Oʻzbekiston Respublikasi Vazirlar Mahkamasining 14.02.1995 y. 38-f-son Farmoyishi. Aholiga pensiyalar, nafaqalar toʻlash bilan bogʻliq pul mablagʻlarini toʻplash, mablagʻ bilan ta’minlash va ularning ishlatilishi boʻyicha hisobot ishlari tartibini tasdiqlash toʻgʻrisida
OʻZBEKISTON RESPUBLIKASI
VAZIRLAR MAHKAMASINING
FARMOYIShI
14.02.1995 y.
N 38-f
1. Aholiga pensiyalar, nafaqalar toʻlashga yoʻnaltiriladigan pul mablagʻlarini toʻplash, mablagʻ bilan ta’minlash va ularning ishlatilishiga doir hisobot ishlari tartibi ilovaga muvofiq tasdiqlansin.
2. Aloqa vazirligi, Ijtimoiy ta’minot vazirligi, Moliya vazirligi, Markaziy bank va Oʻzbekiston Respublikasi Vazirlar Mahkamasi huzuridagi Ijtimoiy sugʻurta jamgʻarmasi bilan kelishgan holda 10 kun muddatda Oʻzbekiston Respublikasi Aloqa vazirligi korхonalari tomonidan pensiya va nafaqalarni toʻlash boʻyicha Yoʻriqnomaga tegishli oʻzgartirishlar kiritsinlar.
3. "Oʻzsanoatqurilishbank" va "Oʻzdehqonchiliksanoatbank" ish haqini tashkilotlarga ijtimoiy sugʻurta boʻyicha badallarni toʻlashga doir topshiriqnoma mavjud boʻlgan taqdirda bersinlar hamda "Oʻzbekiston pochtasi" konserni aloqa tarmoqlarining pensiya va nafaqalarni toʻlash uchun naqd pul mablagʻlari olish yuzasidan buyurtmanomalarini birinchi navbatda ta’minlasinlar.
4. Oʻzbekiston Respublikasi Ijtimoiy ta’minot vazirligi huzuridagi Pensiya jamgʻarmasi majburiy davlat ijtimoiy sugʻurtasi boʻyicha badallarni yuridik va jismoniy shaхslarning oʻz vaqtida toʻlashi ustidan nazoratni kuchaytirsinlar.
5. Mazkur farmoyishning bajarilishini nazorat qilish Oʻzbekiston Respublikasi Vazirlar Mahkamasining Ijtimoiy masalalar va madaniyat boʻlimiga yuklansin.
Oʻzbekiston Respublikasi Bosh vaziri A. Mutalov
1995 yil 14 fevraldagi
38-f-son farmoyishiga
ILOVA
Aholiga pensiyalar, nafaqalar toʻlash bilan
bogʻliq pul mablagʻlarini toʻplash, mablagʻ bilan
ta’minlash va ularning ishlatilishi
boʻyicha hisobot ishlari
TARTIBI
1. 1995 yil 1 martdan boshlab Pensiya jamgʻarmasining pensiya va nafaqalarni mablagʻ bilan ta’minlashga yoʻnaltiriladigan mablagʻlari Jamgʻarmaning tuman (shahar) boʻlimlari tomonidan, bevosita tuman (shahar) aloqa tarmoqlari tomonidan, toʻlov davri boshlanishidan kechi bilan 5 kun oldin oʻtkaziladi.
Bunda jamgʻarma banki muassasalariga va pensiyalarni yetkazib berish boʻyicha kichik korхonalarga mablagʻlarni oʻtkazishning amalda tartibi saqlanib qoladi.
2. Pensiya jamgʻarmasining tuman (shahar) boʻlimlari har oyda Pensiya jamgʻarmasining tuman (shahar) boʻlimlariga pensiya va nafaqalarga boʻlgan ehtiyoj yuzasidan buyurtmanomalarni, tuman (shahar) aloqa tarmoqlariga, jamgʻarma banki muassasalariga va ijtimoiy ta’minot tizimining kichik korхonalariga esa pensiya va nafaqalar toʻlash yuzasidan vedomostlar va topshiriqnomalarni taqdim etadilar.
3. Taqdim etilgan buyurtmanomalarga muvofiq Jamgʻarma pensiya va nafaqalarni mablagʻ bilan ta’minlashni amalga oshiradi, aloqa tizimining organlari, jamgʻarma banklari muassasalari hamda ijtimoiy ta’minot tizimining kichik korхonalari esa ularni ijtimoiy ta’minot organlari tomonidan taqdim etilgan vedomost va topshiriqnomalar boʻyicha fuqarolarga toʻlaydilar.
4. Tuman (shahar) aloqa, ijtimoiy ta’minot organlari toʻlov davri tugagandan keyin har oyda pensiya va nafaqalarni toʻlashga hamda yetkazib berishga moʻljallangan mablagʻlar boʻyicha oʻzaro solishtirishni amalga oshiradilar.