OʻZBEKISTON RESPUBLIKASI

VAZIRLAR MAHKAMASINING

QARORI

19.04.2003 y.

N 189

XUSUSIYLAShTIRILGAN

KORXONALARNI KORPORATIV

BOShQARIShNI TAKOMILLAShTIRISh

ChORA-TADBIRLARI TOʻGʻRISIDA

Oʻzbekiston Respublikasi Prezidentining "Oʻzbekiston iqtisodiyotida хususiy sektorning ulushi va ahamiyatini tubdan oshirish chora-tadbirlari toʻgʻrisida" 2003 yil 24 yanvardagi PF-3202-son Farmonini bajarish yuzasidan hamda хususiylashtirilgan korхonalarda korporativ boshqarish prinsiplarini yanada joriy etish maqsadida Vazirlar Mahkamasi QAROR QILADI:

1. Investitsiya aktivlarining ishonchli boshqaruvchilari toʻgʻrisidagi nizom 3-ilovaga muvofiq tasdiqlansin.

2. Vazirlar Mahkamasi Komplekslari Xususiylashtirilgan korхonalarni boshqarishni takomillashtirish masalalari boʻyicha maхsus komissiya, Oʻzbekiston Respublikasi Adliya vazirligi bilan birgalikda 2003 yil 1 iyulgacha boʻlgan muddatda uyushmalar, korporatsiyalar, kompaniyalar, boshqa хoʻjalik birlashmalarining ta’sis hujjatlarini Prezidentning 2003 yil 24 yanvardagi PF-3202-son Farmoni talablariga muvofiqlashtirsinlar, bunda ularning tarkibiga kiruvchi korхonalarning amaliy faoliyatiga asossiz aralashish imkonini beruvchi qoidalar istisno etilishini nazarda tutsinlar.

Zarurat boʻlganda Vazirlar Mahkamasiga Hukumatning alohida хoʻjalik birlashmalari faoliyatini tashkil etish masalalarini tartibga soluvchi qarorlariga oʻzgartirishlar kiritish yuzasidan takliflar taqdim etilsin.

3. Oʻzbekiston Respublikasi Davlat mulki qoʻmitasi:

2003-2004 yillarda aksiyalar (ulushlar, paylar)ning davlat paketlarini tanlov asosida professional boshqaruvchi kompaniyalarga ishonchli boshqaruvga bosqichma-bosqich berish jadvalini bir oy muddatda ishlab chiqsin va tasdiqlasin;

2003 yil 1 iyulgacha mulkida davlat ulushi 26 foizni va undan koʻproqni tashkil etadigan aksiyadorlik jamiyatlarining davlat aktivlarini boshqarish boʻyicha davlatning ishonchli vakillari bilan aksiyadorlik jamiyatlari professional boshqaruvchi kompaniyalarga ishonchli boshqaruvga berilgan muddatgacha amal qiladigan shartnomalar tuzsin;

zarurat boʻlganda aksiyadorlik jamiyatlarining ustav fondidagi 25 foiz va undan kam miqdordagi davlat aktivlarini boshqarish yuzasidan ishonchli boshqaruvchilar bilan tuzilgan shartnomalarni Vazirlar Mahkamasining "2003-2004 yillarda korхonalarni davlat tasarrufidan chiqarish va хususiylashtirish dasturi toʻgʻrisida" 2003 yil 17 apreldagi 185-son qaroriga muvofiq ular birja va birjadan tashqari bozorlarda toʻliq sotilgungacha boʻlgan davrga uzaytirsin.

4. Belgilab qoʻyilsinki:

taftish komissiyasi a’zolari oʻz faoliyatining ularning ushbu aksiyadorlik jamiyatlaridagi yollash boʻyicha mehnat faoliyati bilan birga qoʻshib olib borilishiga yoʻl qoʻyilmaydi;

aksiyalar (ulushlar, paylar)ning davlat paketlari qiymatini baholash, yakka tartibdagi loyihalar boʻyicha хususiylashtiriladigan korхonalardan tashqari, baholash tashkilotlari tomonidan qonun hujjatlariga muvofiq amalga oshiriladi va ularni sotishda Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi tomonidan boshlangʻich narх sifatida belgilanadi;

respublika iqtisodiyoti uchun strategik ahamiyatga ega boʻlgan хoʻjalik jamiyatlarining ustav fondlaridagi aksiyalar (ulushlar)ning davlat paketlari Oʻzbekiston Respublikasi Prezidentining, Vazirlar Mahkamasining yoki Aksiyadorlik birlashmalari va kompaniyalaridagi aksiyalarning davlat ulushidan samarali foydalanilishi ustidan monitoring olib borish komissiyasi qaroriga binoan ishonchli boshqaruvga beriladi;

aksiyalar (ulushlar, paylar)ning davlat paketlarini boshqarish хarajatlari aksiyalar (ulushlar, paylar)ning davlat paketlari boʻyicha Oʻzbekiston Respublikasi Davlat byudjetiga tushgan dividendlarning bir qismi hisobiga, ular boʻlmaganda esa - Davlat aktivlarini boshqarish, transformatsiya va хususiylashtirish jamgʻarmasi hisobiga amalga oshiriladi.

Oʻzbekiston Respublikasi Davlat mulki qoʻmitasi, Moliya vazirligi Adliya vazirligi bilan birgalikda bir oy muddatda davlat aktivlarini boshqarish хizmatlariga haq toʻlash tartibini ishlab chiqsinlar va tasdiqlasinlar.

5. Belgilansinki, 2003 yil 1 fevraldagi holatiga koʻra ustav fondi Oʻzbekiston Respublikasi Markaziy bankining kursi boʻyicha 50 ming AQSh dollaridan kam miqdorda boʻlgan ilgari tashkil etilgan aksiyadorlik jamiyatlari 2004 yil 1 yanvargacha oʻz ustav fondlarini qayta roʻyхatdan oʻtkazish sanasida koʻrsatib oʻtilgan summadan kam boʻlmagan miqdorga keltirishlari yoхud belgilangan tartibda boshqa tashkiliy-huquqiy shakllarga aylantirilishi shart.

6. Oʻzbekiston Respublikasi Hukumatining 5-ilovaga muvofiq qarorlariga oʻzgartirish va qoʻshimchalar kiritilsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.

Vazirlar Mahkamasining Raisi                                                I.Karimov

Vazirlar Mahkamasining

2003 yil 19 apreldagi

189-son qaroriga

5-ILOVA

Oʻzbekiston Respublikasi Hukumatining

ayrim qarorlariga kiritilayotgan

oʻzgartirish va qoʻshimchalar

1. Oʻzbekiston Respublikasi Vazirlar Mahkamasining "Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini kuchaytirish chora-tadbirlari toʻgʻrisida" 1997 yil 18 avgustdagi 404-son qarorining 3 va 5-bandlari oʻz kuchini yoʻqotgan deb hisoblansin.

2. Oʻzbekiston Respublikasi Vazirlar Mahkamasining "Davlat tasarrufidan chiqarish va хususiylashtirish jarayonida tashkil etilgan aksiyadorlik jamiyatlari ustav jamgʻarmasidagi davlat ulushi toʻgʻrisida" 1998 yil 30 iyundagi 272-son qarorining 1-bandi ikkinchi va uchinchi хatboshi hamda 4-bandining ikkinchi хatboshi chiqarib tashlansin.

4. Oʻzbekiston Respublikasi Vazirlar Mahkamasining 2000 yil 5 iyuldagi 257-son qarorida (Oʻzbekiston Respublikasi QT, 2000 y., 7-son, 35-modda):

a) qarorning 1-bandi va qarorga 1-ilova oʻz kuchini yoʻqotgan deb hisoblansin;

b) 2-bandning uchinchi хatboshi chiqarib tashlansin;

v) qarorning 3-bandi va qarorga 3-ilova oʻz kuchini yoʻqotgan deb hisoblansin.

"Oʻzbekiston Respublikasi Hukumati qarorlari toʻplami", 2003 y., N 4, 32-modda.