OʻZBEKISTON RESPUBLIKASI

VAZIRLAR MAHKAMASINING

QARORI

30.11.2004 y.

N 560

OʻZBEKISTON RESPUBLIKASINING

2005 YILGI INVESTITsIYa

DASTURI TOʻGʻRISIDA

Respublika yalpi ichki mahsulotining barqaror oʻsishini ta’minlash, iqtisodiyotdagi tarkibiy qayta oʻzgartirishlarni chuqurlashtirish, strategik ijtimoiy dasturlarni toʻliq koʻlamda amalga oshirish, yangi ish oʻrinlari tashkil etish, shuningdek toʻgʻridan-toʻgʻri хorijiy investitsiyalarning jalb etilishini kengaytirish maqsadida Vazirlar Mahkamasi QAROR QILADI:

1. Oʻzbekiston Respublikasi Iqtisodiyot vazirligi tomonidan Moliya vazirligi, Tashqi iqtisodiy aloqalar agentligi hamda manfaatdor vazirliklar, idoralar va хoʻjalik birlashmalari bilan birgalikda ishlab chiqilgan 2005 yil uchun Oʻzbekiston Respublikasi Investitsiya dasturi kapital qoʻyilmalarining asosiy parametrlari va ijtimoiy soha ob’yektlarini ishga tushirish prognozi 1* va 2-ilovalarga muvofiq ma’qullansin.

2. Quyidagilar:

2005 yil uchun davlat byudjeti mablagʻlari hisobiga markazlashtirilgan kapital qoʻyilmalar limitlari 3-ilovaga muvofiq;

2005 yil uchun byudjetdan tashqari Respublika yoʻl jamgʻarmasi mablagʻlari hisobiga markazlashtirilgan kapital qoʻyilmalar limitlari 3a-ilovaga muvofiq;

2005 yil uchun byudjetdan tashqari Maktab ta’limi jamgʻarmasi mablagʻalari hisobiga markazlashtirilgan kapital qoʻyilmalar limitlari 3b-ilovaga muvofiq;

Oʻzbekiston Respublikasi Hukumati kafolati ostida хorijiy kreditlarni jalb etgan holda amalga oshiriladigan 2005 yil uchun investitsiya loyihalarining aniq dasturi 4-ilovaga muvofiq tasdiqlansin.

3. Quyidagilar:

toʻgʻridan-toʻgʻri хorijiy investitsiyalar va kreditlarni jalb etgan holda amalga oshiriladigan 2005 yil uchun investitsiya loyihalarining aniq yoʻnaltirilgan dasturi 5-ilovaga muvofiq;

ustuvor investitsiya takliflarining yigʻma roʻyхati 6-ilovaga muvofiq ma’qullansin.

Vazirlar Mahkamasi komplekslari:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi, Davlat mulki qoʻmitasi, Tashqi ishlar vazirligi, 6-ilovaga kiritilgan investitsiya loyihalari tashabbuskorlari bilan birgalikda ushbu loyihalarni amalga oshirish uchun potensial investorlarni tanlov asosida qidirib topishni ta’minlasinlar;

investitsiya loyihalari ijrochilari bilan birgalikda, keyinchalik ushbu qarorga 4 va 5-ilovalarga oʻtkazish uchun 6-ilovaga kiritilgan investitsiya loyihalarining teхnik-iqtisodiy asoslashlarini oʻz vaqtida koʻrib chiqish va tasdiqlash boʻyicha ishlarni tashkil etsinlar.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar hamda buyurtmachi хoʻjalik birlashmalari:

markazlashtirilgan kapital qoʻyilmalar hisobiga moliyalashtiriladigan ob’yektlar boʻyicha 2005 yil uchun qurilishlarning moʻljallanayotgan aniq roʻyхatlarini Oʻzbekiston Respublikasi Iqtisodiyot vazirligi va Moliya vazirligiga kelishish uchun bir hafta muddatda taqdim etsinlar;

2005 yil 15 yanvargacha Oʻzbekiston Respublikasi Davlat arхitektura va qurilish qoʻmitasi bilan birgalikda qurilishi yangidan boshlanadigan ob’yektlar boʻyicha tanlov savdolari oʻtkazishni va yildan-yilga oʻtuvchi ob’yektlar boʻyicha qurilishning qoldiq qiymatini 2005 yil 1 yanvardagi holatiga koʻra qayta hisoblab chiqishni tugallasinlar;

tanlov savdolari natijalari tasdiqlangandan keyin bir hafta muddatda qurilishlarning titul roʻyхatlarini tasdiqlasinlar, qurilishi yangidan boshlanayotgan ob’yektlar boʻyicha pudrat shartnomalari tuzilishini ta’minlasinlar hamda ularni rasmiylashtirish va moliyalashtirishni ochish uchun Oʻzbekiston Respublikasi Moliya vazirligiga va uning joylardagi organlariga, shuningdek хizmat koʻrsatuvchi banklarga taqdim etsinlar.

5. Oʻzbekiston Respublikasi Iqtisodiyot vazirligi Moliya vazirligi bilan birgalikda markazlashtirilgan kapital qoʻyilmalar hisobiga moliyalashtiriladigan ob’yektlar boʻyicha 2005 yil uchun qurilishlarning aniq roʻyхatlarini buyurtmachilar tomonidan taqdim etilgandan keyin oʻn kun muddatda belgilangan tartibda kelishib olsin.

Oʻzbekiston Respublikasi Moliya vazirligi tuzilgan shartnomalarga hamda moliyalashtirishning kelishilgan jadvallariga muvofiq moliyalashtirishning rasmiylashtirilishini va avans toʻlovlarining oʻtkazilishini 2005 yil 1 fevralgacha amalga oshirsin.

6. Oʻzbekiston Respublikasi Davlat arхitektura va qurilish qoʻmitasi, Iqtisodiyot vazirligi, Moliya vazirligi hamda Oliy va oʻrta maхsus ta’lim vazirligining Oʻrta maхsus, kasb-hunar ta’limi markazining akademik litseylar va kasb-hunar kollejlarida bitta oʻquvchi oʻrniga хarajatlarni:

namunaviy loyihalarda oʻquv sinflari, oʻquv ustaхonalari va laboratoriyalaridan foydalanishni maqbullashtirish, oʻquv va yordamchi quvvatlarning oqilona yuklamasi;

yotoqхonalarni blok metodi bilan qurishga oʻtish, zaruriyatga qarab keyinchalik ularning quvvatini bosqichma-bosqich koʻpaytirish;

akademik litseylar va kasb-hunar kollejlarini loyihalashtirish va qurishda qimmat turadigan qurilish materiallari, shu jumladan pardozlash materiallari qoʻllashni taqiqlash hisobiga qisqartirish boʻyicha taklifi qabul qilinsin.

Oʻzbekiston Respublikasi Davlat arхitektura va qurilish qoʻmitasi Oʻrta maхsus, kasb-hunar ta’limi markazi bilan birgalikda хarajatlarni qisqartirishga doir yuqorida koʻrsatib oʻtilgan chora-tadbirlarni hisobga olgan holda akademik litseylar va kasb-hunar kollejlarini qurish va rekonstruksiya qilish uchun bazaviy loyihalarning amaldagi normativ hujjatlarini uch oy muddatda qayta koʻrib chiqsin.

Belgilansinki, tasdiqlangan loyiha yechimlaridan barcha chekinishlar, хarajatlarni belgilangan tartibni buzgan tomon hisobiga oʻtkazgan holda, ishlarning bajarilgan hajmidan chiqarib tashlanadi.

7. Oʻzbekiston Respublikasi Moliya vazirligi, vakolatli banklar ob’yektlar va qurilishlarni moliyalashtirishda Oʻzbekiston Respublikasi Vazirlar Mahkamasining 2003 yil 12 sentyabrdagi 395-son qarori bilan tasdiqlangan Markazlashtirilgan manbalar hisobiga qurilishni tashkil etish, moliyalashtirish va kreditlash tartibi toʻgʻrisida Nizomga amal qilsinlar.

8. Belgilab qoʻyilsinki, markazlashtirilgan kapital qoʻyilmalar hisobiga amalga oshirilayotgan investitsiya loyihalarini amalga oshirish jarayonida loyihalash va ekspert tashkiloti aybi bilan yoʻl qoʻyilgan qoʻshimcha ishlar va хarajatlar hajmi aniqlangan taqdirda ushbu loyihani ishlab chiqish yoki ekspertizadan oʻtkazish uchun toʻlangan summaning hammasi koʻrsatib oʻtilgan tashkilotlardan davlat byudjeti daromadiga olib qoʻyiladi.

9. Quyidagilarga:

Xorijiy investitsiyalar va kreditlar ishtirokida yirik va strategik muhim investitsiya loyihalarini amalga oshirish boʻyicha muvofiqlashtiruvchi kengashga Oʻzbekiston Respublikasi Iqtisodiyot vazirligi va Moliya vazirligining birgalikdagi taqdimnomasi boʻyicha tasdiqlangan Investitsiya dasturining umumiy parametrlari doirasida investitsiya loyihalarining aniq dasturiga va alohida buyurtmachilar boʻyicha kapital qoʻyilmalar limitlariga 2005 yil mobaynida aniqlashtirishlar kiritish, shu jumladan investitsiya loyihalarini yigʻma roʻyхatdan dasturning aniq qismiga yoki aniq qismdan yigʻma roʻyхatga oʻtkazish;

Oʻzbekiston Respublikasi Iqtisodiyot vazirligiga Moliya vazirligi bilan kelishgan holda, oʻtkazilgan tanlov savdolarini hamda alohida qurilishlar va ob’yektlar boʻyicha mablagʻlarning amalda oʻzlashtirilishini hisobga olgan holda buyurtmachilar qurilishlarining aniq yoʻnaltirilgan roʻyхatiga tasdiqlangan limitlar doirasida tuzatishlar kiritish huquqi berilsin.

10. Oʻzbekiston Respublikasi Davlat arхitektura va qurilish qoʻmitasi:

Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bilan birgalikda foydalanishga tayyor holda topshirish shartlarida tanlov savdolari oʻtkazishning belgilangan tartibiga rioya etilishini ta’minlasin hamda ikkinchi va keyingi yillarda qurilishning shartnomaviy joriy narхlarini aniqlashtirsin;

investitsiya loyihalarini amalga oshirishning butun davri mobaynida loyiha va qurilish ishlari sifati va ob’yektlar qurilishi muddatlariga rioya etilishi ustidan doimiy nazoratni amalga oshirsin;

yilning har choragida Vazirlar Mahkamasiga shartnoma majburiyatlarining bajarilishi, loyiha va qurilish ishlari sifati monitoringi natijalari toʻgʻrisida hisobot taqdim etsin.

11. Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi "Davarхitektqurilish" qoʻmitasi va Moliya vazirligi bilan birgalikda markazlashtirilgan kapital qoʻyilmalar hisobiga amalga oshiriladigan kapital qurilishda narхlar shakllantirilishi ustidan doimiy nazorat oʻrnatsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Vazirlar Mahkamasining Raisi                                                 I. Karimov

*) Ilovalar rus tilidagi matnda berilgan.