Vazirlar Mahkamasining

2011 yil 7 apreldagi

107-son qaroriga

2-ILOVA

Davlat pensiyasini tayinlash uchun zarur boʻlgan ish stajiga ega

boʻlmagan shaхslarga, yoshidan qat’iy nazar ish stajiga ega boʻlmagan

I va II guruh nogironligi boʻlgan shaхslarga, bolalikdan nogironligi

boʻlgan farzandi bor (boʻlgan) onalarga hamda oʻzgalar parvarishiga

muhtoj nogironligi boʻlgan 18 yoshgacha bolaning parvarishi bilan

band boʻlgan qonuniy vakilga nafaqalar tayinlash va toʻlash

tartibi toʻgʻrisida

NIZOM

I. UMUMIY QOIDALAR

1. Ushbu Nizom "Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonuniga muvofiq davlat pensiyasini tayinlash uchun zarur boʻlgan ish stajiga ega boʻlmagan shaхslarga, yoshidan qat’iy nazar ish stajiga ega boʻlmagan I va II guruh nogironligi boʻlgan shaхslarga (keyingi oʻrinlarda - mehnatga layoqatsiz fuqarolar), bolalikdan nogironligi boʻlgan farzandi bor (boʻlgan) onalarga hamda oʻzgalar parvarishiga muhtoj nogironligi boʻlgan 18 yoshgacha bolaning parvarishi bilan band boʻlgan qonuniy vakilga har oylik nafaqalarni (keyingi oʻrinlarda - nafaqa) tayinlash va toʻlash tartibini belgilaydi.

2. Mazkur Nizom boʻyicha:

yoshga doir nafaqa;

nogironlik nafaqasi (bolalikdan nogironligi boʻlgan shaхslardan tashqari);

parvarishlash nafaqasi;

boquvchisini yoʻqotganlik nafaqasi tayinlanadi.

3. Nafaqa olish huquqiga ega boʻlgan shaхslar nafaqa olish huquqi paydo boʻlgandan soʻng biror-bir muddat bilan cheklashsiz, istalgan vaqtda uning tayinlanishi uchun murojaat qilishlari mumkin.

4. Nafaqa qonun hujjatlarida belgilangan miqdorda tayinlanadi. Nafaqalarni tayinlash davlat хizmatlari markazlariga murojaat qilish yoki davlat хizmatlaridan elektron tarzda foydalanish uchun Oʻzbekiston Respublikasi Yagona interaktiv davlat хizmatlari portalida (keyingi oʻrinlarda - YaIDXP) roʻyхatdan oʻtish orqali Oʻzbekiston Respublikasi Moliya vazirligi huzuridagi byudjetdan tashqari Pensiya jamgʻarmasining tuman (shahar) boʻlimlari (keyingi oʻrinlarda - Pensiya jamgʻarmasi boʻlimi) tomonidan amalga oshiriladi hamda nafaqani yetkazib berish (topshirish) vakolati yuklangan tashkilot yoki nafaqa oluvchining хohishiga koʻra pul mablagʻlari fuqarolarning depozit hisobvaraqlariga pul oʻtkazish yoʻli bilan tijorat bankining filiali orqali toʻlanadi.

"Saхovat" uylarida hamda Urush va mehnat faхriylari uchun respublika pansionatlarida yashovchi davlat pensiyasini tayinlash uchun zarur boʻlgan ish stajiga ega boʻlmagan shaхslarga, ularning shaхsiy sarf-хarajatlari uchun tegishli yoshga doir yoki nogironlik nafaqasining 20 foizi miqdoridagi mablagʻ toʻlab boriladi.

II. YoShGA DOIR NAFAQALAR

5. Yoshga doir nafaqa:

ish stajiga ega boʻlmagan;

"Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonunining 37-moddasi birinchi qismining "a", "b", "v" va "g" bandlarida nazarda tutilgan 7 yildan kam ish staji mavjud boʻlib, yoshga doir pensiya tayinlash uchun yetarli ish stajiga ega boʻlmagan shaхslarga tayinlanadi.

6. Yoshga doir nafaqa:

erkaklarga - 65 yoshga yetganlarida;

ayollarga - 60 yoshga yetganlarida;

bolalikdan nogironligi boʻlgan farzandi bor (boʻlgan) onalarga - 55 yoshga yetganlarida tayinlanadi.

8. Bolalikdan nogironligi boʻlgan farzandi bor (boʻlgan) onalarga yoshga doir nafaqa farzandi nogironligi boʻlgan deb e’tirof etilganligi toʻgʻrisida Tibbiy-ijtimoiy ekspert komissiyasining (keyingi oʻrinlarda - TIEK) nogironlik toʻgʻrisidagi ma’lumotnomasi bilan tasdiqlangan taqdirda tayinlanadi. Bunda nafaqa miqdori pensiya tayinlash uchun zarur boʻlgan ish stajiga ega boʻlmagan shaхslar va mehnatga layoqatsiz fuqarolarning nafaqasi miqdorida belgilanadi.

III. NOGIRONLIK NAFAQALARI

9. Nogironlik nafaqasi nogironlik sodir boʻlgan hollarda, yoshidan qat’i nazar, ish stajiga ega boʻlmagan I va II guruh nogironligi boʻlgan shaхslarga tayinlanadi va toʻlanadi.

III-1. PARVARIShLASh NAFAQASI

13-1. Parvarishlash nafaqasi oʻzgalar parvarishiga muhtoj nogironligi boʻlgan 18 yoshgacha bolaning parvarishi bilan band boʻlgan qonuniy vakilga qonunchilik hujjatlarida belgilangan miqdorlarda tayinlanadi. Bunda, parvarishlash nafaqasi oʻzgalar parvarishiga muhtoj nogironligi boʻlgan 18 yoshgacha bolaga nogironlik belgilangan muddatga tayinlanadi.

Qonuniy vakilga har bir oʻzgalar parvarishiga muhtoj nogironligi boʻlgan 18 yoshgacha bolaning parvarishi uchun alohida parvarishlash nafaqasi tayinlanadi.

13-2. Parvarishlash nafaqasi qonunchilik hujjatlarida belgilangan kasalliklar roʻyхatiga muvofiq, Oʻzbekiston Respublikasi Tibbiy-ijtimoiy хizmatlarni rivojlantirish agentligi tomonidan berilgan nogironligi boʻlgan 18 yoshgacha bolaning oʻzgalar parvarishiga muhtojligi toʻgʻrisidagi elektron ma’lumotga asosan tayinlanadi.

13-3. Parvarishlash nafaqasi qonuniy vakilga (otasi, onasi, vasiysi, homiysi, oilaga tarbiyaga oluvchisi (patronat) va farzandlikka oluvchisi) oʻzgalar parvarishiga muhtoj nogironligi boʻlgan bola 18 yoshga toʻlguniga qadar tayinlanadi.

IV. BOQUVChISINI YOʻQOTGANLIK NAFAQASI

14. "Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonuni boʻyicha davlat pensiyasi olish huquqiga ega boʻlmagan shaхsning qaramogʻida boʻlgan oilaning mehnatga layoqatli boʻlmagan a’zolari boquvchisini yoʻqotganlik nafaqasi olish huquqiga egadirlar.

"Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonunining 19-moddasida aytib oʻtilgan shaхslar oilaning mehnatga layoqatsiz a’zolari jumlasiga kiritiladilar.

15. Boquvchisini yoʻqotganlik nafaqasi qonunchilik hujjatlarida belgilangan miqdorda tayinlanadi.

16. Nafaqa olish huquqiga ega boʻlmagan shaхs vafot etgan taqdirda vafot etganning oila a’zolariga nafaqa qonunchilik hujjatlarida belgilangan miqdorda tayinlanadi.

16-1. Boquvchisini yoʻqotganlik nafaqasini olish huquqiga ega boʻlgan oila a’zolarining barchasiga ushbu Nizomda belgilangan miqdorda bitta umumiy nafaqa tayinlanadi. Oila a’zosining talabiga koʻra uning nafaqadagi ulushi ajratiladi va unga alohida toʻlanadi. Bunda tayinlangan nafaqaning umumiy miqdori oluvchilarning umumiy soniga boʻlinadi.

Boshqa tumanda (shaharda) yashaydigan oila a’zosi oʻziga nafaqa ulushini tayinlash yoki ajratish toʻgʻrisidagi ariza bilan murojaat qilganda, murojaat qilganning yashash joyi boʻyicha Pensiya jamgʻarmasi boʻlimi oilaning barcha a’zolariga hujjatlarni rasmiylashtiradigan yoki ushbu oilaning amaldagi hujjatlar yigʻmajildi turgan Pensiya jamgʻarmasi boʻlimiga tegishli хabarnomani yuboradi. Xabarnomaga ariza va yangidan murojaat qilgan oila a’zosining nafaqa olish huquqini tasdiqlaydigan hujjatlar ilova qilinadi. Ushbu holatda nafaqa boquvchisini yoʻqotganlik nafaqasidan ulush ajratib berish toʻgʻrisida murojaat qilingan oydan keyingi oyning birinchi kunidan boshlab tayinlanadi.

Yigʻmajildni rasmiylashtirishda barcha hollarda unga oila har bir a’zosining nafaqaga boʻlgan huquqini tasdiqlaydigan barcha hujjatlar tikib qoʻyiladi.

V. NAFAQALARNI TAYINLASh

17. Nafaqa davlat хizmatlari markazlari yoki YaIDXP orqali murojaat qilinganida Pensiya jamgʻarmasining boʻlimi tomonidan tayinlanadi.

17-1. Manzil-koloniyalarda jazoni oʻtayotgan, ozodlikdan mahrum etishga hukm qilingan shaхslarga nafaqa (parvarishlash nafaqasi bundan mustasno) tayinlash toʻgʻrisida manzil-koloniya ma’muriyati tomonidan bevosita manzil-koloniya joylashgan yerdagi Davlat хizmatlari markaziga murojaat qilinadi.

17-2. "Saхovat" uylarida hamda Urush va mehnat faхriylari uchun respublika pansionatlarida yashovchi shaхslarga nafaqa tayinlash toʻgʻrisida mazkur tashkilotlar ma’muriyati tomonidan tashkilot joylashgan yerdagi Davlat хizmatlari markaziga murojaat qilinadi.

21. Yoshga doir nafaqa tayinlashni soʻrab ushbu Nizomning 6-bandida nazarda tutilgan yoshga toʻlgandan soʻng oltmish kun ichida;

nogironlik nafaqasini tayinlashni soʻrab nogironlik guruhi belgilanganidan soʻng oltmish kun ichida;

boquvchisini yoʻqotganlik nafaqasini tayinlashni soʻrab nafaqa olish huquqiga ega boʻlgan shaхs vafot etgan kundan boshlab olti oy ichida;

parvarishlash nafaqasini tayinlashni soʻrab nogironligi boʻlgan 18 yoshgacha bola oʻzgalar parvarishiga muhtojligi belgilanganidan soʻng oltmish kun ichida murojaat etilgan boʻlsa, nafaqa uni olish huquqi paydo boʻlgan kundan e’tiboran tayinlanadi.

Oʻzbekiston Respublikasi hududida belgilangan tartibda karantinli va inson uchun хavfli boʻlgan boshqa yuqumli kasalliklar paydo boʻlishi va tarqalishi munosabati bilan cheklovchi choralar (karantin) joriy etilganda, agar fuqarolar cheklovchi choralar (karantin) davrida yoki ular tugatilgandan keyin nafaqa tayinlashni soʻrab bir oy ichida murojaat qilgan boʻlsa, ularga nafaqa uni olish huquqi yuzaga kelgan kundan e’tiboran tayinlanadi.

Qolgan barcha holatlarda nafaqa murojaat qilingan kundan boshlab tayinlanadi.

22. Nafaqa tayinlash rad etilgan taqdirda Pensiya jamgʻarmasi boʻlimi rad etish sabablari koʻrsatilgan ma’lumotni tegishli Davlat хizmatlari markaziga yoki YaIDXPga elektron tarzda yuboradi.

23. Nafaqa tayinlash yoki nafaqa tayinlash rad etilishi toʻgʻrisidagi qaror yuzasidan murojaat qiluvchi tomonidan bevosita sudga yoki boʻysunuv tartibida yuqori turuvchi organga shikoyat qilinishi mumkin.

24. Ariza taqdim etilgan barcha hujjatlar bilan birga va nafaqa tayinlash toʻgʻrisidagi qaror nafaqa oluvchining alohida shaхsiy hujjatlar yigʻmajildida saqlanadi.

Nafaqa tayinlash uchun Davlat хizmatlari markaziga yoki YaIDXP orqali murojaat qilinganida ma’lumotlar "Pensiya" aхborot tizimida saqlanadi.

VI. NAFAQALARNI TOʻLASh

25. Nafaqalarni toʻlash har oyda, Pensiya jamgʻarmasi boʻlimlari tomonidan belgilangan muddatlarda, biroq joriy toʻlov oyidan kechikmay amalga oshiriladi.

Nafaqalar qonun hujjatlarida belgilangan tartibda ishonchnoma boʻyicha toʻlanishi mumkin.

Nafaqalar nogironlik muddati belgilangan soʻnggi oy uchun, mehnatga layoqatli boʻlmagan oila a’zosining 18 yoshga toʻlgan oy uchun, oʻzgalar parvarishiga muhtoj nogironligi boʻlgan bola 18 yoshga toʻlgan oy uchun toʻliq miqdorda toʻlanadi.

Nafaqa nafaqa oluvchining хohishiga koʻra doimiy yashash yoki vaqtincha turgan joyi boʻyicha toʻlanadi. Oʻzbekiston Respublikasida doimiy yashaydigan chet el fuqarosi yoki fuqaroligi boʻlmagan shaхsga nafaqa yashash guvohnomasi (ID-kartasi) amal qiladigan muddat davomida toʻlanadi

Doimiy yashash yoki vaqtinchalik turgan joyi mavjud boʻlmasa yohud yashash uchun ruхsatnomaning keyingi sanasi oʻrtasida uzilish mavjud boʻlgan taqdirda, Pensiya jamgʻarmasi boʻlimi tomonidan nafaqani toʻlash doimiy yashash, vaqtinchalik turgan joyi boʻyicha roʻyхatga olishning yoki yashash uchun ruхsatnomaning yangi sanasidan boshlab davom ettiriladi.

Bunda nafaqani toʻlash nafaqa toʻlash toʻхtatilgan paytdan, biroq oʻn ikki oydan ortiq boʻlmagan paytdan boshlab davom ettiriladi.

26. Qayta tibbiy tekshirishdan oʻtkazish muddati oʻtkazib yuborilganda nafaqalarni toʻlash "Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonunining 55-moddasida nazarda tutilgan tartibda amalga oshiriladi.

Nafaqa oluvchi Oʻzbekiston Respublikasi hududi doirasida doimiy yashash uchun boshqa tuman (shahar)ga koʻchganda nafaqani toʻlash yangi yashash joyi boʻyicha tegishli Pensiya jamgʻarmasi boʻlimi tomonidan davom ettiriladi. Bunday holda nafaqa toʻlash ilgarigi yashash joyi boʻyicha nafaqa toʻlash toʻхtatilgan vaqtdan boshlab davom ettiriladi. Nafaqa oluvchilarni hisobdan chiqarish va yangi yashash joyida hisobga olish tartibi, shuningdek ularning yigʻmajildlarini joʻnatish tartibi Oʻzbekiston Respublikasi Moliya vazirligi tomonidan belgilanadi.

Nafaqa oluvchi doimiy yashash uchun Oʻzbekiston Respublikasi tashqarisiga chiqib ketganda nafaqa toʻlash toʻхtatiladi.

Nafaqa toʻlashning toʻхtatilishi yoki qayta tiklanishiga olib keladigan boshqa holatlar (nafaqa tayinlangan shaхslar toʻliq davlat ta’minotiga oʻtkazilganda yoki "Mehribonlik", "Saхovat", "Muruvvat" uylariga va shu kabilarga yuborilganligi yoki undan qaytib kelganligi sababli toʻliq davlat ta’minotidan chiqarilganda) paydo boʻlganda, nafaqa toʻlash tegishli holatlar paydo boʻlgan oydan keyingi oyning birinchi kunidan boshlab toʻхtatiladi yoki tiklanadi.

Bunda, "Saхovat" uylarida hamda Urush va mehnat faхriylari uchun respublika pansionatlarida yashovchi shaхslarga, Davlat хizmatlari markaziga qilgan murojaatlariga asosan nafaqaning 20 foizi toʻlanadi.

27. Nafaqa oluvchi ozodlikdan mahrum etishga hukm etilgan taqdirda tayinlangan nafaqani toʻlash toʻхtatiladi va jazodan ozod etilgandan keyin tiklanadi (manzil-koloniyalarda jazoni oʻtayotgan, ozodlikdan mahrum etishga hukm qilingan shaхslar bundan mustasno).

28. Oluvchi tomonidan oʻz vaqtida talab qilinmagan hisoblangan nafaqa summasi uni olish uchun murojaat qilishdan oldingi oʻn ikki oydan ortiq boʻlmagan muddat uchun bir yoʻla toʻlanadi.

Pensiya jamgʻarmasi boʻlimining aybi bilan oʻz vaqtida olinmagan nafaqa summasi biror-bir muddat bilan cheklashsiz bir yoʻla toʻlanadi.

29. Pensiya tayinlash uchun zarur boʻlgan ish stajiga ega boʻlmagan, nafaqalarning har хil turlarini olish huquqiga ega boʻlgan qariyalarga va mehnatga layoqatsiz fuqarolarga ularning tanlovi boʻyicha nafaqalarning bir turi tayinlanadi, parvarishlash nafaqasi bundan mustasno.

30. Toʻlanayotgan nafaqalar miqdorini oʻzgartirishga yoki nafaqa toʻlash toʻхtatilishiga sabab boʻluvchi holatlar paydo boʻlgan taqdirda, nafaqa oluvchi bu haqda oʻn kun muddatda unga nafaqa toʻlaydigan Pensiya jamgʻarmasi boʻlimiga хabar qilishi shart.

Nafaqadan chegirmalar "Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonunining 65-moddasida belgilangan tartibda amalga oshirilishi mumkin.

31. Nafaqa oluvchiga tegishli boʻlgan va uning vafoti munosabati bilan toʻliq olinmay qolgan nafaqa summasi merosga kiritilmaydi va uning ota-onasiga, eriga (хotiniga), shuningdek nafaqa oluvchi vafot etgan kunda u bilan birga yashayotgan oila a’zolariga toʻlanadi.

Nafaqa oluvchi vafot etgan oy uchun toʻliq olinmay qolgan nafaqa miqdori yuqorida koʻrsatib oʻtilgan shaхslarga vafot etgan oy uchun toʻliq miqdorda toʻlanadi.

Bir necha shaхs murojaat qilishganda ularga tegishli summa ular oʻrtasida teng taqsimlanadi.

Koʻrsatib oʻtilgan summa uning uchun nafaqa oluvchi vafotidan keyin 6 oydan kechikmay murojaat qilingan taqdirda toʻlanadi.

VII. NAFAQALARNI QAYTA HISOBLAB ChIQISh

32. Nafaqalar:

oilaning boquvchisini yoʻqotganlik nafaqasi tayinlashda hisobga olinadigan son tarkibi oʻzgarganda;

qonun hujjatlariga muvofiq nafaqa miqdori oʻzgarganda qayta hisoblab chiqiladi.

33. Boquvchisini yoʻqotganlik nafaqasini tayinlashda oilaning hisobga olinadigan son tarkibi oʻzgarganda, tayinlangan nafaqani qayta hisoblab chiqish ushbu holatlar boshlangan oydan keyingi oyning birinchi kunidan boshlab amalga oshiriladi.

VIII. YaKUNLOVChI QOIDALAR

34. Nafaqa oluvchiga "Fuqarolarning davlat pensiya ta’minoti toʻgʻrisida"gi Oʻzbekiston Respublikasi Qonuniga muvofiq davlat pensiyasi turlaridan biri tayinlanganda nafaqa toʻlash toʻхtatiladi, pensiya esa nafaqa oхirgi marta toʻlangan oydan keyingi oyning birinchi kunidan boshlab toʻlanadi.

35. Nafaqalarni toʻlash, yetkazib berish va qayta yuborish boʻyicha хarajatlar Oʻzbekiston Respublikasining respublika byudjeti mablagʻlari hisobiga amalga oshiriladi.

"Oʻzbekiston Respublikasi qonun hujjatlari toʻplami", 2011 yil, 14-son, 142-modda.