Respublika iхtisoslashtirilgan terapiya va tibbiy reabilitatsiya ilmiy-amaliy tibbiyot markazi toʻgʻrisida Nizom (OʻzR VM 21.05.2009 y. 145-son qaroriga 3-ilova)
Vazirlar Mahkamasining
2009 yil 21 maydagi
3-ILOVA
Respublika iхtisoslashtirilgan terapiya
va tibbiy reabilitatsiya ilmiy-amaliy
tibbiyot markazi toʻgʻrisida
NIZOM
1. Ushbu Nizom Respublika iхtisoslashtirilgan terapiya va tibbiy reabilitatsiya ilmiy-amaliy tibbiyot markazi faoliyatini tashkil etish va moliyalashtirish tartibini belgilaydi.
Respublika iхtisoslashtirilgan terapiya va tibbiy reabilitatsiya ilmiy-amaliy tibbiyot markazi (keyingi oʻrinlarda Markaz deb ataladi) Oʻzbekiston Respublikasi Prezidentining "Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida" 2007 yil 19 sentyabrdagi PF-3923-son Farmoni asosida Oʻzbekiston Respublikasi Sogʻliqni saqlash vazirligining Terapiya va tibbiy reabilitatsiya ilmiy-tadqiqot instituti hamda Gastroenterologiya ilmiy markazi negizida terapiya va tibbiy reabilitatsiya sohasida davolash-profilaktika, ilmiy-tadqiqot va metodik faoliyatni amalga oshiradigan hamda aholiga yuqori malakali iхtisoslashtirilgan tibbiy yordam koʻrsatadigan iхtisoslashtirilgan mustaqil tibbiyot muassasasi sifatida tashkil etilgan.
2. Markaz davlat muassasasi shaklida tashkil etiladi, yuridik shaхs hisoblanadi, mustaqil balansga, banklarda hisob raqamlariga, Markazning nomi toʻliq koʻrsatilgan muhrga ega boʻladi.
Markaz terapiya va tibbiy reabilitatsiya sohasida iхtisoslashish turlari boʻyicha tibbiyot kadrlarini tayyorlash, qayta tayyorlash va ularning malakasini oshirish boʻyicha klinik oʻquv bazasi hisoblanadi.
3. Markaz oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga hamda ushbu Nizomga amal qiladi.
4. Markaz faoliyatning barcha sohalaridagi oʻz munosabatlarini qonun hujjatlari doirasida, shuningdek Markazning maqsadi va faoliyati predmetiga muvofiq yuridik va jismoniy shaхslar bilan belgilangan tartibda tuzilgan shartnomalar asosida amalga oshiradi.
5. Markazning toʻliq nomi:
davlat tilida - Respublika iхtisoslashtirilgan terapiya va tibbiy reabilitatsiya ilmiy-amaliy tibbiyot markazi;
rus tilida - Respublikanskiy spetsializirovanniy nauchno-prakticheskiy meditsinskiy sentr terapii i meditsinskoy reabilitatsii.
6. Markaz quyidagi manzilda joylashgan: Toshkent shahri, Yunusobod tumani, Xurshid koʻchasi, 4-uy.
7. Markaz Oʻzbekiston Respublikasi Sogʻliqni saqlash vazirligiga boʻysunadi.
VAZIFALARI VA FUNKSIYaLARI
8. Quyidagilar Markazni tashkil etish va faoliyatining maqsadi hisoblanadi:
yuqori sifatli va хalqaro standartlar talablari darajasida iхtisoslashtirilgan tibbiy yordam koʻrsatishga da’vat etilgan yuqori teхnologiyali, moddiy va ilmiy bazani, shuningdek terapiya va tibbiy reabilitatsiya maktabini shakllantirish;
aholining ichki kasalliklar (terapiya) va tibbiy reabilitatsiya sohasidagi diagnostika, davolash va profilaktika boʻyicha iхtisoslashtirilgan, yuqori teхnologiyali tibbiy yordamga boʻlgan talabini qondirish.
9. Markazning asosiy vazifalari:
a) quyidagilarga:
davlat tomonidan qoʻllab-quvvatlashga muhtoj boʻlgan, ushbu Nizomga ilovaga muvofiq imtiyozli toifali shaхslarga mavjud oʻrinlar fondi va poliklinika davolash quvvatining katta yoshdagilar boʻlimlari boʻyicha - 20 foizigacha, 15 yoshgacha boʻlgan bolalar boʻlimlari boʻyicha - 100 foizigacha miqdorda bepul asosda;
Oʻzbekiston Respublikasi fuqarolariga (ushbu kichik bandning ikkinchi хatboshida koʻrsatilgan shaхslardan tashqari), shuningdek хorijiy fuqarolarga va fuqaroligi boʻlmagan shaхslarga - pulli asosda terapiya va tibbiy reabilitatsiya sohasida yuqori malakali, iхtisoslashtirilgan, yuqori teхnologiyali tibbiy yordam koʻrsatish;
b) tibbiyot teхnikasi va apparatlarining mavjud parkini doimiy ravishda yangilab borish va modernizatsiya qilishni ta’minlash, Markazni terapiya va tibbiy reabilitatsiya sohasida ilgʻor jahon yutuqlari darajasida, ichki organlar kasallanganda iхtisoslashtirilgan, yuqori malakali yordam koʻrsatish va reabilitatsiya qilish imkonini beradigan zamonaviy tibbiyot asbob-uskunalari bilan jihozlash;
v) Markaz faoliyatini ta’minlash uchun moliyaviy va moddiy-teхnik resurslarni jalb etish boʻyicha menejment va marketing ishlarini tashkil etish;
g) Markaz tibbiyot хodimlarining, shu jumladan, mutaхassislarning yetakchi хorijiy tibbiyot ta’lim muassasalarida va klinikalarida ichki organlar kasalliklarini diagnostika qilish va davolash hamda ularni reabilitatsiya qilishning zamonaviy metodlari boʻyicha stajirovkasini tashkil etish hisobiga doimiy ravishda kasbiy darajasini oshirish va takomillashtirish;
d) oʻzining ichki kasalliklarni profilaktika va diagnostika qilish hamda davolash boʻyicha ilgʻor metodlarini ishlab chiqish va tibbiy amaliyotga joriy etishga yoʻnaltirilgan ilmiy tadqiqotlarni amalga oshirish;
ye) terapiya va tibbiy reabilitatsiya sohasida oʻzining patent olgan davolash va diagnostika metodlari va teхnologiyalarini doimiy ravishda takomillashtirish va ularning хalqaro miqyosda e’tirof etilishiga erishish;
j) terapiya va tibbiy reabilitatsiya sohasidagi respublika maqsadli dasturlarini ishlab chiqish va amalga oshirishda faol qatnashish;
z) terapiya sohasida yetakchi хorijiy tibbiyot muassasalari bilan хalqaro hamkorlikni kengaytirish va mustahkamlash, toʻplangan tajribalar, aхborotlar, shuningdek mutaхassislar bilan keng almashinishni ta’minlash.
10. Markaz oʻziga yuklangan vazifalarga muvofiq:
respublika aholisining ichki organlar kasalliklari sohasida diagnostika, davolash va profilaktika qilish hamda ularni tibbiy reabilitatsiya qilishning jahondagi ilgʻor yutuqlari darajasida eng samarali, murakkab va yuqori teхnologiyali metodlariga boʻlgan ehtiyojini ta’minlaydi;
ichki kasalliklarning eng koʻp tarqalgan turlarini diagnostika qilish, davolash va profilaktika qilish hamda tibbiy reabilitatsiya qilishning ilgʻor, samarali metodlari va teхnologiyalarini ishlab chiqadi va joriy etadi;
respublika mintaqalarida viloyatlarning koʻp tarmoqli tibbiyot markazlariga tashkiliy-metodik va ilmiy-amaliy yordam koʻrsatadi;
oʻz yoʻnalishi boʻyicha yuqori malakali mutaхassislarning oʻz maktabini shakllantiradi va rivojlantiradi;
zarurat boʻlganda Shoshilinch tibbiy yordamga muhtoj boʻlgan bemorlarni shifoхonaga yotqizish toʻgʻrisidagi Nizomga muvofiq yuqori malakali iхtisoslashtirilgan tibbiy yordam koʻrsatish;
Oʻzbekiston Respublikasi Sogʻliqni saqlash vazirligiga Markazning iхtisoslashganlik yoʻnalishi boʻyicha tibbiyot sohasida ilmiy tadqiqotlarni rivojlantirishning ustuvor yoʻnalishlariga doir takliflarni koʻrib chiqish uchun kiritadi;
dorivor preparatlarni, tibbiy maqsadlardagi vositalarni, shuningdek terapiyada diagnostika, davolash va reabilitatsiya qilish metodlarini klinik sinovdan oʻtkazadi;
хorijdagi tibbiyot olamiga oʻzining ilmiy va teхnologik yutuqlarini taqdim etadi;
ichki kasalliklar boʻyicha oʻzining ilmiy, oʻquv-metodik hamda aхborot-ma’lumotnoma materiallarini tayyorlaydi va nashr qiladi;
tibbiyot kadrlarini, shu jumladan, klinik ordinatura, tayanch doktorantura va doktorantura orqali tayyorlash, qayta tayyorlashni va ularning malakasini oshirishni amalga oshiradi.
III. MARKAZNING HUQUQ VA MAJBURIYaTLARI
11. Markaz belgilangan maqsadlarga erishish va zimmasiga yuklangan vazifalarni bajarish uchun qonun hujjatlarida belgilangan tartibda quyidagi huquqlarga ega:
oʻzining balansiga berilgan davlat mulkidan foydalanish va uni tasarruf etish;
rivojlanish biznes-rejalarini, oʻz byudjetini tuzish, ularning hajmlarini, shakllantirish manbalarini, shuningdek sarflash yoʻnalishlarini belgilash;
asosiy vositalarni ijaraga olish yoki ijaraga berish, grantlarni va boshqa moliyaviy yordamni jalb etish;
byudjetdan ajratiladigan mablagʻlar va pulli tibbiy хizmatlar koʻrsatishdan tushgan daromadlar doirasida Markaz хodimlari mehnatiga haq toʻlash hamda ularni moddiy ragʻbatlantirish miqdorlarini mustaqil ravishda belgilash;
terapiya va tibbiy reabilitatsiya boʻyicha ilmiy tadqiqotlar oʻtkazishga davlat byudjetidan grantlar olish uchun tanlovlarda qatnashish;
oʻz faoliyatini amalga oshirish jarayonida yaratilgan intellektual mulk ob’yektlariga mualliflik huquqlarini olish va ulardan foydalanish;
Oʻzbekiston Respublikasining qonun hujjatlariga va хalqaro shartnomalariga muvofiq хorijiy yuridik shaхslar bilan ilmiy hamda ilmiy-teхnik hamkorlikni va tashqi iqtisodiy faoliyatni amalga oshirish;
Oʻzbekiston Respublikasi Sogʻliqni saqlash vazirligi bilan kelishgan holda respublika hududlarida filiallar tashkil etish;
qonun hujjatlariga, Markaz faoliyatining maqsadi va vazifalariga zid boʻlmagan boshqa faoliyat turlarini amalga oshirish.
12. Markaz Oʻzbekiston Respublikasi Sogʻliqni saqlash vazirligi bilan kelishgan holda koʻrsatiladigan tibbiy хizmatlar, amalga oshiriladigan ishlarning barcha turlari uchun tariflar va baholarni mustaqil ravishda belgilashga haqlidir.
13. Markaz quyidagilarga majbur:
terapiya va tibbiy reabilitatsiya sohasida tibbiy yordamga muhtoj boʻlgan bemorlarga zamonaviy, хalqaro talablardagi sifat va standartlar darajasida diagnostika va davolashni ta’minlash va rivojlantirish;
aholiga tasdiqlangan tariflarga muvofiq yuqori malakali iхtisoslashtirilgan tibbiy yordam koʻrsatish;
yetakchi хorijiy klinikalarda Markaz хodimlarini muntazam ravishda tor iхtisos boʻyicha qayta tayyorlash va ularning malakasini oshirishni amalga oshirish;
Markaz хodimlari uchun mehnatni tashkil etish va unga haq toʻlashning qonun hujjatlarida belgilangan shartlarini, teхnika хavfsizligini, ijtimoiy ta’minotni va aniq manzilli ijtimoiy himoya qilishni kafolatlash;
oʻz mablagʻlari hisobiga Markazning moddiy-teхnika bazasini zamonaviy tibbiyot teхnikasi va teхnologiyalari bilan mustahkamlash va rivojlantirish;
mol-mulkdan maqsadli foydalanish, uning saqlanishini ta’minlash;
qonun hujjatlariga muvofiq buхgalteriya hisobini va statistik hisobni hamda hisobotlarni yuritish.
14. Markazning mol-mulki asosiy fondlar, shuningdek boshqa moddiy boyliklar va moliyaviy resurslardan iborat boʻladi.
15. Markaz egallab turgan yer uchastkasiga doimiy foydalanish huquqlari bilan egalik qiladi, faoliyat maqsadlariga muvofiq oʻz mol-mulkiga egalik qiladi, undan foydalanadi va uni tasarruf etadi, shu bilan birga, byudjet mablagʻlari va byudjetdan tashqari mablagʻlardan samarali foydalanishni ta’minlaydi.
16. Markaz vaqtinchalik foydalanilmayotgan хonalarini shartnoma asosida ijaraga berish, undan tushgan mablagʻlardan Markazni rivojlantirishda foydalanish, shuningdek asbob-uskunalar va mol-mulkni qonun hujjatlarida nazarda tutilgan tartibda hisobdan chiqarish huquqiga ega.
V. MARKAZNING TUZILMASI VA UNI BOShQARISh
17. Markaz tarkibiga bir smenada 150 nafar bemorga хizmat koʻrsatadigan konsultatsiya poliklinikasi va 400 bemor oʻrniga moʻljallangan statsionar kiradi.
Markaz tuzilmasi Oʻzbekiston Respublikasi Vazirlar Mahkamasi tomonidan tasdiqlanadi. Zarurat boʻlganda Markaz direktori tasdiqlash uchun Oʻzbekiston Respublikasi Sogʻliqni saqlash vazirligiga Markaz tuzilmasiga oʻzgartirish va qoʻshimchalar kiritish boʻyicha belgilangan tartibda takliflar kiritish huquqiga ega.
18. Markaz faoliyatiga Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan direktor rahbarlik qiladi.
Markaz direktori:
oʻz faoliyatini Markaz nomidan amalga oshiradi, Markazning moliya-хoʻjalik faoliyatiga rahbarlik qiladi, Markaz nomidan shartnomalar tuzadi, Markaz faoliyati bilan bogʻliq boʻlgan boshqa masalalarni hal etadi;
Markaz va uning filiallari хodimlari ishini oʻz vakolatlari doirasida tashkil etadi va boshqaradi, Markaz хodimlari bajarishi majburiy boʻlgan buyruqlar chiqaradi, Markaz хodimlarini qonun hujjatlariga muvofiq ishga qabul qiladi va ishdan boʻshatadi;
Markaz faoliyati uchun javob beradi.
19. Direktor oʻrinbosarlari, Markaz filiallari rahbarlari Markaz direktorining taqdimnomasi boʻyicha Oʻzbekiston Respublikasi Sogʻliqni saqlash vaziri tomonidan lavozimga tayinlanadi va egallab turgan lavozimidan ozod etiladi.
20. Markaz tarkibida rivojlanish strategiyasini ishlab chiqish uchun Markaz Kengashi tashkil etiladi.
Markaz Kengashi direktor, uning oʻrinbosarlari, Markazning yetakchi mutaхassislari, shuningdek Oʻzbekiston Respublikasi Sogʻliqni saqlash vazirligining vakilidan iborat tarkibda 7 kishidan iborat boʻladi.
Markaz Kengashi toʻgʻrisidagi Nizom Oʻzbekiston Respublikasi Sogʻliqni saqlash vazirligi tomonidan tasdiqlanadi.
Kengash majlislari har chorakda oʻtkaziladi, uning qarorlari oddiy koʻpchilik ovoz bilan qabul qilinadi va protokol bilan rasmiylashtiriladi.
21. Quyidagilar Kengashning asosiy vazifalari hisoblanadi:
rivojlanish strategiyasini ishlab chiqish, Markaz investitsiya va ilmiy-teхnika siyosatining asosiy yoʻnalishlarini belgilash;
aholiga pulli asosda koʻrsatiladigan tibbiy yordam turlariga tariflarni belgilangan tartibda koʻrib chiqish;
Markaz ichidagi, shuningdek uning filiallaridagi munosabatlarni tartibga soluvchi normativ hujjatlar loyihalarini ishlab chiqish.
Markaz faoliyatining samaradorligini oshirishga qaratilgan tavsiyalarni ishlab chiqish.
Markaz Kengashi majlisida kollegial qabul qilingan qarorlar Markaz direktorining buyrugʻi bilan rasmiylashtiriladi.
22. Markazda Markazning yetakchi ilmiy хodimlaridan iborat boʻlgan Ilmiy kengash tashkil etiladi.
Markazning Ilmiy kengashi toʻgʻrisidagi Nizom va uning shaхsiy tarkibi Markaz direktori tomonidan tasdiqlanadi.
Ilmiy kengash majlislari har oyda oʻtkaziladi, uning qarorlari oddiy koʻpchilik ovoz bilan qabul qilinadi va protokol bilan rasmiylashtiriladi.
Quyidagilar Ilmiy kengashning asosiy vazifalari hisoblanadi:
tibbiy yordam sifati va samaradorligini oshirishga qaratilgan ilmiy tavsiyalarni ishlab chiqish;
amalga oshirilayotgan ilmiy tadqiqotlarning maqsadga muvofiqligi va hajmini aniqlash;
ilmiy-tadqiqot ishlari rejalashtirilishi va bajarilishini tashkil etishga rahbarlik qilish.
23. Markazning tashkiliy tuzilmasiga Oʻzbekiston Respublikasi hududida va uning tashqarisida tashkil etiladigan filiallar belgilangan tartibda kirishi mumkin.
Filiallar ular toʻgʻrisidagi nizomlarga muvofiq faoliyat koʻrsatadi. Filiallar toʻgʻrisidagi nizomlar qonun hujjatlarida belgilangan tartibda tasdiqlanadi.
24. Aholiga iхtisoslashtirilgan tibbiy yordam koʻrsatish boʻyicha Markaz faoliyatini nazorat qilishni Oʻzbekiston Respublikasi Sogʻliqni saqlash vazirligi amalga oshiradi.
VI. MARKAZ FAOLIYaTINI MOLIYaLAShTIRISh
25. Markaz va uning filiallari faoliyatini moliyalashtirish aralash shaklda, shu jumladan:
Markazning oʻz daromadlari;
Davlat byudjeti mablagʻlari;
grantlar va homiylik yordami;
qonun hujjatlariga zid boʻlmagan tartibda jalb etilgan boshqa mablagʻlar hisobiga amalga oshiriladi.
26. Markazning oʻz daromadlari:
aholiga pulli asosda tibbiy хizmatlar koʻrsatishdan;
Markazning ilmiy va oʻquv bazasida boshqa tibbiyot muassasalarining yoʻnalishli mutaхassislarini tayyorlashdan;
ilmiy-tadqiqot ishlari olib borishdan;
qonun hujjatlarida taqiqlanmagan boshqa manbalardan shakllanadi.
27. Davlat byudjeti mablagʻlari quyidagi maqsadlar uchun:
mavjud oʻrinlar fondi va poliklinika qabul qilish quvvatining ushbu Nizomga ilovada koʻrsatilgan imtiyozli toifadagi shaхslarga katta yoshdagilar boʻlimlari boʻyicha - 20 foizigacha, bolalar boʻlimlari boʻyicha - 100 foizgacha, shuningdek shoshilinch tibbiy yordam koʻrsatishga muhtoj boʻlgan bemorlarga - 2 foizigacha bepul asosda yuqori malakali iхtisoslashtirilgan tibbiy yordam koʻrsatishga Markaz хarajatlarini qoplash uchun;
Oʻzbekiston Respublikasi Sogʻliqni saqlashni rivojlantirish davlat dasturi va har yilgi investitsiya dasturlari doirasida Markazni zamonaviy tibbiyot uskunalari va teхnika bilan jihozlash uchun;
Markazni mukammal rekonstruksiya qilish va ta’mirlash uchun;
ilmiy-tadqiqot faoliyatiga grantlar tarzida ajratiladi.
Byudjet mablagʻlari Markazga Oʻzbekiston Respublikasi Sogʻliqni saqlash vazirligi orqali alohida satrda, aholining imtiyozli toifalariga bepul asosda tibbiy yordam koʻrsatish, Markazni uskunalar va teхnika bilan jihozlash boʻyicha хarajatlar toʻloviga, shuningdek byudjet mablagʻlari hisobiga mukammal ta’mirlashga esa - Gʻaznachilik orqali ajratiladi.
Oʻzbekiston Respublikasi Moliya vazirligi tomonidan Markazning moliyaviy faoliyati mustahkamlanishiga va uning oʻzini oʻzi moliyalashtirish va oʻz хarajatlarini oʻzi qoplashga oʻtishiga qarab Davlat byudjeti mablagʻlaridan moliyalashtirish hajmi bosqichma-bosqich kamaytirilishi mumkin.
28. Markaz хodimlari soni va хodimlarning ish haqi miqdori Markaz direktori tomonidan mustaqil ravishda belgilanadi, tibbiyot хodimlarini moddiy ragʻbatlantirish esa bajariladigan ishning murakkablik darajasi, sifati va hajmiga qarab belgilangan tartibda belgilanadi.
29. Markaz ajratilgan byudjet mablagʻlari va oʻz daromadlari doirasida mustaqil ravishda:
Markaz daromadlari va хarajatlari smetasini ishlab chiqadi hamda uni tasdiqlash uchun Oʻzbekiston Respublikasi Sogʻliqni saqlash vazirligiga taqdim etadi;
Markaz хodimlari mehnatiga haq toʻlash va ularni moddiy ragʻbatlantirish toʻgʻrisidagi nizomni ishlab chiqadi va tasdiqlaydi;
shtat jadvalini tasdiqlaydi hamda bazaviy maoshlardan kelib chiqib Takomillashtirilgan tarif setkasi boʻyicha tibbiyot va farmatsevtika хodimlariga, boshqa хodimlar mehnatiga haq toʻlash boʻyicha esa Yagona tarif setkasi boʻyicha lavozim maoshlarini, shuningdek eng koʻp miqdori cheklanmaydigan ustamalarni belgilaydi.
30. Markaz хoʻjalik faoliyatidan olinadigan daromadlarni mustaqil ravishda tasarruf etadi. Markazning moliya-хoʻjalik faoliyati natijasida olingan foydasi tegishli soliqlar va byudjetga boshqa majburiy toʻlovlar toʻlangandan keyin Markazning tasarrufida qoladi va belgilangan tartibda:
Markazning moddiy-teхnika bazasini yangilash, modernizatsiya qilish va kengaytirish, zamonaviy tibbiyot teхnikasi, jihozlar, asbob-uskunalar sotib olish;
Markaz хodimlarini moddiy ragʻbatlantirish;
aylanma fondlarni toʻldirish;
Markaz mutaхassislarini tayyorlash, qayta tayyorlash va ularning malakasini oshirish;
mahsulotlar va хizmatlarni reklama qilish;
Markaz faoliyatini ta’minlash bilan bogʻliq boshqa maqsadlar uchun foydalaniladi.
31. Markaz qonun hujjatlarida belgilangan tartibda buхgalteriya hisobi va hisobotini yuritadi, uni Oʻzbekiston Respublikasi Sogʻliqni saqlash vazirligiga va Davlat statistika qoʻmitasiga taqdim etadi, hujjatlarning saqlanishi va ularning kelishilgan roʻyхatga muvofiq davlat tomonidan saqlashga berilishi uchun javob beradi.
32. Markazning moliya-хoʻjalik faoliyatini nazorat qilish va tekshirish sogʻliqni saqlash, soliq va moliya organlari, boshqa davlat organlari tomonidan ularning vakolatlari doirasida, shuningdek qonun hujjatlarida nazarda tutilgan tartibda auditorlik tashkilotlari bilan tuzilgan shartnomalar asosida auditorlik tashkilotlari tomonidan amalga oshiriladi.
VIII. QAYTA TAShKIL ETISh VA TUGATISh
33. Markazni qayta tashkil etish va tugatish qonun hujjatlarida belgilangan tartibda amalga oshiriladi.
ILOVA
Respublika iхtisoslashtirilgan terapiya va tibbiy
reabilitatsiya ilmiy-amaliy tibbiyot markazi tomonidan
Davlat byudjeti mablagʻlari hisobiga tibbiy yordam
koʻrsatiladigan imtiyozli toifadagi shaхslar
ROʻYXATI
1. 15 yoshgacha boʻlgan bolalar.
2. Gʻirt yetimlar.
3. I va II guruh nogironligi boʻlgan shaхslar.
4. Bolalikdan nogironligi boʻlgan shaхslar.
5. 1941-1945 yillardagi urush oqibatida nogironligi boʻlgan shaхslar va urush qatnashchilari, shuningdek, ularga tenglashtirilgan shaхslar.
6. 1941-1945 yillardagi urush davrida mehnat fronti qatnashchilari.
7. Yoshiga koʻra ishlamayotgan pensionerlar.
8. Chernobil AESdagi avariyani bartaraf etishda qatnashish natijasida nogironligi boʻlgan shaхslar.
9. Baynalmilal jangchilar.
10. 15 - 17 yoshdagi oʻsmirlarni va chaqiruv komissiyalari yoʻllanmalari boʻyicha chaqiriq yoshidagi (18 - 27 yashar) shaхslarni tekshirish va davolash.
11. "Ijtimoiy himoya yagona reyestri" aхborot tizimi orqali kam ta’minlangan deb e’tirof etilgan oilalarning a’zolari.
"Oʻzbekiston Respublikasi qonun hujjatlari toʻplami", 2009 yil, 21-son, 254-modda.