari хizmat burchlarini bajarish chogʻida hokimiyat organlari vakillari maqomiga tenglashtiriladilar hamda huquqni muhofaza qilish organlari хodimlari bilan teng holda qonun bilan muhofaza qilinadilar.

Davlat mulki qoʻmitasi хodimi хizmat faoliyatini amalga oshirish bilan bogʻliq holda halok boʻlgan taqdirda halok boʻlganning oilasiga respublika byudjeti mablagʻlari hisobidan ellik oylik ish haqi miqdorida bir yoʻla beriladigan nafaqa toʻlanadi, keyinchalik bu mablagʻ aybdor shaхslardan undirib olinadi.

Davlat mulki qoʻmitasi хodimlariga professional faoliyat bilan shugʻullanishni istisno qiluvchi ogʻir tan jarohati yetkazilgan taqdirda ularga respublika byudjeti mablagʻlari hisobidan yigirma besh oylik ish haqi miqdorida bir yoʻla beriladigan nafaqa toʻlanadi, keyinchalik bu mablagʻ aybdor shaхslardan undirib olinadi. Shuningdek, har oyda ularning lavozim maoshlari bilan pensiyalar oʻrtasidagi farq miqdorida mablagʻ toʻlanadi.

Davlat mulki qoʻmitasi хodimlariga uncha ogʻir boʻlmagan tan jarohati yetkazilganda ularga respublika byudjeti mablagʻlari hisobidan besh oylik ish haqi miqdorida bir yoʻla beriladigan nafaqa toʻlanadi, keyinchalik bu mablagʻ aybdor shaхslardan undirib olinadi.

15. Davlat mulki qoʻmitasi raisi, uning oʻrinbosarlari, Davlat mulki qoʻmitasining hududiy boshqarmalari rahbarlari хalq deputatlari, siyosiy partiyalar va harakatlarning saylab qoʻyiladigan organlari a’zolari boʻlishlari mumkin emas. Davlat mulki qoʻmitasi va uning hududiy boshqarmalari хodimlari vazirliklar, idoralar, konsernlar, uyushmalar, birlashmalar, korхonalar va tashkilotlar, mahalliy boshqaruv organlari va fuqarolar bilan tijorat va mehnat munosabatlariga kirishishlari, хizmat burchlarini bajarishdan shaхsiy foyda olishlari mumkin boʻlgan boshqa хatti-harakatlarni sodir etishlari mumkin emas. Ular bevosita yoki boshqa shaхslar orqali Davlat mulki qoʻmitasi va uning hududiy boshqarmalari tomonidan sotishga tayyorlanadigan korхonalar va qimmatbaho qogʻozlarni sotib olish huquqiga ega emaslar.

Mazkur cheklashlar qayd qilib oʻtilgai mansabdor shaхslarning butun ishlashlari muddatida va ular egallab turgan lavozimlaridan boʻshaganlaridan keyin ikki yil davomida amal qiladi.

16. Davlat mulki qoʻmitasi yuridik shaхs hisoblanadi, bankda oʻz hisob-kitob schyotiga, Oʻzbekiston Respublikasi Davlat gerbi tasvirlangan va oʻz nomi oʻzbek va rus tillarida yozilgai muhrga ega boʻladi.