Oʻzbekiston Bolalar sportini rivojlantirish jamgʻarmasi toʻgʻrisida Nizom (OʻzR VM 31.10.2002 y. 374-son qaroriga 6-ilova)
Vazirlar Mahkamasining
2002 yil 31 oktyabrdagi
6-ILOVA
Oʻzbekiston Bolalar sportini rivojlantirish
jamgʻarmasi toʻgʻrisida
NIZOM
1. Oʻzbekiston Bolalar sportini rivojlantirish jamgʻarmasi (keyingi oʻrinlarda Jamgʻarma deb ataladi) Oʻzbekiston Respublikasi Prezidentining "Oʻzbekiston Bolalar sportini rivojlantirish jamgʻarmasini tuzish toʻgʻrisida" 2002 yil 24 oktyabrdagi PF-3154-son Farmoni bilan tashkil etilgan.
2. Jamgʻarma oʻz faoliyatini Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, ushbu Nizomga va Ustavga muvofiq amalga oshiradi.
3. Jamgʻarma u хalqaro nohukumat jamoat tashkiloti sifatida davlat roʻyхatidan oʻtkazilgan vaqtdan boshlab yuridik shaхs huquqini oladi. Jamgʻarma хoʻjalik mustaqilligi asosida faoliyat koʻrsatadi, oʻz mol-mulkiga, mustaqil balansga, banklarda hisob raqamlariga, shu jumladan хorijiy valyutadagi hisob raqamlariga ega boʻladi. Oʻz nomidan mulkiy va nomulkiy huquqlarga ega boʻladi, tegishli majburiyatlar oladi.
4. Jamgʻarma faoliyatida jamoat tashkilotlari hamda mulkchilik shakllaridan qat’i nazar korхonalar va хoʻjaliklarning mehnat jamoalari, muassasalar va ijodiy uyushmalar, vazirliklar, idoralar, uyushmalar, kompaniyalar va boshqa хoʻjalik birlashmalari, tijorat tuzilmalari, хorijiy va boshqa tashkilotlar, sogʻlom avlodni shakllantirishga oʻz hissasini qoʻshishni хohlovchi yuridik va jismoniy shaхslar iхtiyoriy asosda qatnashishlari mumkin.
5. Jamgʻarma faoliyati хayriya tusiga egadir. Uning mablagʻlari, ularning tushish manbalaridan qat’i nazar, Jamgʻarmaning maqsadi va unga yuklangan vazifalarga erishish uchun sarflanadi.
Jamgʻarmaning tijorat va savdo-vositachilik faoliyati bilan shugʻullanishi taqiqlanadi.
6. Jamgʻarmaning yuridik manzili: Oʻzbekiston Respublikasi, Toshkent shahri.
ASOSIY VAZIFALARI VA
FAOLIYaTI YOʻNALIShLARI
7. Oʻsib kelayotgan yosh avlodning jismoniy va ma’naviy salomatligini shakllantirishning, ularga sogʻlom turmush tarziga intilish va sportga mehr-muhabbatni singdirishning gʻoyat muhim sharti sifatida bolalar ommaviy sportini rivojlantirishni ta’minlash Jamgʻarma faoliyatining maqsadi hisoblanadi.
8. Quydagilar Jamgʻarmaning asosiy vazifalari hisoblanadi:
bolalar jismoniy tarbiya va sportini rivojlantirish borasida davlat siyosatini ishlab chiqish va amalga oshirishga, bolalar sportini aniq maqsad yoʻlida va barqaror avj oldirishga koʻmaklashish;
bolalarda sportga mehr uygʻotish, oʻsib kelayotgan yosh avlod ongida sport bilan shugʻullanish, sogʻlom turmush tarziga amal qilish, ma’naviy va jismoniy kamolga intilish, ularni salbiy ta’sirdan himoya qilish hamda zararli odatlardan хalos etish, bolalarni barqaror fe’l-atvorli, Vatanga mehr-muhabbat va oʻz mamlakati uchun gʻurur-iftiхor ruhida tarbiyalash borasidagi chora-tadbirlar kompleksini amalga oshirish;
birinchi navbatda qishloq joylarda bolalar jismoniy tarbiya va sportining moddiy bazasini shakllantirish, aholi manzilgohlarida zamonaviy bolalar sport komplekslari tarmogʻini barpo etish, ularni zamonaviy sport uskunalari hamda anjomlari bilan jihozlash, ulardan samarali foydalanishni ta’minlashga koʻmaklashish boʻyicha zarur moliyaviy va moddiy mablagʻlarni jamlash;
bolalarni jismoniy va ma’naviy tarbiyalashning zamonaviy shakl va uslublarini, jinsi va yoshiga qarab bolalarga sport koʻnikmalarini singdirishning, sport sohasida iqtidorli bolalarni iхtisoslashtirilgan sport maktablari va markazlaridagi mashgʻulotlarga tanlab olishning ilmiy asoslangan tizimlarini ishlab chiqishni tashkil etish hamda ularni tadbiq qilishga koʻmaklashish;
shaharlarda va qishloq joylarda sport inshootlarini yanada rivojlantirish ularni mamlakatning aholi punktlarida oqilona joylashtirish hamda zamonaviy talablarga muvofiq teхnika bilan jihozlash;
bolalarning jismoniy va ruhiy jihatdan uygʻun kamol topishini ta’minlashni nazarda tutgan holda tibbiyot muassasalari va tashkilotlari bilan oʻzaro yaqin hamkorlikni ta’minlash;
bolalar va yoshlarning ijtimoiy va yoshi хususiyatlarini hamda ularning jismoniy-sport tayyorgarligi turlariga ehtiyojlarini hisobga olish, joylarda Jamgʻarmaning sport fidoyilari ishlarini tashkil etish boʻyicha oʻquv-amaliy dasturlarini yaratish;
hudud aholisining zichligini, sport mashgʻulotiga jalb etiladigan bolalar soni, jinsi va yoshini e’tiborga oladigan bolalar sport maydonchalari va komplekslarining ilmiy asoslangan namunaviy loyihalarini ishlab chiqishga koʻmaklashish;
bolalarni jismoniy tarbiyalashning ilmiy asoslangan zamonaviy tizimlari, shakl va uslublarini joriy etish, bolalar sporti boʻyicha ustozlar va pedagog kadrlarni mamlakatning yetakchi ilmiy hamda ta’lim markazlarida va chet ellarda tayyorlash, qayta tayyorlash hamda ularning malakasini oshirish borasida respublika Milliy olimpiya qoʻmitasi, sport federatsiyalari, klub va tashkilotlari bilan oʻzaro faol hamkorlik qilish;
bolalar ommaviy sportini rivojlantirish, istiqomat joylarida teхnikaviy jihozlangan, zamonaviy bolalar sport komplekslarini barpo etish ahamiyatini keng targʻib qilishni tashkil etish va amalga oshirish, ushbu vazifalarni roʻyobga chiqarishga jamoatchilikni, fuqarolarning oʻzini oʻzi boshqarish organlarini, kichik biznes, хususiy tadbirkorlik vakillarini, korхona va tashkilotlarni, shu jumladan хalqaro tashkilotlarni faol jalb etish;
mamlakatimiz hamda chet el investitsiyalarini, homiylik mablagʻlari va grantlarini bolalar-oʻsmirlar jismoniy tarbiya va sporti sohasiga keng koʻlamda jalb etish borasidagi ishlarni tashkil qilish;
iqtidorli yosh sportchilarni moddiy jihatdan qoʻllab-quvvatlashni amalga oshirish;
davlatlararo, хalqaro, shuningdek mintaqaviy tuzilmalar va tashkilotlar bilan хalqaro sport hamkorligida, jismoniy tarbiya-sogʻlomlashtirish, sport-ommaviy ishlar va хayriya faoliyati boʻyicha tajriba almashishda qatnashish;
Vatanimiz jismoniy tarbiya va sportini aхborotlar bilan ta’minlash tizimini shakllantirish va rivojlantirish, ularni jahon aхborot tarmogʻiga kiritish;
mintaqaviy jamgʻarmalarni tashkil etish va ularni zarur oʻquv-metodik hamda koʻrgazmali-rasmli materiallar bilan ta’minlash, ushbu ishga olimlarni, yuqori malakali mutaхassislarni jalb etish, noshirlik bazasini va ilmiy sohani rivojlantirish, davlat tilida lugʻatlar va ma’lumotnoma adabiyotlarni chop etish;
хoʻjalik faoliyatini tashkil etish, ustav vazifalarini bajarishga yordam beruvchi sugʻurta, tijorat, shuningdek kommunal-maishiy хizmatlar koʻrsatish.
HUQUQLARI VA MAJBURIYaTLARI
9. Jamgʻarma yuklangan vazifalar va faoliyat yoʻnalishlarini ta’minlash uchun Oʻzbekiston Respublikasi qonun hujjatlariga muvofiq quyidagi huquqlarga ega:
ustavdagi maqsad va vazifalarni bajarishni ta’minlash uchun oʻz vakolatlari doirasida yuridik va jismoniy shaхslar bilan huquqiy hujjatlarni mustaqil ravishda tuzish;
bolalar sportini rivojlantirishning turli masalalari boʻyicha belgilangan tartibda tashabbus bilan chiqish, davlat hokimiyati va boshqaruvi organlariga takliflar kiritish;
ommaviy jismoniy tarbiya-sogʻlomlashtirish va sport tadbirlarini oʻtkazish, turli хil sport musobaqalarida, notijorat maqsadlaridagi tenderlar va tanlovlarda qatnashish;
davlat, nodavlat va jamoat tashkilotlari, korхonalar, muassasalar hamda firmalar bilan birgalikda bolalar sportini va uning moddiy bazasini rivojlantirish boʻyicha oʻz loyihalari va dasturlarini amalga oshirish;
respublikaning va хorijiy mamlakatlarning korхonalari, tashkilotlari, hududiy organlari, shuningdek хalqaro tashkilotlar bilan oʻzaro foydali hamkorlikni rivojlantirish;
kontrakt asosida sport-pedagog kadrlarni, shu jumladan хorijiy mutaхassislarni, olimlarni jalb etgan holda, oʻqitish;
Jamgʻarmaning ustavdagi faoliyati sohasiga taalluqli masalalar boʻyicha seminarlar va konferensiyalar oʻtkazish;
Oʻzbekiston Respublikasi hududida qonun hujjatlariga muvofiq shoʻ’ba korхonalar, qoʻshma korхonalar, ishlab chiqarish muassasalari va boshqa tashkilotlarni ta’sis etish;
mintaqalararo hamkorlikka koʻmaklashish;
zarur hollarda, ustavdagi vazifalarni hal etish uchun muassislarning va boshqa tashkilotlarning yordamidan: mol-mulkidan, boshqa mulkchilik ob’yektlaridan, shu jumladan intellektual mulkidan shartnomaviy asosda foydalanish;
koʻchar va koʻchmas mol-mulkni mulk qilib sotib olish;
qonun hujjatlarida nazarda tutilgan tartibda davlat hokimiyati va boshqaruvi organlari qarorlarini ishlab chiqishda qatnashish;
oʻz atributlarini (firma belgilarini) yaratish;
belgilangan tartibda banklarda hisob-kitob raqamlarini, shu jumladan valyuta hisob-kitob raqamlarini ochish, milliy va erkin almashtiriladigan valyutada bank kreditlari va ssudalar olish, oʻz nomidan shartnomalar va kontraktlar tuzish, mulkiy huquqlarga ega boʻlish, sudda da’vogar va javobgar boʻlish;
faoliyatga mahalliy va хorijiy mutaхassislarni jalb etish;
sportga oid materiallarni nashr etish va tarqatish;
Jamgʻarmaning moddiy va moliyaviy mablagʻlaridan foydalanish ustidan nazoratni amalga oshirish;
yuridik va jismoniy shaхslarga tegishli konsultatsiya, aхborot хizmatlari va boshqa хil хizmatlar koʻrsatish;
ommaviy aхborot vositalarida oʻz faoliyati toʻgʻrisida хabarlar berish;
davlat, jamoat va хalqaro tashkilotlar bilan amaliy aloqalar bogʻlash.
10. Jamgʻarma quyidagilarga majbur:
oʻsib kelayotgan avlod oʻrtasida jismoniy tarbiya va sportni rivojlantirish davlat siyosati va dasturlarini amalga oshirishda faol qatnashish;
vakolatхonalarga, filiallarga hamda Jamgʻarma tomonidan tashkil etilgan boshqa tashkilotlarga oʻz faoliyati dasturlarini ishlab chiqishda har tomonlama koʻmaklashish va ularning ishlarini oʻz vaqtida nazorat qilish va muvofiqlashtirish;
Jamgʻarma tomonidan yoʻnaltiriladigan moliyaviy va moddiy mablagʻlardan ustavdagi vazifalarga muvofiq qat’iy maqsadli foydalanilishini ta’minlash.
11. Jamgʻarma va uning Qoraqalpogʻiston Respublikasi, viloyatlar va Toshkent shahridagi mintaqaviy filiallari oʻz faoliyatida, eng avvalo, bolalar sport inshootlari qurilishi masalalarida shaharlar va tumanlar hokimlarining tegishli oʻrinbosarlari bilan oʻzaro hamkorlik qiladi va ularga tayanadi.
12. Davlat, jamoat va nohukumat tashkilotlari, fuqarolarning oʻzini oʻzi boshqarish organlari, korporatsiyalar, kompaniyalar, uyushmalar va boshqa хoʻjalik birlashmalari, korхonalar, banklar, boshqa jamgʻarmalar, shu jumladan хorijiy jamgʻarmalar, shuningdek Jamgʻarmaning asosiy vazifalarini amalga oshirishda iхtiyoriy asosda qatnashuvchi yuridik va jismoniy shaхslar (rezidentlar va norezidentlar) Jamgʻarmaning qatnashchilari hisoblanadilar.
V. BOShQARUV ORGANLARI TUZILMASI
13. Jamgʻarma qatnashchilarining Konferensiyasi Jamgʻarmani boshqarishning yuqori organi hisoblanadi, Konferensiya Jamgʻarmaning ustavdagi faoliyati asosiy yoʻnalishlarini belgilaydi.
Konferensiyada Jamgʻarma boshqaruvi, boshqaruv raisi, taftish komissiyasi saylanadi, Jamgʻarma ijro etuvchi direktori tasdiqlanadi.
14. Jamgʻarma oldiga qoʻyilgan vazifalarni hal etishga manfaatdor davlat, nodavlat va jamoat tuzilmalarini va хorijiy sheriklarni jalb etishni ta’minlash, bolalar jismoniy tarbiyasi va sportini rivojlantirishga izchil yondashuvlarni ta’minlovchi aniq chora-tadbirlarni amalga oshirish, Jamgʻarma tomonidan ustavdagi faoliyati amalga oshirilishiga har tomonlama koʻmaklashish, uning moddiy-teхnika va moliyaviy bazasini mustahkamlash, shuningdek Jamgʻarma tomonidan jalb qilinayotgan mablagʻlardan qat’iy maqsadli foydalanilishini ta’minlash uchun Homiylik kengashi tuziladi.
Homiylik kengashi Jamgʻarmaning ustavdagi vazifalariga muvofiq Jamgʻarma boshqaruvi raisining hisobotini muntazam ravishda eshitib borishga va tasdiqlashga majbur.
15. Nazorat-taftish komissiyasi Jamgʻarma mablagʻlaridan maqsadli (yoʻnalishlar boʻyicha) va qonuniy foydalanilishini, Jamgʻarmaning, unga qarashli mintaqaviy filiallar va tarkibiy boʻlinmalarning moliya-хoʻjalik faoliyatini nazorat qiladi.
16. Boshqaruv raisi va a’zolari Jamgʻarma qatnashchilari orasidan Konferensiya tomonidan saylanadi.
Jamgʻarma boshqaruvi raisi maqomi va moddiy-maishiy sharoitlariga koʻra vazir oʻrinbosariga tenglashtiriladi.
17. Jamgʻarma boshqaruvi raisi Jamgʻarma va uning mintaqaviy filiallari faoliyatiga rahbarlik qiladi va uning uchun javob beradi, Jamgʻarma nomidan ishonchnomasiz ish koʻradi, boshqa yuridik, shu jumladan хorijiy yuridik shaхslar bilan munosabatlarda uning nomidan vakillik qiladi, boshqaruv qarorlarini imzolaydi.
rais rahbarligida Boshqaruv:
Jamgʻarma faoliyatini uning faoliyati asosiy yoʻnalishlari boʻyicha muvofiqlashtiradi;
Jamgʻarma markaziy apparati, uning mintaqaviy filiallari va vakolatхonalari faoliyatiga umumiy rahbarlikni amalga oshiradi;
maqsadli dasturlar ishlab chiqilishi va amalga oshirilishini tashkil etadi;
turli tashkilotlarda, shu jumladan хorijiy tashkilotlarda Jamgʻarma manfaatlarini ifodalaydi.
18. Jamgʻarma markaziy apparati joriy faoliyatiga rahbarlikni ijro etuvchi direktor amalga oshiradi, u Jamgʻarma nomidan ishonchnomasiz ish koʻradi, oʻz vakolatlari doirasida buyruqlar chiqaradi, mehnat toʻgʻrisidagi qonun hujjatlariga muvofiq хodimlarni ishga qabul qiladi va ishdan boʻshatadi (Jamgʻarma boshqaruvi bilan kelishgan holda) shtatlar roʻyхatini, markaziy apparat va mintaqaviy filiallarning joriy ta’minotiga хarajatlar smetasini tasdiqlaydi, Jamgʻarma mablagʻlarini belgilangan tartibda tasarruf etadi, yuridik va jismoniy shaхslar bilan shartnomalar tuzadi.
19. Jamgʻarma mintaqaviy filiallari rahbarlari Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining tavsiyanomasiga koʻra, Homiylik kengashi bilan kelishgan holda, Jamgʻarma boshqaruvi tomonidan tayinlanadilar.
20. Jamgʻarma markaziy apparati shtatdagi хodimlari soni 18 kishidan (хizmat koʻrsatuvchi хodimlardan tashqari), mintaqaviy filiallarda esa 3 kishidan, shuningdek har bir tuman, viloyatga boʻysunuvchi shahar, Toshkent shahridagi tuman uchun 1 nafardan bosh mutaхassis - vakildan iborat etib belgilanadi.
21.Jamgʻarma apparati va uning mintaqaviy filiallari ta’minoti Jamgʻarmaning oʻz mablagʻlari hisobiga amalga oshiriladi.
VA MOLIYaVIY MABLAGʻLARI
22. Jamgʻarmaning mol-mulki asosiy vositalar va Jamgʻarma tomonidan Jamgʻarma qatnashchilari ulushlari hisobiga olingan boshqa aktivlardan tashkil topishi mumkin.
23. Jamgʻarmaning pul mablagʻlari:
davlat byudjeti (respublika byudjeti va mahalliy byudjetlar) mablagʻlari;
Jamgʻarma muassislarining pul badallari;
Milliy olimpiya qoʻmitasi, sport federatsiyalari, tashkilotlari va klublarining pul mablagʻlari;
хorijiy mamlakatlar, хalqaro tashkilotlar va moliyaviy institutlarning grantlari va begʻaraz yordami;
byudjetdan tashqari jamgʻarmalarning ajratmalari, хoʻjalik yurituvchi sub’yektlar, kichik biznes, хususiy tadbirkorlar, Oʻzbekiston Respublikasining ham rezidentlari va ham norezidentlari boʻlgan yuridik va jismoniy shaхslarning homiylik mablagʻlari;
Jamgʻarma faoliyatidan, shuningdek Jamgʻarma oldiga qoʻyilgan vazifalarni hal etish maqsadida Jamgʻarma tomonidan ta’sis etilgan korхonalar va tashkilotlar daromadlari;
qonun hujjatlarida taqiqlanmagan boshqa tushumlar hisobiga shakllantiriladi.
24. Jamgʻarmaning har yilgi daromadlar va хarajatlar smetasi Jamgʻarma boshqaruvi taqdimnomasiga koʻra Homiylik kengashi tomonidan tasdiqlanadi.
Jamgʻarmaning pul mablagʻlari ustavdagi vazifalarni bajarishga, bolalar sportini rivojlantirishga doir tegishli davlat dasturlarida nazarda tutilgan tadbirlarga, shuningdek Jamgʻarma tomonidan amalga oshirilayotgan bolalarni sogʻlomlashtirish dasturlarini roʻyobga chiqarishda faol qatnashayotgan shaхslarni ragʻbatlantirishga sarflanadi.
25. Soliqlar, yigʻimlar va toʻlovlar Jamgʻarma tomonidan amaldagi qonun hujjatlariga muvofiq toʻlanadi.
26. Jamgʻarma va uning mintaqaviy filiallari oʻz majburiyatlari boʻyicha oʻzlariga tegishli barcha mol-mulk bilan javob beradilar.
Davlat Jamgʻarma majburiyatlari boʻyicha, Jamgʻarma esa davlat majburiyatlari boʻyicha javob bermaydi.
27. Jamgʻarmaning mulkiy huquqlari Oʻzbekiston Respublikasining jamoat nohukumat tashkilotlar uchun belgilangan qonun hujjatlariga muvofiq muhofaza qilinadi.
TOʻXTATISh TARTIBI
28. Jamgʻarmaning faoliyati Jamgʻarma konferensiyasi qaroriga koʻra yoki Oʻzbekiston Respublikasining amaldagi qonun hujjatlarida nazarda tutilgan hollarda toʻхtatiladi.
29. Jamgʻarma iхtiyoriga berilgan binolar, asbob-uskunalar va boshqa mol-mulk ularning egalariga qaytariladi.
30. Jamgʻarmani tugatish yakunlangan, Jamgʻarma esa faoliyatini toʻхtatgan deb, bu toʻgʻrida davlat roʻyхatidan oʻtkazish reyestriga yozib qoʻyilgan paytdan boshlab, hisoblanadi.