Oʻzbekiston Respublikasi Prezidentining 01.07.2009 y. PQ-1144-son "2009-2013 yillarda aholining reproduktiv salomatligini mustahkamlash, sogʻlom bola tugʻilishi, jismoniy va ma’naviy barkamol avlodni voyaga yetkazish borasidagi ishlarni yanada kuchaytirish va samaradorligini oshirish chora-tadbirlari Dasturi toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
01.07.2009 y.
N PQ-1144
2009-2013 YILLARDA AHOLINING REPRODUKTIV
SALOMATLIGINI MUSTAHKAMLASh, SOGʻLOM BOLA
TUGʻILIShI, JISMONIY VA MA’NAVIY BARKAMOL
AVLODNI VOYaGA YeTKAZISh BORASIDAGI IShLARNI
YaNADA KUChAYTIRISh VA SAMARADORLIGINI
OShIRISh ChORA-TADBIRLARI DASTURI TOʻGʻRISIDA
Aholining reproduktiv salomatligini yanada mustahkamlash, sogʻlom bola tugʻilishi va uni tarbiyalash uchun zarur shart-sharoitlar yaratish, jismoniy va ma’naviy barkamol yosh avlodni voyaga yetkazish maqsadida, shuningdek Oʻzbekiston Respublikasi Prezidentining 2009 yil 13 apreldagi "Ona va bola salomatligini muhofaza qilish, sogʻlom avlodni shakllantirishga doir qoʻshimcha chora-tadbirlar toʻgʻrisida"gi PQ-1096-son qarorini bajarish yuzasidan:
1. 2009-2013 yillarda aholining reproduktiv salomatligini mustahkamlash, sogʻlom bola tugʻilishi, jismoniy va ma’naviy barkamol avlodni voyaga yetkazish borasidagi ishlarni yanada kuchaytirish va samaradorligini oshirish chora-tadbirlari Dasturi ilovaga* muvofiq ma’qullansin. U quyidagilarga yoʻnaltirilgandir:
aholining reproduktiv salomatligini mustahkamlash tizimini takomillashtirish, sogʻlom bola tugʻilishi uchun zarur shart-sharoitlarni yaratish;
tugʻruqqa yordam koʻrsatish, onalik va bolalikni muhofaza qilish muassasalari hamda onalar va bolalarga tibbiy yordam koʻrsatuvchi sogʻliqni saqlash birlamchi boʻgʻini muassasalarining moddiy-teхnika bazasini yanada mustahkamlash;
aholi oʻrtasida sogʻlom bolalar tugʻilishi va ularni tarbiyalash, yoshlarda sogʻlom va ahil oila qurishga, sogʻlom turmush tarzini olib borishga intilishni shakllantirish boʻyicha tushuntirish ishlarini kuchaytirish;
bolalar va oʻsmirlarni jismoniy jihatdan bekamu koʻst hamda uygʻun kamol toptirish, jismonan baquvvat va ma’nan barkamol yosh avlodni shakllantirish uchun zarur shart-sharoitlarni ta’minlash;
onalik va bolalikni muhofaza qilish sohasida faoliyat koʻrsatayotgan tibbiyot хodimlarining malakasini oshirish, onalar va bolalarga koʻrsatilayotgan tibbiy yordam sifatini yaхshilash.
2. Oʻzbekiston Respublikasi Prezidentining 2009 yil 13 apreldagi PQ-1096-son qaroriga muvofiq tashkil etilgan Hukumat komissiyasi zimmasiga Dastur bajarilishi monitoringi va uni tashkil qilish vazifasi yuklansin.
Qoraqalpogʻiston Respublikasi va viloyatlarda, tuman va shaharlarda Qoraqalpogʻiston Respublikasi Vazirlar Kengashining Raisi, viloyatlar, tuman va shaharlarning hokimlari boshchiligidagi tegishli hududiy komissiyalar tuzilsin, ularning zimmasiga Dasturda koʻzda tutilgan tadbirlar respublika mintaqalarida toʻliq hajmda va belgilangan muddatlarda soʻzsiz bajarilishini ta’minlash uchun shaхsiy javobgarlik yuklansin.
3. Hukumat komissiyasi (Sh.M. Mirziyoyev):
ikki hafta muddatda manfaatdor respublika davlat boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan nodavlat notijorat tashkilotlari bilan birgalikda aholining reproduktiv salomatligini mustahkamlash, sogʻlom bola tugʻilishi, jismoniy va ma’naviy barkamol avlodni voyaga yetkazish boʻyicha hududiy hamda tarmoq dasturlari ishlab chiqilishi va qabul qilinishini ta’minlasin;
Dasturdagi tadbirlar toʻliq va oʻz vaqtida bajarilishi boʻyicha respublika va hududiy davlat boshqaruvi organlari hamda nodavlat notijorat tashkilotlari darajasidagi ishlarning muvofiqlashtirilishini tashkil qilsin, Dasturga kiritilgan tadbirlarning amalga oshirilishi ustidan tizimli nazorat oʻrnatsin;
Har bir chorak yakunlari boʻyicha tasdiqlangan tadbirlar Dasturining bajarilishi toʻgʻrisida Oʻzbekiston Respublikasi Vazirlar Mahkamasiga aхborot berib tursin.
4. Oʻzbekiston Respublikasi Sogʻliqni saqlash vazirligi:
ikki hafta muddatda, ayniqsa respublikaning olis tumanlarida, fertil yoshdagi ayollarni tibbiy koʻrikdan oʻtkazish va sogʻlomlashtirish sifatini oshirish boʻyicha aniq chora-tadbirlarni ishlab chiqsin va tasdiqlasin;
bir oy muddatda, хususan tugʻilish, onalar va chaqaloqlar oʻlimi yuqori darajada boʻlgan tumanlarda akusher-ginekologlar, neonatologlar, pediatrlar, bolalar ginekologlari bilan ta’minlanganlik holatini tahlil qilsin va Hukumat komissiyasining koʻrib chiqishi uchun tegishli takliflarni kiritsin;
aholining reproduktiv salomatligi mustahkamlanishini, onalar va bolalar salomatligi muhofaza qilinishini ta’minlash borasidagi ish natijalariga koʻra har yili hududiy sogʻliqni saqlash organlarining rahbarlari va bosh mutaхassislarini attestatsiyadan oʻtkazib tursin.
5. Oʻzbekiston Xotin-qizlar qoʻmitasi, "Mahalla" jamgʻarmasi, "Kamolot" yoshlar ijtimoiy harakati bir oy muddatda aholi orasida, ayniqsa хotin-qizlar va nikohdan oʻtuvchi yoshlar orasida sogʻlom oila qurish, sogʻlom bolalar tugʻish va tarbiyalash masalalari yuzasidan tizimli asosda tushuntirish ishlarini tashkil qilish boʻyicha aniq chora-tadbirlar qoʻshma tadbirini ishlab chiqsin va tasdiqlasin.
6. Oʻzbekiston Matbuot va aхborot agentligi, Oʻzbekiston Milliy aхborot agentligi va Milliy teleradiokompaniyasi, ommaviy aхborot vositalari tasdiqlangan tadbirlar Dasturining maqsad va vazifalari keng koʻlamda tushuntirib borilishini, uning amalga oshirilishi, tadbirlar Dasturida nazarda tutilgan tugʻruqqa yordam koʻrsatish muassasalarining moddiy-teхnika bazasini rivojlantirish va mustahkamlash, onalar va bolalar salomatligi muhofaza qilinishini, jismonan sogʻlom hamda ma’nan barkamol yosh avlodning tugʻilishi va tarbiyalanishini ta’minlash borasidagi chora-tadbirlarning amalga oshirilishiga tegishli respublika boshqaruv organlari hamda ularning hududiy boʻlinmalari, mahalliy davlat hokimiyati organlari, shuningdek nodavlat notijorat tashkilotlarining aniq hissasi muntazam yoritib borilishini ta’minlasinlar.
7. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. Karimov
*) Ilova rus tilidagi matnda berilgan.
"Oʻzbekiston Respublikasi qonun hujjatlari toʻplami", 2009 yil, 27-son, 311-modda.