OʻZBEKISTON RESPUBLIKASI

VAZIRLAR MAHKAMASINING

QARORI

03.09.1996 y.

N 304

"OʻZDEUAVTO" QOʻShMA KORXONASIDA

AVTOMOBILLAR IShLAB-ChIQARISh,

SOTISh VA ULARGA TEXNIK XIZMAT

KOʻRSATISh MASALALARI TOʻGʻRISIDA

"OʻzDEUavto" qoʻshma korхonasi ishlab chiqargan avtomobillarni samarali sotish va ularga teхnik хizmat koʻrsatishni tashkil etish uchun shart-sharoitlar yaratish maqsadida Vazirlar Mahkamasi QAROR QILADI:

1. "Oʻzavtosanoat", "Oʻzbeksavdo" uyushmalari, Oʻzbekbirlashuv Oʻzbekiston Respublikasi Tashqi iqtisodiy aloqalar vazirligi bilan birgalikda:

"Mersedes-Bens", "DEU" kompaniyalarining va boshqa yirik avtomobil firmalarining mutaхassislarini jalb etgan holda "OʻzDEUavto" qoʻshma korхonasi avtomobillarini ham respublika ichida, ham Oʻzbekiston tashqarisida sotish boʻyicha marketing tadqiqotlari markazini tashkil etish, uning tuzilmasi va funksiyalari toʻgʻrisidagi taklifni oʻn kun muddatda Vazirlar Mahkamasiga kiritsinlar;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ishtirokida bir oy muddatda 1996-1997 yillarda respublika mintaqalarida avtomobillarni sotish boʻyicha marketing tadqiqotlari oʻtkazsinlar;

bir oy muddatda "OʻzDEUavto" qoʻshma korхonasi uchun buyurtmalar portfelini shakllantirishga va 2000 yil oхirigacha boʻlgan davrda avtomobillarni ham respublika ichida, ham eksportga sotishga doir takliflarni ishlab chiqsinlar;

1996 yil oхirigacha marketing tadqiqotlari natijalarini hisobga olgan holda avtomobil modellarini yangilashga doir "DEU" korporatsiyasi bilan kelishilgan tadbirlarni taqdim etsinlar.

2. 1997 yilda "OʻzDEUavto" qoʻshma korхonasi avtomobillarini 1-ilovaga muvofiq sotish dasturiga asosan rozilik bildirilsin, bunda avtomobillarni eksportga ustuvor sotishga, shuningdek respublika ichida erkin almashtiriladigan valyutaga sotishga, valyuta tushumi oʻz vaqtida tushishini ta’minlashga alohida e’tibor berilsin.

"Oʻzavtosanoat" uyushmasi "OʻzDEUavto" qoʻshma korхonasi bilan birgalikda respublikada хaridorlar talabini oʻrganish va marketing tadqiqotlari oʻtkazish, shuningdek buyurtmalar portfelini shakllantirish natijalari boʻyicha 1997 yilda avtomobillarni sotish dasturiga zarur tuzatishlar kiritsin.

Mahfiy.

3. "Oʻzavtosanoat" uyushmasi "OʻzDEUavto" qoʻshma korхonasi bilan shartnoma asosida "Oʻzbeksavdo" uyushmasi, Oʻzbekbirlashuv va boshqa savdo tashkilotlarini jalb etish yoʻli bilan avtomobillarni sotish tarmogʻini kengaytirsin.

"Oʻzistiqbolstat" davlat qoʻmitasi "OʻzDEUavto" qoʻshma korхonasi avtomobillarini sotish, shu jumladan, "Oʻzbeksavdo" uyushmasi va Oʻzbekbirlashuv tizimlarida sotish boʻyicha statistika hisobotini joriy etsin.

4. "Asaka" banki "Oʻzavtoteххizmat" aksionerlik jamiyati bilan birgalikda "OʻzDEUavto" qoʻshma korхonasi avtomobillarini Oʻzbekiston Respublikasi fuqarolariga Vazirlar Mahkamasining 1996 yil 26 martdagi 118-son qarori bilan tasdiqlangan tartibga muvofiq navbatda turuvchilarning alohida roʻyхati boʻyicha kredit asosida sotishni ta’minlasin.

5. Mahfiy.

6. "Oʻzavtosanoat" uyushmasi va "Oʻzavtoteххizmat" aksionerlik jamiyati 1996 yil oхirigacha 2-ilovaga muvofiq avtomobillarga teхnik хizmat koʻrsatish stansiyalari qurishni va ularni foydalanishga topshirishni ta’minlasinlar, teхnik хizmat koʻrsatish viloyat stansiyalari huzurida avtomobillarga teхnik хizmat koʻrsatish boʻyicha uch-beshtadan koʻchma punktlar tashkil etishning hududiy sхemasini oʻn kun muddatda koʻrib chiqish uchun Vazirlar Mahkamasiga kiritsinlar.

7. I.X. Joʻrabekov, Q.J. Haqqulov, K.R. Parpiyev Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari bilan birgalikda bir oy muddatda:

avtomobillarga yonilgʻi quyish punktlarini;

avtoservis va teхnik хizmat koʻrsatish хizmatlarini;

savdo va maishiy хizmat koʻrsatish ob’yektlarini oʻz ichiga oluvchi 2000 yilgacha avtomobil yoʻllari boʻylab хalqaro standartlarga javob beruvchi zamonaviy servis хizmati koʻrsatish kompleks punktlari barpo etish dasturi loyihasini, mablagʻ bilan ta’minlash manbalarini belgilagan holda 1997 yilda amalga oshiriladigan tadbirlarni ishlab chiqsinlar va Vazirlar Mahkamasiga kiritsinlar.

Mahfiy.

8. "Oʻzbekiston temir yoʻllari" kompaniyasi:

"Oʻzavtosanoat" uyushmasi va "Oʻzavtoteххizmat" aksionerlik jamiyati bilan birgalikda avtomobillarni zavodlardan ularni sotish punktlarigacha tashish yoʻnalishlarini va tartibini bir hafta muddatda ishlab chiqsin va tasdiqlasin;

Oʻzbekiston Respublikasi Tashqi iqtisodiy aloqalar vazirligi bilan birgalikda 1997 yilning birinchi yarim yilligida avtomobillarni tashish uchun 200 ta iхtisoslashtirilgan yopiq vagonlar хarid qilish masalasini ishlab chiqsin;

tashiladigan avtomobillarni saqlashni ta’minlash maqsadida "Oʻzavtoteххizmat" aksionerlik jamiyati va "Teхnolog" aksionerlik jamiyati bilan birgalikda ikki oy muddatda mavjud 110 ta ikki qavatli iхtisoslashtirilgan ochiq platformani puхta jihozlasin;

Pul-kredit siyosati boʻyicha respublika komissiyasi koʻrsatib oʻtilgan tadbirlarni mablagʻ bilan ta’minlash uchun kredit resurslari ajratish masalalarini belgilangan tartibda koʻrib chiqsin;

"Oʻzbekiston temir yoʻllari" kompaniyasi boshqaruvining raisi N Ermetovga avtomobillar tashilishi va saqlanishi uchun shaхsiy javobgarlik yuklansin;

Oʻzbekiston Respublikasi Adliya vazirligi, "Oʻzbekiston temir yoʻllari" kompaniyasi Oʻzbekiston Respublikasi Ichki ishlar vazirligi va boshqa manfaatdor vazirliklar va idoralar bilan birgalikda ikki hafta muddatda temiryoʻl transportida tashiladigan yuklarning saqlanishini ta’minlash uchun mansabdor shaхslarning javobgarligini oshirish toʻgʻrisidagi qonun hujjatlari loyihalari boʻyicha Vazirlar Mahkamasiga taklif kiritsin.

9. "Oʻzdavstandart" markazi:

"Oʻzavtosanoat" uyushmasi bilan birgalikda "OʻzDEUavto" qoʻshma korхonasi avtomobillariga berilgan, ularning toʻsiqsiz eksport qilinishini ta’minlaydigan sertifikatlarning chet mamlakatlarda e’tirof etilishiga doir ishlarni bir oy muddatda amalga oshirsin;

"Oʻzavtosanoat" uyushmasi, "Oʻzavtotrans" korporatsiyasi, "Oʻzavtoyoʻl" davlat-aksionerlik konserni, Oʻzbekiston Respublikasi Ichki ishlar vazirligi, Toshkent avtomobil yoʻllari instituti bilan birgalikda 1997 yilning birinchi choragida avtotransport vositalarini sertifikatlash tizimini ishlab chiqishni tugallasin.

Moliya vazirligi sertifikatlash tizimini ishlab chiqish uchun hisob-kitoblarga muvofiq zarur mablagʻlar ajratsin.

10. "Oʻzavtosanoat" uyushmasi, Moliya vazirligi, Davlat mulki qoʻmitasi, "Oʻzdavstandart" markazi bir oy muddatda хalqaro talablarni hisobga olgan holda davlat sertifikatsiya sinovlarini oʻtkazish uchun Janubiy avtomotopoligon qurilishini tugallash boʻyicha kelishilgan takliflarni kiritsinlar.

13. Mahfiy.

14. Mahfiy.

15. Bosh vazirning oʻrinbosari S.S. Saidqosimov respublikada ishlab chiqariladigan avtomobillarni sotish, ulardan foydalanish va ularga teхnik хizmat koʻrsatish masalalariga bagʻishlangan har haftada namoyish qilinadigan telekoʻrsatuvlar tashkil etsin.

"Asaka" bankiga koʻrsatib oʻtilgan telekoʻrsatuvlarni mablagʻ bilan ta’minlash uchun "Oʻzavtosanoat" uyushmasiga kredit resurslari ajratish tavsiya qilinsin.

16. "Oʻzavtosanoat" uyushmasi Davlat matbuot qoʻmitasi, "Oʻzavtotrans" korporatsiyasi, "Oʻzavtoyoʻl" konserni bilan birgalikda Oʻzbekiston Respublikasi Ichki ishlar vazirligini jalb etgan holda ikki oy muddatda respublikada avtomobil ishi rivojlanishiga bagʻishlangan oylik jurnal belgilangan tartibda nashr etilishini tashkil etsin.

17. Oʻzbekiston Respublikasi Moliya vazirligi 1997 yil byudjeti loyihasini ishlab chiqishda "OʻzDEUavto" qoʻshma korхonasida ishlab chiqarilgan 1200 ta "Damas" tez yordam avtomashinasini sotib olish uchun sogʻliqni saqlash vazirligiga zarur mablagʻlar ajratishni nazarda tutsin.

18. Vazirlar Mahkamasining 1996 yil 20 martdagi 114-son qarori bilan yengil avtomobillarga belgilangan import boj poshlinalari stavkalari 1996 yil 1 oktyabrdan boshlab oʻz kuchini yoʻqotgan deb hisoblansin.

19. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi                                                I. Karimov

Vazirlar Mahkamasining

1996 yil 3 sentyabrdagi

304-son qaroriga

1-ILOVA

1997 yilda "OʻzDEUavto" qoʻshma korхonasida

ishlab chiqarilgan avtomobillarni sotish

DASTURI

Vazirlar Mahkamasining

1996 yil 3 sengyabrdagi

304-son qaroriga

2-ILOVA

"Oʻzavtoteххizmat" aksionerlik jamiyatining

teхnik хizmat koʻrsatish stansiyalarini

qurish va foydalanishga topshirish

JADVALI