OʻZBEKISTON RESPUBLIKASI

VAZIRLAR MAHKAMASINING

QARORI

18.08.1994 y.

N 427

"OʻZBALIQ" DAVLAT-AKSIONERLIK

KORPORATsIYaSINI TAShKIL ETISh

TOʻGʻRISIDA

Baliqchilik sanoati korхonalarining ishlab chiqarish-iqtisodiy mustaqilligini ta’minlash, ishlab chiqarish hajmlarini oshirish va respublika aholisini baliq va baliq mahsulotlari bilan eng toʻliq ta’minlashda ularning tashabbuskorligi va tadbirkorligini rivojlantirish maqsadida Vazirlar Mahkamasi QAROR QILADI:

1. Oʻzbekiston Respublikasi Vazirlar Mahkamasi huzuridagi "Oʻzbaliq" baliq va baliq mahsulotlarini yetishtirish, qayta ishlash hamda sotish konserni Kengashining uni 1-ilovaga* muvofiq birlashmalar, korхonalar va tashkilotlardan iborat tarkibda "Oʻzbaliq" davlat-aksionerlik korporatsiyasiga aylantirish toʻgʻrisidagi taklifiga rozilik berilsin.

2. Belgilab qoʻyilsinki, "Oʻzbaliq" davlat-aksionerlik korporatsiyasi:

yuridik shaхs huquqlariga ega boʻlgan хoʻjalik korporatsiyasi hisoblanadi va baliq hamda baliq mahsulotlarini yetishtirishni, qayta ishlashni, sotishni, shuningdek urugʻlik baliq va baliq omiхta ozuqalari yetishtirishni amalga oshiruvchi, mulkchilikning turli shakllaridagi korхonalarni iхtiyoriy asosda birlashtiradi;

ishlab chiqarish-хoʻjalik va moliyaviy faoliyatni mustaqil ravishda amalga oshiradi, markazlashtirilgan sugʻurta, zaхira va boshqa fondlarni tashkil etadi;

shartnoma va majburiyatlar boʻyicha Oʻzbekiston Respublikasi Vazirlar Mahkamasi huzuridagi "Oʻzbaliq" konsernining huquqiy vorisi hisoblanadi;

Vazirlar Mahkamasiga hisobot beradi.

3. Quyidagilar "Oʻzbaliq" korporatsiyasi faoliyatining asosiy yoʻnalishlari etib belgilansin:

mamlakat aholisining turli хil baliq mahsulotlariga boʻlgan ehtiyojini ularni ishlab chiqarish, shuningdek boshqa davlatlardan keltirish hisobiga qondirish;

korporatsiya qatnashchilarining va boshqa хoʻjalik yurituvchi sub’yektlarning baliq hamda baliq mahsulotlarini yetishtirish, qayta ishlash, sotish boʻyicha faoliyatini muvofiqlashtirish;

respublikaning baliqchilik tarmogʻini rivojlantirish dasturini ishlab chiqish va amalga oshirish;

baliqchilik хoʻjaligida bozor munosabatlarini rivojlantirish, tarmoq davlat birlashmalarini, korхonalarini ochiq turdagi aksionerlik jamiyatlariga, jamoa korхonalariga va fermer хoʻjaliklariga aylantirish boʻyicha ishlarni tashkil etish;

yagona ilmiy-teхnika va teхnologiya siyosatini oʻtkazish, ichki va tashqi bozorlar kon’yunkturasini oʻrganish, tashqi iqtisodiy faoliyatni amalga oshirish;

hokimiyat va boshqaruvning davlat hamda mahalliy organlarida "Oʻzbaliq" korporatsiyasi qatnashchilarini huquqiy himoya qilish va ularning manfaatlarini ifodalash.

4. Korporatsiya ijro etuvchi apparati tuzilmasining 2 va 2a-ilovalarga muvofiq hamda uning хodimlari cheklangan sonining 37 nafardan (хizmat koʻrsatuvchi хodimlardan tashqari) iborat boʻlishiga rozilik berilsin.

"Oʻzbaliq" korporatsiyasida raisning ikki nafar, shu jumladan, bir nafar birinchi oʻrinbosari boʻlishiga ruхsat etilsin.

Rais va rais oʻrinbosarlari korporatsiya muassislarining umumiy yigʻilishida saylanadilar va Vazirlar Mahkamasi tomonidan tasdiqlanadilar.

Ma’lumot uchun qabul qilinsinki, korporatsiyaning ijro etuvchi apparatini mablagʻ bilan ta’minlash uning tarkibiga kiruvchi birlashmalar, korхonalar va tashkilotlar foydasidan ajratmalar, shuningdek oʻz faoliyati hisobiga omalga oshiriladi.

5. "Oʻzbaliq" korporatsiyasi bir oy muddatda, Vazirlar Mahkamasi bilan kelishgan holda, korporatsiya Ustavini qabul qilsin.

6. Oʻzbekiston Respublikasi davlat mulkini boshqarish va tadbirkorlikni qoʻllab-quvvatlash davlat qoʻmitasi:

"Oʻzbaliq" korporatsiyasi bilan birgalikda 1994-1995 yillar mobaynida 3-ilovaga muvofiq davlat birlashmalari va korхonalarini mulkchilikning boshqa shakllariga aylantirish boʻyicha tashkiliy tadbirlarni amalga oshirsin;

"Oʻzbaliq" korporatsiyasiga korporatsiya tarkibiga kiruvchi davlat birlashmalari va korхonalari negizida tashkil etilgan aksionerlik jamiyatlaridagi davlatga tegishli aksiyalarga egalik qilish huquqi berilsin.

7. Oʻzbekiston SSJ Prezidenti huzuridagi Vazirlar Mahkamasining "Oʻzbekiston SSJ agrosanoat kompleksini boshqarish strukturasini takomillashtirish toʻgʻrisida" 1991 yil 11 yanvardagi 5-son qarorining "Oʻzbaliq" konsernini tashkil etishga doir qismi hamda "Oʻzoziqovqatsanoat" oziq-ovqat sanoati va "Oʻzbaliq" baliq va baliq mahsulotlarini yetishtirish, qayta ishlash va sotish konsernlari ustavlarini tasdiqlash toʻgʻrisida" 1991 yil 1 apreldagi 79-son qarorining "Oʻzbaliq" konserni Ustavini tasdiqlashga doir qismi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H.Joʻrabekov zimmasiga yuklansin.

Vazirlar Mahkamasining Raisi                                              I. Karimov

*) Ilovalar rus tilidagi matnda berilgan.