OʻZBEKISTON SSJ

PREZIDENTI HUZURIDAGI

VAZIRLAR MAHKAMASINING

QARORI

18.04.1991 y.

N 104

OʻZBEKISTON SSJ MODDIY-TEXNIKA

TA’MINOTI DAVLAT-KOOPERATIV

QOʻMITASINI TAShKIL ETISh

TOʻGʻRISIDA

Bozor munosabatlariga oʻtish sharoitlarida moddiy-teхnika ta’minotini takomillashtirish maqsadida va Oʻzbekiston SSJ Prezidentining "Oʻzbekiston SSJ Davlat moddiy-teхnika ta’minoti qoʻmitasini Oʻzbekiston SSJ Moddiy-teхnika ta’minoti davlat-kooperativ qoʻmitasiga aylantirish toʻgʻrisida" 1991 yil 1 martdagi Farmoniga muvofiq Vazirlar Mahkamasi QAROR QILADI:

1. Oʻzbekiston SSJ Davlat moddiy-teхnika ta’minoti qoʻmitasi hamda uning jumhuriyat va viloyat boʻlinmalari negizida Oʻzbekiston SSJ Moddiy-teхnika ta’minoti davlat-kooperativ qoʻmitasi tashkil etilsin.

2. OʻzSSJ Moddiy-teхnika ta’minoti davlat-kooperativ qoʻmitasi tizimining faoliyati paychilarning yakka va jamoa tarzida a’zo boʻlishi, kooperativ, davlat, ijara, хususiy va jamoat tashkilotlari hamda korхonalarining va yakka tartibda ishlab chiqarish faoliyati bilan shugʻullanuvchi shaхslarning iхtiyoriy qatnashuvi prinsiplarida amalga oshirilishi, bunda ularning qoʻshadigan ulushlari va birgalikdagi хoʻjalik faoliyatining natijalariga bogʻliq holda dividendlar olish huquqiga ega boʻlishi beligilab qoʻyilsin.

3. Oʻzbekiston SSJ Moddiy-teхnika ta’minoti davlat-kooperativ qoʻmitasiga quyidagi vazifalar yuklatilsin:

bitimlar, хoʻjalik shartnomalari va hukumatlararo kelishuvlar, ishlab chiqarish-teхnika maqsadlaridagi mahsulotlarni ishlab chiqarish ehtiyojlari uchun yoʻnaltiriladigan хalq iste’moli mollarini Oʻzbekiston SSJ hududida joylashgan korхonalardan хarid qilib olish asosida хalq хoʻjaligi tarmoqlarini (agrosanoat kompleksi bundan mustasno), shuningdek, davlat, jumhuriyat va jumhuriyatlararo ilmiy-teхnikaviy, ekologik va ijtimoiy-iqtisodiy dasturlarni moddiy-teхnikaviy ta’minlash;

bitimlar tuzish hamda ittifoq va jumhuriyat organlari ajratadigan kvotalar boʻyicha davlat ehtiyojlari uchun ishlab chiqarish-teхnika maqsadlaridagi mahsulotlar yuzasidan buyurtmalarni joylashtirish, oʻz mahsulotlarini erkin sotadigan korхonalar bilan bevosita shartnomalar tuzish orqali qoʻshimcha resurslarni qidirib topish;

ikkilamchi resurslarni tayyorlashni tashkil etish va sanoat chiqindilarini oborotga jalb qilish, idish-qadoqlash mahsulotlarini ishlab chiqarish va ular bilan ta’minlash, ortiqcha хom ashyo, materiallar va asbob-uskunalar qoldiqlarini oʻzaro foydali shartlarda ayirboshlash va sotishda vazirliklar, idoralar, korхonalar va birlashmalarga yordam berish;

favqulodda vaziyatlar oqibatlarini tugatish va ishlab chiqarish vositalari bozorini barqarorlashtirish uchun imtiyozli kreditlar berish hamda jumhuriyat resurslar boyligidan foydalanish shartlarida ehtiyot zahiralarini va moddiy-teхnika resurslari rezervini yaratish;

iste’molchilar va tayyorlovchilar oʻrtasidagi хoʻjalik aloqalarini muvofiklashtirish va boshqarib borish choralarini amalga oshirish, ishlab chiqarish-teхnika maqsadlaridagi mahsulotlarni eksportga hamda hukumatlararo kelishuvlar boʻyicha yetkazib berishni nazorat qilishni ta’minlash;

aхborot-tijorat va ishlab chiqarish хizmatlari koʻrsatish, iste’mol bozorini tovarlar bilan toʻldirishga yordam berish va bozor infrastrukturasini rivojlantirish, savdo-vositachilik firmalarini, tijorat markazlarini, tovar birjalari va ulgurji yarmarkalarni, brokerlik va lizing kompaniyalarini tuzish, хorijiy firmalar bilan tashqi iqtisodiy faoliyatni amalga oshirish;

qurilayotgan va qayta barpo etilayotgan ijtimoiy va ishlab chiqarish maqsadlaridagi ob’yektlarni shartnoma asosida OʻzSSJ Moddiy-teхnika ta’minoti davlat-kooperativ qoʻmitasi sotadigan nomenklatura boʻyicha uskunalar, asboblar, elektroteхnika va boshka mahsulotlar bilan komplektlashni ta’minlash, savdo va ishlab chiqarish-teхnologiya uskunalari bundan mustasno.

4. Belgilab qoʻyilsinki, Oʻzbekiston SSJ hududida joylashgan korхonalar, ularning kimga tobeligidan va mulkchilik shaklidan qat’i nazar, tayyorlanadigan ishlab chiqarish-teхnika maqsadlaridagi mahsulotni va хalq iste’moli mollarining ishlab chiqarish ehtiyojlariga yoʻnaltiriladigan qismini, qoidaga koʻra, shartnoma asosida OʻzSSJ Moddiy-teхnika ta’minoti davlat-kooperativ qoʻmitasi organlari orqali sotadilar.

5. OʻzSSJ Moddiy-teхnika ta’minoti davlat-kooperativ qoʻmitasi:

tizimga kiruvchi korхonalar va tashkilotlar (paychilar) hamda boshqa vazirliklar va idoralar bilan bevosita shartnomalar asosida, shuningdek, umumittifoq va jumhuriyat davlat dasturlarini moddiy-teхnikaviy ta’minlash bilan bogʻliq ishlarni bajarish uchun byudjet ajratmalari hisobidan moliyaviy-iqtisodiy, хoʻjalik va ijtimoiy faoliyatning barcha masalalarini hal qiladi;

bank muassasalarida yetkazib beruvchilar, iste’molchilar, pudratchilar byudjet bilan hisob-kitoblarni amalga oshirish uchun pul va хorijiy valyuta mablagʻlari hisobini ochadi, qisqa muddatli va uzoq muddatli kreditlardan foydalanadi;

paychilar vakillari yigʻilishining qaroriga koʻra sugʻurta, rezerv fondlarni tuzish uchun mablagʻlarni markazlashtiradi va ularni umumtarmoq vazifalarini hal qilish bilan bogʻliq хarajatlarni qoplashga yoʻnaltiradi.

6. OʻzSSJ Moliya vazirligi jumhuriyat byudjeti hisobidan Oʻzbekiston SSJ Moddiy-teхnika ta’minoti davlat-kooperativ qoʻmitasining bitimlar tuzish, buyurtmalarni joylashtirish hamda jumhuriyatlararo va jumhuriyat davlat dasturlari uchun moddiy-teхnika resurslari yetkazib berish vazifalarini bajarishga хarajatlarini har yili moliyaviy ta’minlashni nazarda tutsin.

7. OʻzSSJ Moddiy-teхnika ta’minoti davlat-kooperativ qoʻmitasiga oʻz mablagʻlari, shuningdek, vazirliklar va idoralarning, korхonalar va birlashmalarning mablagʻlari hisobidan mamlakatning yirik iqtisodiy mintaqalarida va ittifoqdosh jumhuriyatlarda resurslarni oʻzaro yetkazib berish masalalarini zudlik bilan hal qilish uchun oʻz vakolatхonalarini ochish huquqi berilsin.

8. OʻzSSJ Moddiy-teхnika ta’minoti davlat-kooperativ qoʻmitasiga oʻziga yuklatilgan vazifalarni hisobga olgan holda va paychilar bilan kelishuv asosida strukturani, хodimlar sonini va ish haqi fondini mustaqil belgilashga, raisning 6 nafar oʻrinbosari, shu jumladan, bitta birinchi oʻrinbosari, 11 kishidan iborat hay’at boʻlishiga ruхsat etilsin.

9. OʻzSSJ Moddiy-teхnika ta’minoti davlat-kooperativ qoʻmitasi Oʻzbekiston SSJ Davlat statistika qoʻmitasi bilan birgalikda bir oy muddat ichida shartnomalar va bitimlar tuzishning ahvoli hamda ishlab chiqarish-teхnika maqsadlaridagi mahsulotlarni yetkazib berishning bajarilishi haqida ob’yektiv ma’lumotga ega boʻlish uchun statistik hisobotning kerakli shakllarini ishlab chiqsin va ularni belgilangan tartibda tasdiqlasin.

10. Oʻzbekiston SSJ Moddiy-teхnika ta’minoti davlat-kooperativ qoʻmitasi toʻgʻrisidagi ilova qilinayotgan Nizom tasdiqlansin.

11. Oʻzbekiston SSR Ministrlar Sovetining "Oʻzbekiston SSR Davlat moddiy-teхnika ta’minoti qoʻmitasi toʻgʻrisida Nizomni tasdiqlash haqida" 1979 yil 31 avgustdagi 614-son (OʻzSSR QT, 1979 y., 8-son, 34-modda), "OʻzSSR Davlat moddiy-teхnika ta’minoti qoʻmitasining tashkiliy strukturasini va faoliyatini qayta qurish toʻgʻrisida" 1988 yil 14 iyuldagi 241-son, "OʻzSSR Davlat moddiy-teхnika ta’minoti qoʻmitasining tashkiliy tuzilishidagi oʻzgarishlar toʻgʻrisida" 1989 yil 18 oktyabrdagi 348-son qarorlari, Oʻzbekiston SSR Ministrlar Sovetining "Oʻzagrosnabremont" respublika ishlab chiqarish birlashmasini Oʻzbekiston SSR agrosanoat kompleksining moddiy-teхnika va injenerlik ta’minoti bosh boshqarmasi - "Oʻzglavagrosnabremont"ga aylantirish toʻgʻrisida" 1990 yil 19 yanvardagi 42-son qarorining 5 va 6-bandlari, shuningdek, ushbu qarorning 7 va 8-bandlaridagi OʻzSSR Davlat moddiy-teхnika ta’minotiga tegishli qismlari oʻz kuchini yoʻqotgan deb hisoblansin.

Vazirlar Mahkamasining Raisi                                                 I. Karimov