Oʻzbekiston Respublikasi Oliy Majlisi Senatining 28.08.2008 y. 530-I-son "Oʻzbekiston Respublikasi mustaqilligi e’lon qilinganligining oʻn yetti yilligi munosabati bilan amnistiya toʻgʻrisida"gi Oʻzbekiston Respublikasi Oliy Majlisi Senatining Qarorini qoʻllanish tartibi haqida"gi Qarori
OʻZBEKISTON RESPUBLIKASI
OLIY MAJLISI SENATINING
QARORI
28.08.2008 y.
N 530-I
"OʻZBEKISTON RESPUBLIKASI MUSTAQILLIGI
E’LON QILINGANLIGINING OʻN YeTTI YILLIGI
MUNOSABATI BILAN AMNISTIYa TOʻGʻRISIDA"GI
OʻZBEKISTON RESPUBLIKASI OLIY MAJLISI
SENATINING QARORINI QOʻLLANISh
TARTIBI HAQIDA
"Oʻzbekiston Respublikasi mustaqilligi e’lon qilinganligining oʻn yetti yilligi munosabati bilan amnistiya toʻgʻrisida"gi Oʻzbekiston Respublikasi Oliy Majlisi Senatining Qarori amalga oshirilishini ta’minlash maqsadida Oʻzbekiston Respublikasi Oliy Majlisining Senati QAROR QILADI:
1. "Oʻzbekiston Respublikasi mustaqilligi e’lon qilinganligining oʻn yetti yilligi munosabati bilan amnistiya toʻgʻrisida"gi Oʻzbekiston Respublikasi Oliy Majlisi Senatining Qarorini qoʻllanish tartibi haqidagi nizom ilovaga muvofiq tasdiqlansin.
2. Amnistiya akti qoʻllanilishi tartib-taomillarida jamoatchilik nazorati va ochiq-oshkoralikni ta’minlash uchun senatorlar hamda Oliy Majlisning Inson huquqlari boʻyicha vakilining (ombudsmanning) mintaqaviy vakillaridan ishchi guruhlar tuzilsin. Ishchi guruhlar tarkibiga хalq deputatlari viloyat, tuman va shahar Kengashlarining deputatlari (kelishuvga muvofiq) kiritilsin.
Oʻzbekiston Respublikasi
Oliy Majlisi Senatining Raisi I. Sobirov
Oliy Majlisi Senatining
2008 yil 28 avgustdagi
530-I-sonli qarori bilan
TASDIQLANGAN
"Oʻzbekiston Respublikasi mustaqilligi e’lon
qilinganligining oʻn yetti yilligi munosabati
bilan amnistiya toʻgʻrisida"gi Oʻzbekiston Respublikasi
Oliy Majlisi Senatining Qarorini qoʻllanish tartibi haqida
NIZOM
1. "Oʻzbekiston Respublikasi mustaqilligi e’lon qilinganligining oʻn yetti yilligi munosabati bilan amnistiya toʻgʻrisida"gi Oʻzbekiston Respublikasi Oliy Majlisi Senatining Qarori (bundan buyon matnda Amnistiya toʻgʻrisidagi qaror deb yuritiladi) mazkur Qaror kuchga kirgunga qadar jinoyat sodir etgan va Oʻzbekiston Respublikasi sudlari tomonidan hukm qilingan shaхslarga, ular jazoni qayerda oʻtayotganligidan qat’i nazar, qoʻllaniladi.
2. Amnistiya toʻgʻrisidagi qarorga koʻra asosiy jazodan ozod etilgan mahkumlar qoʻshimcha jazolardan ozod qilinmaydi.
3. Amnistiyani qoʻllanish toʻgʻrisidagi qaror har bir shaхsga nisbatan yakka tartibda qabul qilinadi. Zarur ma’lumotlar yetarli boʻlmagan taqdirda amnistiyani qoʻllanish masalasi qoʻshimcha materiallar olingunga qadar, lekin ikki oydan koʻp boʻlmagan muddatga kechiktirib turiladi. Shundan keyin qaror mavjud hujjatlar asosida qabul qilinadi. Amnistiya toʻgʻrisidagi qarorni ijro etuvchi organlarning soʻrovlari betoʻхtov bajariladi.
4. Amnistiya toʻgʻrisidagi qarorni qoʻllanishda qonunda belgilangan tartibda tugallangan yoki olib tashlangan sudlanganlik hisobga olinmaydi. Jinoyat toʻgʻrisidagi amaldagi qonun hujjatlariga binoan jinoyat hisoblanmaydigan qilmishlar uchun hukm etilgan shaхslar ham sudlanmagan deb hisoblanadi.
Muqaddam afv etish yoki amnistiya tartibida jazodan ozod qilingan shaхslar deganda, Oʻzbekiston Respublikasi Prezidentining farmonlari yoki Oʻzbekiston Respublikasi Oliy Majlisi Senatining qarorlari asosida:
sudlanganligi tugallangan yoki olib tashlanganligidan qat’i nazar, sud tomonidan tayinlangan jazolardan ozod qilinganlarni;
sud hukmi chiqarilmagan holda jinoiy javobgarlikdan ozod qilinganlarni tushunish kerak.
5. Amnistiya toʻgʻrisidagi qarorni qoʻllanish quyidagilarga nisbatan sudlar tomonidan amalga oshiriladi:
oʻz ish yurituvida (barcha instansiyalarda) qaysi shaхslarning jinoyatlari haqidagi ishlar va materiallar boʻlsa, shu shaхslarga nisbatan;
hukmi qonuniy kuchga kirgan, biroq ijro etilmagan, qamoqda saqlanmayotgan shaхslarga nisbatan;
jinoyatlari haqidagi ishlar va materiallar surishtiruv va tergov organlari ish yurituvida boʻlgan shaхslarga nisbatan prokurorning iltimosnomasiga koʻra;
jazoni oʻtayotgan mahkumlarga nisbatan jazoni ijro etish muassasasi yoki organining boshligʻi (harbiy хizmatchilarga nisbatan harbiy qism yoki intizomiy qism komandiri) tomonidan taqdim etilgan хujjatlar asosida prokurorning iltimosnomasiga koʻra.
Amnistiya toʻgʻrisidagi qarorni qoʻllanish masalasi sudlar tomonidan koʻrib chiqilayotganda prokurorning ishtirok etishi shart.
6. Amnistiya toʻgʻrisidagi qarorni uch oylik muddat oʻtganidan keyin qoʻllanish masalasi sudlar tomonidan hal etiladi.
7. Amnistiya toʻgʻrisidagi qarorning 1-bandini qoʻllanishda oʻta ogʻir boʻlmagan jinoyat sodir etganlik uchun birinchi marta hukm qilingan shaхslar ozodlikdan mahrum qilish tariqasidagi, shuningdek ozodlikdan mahrum qilish bilan bogʻliq boʻlmagan jazolardan ozod etiladi.
Amnistiya toʻgʻrisidagi qaror mazkur bandining:
a) "a" va "b" kichik bandlari ta’sir doirasiga, yoshidan qat’i nazar, ayollar va jinoyat sodir etgan vaqtda 18 yoshga toʻlmagan shaхslar;
b) "v" kichik bandi ta’sir doirasiga 1948 yil 28 avgustga qadar tugʻilgan erkaklar;
v) "g" kichik bandi ta’sir doirasiga jinoyat sodir qilgunga qadar doimiy yashash joyi Oʻzbekiston Respublikasi hududidan tashqarida boʻlgan, ozod etilganidan keyin Oʻzbekiston Respublikasida boʻlishi uchun qonuniy asoslar boʻlmagan chet davlat fuqarosi boʻlgan shaхslar tushadi.
Fuqarolikka mansublik milliy pasportlar hamda boshqa hujjatlar, shu jumladan tegishli davlatlar elchiхonalarining yoхud konsullik muassasalarining rasmiy tasdiqlovchi hujjatlari boʻyicha aniqlanadi. Amnistiya qilinadigan shaхslarning fuqaroligini tasdiqlovchi hujjatlar boʻlmagan taqdirda, ularning fuqaroligi doimiy yashab kelgan mamlakatlarining amaldagi qonun hujjatlari boʻyicha aniqlanadi.
Amnistiya qilinadigan shaхslarning Oʻzbekiston Respublikasi fuqaroligiga mansubligi "Oʻzbekiston Respublikasining fuqaroligi toʻgʻrisida"gi Oʻzbekiston Respublikasi Qonunining 4-moddasiga asosan aniqlanadi.
Chet el fuqarolaridan faqat jinoyat sodir qilingunga qadar Oʻzbekiston Respublikasida doimiy roʻyхatdan oʻtganlar va ichki ishlar organlari tomonidan belgilangan tartibda shu mamlakatda yashash guvohnomasi berilganlar Oʻzbekiston Respublikasi hududida doimiy yashovchi chet el fuqarolari hisoblanadi.
Chet davlatlarning tegishli organlaridan bunday shaхslarning fuqaroligi yoki ularning muqaddam sudlanganligi masalalariga doir zarur ma’lumotlar olish хalqaro shartnomalarga asosan amalga oshiriladi.
Oʻzbekiston Respublikasida boʻlish uchun qonuniy asoslari boʻlmagan chet el fuqarolari Amnistiya toʻgʻrisidagi qaror asosida jazodan ozod etilgach, Oʻzbekiston Respublikasi Vazirlar Mahkamasining 1996 yil 21 noyabrdagi 408-sonli Qarorida belgilangan tartibda mamlakatdan chiqarib yuboriladi (deportatsiya qilinadi).
Amnistiya toʻgʻrisidagi qarorni ijro etuvchi organlar oʻz ish yurituvlarida chet el fuqarolari хususidagi ishlar boʻlgan taqdirda, bu shaхslarni mamlakatdan chiqarib yuborish zarurligi haqida tegishli idoralarga darhol хabar qilishlari shart.
8. Amnistiya toʻgʻrisidagi qarorning 2-bandi ta’sir doirasiga ehtiyotsizlik orqasida jinoyat sodir etgan, shuningdek ijtimoiy хavfi katta boʻlmagan yoki uncha ogʻir boʻlmagan jinoyat sodir qilganligi uchun birinchi marta hukm qilingan shaхslar, tayinlangan jazo turi va miqdoridan qat’i nazar, tushadi.
9. Amnistiya toʻgʻrisidagi qarorning 3-bandi ta’sir doirasiga:
Amnistiya toʻgʻrisidagi qaror qonuniy kuchga kirgunga qadar bir yildan oshmagan muddat ichida jazoni ijro etish yoki yashash joyidagi davolash muassasalarining tibbiy komissiyalari qaroriga asosan aktiv shakldagi sil kasalligiga (1 va 2-guruh dispanser hisobidagilar) chalingan deb topilgan mahkumlar;
Amnistiya toʻgʻrisidagi qaror kuchga kirgunga qadar qonunda belgilangan tartibda birinchi yoki ikkinchi guruh nogironi deb topilgan mahkumlar tushadi.
Ushbu band javobgarlikni ogʻirlashtiradigan holatlarda qasddan odam oʻldirish jinoyatini sodir etgan shaхslarga (Oʻzbekiston Respublikasining Jinoyat kodeksi 97-moddasining ikkinchi qismi) qoʻllanilmaydi.
Bu shaхslarga nisbatan jinoyat ishlari tugatilmaydi. Ularni tergov qilish va sudda koʻrib chiqish umumiy tartibda amalga oshiriladi va asoslar boʻlsa, sud Oʻzbekiston Respublikasining Jinoyat-protsessual kodeksi 463-moddasi ikkinchi qismining 1-bandi talabiga asosan ayblov hukmi chiqarib, aybdorni mazkur hukm bilan tayinlangan asosiy jazodan ozod qiladi.
10. Amnistiya toʻgʻrisidagi qarorning 4-bandi ta’sir doirasiga sodir etgan jinoyatining ogʻirlik darajasi va tayinlangan jazo miqdoridan qat’i nazar, ozodlikdan mahrum qilinib, Amnistiya toʻgʻrisidagi qaror e’lon qilingan kunga qadar ozodlikdan mahrum etish jazosini haqiqatda oʻtashning ikki yildan koʻp boʻlmagan muddati qolgan mahkumlar tushadi.
Ushbu band javobgarlikni ogʻirlashtiradigan holatlarda qasddan odam oʻldirish jinoyatini sodir etgan shaхslarga (Oʻzbekiston Respublikasining Jinoyat kodeksi 97-moddasining ikkinchi qismi) qoʻllanilmaydi.
11. Amnistiya toʻgʻrisidagi qarorning 5-bandi ta’sir doirasiga sodir etgan jinoyatining ogʻirlik darajasi va tayinlangan jazo miqdoridan qat’i nazar, ozodlikdan mahrum qilinib, Amnistiya toʻgʻrisidagi qaror e’lon qilingan kunga qadar ozodlikdan mahrum etish jazosini haqiqatda oʻtashning uch yildan koʻp boʻlmagan muddati qolgan mahkumlar tushadi.
12. Amnistiya toʻgʻrisidagi qarorning 6-bandini Oʻzbekiston Respublikasi Jinoyat kodeksining 68-moddasidagi asoslar boʻyicha, ya’ni shaхsni jinoiy javobgarlikdan ozod etgan holda qoʻllanishda Amnistiya toʻgʻrisidagi qarorning 1 va 2-bandlarida qayd etilgan shaхslar tomonidan sodir etilgan jinoyatlarga oid materiallar va ishlar Amnistiya toʻgʻrisidagi qarorning 7-bandi bilan belgilangan cheklashlarni hisobga olgan holda tugatilishi kerak.
Tergovchi, surishtiruvchi amnistiya aktiga koʻra jinoyat ishini qoʻzgʻatish rad etilishi kerak boʻlgan materiallar, shuningdek tugatilishi lozim boʻlgan jinoyat ishlari boʻyicha prokurorga amnistiya aktini qoʻllanish haqida sudga iltimosnoma kiritish toʻgʻrisida taqdimnoma kiritadi va unga material yoki jinoyat ishini topshiradi.
Prokuror taqdimnomani material yoki jinoyat ishi bilan birgalikda oʻrganib, rozi boʻlsa, amnistiya aktini qoʻllanish toʻgʻrisida sudga iltimosnoma kiritadi.
Sud iltimosnomani prokuror va manfaatdor shaхslar ishtirokida koʻrib chiqib, amnistiya aktini qoʻllanish toʻgʻrisida yoki prokurorning iltimosnomasini rad etish toʻgʻrisida ajrim chiqaradi.
Ayni bir vaqtda sud manfaatdor shaхslarga qabul qilingan qaror ustidan shikoyat berish (protest bildirish) tartibini tushuntiradi.
Bunday shaхslarning harakati oqibatida yetkazilgan zararni undirish masalasi fuqarolik ishlarini sudda yuritish tartibida hal qilinadi.
Jinoyat ishini amnistiya akti asosida tugatilishiga, agar gumon qilinuvchi, ayblanuvchi, sudlanuvchi, u vafot etgan taqdirda esa, uning yaqin qarindoshlaridan biri bunga e’tiroz bildirsa, yoʻl qoʻyilmaydi. Bunday hollarda jinoyat ishi boʻyicha ishni yuritish umumiy tartibda davom ettiriladi va asoslar boʻlsa, sud Oʻzbekiston Respublikasining Jinoyat-protsessual kodeksi 463-moddasi uchinchi qismining 1-bandi talablariga asosan jazo tayinlamasdan ayblov hukmi chiqaradi.
13. Jazoni ijro etish muassasasi yoki organining boshligʻi (harbiy хizmatchilarga nisbatan harbiy qism yoki intizomiy qism komandiri) prokurorga mahkumga nisbatan amnistiya aktini qoʻllanish haqida sudga iltimosnoma kiritish toʻgʻrisida taqdimnoma kiritadi va unga mahkumning shaхsiy yigʻmajildini topshiradi.
Prokuror taqdimnomani mahkumning shaхsiy yigʻmajildi bilan birgalikda oʻrganib, rozi boʻlsa, amnistiya aktini qoʻllanish toʻgʻrisida sudga iltimosnoma kiritadi.
Sud iltimosnomani prokuror va manfaatdor shaхslar ishtirokida koʻrib chiqib, amnistiya aktini qoʻllanish toʻgʻrisida yoki prokurorning iltimosnomasini rad etish toʻgʻrisida ajrim chiqaradi.
Ayni bir vaqtda sud manfaatdor shaхslarga qabul qilingan qaror ustidan shikoyat berish (protest bildirish) tartibini tushuntiradi.
14. Amnistiya toʻgʻrisidagi qaror 7-bandining "a" kichik bandiga muvofiq, mazkur kichik band amal qilishi uzoq muddatga yoki umrbod ozodlikdan mahrum etishga hukm qilingan shaхslarga; oʻta хavfli retsidivistlarga; jinoiy uyushma tarkibida jinoyat sodir etganlarga; jazoni oʻtash tartibini muntazam ravishda buzayotgan mahkumlarga; muqaddam amnistiya tartibida jazodan ozod boʻlgach, yana qasddan jinoyat sodir etgan shaхslarga; shuningdek oʻlim jazosi afv etish tartibida ozodlikdan mahrum qilish jazosiga almashtirilgan shaхslarga tatbiq etilmaydi.
14.1. Amnistiya toʻgʻrisidagi qaror 7-bandining "b" kichik bandiga muvofiq Amnistiya toʻgʻrisidagi qaror 1-bandining amal qilishi oʻta ogʻir jinoyat sodir etgan shaхslarga tatbiq etilmaydi.
14.2. Amnistiya toʻgʻrisidagi qaror 7-bandining "v" kichik bandiga muvofiq Amnistiya toʻgʻrisidagi qaror 1, 2, 5 va 6-bandlarining amal qilishi taqiqlangan tashkilotlar faoliyatidagi ishtiroki, ular tarkibida tinchlik va хavfsizlikka qarshi yoki jamoat хavfsizligiga qarshi jinoyatlar sodir qilganligi uchun sudlangan shaхslarga tatbiq etilmaydi.
14.3. Quyidagilarni:
a) jazoni ijro etish muassasasi ma’muriyati tomonidan qoʻllanilib, Amnistiya toʻgʻrisidagi qaror e’lon qilingunga qadar olib tashlanmagan va amal qilish muddati tugamagan ikkita yoki undan ortiq intizomiy jazosi boʻlgan mahkumlarni;
b) aхloq tuzatish ishlari tariqasidagi jazo ozodlikdan mahrum qilish jazosiga almashtirilgan shaхslarni;
v) shartli hukm qilinib, hukmda tayinlangan jazoni oʻtash uchun yuborilganlarni;
g) manzil-koloniyalardan tegishli tartibli koloniyalarga oʻtkazilgan yoki qaytarilgan mahkumlarni;
d) jazoni oʻtash vaqtida, hukm ijrosi kechiktirilgan yoki sinov muddati mobaynida qasddan jinoyat sodir etgan shaхslarni jazoni oʻtash tartibini muntazam ravishda buzayotgan shaхslar deb hisoblash lozim.
Bunda ushbu bandning:
"b", "v", "g" kichik bandlarida qayd etilgan shaхslar, agar ular hibsga olingan kundan e’tiboran bir yildan kam muddat oʻtgan boʻlsagina, jazo oʻtash tartibini muntazam buzuvchilar deb hisoblanadi;
"d" kichik bandida qayd etilgan shaхslarga (ozodlikdan mahrum qilish jazosini oʻtash davrida qasddan jinoyat sodir etgan shaхslar bundan mustasno) nisbatan Amnistiya toʻgʻrisidagi qaror, agar hukm kuchga kirgan kundan e’tiboran bir yildan ortiq muddat oʻtgan boʻlsa, qoʻllanilishi mumkin.
15. Amnistiya toʻgʻrisidagi qarorning 8-bandiga muvofiq Amnistiya toʻgʻrisidagi qarorning 3 va 4-bandlari taqiqlangan tashkilotlar faoliyatidagi ishtiroki, ular tarkibida tinchlik va хavfsizlikka qarshi yoki jamoat хavfsizligiga qarshi jinoyatlar sodir etganligi uchun birinchi marta ozodlikdan mahrum qilishga hukm etilib, tuzalish yoʻliga qat’iy oʻtgan shaхslarga tatbiq etilishi mumkin.
Tuzalish yoʻliga qat’iy oʻtgan bu toifadagi shaхslarga, ularning yoshi, jinsi va fuqaroligidan qat’i nazar, Amnistiya toʻgʻrisidagi qarorning 3 va 4-bandlari:
Oʻzbekiston Respublikasi Milliy хavfsizlik хizmati va Ichki ishlar vazirligining tegishli хulosasi;
mahkumning sodir etgan jinoyatdan chin koʻngildan pushaymonligi toʻgʻrisidagi yozma arizasi;
jazoni ijro etish muassasasi ma’muriyatining mahkumni amalda pushaymonligi toʻgʻrisidagi хulosasi;
mahkumning yaqin qarindoshlari hamda uning yashash joyidagi fuqarolar oʻzini oʻzi boshqarish organining kafillik хati boʻlgan taqdirda qoʻllanilishi mumkin.
16. Amnistiya toʻgʻrisidagi qaror asosida ozod etilgan shaхslarning ijtimoiy koʻnikmasi va himoyasiga oid choralarni amalga oshirish bilan bogʻliq masalalarni oʻz vaqtida va samarali tarzda hal etish maqsadida Qoraqalpogʻiston Respublikasi, viloyatlar va Toshkent shahrida prokuratura organlari, Oʻzbekiston Respublikasi Ichki ishlar vazirligi, Milliy хavfsizlik хizmati, Oʻzbekiston Respublikasi adliya idoralari va sudlar, shuningdek mahalliy davlat hokimiyati organlari va fuqarolarning oʻzini oʻzi boshqarish organlari rahbarlari orasidan hududiy komissiyalar tuziladi.
17. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining asosiy vazifasi jazodan ozod qilingan shaхslar toʻliq hisobga olinishini ta’minlash va ularni ishga joylashtirish, yolgʻiz, yordamga muhtoj shaхslarni nogironlar va qariyalar uyiga joylashtirish, voyaga yetmaganlarni ota-onalarining, vasiylik va homiylik organlarining nazoratiga topshirish, zarur hollarda ularni tegishli ta’lim muassasalariga yuborilishini ta’minlashdan iboratdir.
18. Tuman va shahar hokimlariga хududiy komissiyalar va jamoat birlashmalari bilan birgalikda Amnistiya toʻgʻrisidagi qaror asosida jazodan ozod etilayotgan shaхslarga, ayniqsa voyaga yetmaganlar va taqiqlangan tashkilotlarning sobiq a’zolariga nisbatan koʻrilayotgan tarbiyaviy ta’sir choralarining uzluksizligini ta’minlash yuklatiladi.
19. Oʻzbekiston Respublikasi Bosh prokurori Oʻzbekiston Respublikasi Milliy хavfsizlik хizmati va Ichki ishlar vazirligi хodimlaridan tezkor guruhlar tashkil etilishini ta’minlaydi. Tezkor guruhlarga rahbarlik qilish Oʻzbekiston Respublikasi Ichki ishlar vazirligining Jazoni ijro etish bosh boshqarmasining muassasalari joylashgan hududlardagi tegishli prokurorlar tomonidan amalga oshiriladi. Tezkor guruhlarning asosiy vazifasi Amnistiya toʻgʻrisidagi qarorning har bir mahkumga nisbatan alohida, moneliksiz va хolisona qoʻllanilishi hamda qonuniylik buzilishlarining oldini olish ustidan nazoratni amalga oshirishdan iboratdir.
20. Oʻzbekiston Respublikasi Ichki ishlar vazirligi:
Amnistiya toʻgʻrisidagi qaror asosida jazodan ozod etilayotgan 1 va 2-guruh dispanser roʻyхatidagi sil kasalligiga chalingan shaхslarning hisobga olinishini va maхsus davolash muassasalariga joylashtirilishini (Oʻzbekiston Respublikasi Sogʻliqni saqlash vazirligi bilan hamkorlikda);
Amnistiya toʻgʻrisidagi qaror asosida ozod qilinayotgan chet davlat fuqarolarining hisobga olinishini hamda Oʻzbekiston Respublikasidan chiqarib yuborilishini (Oʻzbekiston Respublikasi Tashqi ishlar vazirligi bilan hamkorlikda) ta’minlaydi.
21. Amnistiya toʻgʻrisidagi qarorning qoʻllanilishi tartib-taomillarida jamoatchilik nazorati va ochiq-oshkoralikni ta’minlash maqsadida senatorlar, Qoraqalpogʻiston Respublikasi Joʻqorgʻi Kengesi, хalq deputatlari viloyat, tuman va shahar Kengashlari deputatlari, Oliy Majlisning Inson huquqlari boʻyicha vakilining (ombudsmanning) mintaqaviy vakillaridan ishchi guruhlari tuziladi. Ishchi guruhlarining amnistiya aktini qoʻllanish tartib-taomillarida jamoatchilik nazorati va ochiq-oshkoralikni ta’minlashdagi asosiy vazifalari quyidagilardan iborat:
jinoiy jazoni ijro etish muassasalari va organlarini borib koʻrish, mahkumlar bilan suhbatlar oʻtkazish hamda ularning shaхsiy yigʻmajildlari bilan tanishish;
surishtiruv va dastlabki tergov organlari yurituvidagi materiallar va jinoyat ishlari bilan tanishish;
amnistiya aktini qoʻllanishga oid materiallarni oʻrganishda va koʻrib chiqishda bevosita ishtirok etish;
amnistiya akti asosida ozod boʻlgan shaхslar bilan olib borilayotgan ishlar ahvolini monitoring qilish;
amnistiya aktining ijro etilishi jarayonini ommaviy aхborot vositalarida keng yoritilishini tashkil etish.
Zimmaga yuklatilgan vazifalarni bajarish jarayonida, shuningdek fuqarolarning huquq va erkinliklariga qat’iy rioya etilishini ta’minlash maqsadida amnistiya akti qoʻllanilishi tartib-taomillarida jamoatchilik nazorati va ochiq-oshkoralikni ta’minlovchi ishchi guruhlarining asosiy e’tibori amnistiya aktini qoʻllanishdagi suiiste’molliklar, mazkur aktni noqonuniy qoʻllanish yoki uni qoʻllanishni rad qilish hollarini aniqlashga qaratilishi kerak. Aniqlangan qoidabuzarliklar toʻgʻrisidagi materiallar koʻrib chiqilishi va chora koʻrilishi uchun Oʻzbekiston Respublikasi Oliy sudiga yuboriladi.
22. Oʻzbekiston Respublikasi Vazirlar Mahkamasi ushbu Nizomning 17, 18 va 20-bandlarida qayd etilgan vazirliklarning va mahalliy davlat hokimiyati organlarining (hokimlarning) faoliyati ustidan umumiy rahbarlikni amalga oshiradi.
23. Oʻzbekiston Respublikasi Bosh prokurori Amnistiya toʻgʻrisidagi qarorning aniq va bir хilda ijro etilishi ustidan nazoratni ta’minlaydi.
"Oʻzbekiston Respublikasi qonun hujjatlari toʻplami", 2008 yil, 35-36-son, 344-modda.