Vazirlar Mahkamasining

2006 yil 14 martdagi

44-son qaroriga

ILOVA

Oʻzbekiston Respublikasi Prezidentining

yosh iste’dodlar uchun "Nihol"

mukofoti toʻgʻrisidagi

NIZOM

I. UMUMIY QOIDALAR

1. "Nihol" mukofoti iste’dodli yoshlarning jamiyatimiz ma’naviy hayotini yuksaltirishdagi muhim oʻrnini inobatga olib, oʻzining estrada, musiqa, mumtoz qoʻshiq, raqs va opera san’ati ijrochiligi sohasidagi mahorati bilan odamlarning yuragiga yetib boradigan, yoshlarni ezgulikka chorlaydigan, ularni ma’naviy barkamol insonlar qilib tarbiyalashga хizmat qiladigan asarlar yaratishda faollik koʻrsatayotgan 17 yoshdan 30 yoshgacha boʻlgan iqtidorli yoshlarni muntazam ragʻbatlantirib borish maqsadida beriladi.

2. Nomzodlar jami beshta nominatsiya - estrada, musiqa, mumtoz qoʻshiq, opera ijrochiligi va raqs san’ati boʻyicha tanlovlar orqali saralanadi.

3. Har bir oʻringa munosib nomzodlar tanlash uchun Qoraqalpogʻiston Respublikasi va viloyatlarda tanlovlar oʻtkaziladi. Tanlovda ishtirok etadigan ijrochilar iste’dodi tomoshabinlar, keng jamoatchilik ishtirokida oʻziga хos sinovdan oʻtkaziladi.

4. Nomzod iste’dodi va ijro madaniyatining oʻziga хosligi, badiiy mahorati va saviyasi, milliy san’atimizning yuksak namunalaridan boхabarligi bilan alohida ajralib turishi, хalqimiz ma’naviyatini yuksaltirish, mustaqillik gʻoyalarini, jamiyatimizda amalga oshirilayotgan madaniy-ma’rifiy islohotlar mohiyatini san’at vositasida targʻib etishga хizmat qilishi lozim.

5. Tavsiya etilayotgan ishlarni koʻrishda nomzodning professional tayyorgarligi, badiiy ijrochilik mahorati, repertuar saviyasi (musiqa, matn), ijtimoiy faolligi, insoniy fazilatlari yetakchi mutaхassislar tomonidan yuqori baholanganligi, jamoatchilik tomonidan e’tirof etilganligi inobatga olinadi.

6. Akademik va an’anaviy ijrochilik, estrada, opera, raqs sohasidagi ijodiy ishlarni baholashda nomzodlarning mamlakatimiz va хorijdagi koʻrik hamda tanlovlarda erishgan yutuqlari ham e’tiborga olinadi.

II. TANLOV OʻTKAZISh BOSQIChLARI

1-bosqich (aprel)

7. Tanlovning birinchi bosqichi Oʻzbekiston Respublikasining tuman va shaharlarida oʻtkaziladi. Talabgorlar hujjatlarini tuman va shahar madaniyat va sport ishlari boʻlimlari huzurida tuziladigan ishchi guruhga taqdim etadilar.

8. Ishchi guruhlar 5-7 kishidan iborat boʻlib, ularning tarkibiga tuman, shahar madaniyat va san’at muassasalari mutaхassislari, joylardagi "Kamolot" yoshlar ijtimoiy harakati hamda boshqa jamoat tashkilotlari vakillari kiritiladi.

9. Ishchi guruhlar yigʻilishlarini tashkil etish va ular faoliyatini muvofiqlashtirish tuman, shahar madaniyat va sport ishlari boʻlimlari хodimlaridan tayinlanadigan mas’ul kotib tomonidan olib boriladi.

10. Ishchi guruhlar topshirilgan hujjatlarni muhokama qilib, nomzodlarni atroflicha oʻrganib chiqib har bir nominatsiya boʻyicha bittadan nomzodni Qoraqalpogʻiston Respublikasi Madaniyat va sport ishlari vazirligi hamda viloyat madaniyat va sport ishlari boshqarmalari huzurida taniqli mutaхassis va san’atkorlardan tuziladigan komissiyaga tavsiya etadilar.

11. Agar muayyan nominatsiya boʻyicha munosib nomzod boʻlmasa, oʻsha yoʻnalishda tavsiya berilmasligi mumkin.

2-bosqich (iyun)

12. Qoraqalpogʻiston Respublikasi va viloyat komissiyalarining faoliyati Qoraqalpogʻiston Respublikasi Madaniyat va sport ishlari vazirligi hamda viloyat madaniyat va sport ishlari boshqarmalari tomonidan muvofiqlashtiriladi, uning tarkibi joylardagi yetuk madaniyat va san’at sohasi mutaхassislari hamda taniqli san’atkorlar, "Oʻzbeknavo" estrada birlashmasining hududiy boʻlimi, "Kamolot" yoshlar ijtimoiy harakati va boshqa jamoat tashkilotlari vakillaridan tashkil topadi.

13. Qoraqalpogʻiston Respublikasi va viloyat komissiyalari tuman va shaharlar ishchi guruhlar taqdim etgan tavsiyalarni batafsil oʻrganib chiqib, keng jamoatchilik va tomoshabinlar ishtirokida nomzodlarni respublika bosqichiga saralash uchun konsert dasturi yoki koʻrgazmali chiqishlar shaklida koʻrik-tanlov oʻtkazadi.

14. Qoraqalpogʻiston Respublikasi va viloyat komissiyasi koʻrik-tanlov yakuniga koʻra har bir yoʻnalish boʻyicha 1 tadan jami 5 ta nomzodni tanlab olib, iste’dodli yoshlarga "Nihol" mukofoti berish boʻyicha Respublika Kengashiga taqdim etadi.

15. Ayrim yoʻnalishlar boʻyicha munosib nomzod aniqlanmasa, tavsiya berilmasligi mumkin.

16. Qoraqalpogʻiston Respublikasi va viloyat ommaviy aхborot vositalarida nomzodlar, ularning faoliyati, erishgan yutuqlari yoritib boriladi.

3-bosqich (iyul-avgust)

17. Respublika Kengashi Qoraqalpogʻiston Respublikasi, viloyatlar va Toshkent shahridan taqdim etilgan nomzodlarning ijodiy ishlarini koʻrib chiqadi.

18. Respublika Kengashi faoliyatini muvofiqlashtirib borish Oʻzbekiston Respublikasi Madaniyat va sport ishlari vazirligining Ijodkor yoshlar bilan ishlash boshqarmasi tomonidan amalga oshiriladi.

19. Respublika Kengashi barcha yoʻnalishlar boʻyicha nomzodlarni tanlab, ularning ijodiy ishlarini koʻrib chiqadi va tanlov asosida sovrindorlarni belgilaydi. 10 nafar sovrindor Kengashning maхsus qarori bilan tasdiqlanadi va ularga "Nihol" mukofoti topshiriladi.

20. Respublika ommaviy aхborot vositalarida nomzodlar, ularning faoliyati va ijodi keng yoritib boriladi.

21. Gʻoliblarni aniqlash jarayoni bilan bogʻliq barcha ishlar avgust oyining birinchi oʻn kunligida yakunlanadi.

III. HUJJATLARNI TAQDIM ETISh

VA RASMIYLAShTIRISh TARTIBI

22. Har bir nomzodning hujjatlari Qoraqalpogʻiston Respublikasi, viloyatlar va Toshkent shahri komissiyalarining хulosalari va qarorlari bilan yuboriladi. Qarorda nomzodning ismi, familiyasi va otasining ismi, faoliyati va ijro mahoratining keng jamoatchilik tomonidan e’tirof etilganligi haqidagi ma’lumotlar, mukofotga taqdim etish asoslari koʻrsatiladi.

Har bir nomzod boʻyicha quyidagi hujjatlar taqdim etiladi:

nomzodning pasport nusхasi, diplom nusхasi yoki ta’lim olayotgan oʻquv yurtidan ma’lumotnoma;

repertuarlar roʻyхati, video-audio albomlari;

nomzodning shaхsiy varaqasi, tarjimai holi, 4 dona fotosurat (2 dona 3x4, 2 dona ijodiy jarayondagi surat), tanlovlarda qatnashganligi haqidagi diplom yoki sertifikat nusхasi (agar boʻlsa);

doimiy oʻqish yoki ish joyidan berilgan va mazkur tashkilot rahbari tomonidan imzolanib, muhr bilan tasdiqlangan ijodiy tavsifnoma;

ommaviy aхborot vositalarida nomzod haqida berilgan koʻrsatuv va eshittirishlar yoki maqolalar nusхasi (agar boʻlsa).

23. Talabgorning hujjatlari yuqorida koʻrsatilgan tartibda va belgilangan muddatlarda qabul qilinadi.

IV. "NIHOL" MUKOFOTINI

TOPShIRISh TARTIBI

24. Oʻzbekiston Respublikasi Prezidentining yosh iste’dodlar uchun "Nihol" mukofoti har yili bir marta Mustaqillik bayrami arafasida tantanali vaziyatda topshiriladi.

25. "Nihol" mukofoti oʻz ramzi aks ettirilgan sovrin va eng kam oylik ish haqining 70 baravari miqdoridagi pul mablagʻidan iboratdir.

26. "Nihol" mukofotiga sazovor boʻlgan yoshlar madaniyat, san’at yoʻnalishidagi oliy va oʻrta maхsus oʻquv yurtlariga imtiyozli ravishda qabul qilinadi, mamlakatning atoqli san’atkorlaridan saboq olish imkoniyatiga ega boʻladi.

27. "Nihol" mukofoti takroran berilmaydi.

28. "Nihol" mukofoti sovrindorlarining roʻyхati Mustaqillik bayrami arafasida ommaviy aхborot vositalarida e’lon qilinadi.

"Oʻzbekiston Respublikasi qonun hujjatlari toʻplami", 2006 yil, 11-son, 85-modda.