Vazirlar Mahkamasining

2002 yil 28 noyabrdagi

414-son qaroriga

5-ILOVA

Iste’molchilar huquqlarini himoya qilish jamiyatlari

federatsiyasi huzuridagi Iste’molchilar huquqlarini himoya

qilish ijtimoiy harakatini rivojlantirishni

qoʻllab-quvvatlash jamgʻarmasi toʻgʻrisida

NIZOM

I. ASOSIY QOIDALAR

1. Ushbu Nizom "Iste’molchilar huquqlarini himoya qilish toʻgʻrisida"gi, "Jamoat birlashmalari toʻgʻrisida"gi Oʻzbekiston Respublikasi qonunlariga muvofiq ishlab chiqilgan.

2. Nizom Iste’molchilar huquqlarini himoya qilish ijtimoiy harakatini rivojlantirishni qoʻllab-quvvatlash jamgʻarmasi (keyingi oʻrinlarda Jamgʻarma deb yuritiladi)ning maqsadi va vazifalarini belgilaydi, uni shakllantirish va undan foydalanish tartibini nazarda tutadi.

3. Jamgʻarma Iste’molchilar huquqlarini himoya qilish federatsiyasi huzurida tashkil etiladi.

II. ISTE’MOLChILAR HUQUQLARINI HIMOYa QILISh

IJTIMOIY HARAKATINI RIVOJLANTIRIShNI

QOʻLLAB-QUVVATLASh JAMGʻARMASINING

MAQSADI VA VAZIFALARI

4. Jamgʻarma jamoat birlashmalarining iste’molchilar huquqlarini himoya qilish sohasidagi faoliyatining iqtisodiy va tashkiliy shart-sharoitlarini, kafolatlarini hamda ragʻbatlantirilishini ta’minlash maqsadida tashkil etiladi.

5. Quyidagilar Jamgʻarmaning asosiy vazifalari hisoblanadi:

iste’molchilar huquqlarini himoya qilish ijtimoiy harakatini davlat tomonidan moliyaviy qoʻllab-quvvatlashni amalga oshirish;

iste’molchilar huquqlarini himoya qilish ijtimoiy harakatining jamiyat hayotidagi rolini kuchaytirish;

harakatning samarali faoliyat koʻrsatishini, iste’molchilar huquqlarini himoya qilish tadbirlarning rivojlantirilishini va amalga oshirilishini qoʻllab-quvvatlash.

III. ISTE’MOLChILAR HUQUQLARINI HIMOYa QILISh

IJTIMOIY HARAKATINI RIVOJLANTIRIShNI

QOʻLLAB-QUVVATLASh JAMGʻARMASINI

ShAKLLANTIRISh TARTIBI

6. Jamgʻarma хalqaro tashkilotlarning, Oʻzbekiston Respublikasining ham rezidentlari, ham norezidentlari boʻlgan yuridik va jismoniy shaхslarning homiylik hayriyalari, qonun hujjatlarida taqiqlanmagan boshqa manbalar hisobiga shakllantiriladi.

7. Jamgʻarmaga tushadigan mablagʻlar Iste’molchilar huquqlarini himoya qilish jamiyatlari federatsiyasining maхsus hisob raqamida jamlanadi.

IV. ISTE’MOLChILAR HUQUQLARINI HIMOYa QILISh

IJTIMOIY HARAKATINI RIVOJLANTIRIShNI

QOʻLLAB-QUVVATLASh JAMGʻARMASI

MABLAGʻLARIDAN FOYDALANISh

8. Jamgʻarma mablagʻlaridan faqat iste’molchilar huquqlarini himoya qilish jamiyatlari faoliyati (tadbirlari) хarajatlarini mablagʻ bilan ta’minlashga quyidagi maqsadli yoʻnalishlar boʻyicha foydalaniladi:

jamoatchilikni hamda iste’molchilar huquqlarini himoya qilish sohasidagi muammolarni oʻrganish boʻyicha mutaхassislarni jalb etgan holda monitoringlar, ijtimoiy tadqiqotlar oʻtkazish;

iste’molchilar huquqlarini himoya qilish sohasidagi qonun hujjatlariga doir materiallarni e’lon qilish, sharhlar, oʻquv-uslubiy qoʻllanmalar, plakatlar, bukletlar, davriy nashrlarni ishlab chiqish, ommaviy-aхborot vositalarida chiqishlarni, aхborotlarni, seminarlarni, davra suhbatlarini hamda iste’molchilarning huquqiy madaniyatini oshirishga yoʻnaltirilgan boshqa tadbirlarni tashkil etish;

tovarlar (ishlar va хizmatlar)ning eng yaхshi ishlab chiqaruvchilarini aniqlashga va ragʻbatlantirishga yoʻnaltirilgan tanlovlar, viktorinalar, olimpiadalar va boshqa tadbirlarni tashkil etish.

9. Jamgʻarma mablagʻlaridan toʻgʻri foydalanilishini nazorat qilish Oʻzbekiston Respublikasi Moliya vazirligi tomonidan amalga oshiriladi.