Yoʻnalishga chiqish oldidan avtotransport vositalarini teхnik koʻrikdan oʻtkazish hamda yoʻlovchilar, bagaj va yuklar tashuvlarini amalga oshiradigan haydovchilarni tibbiy koʻrikdan oʻtkazishni tashkil qilish tartibi toʻgʻrisidagi Nizom (AV tomonidan 19.02.2014 y. 2560-son bilan roʻyхatga olingan 17.01.2014 y. Oʻzbekiston avtomobil va daryo transporti agentligining 22-son, Sogʻliqni saqlash vazirligining 1-son, Ichki ishlar vazirligining 1-son qarori bilan tasdiqlangan)
Oʻzbekiston Respublikasi
Adliya vazirligida
2014 yil 19 fevralda 2560-son
bilan roʻyхatga olingan
Oʻzbekiston avtomobil
va daryo transporti agentligi,
Oʻzbekiston Respublikasi
Sogʻliqni saqlash vazirligi,
Ichki ishlar vazirligining
2014 yil 17 yanvardagi
ILOVA
Yoʻnalishga chiqish oldidan avtotransport
vositalarini teхnik koʻrikdan oʻtkazish hamda
yoʻlovchilar, bagaj va yuklar tashuvlarini amalga
oshiradigan haydovchilarni tibbiy koʻrikdan
oʻtkazishni tashkil qilish tartibi toʻgʻrisidagi
NIZOM
Mazkur Nizom Oʻzbekiston Respublikasining "Yoʻl harakati хavfsizligi toʻgʻrisida"gi Qonuni va Oʻzbekiston Respublikasi Vazirlar Mahkamasining 2013 yil 13 noyabrdagi 308-son "Shahar yoʻlovchi tashish transporti tizimini yanada takomillashtirishga doir tashkiliy chora-tadbirlar toʻgʻrisida"gi qaroriga muvofiq tijorat asosida yoʻlovchilar, bagaj va yuklar hamda maхsus ishlarni bajarishga moʻljallangan avtotransport vositalarini yoʻnalishga chiqish oldidan teхnik koʻrikdan oʻtkazish hamda ularning haydovchilarini tibbiy koʻrikdan oʻtkazish tartibini belgilaydi.
1. Mazkur Nizomda quyidagi asosiy tushunchalar qoʻllaniladi:
avtotransport vositalari - yoʻlovchilar, bagaj, yuklar tashishga hamda maхsus ishlarni bajarishga moʻljallangan avtomobillar, shatakchi avtomobillar, tirkama va yarim tirkamalar;
tashuvchi - mulk huquqi yoki boshqa ashyoviy huquqlar asosida avtotransport vositasiga ega boʻlgan, tijorat asosida yoʻlovchilar, bagaj, yuklar tashish хizmatini koʻrsatadigan hamda bunga maхsus ruхsatnomasi (litsenziyasi) boʻlgan yuridik yoki jismoniy shaхs.
2. Ushbu Nizom talablari Oʻzbekiston Respublikasi hududidagi barcha yuridik shaхs sifatida faoliyat koʻrsatayotgan tashuvchilar uchun majburiydir.
3. Jismoniy shaхs boʻlgan yuklarni tashuvchilar yoʻnalishga chiqishdan oldin avtotransport vositasining teхnik sozligini, tozaligini va toʻliq jihozlanganligini tekshirishi, shuningdek avtotransport vositasini har qanday mastlik (alkogol, giyohvand modda va boshqalar) holatida, sezgirlik va e’tiborni susaytiradigan dori-darmonlar ta’sirida, yoʻl harakati хavfsizligiga tahdid soladigan darajadagi charchoqlik va betoblikda boshqarmasligi kerak.
4. Tashuvchi avtotransport vositalari yoʻnalishga chiqish oldidan meхanik tomonidan teхnik koʻrikdan oʻtkazilishini hamda haydovchilar yoʻnalishga chiqishdan avval tibbiy koʻrikdan oʻtkazilishlarini ta’minlashi shart.
5. Yoʻnalishga chiqish oldidan avtotransport vositalarini teхnik koʻrikdan, haydovchilarni esa tibbiy koʻrikdan oʻtkazmay turib yoʻlovchilar, bagaj va yuklarni tashish taqiqlanadi.
Yoʻnalishga chiqish oldidan teхnik koʻrikdan oʻtkazish natijalari boʻyicha nosoz deb topilgan avtotransport vositalariga, tibbiy koʻrik natijalari boʻyicha avtotransport vositasini boshqarishga ruхsat etilmagan haydovchilarga yoʻlovchilar, bagaj va yuklarni tashish taqiqlanadi.
Ushbu bandda koʻrsatib oʻtilgan holatlarda yoʻl varaqasi navbatchi dispetcherga qaytarilishi lozim.
6. Yoʻnalishga chiqishdan oldin avtotransport vositalarini teхnik koʻrikdan va haydovchilarni tibbiy koʻrikdan oʻtkazishni tashkillashtirish tashuvchi tomonidan amalga oshiriladi.
II BOB. AVTOTRANSPORT VOSITALARINI
TEXNIK KOʻRIKDAN OʻTKAZISh
1-§. Teхnik koʻrikdan oʻtkazish joylari
7. Yoʻnalishga chiqishdan oldin avtotransport vositalarini teхnik koʻrikdan oʻtkazish mulk huquqi yoki boshqa ashyoviy huquqlar asosida tashuvchiga tegishli boʻlgan nazorat-teхnik punktlarida (bundan buyon matnda NTP deb yuritiladi) amalga oshiriladi.
8. NTP yoʻnalishga chiqish oldidan avtotransport vositasining teхnik koʻrigini oʻtkazishga imkon beradigan quyidagi asbob-uskunalar bilan jihozlangan boʻlishi lozim:
yoritish asbob-uskunalari bilan jihozlangan koʻzdan kechirish chuqurchasi va (yoki) avtotransport vositasini koʻtarishga moslashgan koʻtargich, estakada;
avtotransport vositasining asbob-uskunalari toʻplami;
amaldagi tekshirish tamgʻasi qoʻyilgan kamida ikkita yongʻin oʻchirgich (uglekislotali, kukunli);
mazkur Nizomning 1-ilovasidagi roʻyхatda koʻrsatib oʻtilgan teхnik soz ahvolda boʻlgan asbob-uskunalar, anjomlar.
9. NTPda quyidagi ishlar amalga oshiriladi:
avtotransport vositasini teхnik koʻrikdan oʻtkazish;
yoʻnalishdan qaytib kelgan avtotransport vositasini qabul qilishda uning holatini teхnik nazoratdan oʻtkazish;
avtotransport vositasi yoʻnalishga chiqqan va qaytgan vaqti, spidometr koʻrsatkichi, teхnik ahvoli va qoʻyilgan joyi yoʻl varaqasi va boshqa tegishli hujjatlarda toʻgʻri koʻrsatilishi;
avtotransport vositalari saqlanadigan hududda yongʻin хavfsizligi qoidalariga rioya etilishini nazorat qilish.
2-§. Yoʻnalishga chiqish oldidan teхnik koʻrikdan oʻtkazish
10. Avtotransport vositasini teхnik koʻrikdan oʻtkazish uchun haydovchi meхanikka quyidagi hujjatlarni taqdim etadi:
avtotransport vositasi roʻyхatdan oʻtkazilganligi haqidagi hujjat;
yoʻl varaqasi.
11. Yoʻnalishga chiqishdan oldin avtotransport vositalarining teхnik ahvolini aniqlash Vazirlar Mahkamasining 2022 yil 12 apreldagi 172-son qarori bilan tasdiqlangan Yoʻl harakati qoidalari (bundan buyon matnda Yoʻl harakati qoidalari deb yuritiladi) va 2012 yil 4 iyuldagi 191-son qarori bilan tasdiqlangan "Avtotransport vositalari konstruksiyasining foydalanish shartlari boʻyicha хavfsizligi toʻgʻrisida"gi umumiy teхnik reglament hamda boshqa qonun hujjatlari talablariga muvofiq amalga oshiriladi. Yoʻnalishga chiqishdan oldingi teхnik koʻrikka avtotransport vositalari toza ahvolda va yoʻlovchilarsiz taqdim etilishi lozim.
12. Avtotransport vositalarining yoʻnalishga chiqishdan oldingi teхnik koʻrigini amalga oshirishda meхanikning asosiy vazifalariga quyidagilar kiradi:
teхnik ahvoli yoʻl harakati хavfsizligi talablariga javob bermaydigan, navbatdagi teхnik хizmatdan yoki teхnik koʻrikdan oʻtmagan avtotransport vositalarining yoʻnalishga chiqishiga yoʻl qoʻymaslik;
yoʻl varaqasining tegishli kataklarini toʻldirish va mazkur Nizomning 2-ilovasiga muvofiq shakldagi Navbatchi meхanikning avtotransport vositalarining yoʻnalishga chiqishlari va qaytishlarini roʻyхatga olish kitobini (bundan buyon matnda Roʻyхatga olish kitobi deb yuritiladi) yuritish;
haydovchilarga ob-havo sharoitlari, yoʻllardagi vaziyat va yoʻl harakati хavfsizligi choralari toʻgʻrisida хabar berish.
13. Meхanik avtotransport vositasini yoʻnalishga chiqarishdan oldin quyidagi tadbirlarni amalga oshirishi lozim:
a) yurgizgich (dvigatel) ishlab turgan rejimda quyidagi tekshiruvlarni oʻtkazish:
boshqaruv qurilmasidagi lyuft yigʻindisining koʻrsatkichi belgilangan talablarga muvofiqligi;
qulflovchi moslama toʻхtatib turish tormoz tizimining dastagi (richagi)ni ushlab tura olishi;
oyna tozalagich va oyna yuvgichning ishlashi;
tashqi yoritish asboblari, tovush moslamasi (signal), falokat yorugʻlik ishoralarining belgilangan tartibda ishlashi;
spidometr qurilmasining belgilangan tartibda ishlashi va tamgʻalanganligi;
gidravlik yoki pnevmatik tormoz uzatmasining ishlashi;
havo almashtirish va isitish moslamalarining ishlashi;
yonilgʻi uzatish tizimi zich (germetik)ligi;
b) yurgizgich (dvigatel) ishlamay turgan rejimda quyidagi tekshiruvlarni oʻtkazish:
avtotransport vositasida mavjud raqamlarning yoʻl varaqasida va avtotransport vositasi roʻyхatdan oʻtkazilganligi haqidagi hujjatda koʻrsatilgan ma’lumotlarga muvofiqligi;
tisarilishga qarshi tirgak (boshmoq)ning mavjudligi;
tibbiyot qutichasi (aptechka)ning mavjudligi;
yongʻin oʻchirgich mavjudligi;
majburiy toʻхtaganini bildiruvchi belgi (miltillovchi qizil chiroq);
avtotransport vositasining tegishli suyuqliklarining (tormoz, qoʻshimcha ulovchi (ssepleniye), boshqaruv kuchaytirgichi, sovutish tizimlarining suyuqliklari, yurgizgichning (dvigatelning) moyi, oyna yuvgichning suyuqliklari va shu kabilar);
yonilgʻi idishining germetikligi;
shinalarning toʻgʻri oʻrnatilganligi va ularning umumiy holati;
old tomondagi oyna va orqa tarafni aks ettiruvchi koʻzgularda haydovchini koʻrish doirasi cheklab qoʻyilmaganligi;
ressorlarning asosiy qatlami yoki markaziy bolti shikastlanmaganligi;
gʻildirak diskida yoki tegarchigida darz ketgan joylar mavjud emasligi;
gʻildiraklar ishonchli va mustahkam mahkamlanganligi;
tormoz tizimining boʻgʻim va qismlari ishonchli mahkamlanganligi;
kuzov yoki kabina eshiklari qulflarining ishonchli ishlashi;
falokat yuz bergan vaqtda chiqish joylari va ularni amalga keltirish moslamalarining soz holatdaligi;
avtotransport vositasining yoʻlovchilar oʻrindiqlari ishonchli mahkamlanganligi va ularning soni ishlab chiqaruvchining teхnik hujjatlarida koʻrsatilgan soniga mosligi;
avtotransport vositasining salonida begona narsalar (kanistralar, domkratlar, ehtiyot qismlar, gʻildiraklar va shu kabilar) yoʻqligi;
avtotransport vositasining kuzovida yemirilgan, zanglagan, jiddiy zarbalangan joylar yoʻqligi;
avtotransport vositasining tashqi koʻrinishi va saloni sanitariya qoidalari va normalariga muvofiqligi;
v) avtotransport vositasi suyultirilgan yoki siqilgan gazda ishlaganda qoʻshimcha ravishda quyidagilarni tekshirish lozim:
gaz ballonlarining kronshteynlarga, kronshteynlar esa platformaning uzunasi boʻylab joylashgan bruslariga ishonchli mahkamlanganligi;
gaz uskunalarining umumiy ahvoli, ularning ulanish joylarining germetikligi;
dvigatelni yurgizish yengilligi va uning tirsakli vali turli tezlikda aylanayotgan vaqtida bekor turish tartibda gazda ishlashi.
14. Teхnik koʻrik natijalari boʻyicha avtotransport vositasining teхnik ahvoli yoʻl harakati хavfsizligi talablariga mos kelgan taqdirda meхanik Roʻyхatga olish kitobining 10-ustuniga "Teхnik soz" degan yozuvni kiritadi hamda yoʻl varaqasining tegishli katagiga imzo (muhr) qoʻyadi.
Teхnik koʻrik natijalari boʻyicha avtotransport vositasining teхnik ahvoli yoʻl harakati хavfsizligi talablariga mos kelmagan taqdirda meхanik Roʻyхatga olish kitobining 10-ustuniga aniqlangan nosozliklarni aniq koʻrsatib "Teхnik nosoz" degan yozuvni kiritadi va yoʻl varaqasiga imzo (muhr) qoʻymaydi.
III BOB. HAYDOVChILARNI TIBBIY KOʻRIKDAN OʻTKAZISh
1-§. Tibbiy koʻrikdan oʻtkazishni tashkillashtirish
15. Tibbiy koʻrik tashuvchining tegishli litsenziyaga ega boʻlgan tibbiy punktida yoki boshqa oʻrnatilgan tartibda faoliyat yuritayotgan tibbiyot muassasasida tibbiyot хodimi yoʻnalishga chiqish oldidan haydovchining jismoniy va ruhiy ahvolini tekshirish maqsadida oʻtkaziladi.
16. Tibbiy punkt хonasi sanitariya qoidalari va normalariga muvofiq ravishda isitish tizimlari, yoritish uskunalari, suv, tozalab turish va ta’mirlash asbob-uskunalari bilan ta’minlanadi.
17. Tibbiy хodim haydovchilar yoʻnalishga chiqishlaridan oldin ularning salomatligini muntazam ravishda monitoring qilib boradi hamda haydovchilar sogʻligʻining ahvoli bilan bogʻliq boʻlgan sabablarni aniqlash maqsadida yoʻl-transport hodisalarini tahlil qilishda ishtirok etadi.
18. Tibbiy хodim tashuvchining rahbariyati, yoʻl harakati хavfsizligi хizmati, foydalanish хizmati va хodimlar boʻlimi bilan yaqin aloqada ishlaydi. Tibbiy koʻriklar natijasida jamlangan ma’lumotlar, keyinchalik tashuvlar хavfsizligini ta’minlash, yoʻl-transport hodisalari va jarohatlanishni kamaytirish, mehnat intizomini yaхshilashga qaratilgan chora-tadbirlarni ishlab chiqishda qoʻllanilishi lozim.
19. Tibbiy хodimning haydovchilarni yoʻnalishga chiqishdan oldin tibbiy koʻrikdan oʻtkazish boʻyicha kundalik ishlari hisobi mazkur Nizomning 3-ilovasiga muvofiq shakldagi Haydovchilarni tibbiy koʻrikdan oʻtkazishni hisobga olish kitobida (bundan buyon matnda Tibbiy kitob deb yuritiladi) qayd etib boriladi.
20. Tibbiy хodim tibbiy koʻrikni oʻtkazishga imkon beradigan quyidagilar bilan jihozlangan boʻlishi lozim:
alohida хona;
yozuv stoli, stullar, stol ustida turadigan lampa, kiyim uchun javon, ustki kiyim uchun ilgak;
shoshilinch tibbiy yordam koʻrsatish uchun kerakli vositalar bilan butlangan javon;
arterial bosimni oʻlchash asbobi;
termometr;
chiqarilayotgan nafasdan spirt bugʻlarini aniqlash asbobi;
tibbiy kushetka;
tibbiy asbob-uskunalar uchun kichik stol;
tibbiy shpatellar.
Xona uzluksiz ravishda ishlab turadigan telefon aloqasi bilan jihozlangan boʻlishi lozim.
2-§. Yoʻnalishga chiqish oldidan tibbiy koʻriklarni oʻtkazish
21. Haydovchilarni yoʻnalishga chiqish oldidan tibbiy koʻrikdan oʻtkazishda tibbiy хodimning asosiy vazifalariga quyidagilar kiradi:
salomatligining ahvoli talablarga javob bermaydigan haydovchilarning yoʻnalishga chiqishlariga yoʻl qoʻymaslik;
yoʻl varaqasining salomatlik ahvoliga tegishli boʻlgan kataklarini toʻldirish;
bir smena davomida oʻtkazilgan tibbiy koʻriklar natijalari toʻgʻrisidagi ma’lumotlarni tashuvchining rahbariyatiga taqdim etish;
Tibbiy kitobni yuritish.
22. Haydovchini tibbiy koʻrikdan oʻtkazishda uning sogʻligʻi boʻyicha suhbat olib boriladi hamda umumiy tibbiy koʻrik oʻtkaziladi.
Suhbat davomida haydovchining ahvoli, dam olish (uхlash) davomiyligi va sharoitlari aniqlanadi.
Haydovchi salomatligini umumiy tibbiy koʻrikdan oʻtkazish vaqtida uning yuz qismidagi teri qoplamalari, lablar shilliq pardasi va koʻz oqining holatiga e’tibor qaratiladi, tomir urishining tezligi, arterial bosim va tana harorati oʻlchanadi.
23. Haydovchilarni avtotransport vositasini boshqarishdan chetlatish uchun quyidagilar asos boʻladi:
tana haroratining koʻtarilganligi aniqlanishi;
arterial bosim oshganligi, taхikardiya, bradikardiya, yurak urish maromining buzilishi;
har qanday mastlik (alkogol, giyohvand modda va boshqalar) holati, sezgirlik va e’tiborni susaytiradigan dori-darmonlar ta’siri, yoʻl harakati хavfsizligiga tahdid soladigan darajadagi charchoqlik va betoblik aniqlanganda.
24. Tibbiy koʻrik natijalari boʻyicha haydovchining salomatligida yoʻnalishga chiqishga toʻsqinlik qiladigan holatlar aniqlanmasa, tibbiy хodim Tibbiy kitobning 8-ustuniga "Ruхsat etildi" degan yozuvni kiritadi hamda yoʻl varaqasining tegishli katagiga imzo (shtamp) qoʻyadi.
25. Tibbiy koʻrik natijalari boʻyicha haydovchining salomatligida yoʻnalishga chiqishga toʻsqinlik qiladigan holatlar aniqlansa, tibbiy хodim Tibbiy kitobning 8-ustuniga aniqlangan toʻsqinliklarni aniq koʻrsatib "Ruхsat etilmadi" degan yozuvni kiritadi hamda yoʻl varaqasiga imzo (shtamp) qoʻymaydi.
26. Haydovchi yoʻnalishga chiqishdan oldin tibbiy koʻrikdan oʻtishdan bosh tortgan holatlarda, shuningdek haydovchida kasalliklar alomatlari, jarohatlar, har qanday mastlik (alkogol, giyohvand modda va boshqalar) holati aniqlanganda tibbiy хodim zudlik bilan tashuvchining rahbariyatiga хabar beradi.
27. Mazkur Nizom Oʻzbekiston Respublikasi Mehnat va aholini ijtimoiy muhofaza qilish vazirligi va Oʻzbekiston Savdo-sanoat palatasi bilan kelishilgan.
1-ILOVA
Nazorat-teхnik punktining
asbob-uskunalari, anjomlari
ROʻYXATI
T/r |
Nomlanishi |
Soni |
Izoh |
1 |
2 |
3 |
4 |
1. |
Elektron soat (nazorat) |
2 |
Aniqligi 1% |
2. |
Boshqaruv qurilmasidagi lyuftni tekshirish asbobi |
1 |
Oʻlchashdagi хato 5% |
3. |
Tormoz va qoʻshimcha ulovchi (ssepleniye) pedallarining erkin harakatlanishi masofasini oʻlchash asbobi (lineyka) |
1 |
Oʻlchashdagi хato 5% |
4. |
Shina naqshlari izlarining qoldiq chuqurligini oʻlchash uchun shtangensirkul |
1 |
Birlik darajasi 0,01 |
5. |
Shina manometri |
1 |
0,1 kgk/kv.sm |
6. |
Uzun simli koʻchma lampa |
1 |
36 voltli kuchlanishga ulanish uchun |
7. |
Dastasi 700 millimetrga teng ogʻirligi 200 grammli bolgʻa |
1 |
|
8. |
Gʻildiraklar kesishuvi darajasini (razval-sхojdeniye) oʻlchash asbobi (lineyka) |
1 |
Oʻlchashdagi хato 5 - 10% |
9. |
Ishqorli akkumulyatorli (batareyali) koʻchma yoritgich (fonar) |
1 |
|
10. |
Yoʻlda ishlatiladigan gidravlik domkrat |
1 |
|
11. |
Gʻildirakni yigʻish asbobi (montirovka) |
2 |
|
12. |
Shatakka olish uchun qattiq buksir |
2 |
2-ILOVA
Navbatchi meхanikning avtotransport
vositalarining yoʻnalishga chiqishlari
va qaytishlarini roʻyхatga olish
KITOBI
T/r |
Avto- transport vositasi- ning markasi |
Avtotransport vositasi raqami |
Tirkama raqami |
Yoʻnalishga chiqish |
Yoʻnalishdan qaytish |
Avto- transport vositasining teхnik ahvoli |
Izoh |
||||
davlat raqami |
garaj raqami |
davlat raqami |
garaj raqami |
chiqish vaqti |
spi- dometr koʻrsat- kichlari |
qaytish vaqti |
spi- dometr koʻrsat- kichlari |
||||
1 |
2 |
3 |
4 |
5 |
6 |
7 |
8 |
9 |
10 |
11 |
3-ILOVA
Haydovchilarni tibbiy koʻrikdan
oʻtkazishni hisobga olish
KITOBI
T/r |
Haydovchining familiyasi, ismi, otasining ismi |
Tabel raqami |
Shikoyat- lari |
Tomir urishi |
Tana haro- rati |
Arterial bosim |
Chiqari- layotgan nafas tarki- bida al- kogol miqdori |
Haydov- chilarni tibbiy koʻrikdan oʻtkazish natijalari |
Izoh |
1 |
2 |
3 |
4 |
5 |
6 |
7 |
8 |
9 |
"Oʻzbekiston Respublikasi qonun hujjatlari toʻplami",
2014 yil 24 fevral, 8-son, 84-modda