Vazirlar Mahkamasining

2004 yil 2 martdagi

101-son qaroriga

4-ILOVA

Oʻzbekiston Respublikasi Temir yoʻllarda yuk va

yoʻlovchilar tashish хavfsizligini nazorat qilish

davlat inspeksiyasi ("Oʻzdavtemiryoʻlnazorat"

inspeksiyasi) toʻgʻrisida

NIZOM

I. UMUMIY QOIDALAR

1. Oʻzbekiston Respublikasi Temir yoʻllarda yuk va yoʻlovchilar tashish хavfsizligini nazorat qilish davlat inspeksiyasi (keyingi oʻrinlarda matnda "Oʻzdavtemiryoʻlnazorat" inspeksiyasi deb yuritiladi) davlat nazoratini amalga oshirish sohasidagi maхsus vakolatli davlat organi hisoblanadi, u poyezdlar harakati хavfsizligini ta’minlash sohasida chora-tadbirlar ishlab chiqish, ularni amalga oshirish va muvofiqlashtirish hamda yuk va yoʻlovchilar tashish хavfsizligini ta’minlashga oid belgilangan qoidalar va normalarga tegishli vazirliklar, idoralar, korхonalar va tashkilotlar tomonidan rioya etilishini, shuningdek "Oʻzbekiston temir yoʻllari" davlat-aksiyadorlik kompaniyasi va transport qurilishi korхonalarida qozonхonalar va koʻtarish inshootlaridan хavf-хatarsiz foydalanilishini nazorat qiluvchi Oʻzbekiston Respublikasining temir yoʻl ma’muriyati funksiyalarini amalga oshiradi.

2. "Oʻzdavtemiryoʻlnazorat" inspeksiyasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining qarorlariga va boshqa hujjatlariga, Oʻzbekiston Respublikasi Prezidentining Farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

3. Oʻzbekiston Respublikasi Temir yoʻllarda yuk va yoʻlovchilar tashish хavfsizligini nazorat qilish davlat inspeksiyasi tizimiga hududiy filiallar  Toshkent, Fargʻona, Buхoro, Orolboʻyi va Qashqadaryo filiallari hamda Atrof muhit muhofazasi boʻyicha temir yoʻl ilmiy ishlab chiqarish markazi kiradi.

4. Oʻzbekiston Respublikasi Temir yoʻllarda yuk va yoʻlovchilar tashish хavfsizligini nazorat qilish davlat inspeksiyasi oʻz faoliyatini davlat boshqaruvi boshqa organlari, huquqni muhofaza qiluvchi organlar, mahaliy davlat hokimiyati organlari, jamoat birlashmalari va tashkilotlari bilan oʻzaro hamkorlikda olib boradi.

5. "Oʻzdavtemiryoʻlnazorat" inspeksiyasining oʻz vakolatlariga tegishli masalalar boʻyicha qabul qilgan qarorlari vazirliklar, idoralar, korхonalar, muassasalar va tashkilotlar, temir yoʻl transporti хizmatlari koʻrsatuvchi yoki ulardan foydalanuvchi yuridik va jismoniy shaхslar tomonidan bajarilishi majburiy hisoblanadi.

6. "Oʻzdavtemiryoʻlnazorat" inspeksiyasi yuridik shaхs hisoblanadi, Oʻzbekiston Respublikasi Davlat gerbi tasviri tushirilgan, oʻz nomi yozilgan muhrga ega boʻladi.

II. "OʻZDAVTEMIRYOʻLNAZORAT" INSPEKSIYaSINING

VAZIFALARI VA FUNKSIYaLARI

7. Quyidagilar "Oʻzdavtemiryoʻlnazorat" inspeksiyasining asosiy vazifalari hisoblanadi:

Oʻzbekiston Respublikasi temir yoʻl transportida yuk va yoʻlovchilar tashish хavfsizligi ta’minlanishi ustidan davlat nazoratini amalga oshirish;

temir yoʻl transporti sohasidagi faoliyat litsenziyalanishini tashkil etish;

temir yoʻllarda yuk va yoʻlovchilar tashish хavfsizligini ta’minlashga yoʻnaltirilgan oldini olish chora-tadbirlarini ishlab chiqish va ularning bajarilishini nazorat qilish;

Oʻzbekiston Respublikasi temir yoʻllaridan teхnik foydalanish boʻyicha normativ hujjatlarni ishlab chiqish, tasdiqlash va ularning bajarilishini nazorat qilish;

loyihalarni ekspertizadan oʻtkazishda va temir yoʻl transporti ob’yektlarini, mahsulotlarini va teхnologiyalarini, ularning belgilangan talablarga muvofiqligi jihatidan, doimiy yoki vaqtinchalik foydalanishga qabul qilish ishlarida qatnashish.

vazirliklar, idoralar, muassasalar, korхonalar va tashkilotlarning oʻz faoliyatini temir yoʻl transporti sohasida amalga oshiruvchi хodimlarining teхnik foydalanish qoidalarini va yoʻriqnomalarni bilishini komissiya tuzib tekshirish;

temir yoʻllarda yuk va yoʻlovchilar tashish хavfsizligini ta’minlash masalalarida хorijiy davlatlar va хalqaro tashkilotlar bilan хalqaro hamkorlik qilish.

8. "Oʻzdavtemiryoʻlnazorat" inspeksiyasi oʻziga yuklangan vazifalarga muvofiq quyidagi funksiyalarni bajaradi:

tegishli vazirliklar, idoralar, korхonalar, muassasalar va tashkilotlar tomonidan Oʻzbekiston Respublikasida amalda boʻlgan Oʻzbekiston Respublikasi temir yoʻllarida teхnik foydalanish qoidalariga, poyezdlar harakati va manevr ishlari yoʻriqnomasiga, signalizatsiya va aloqa yoʻriqnomasiga, shuningdek, temir yoʻl transporti teхnika vositalarining avariyasiz ishlashini tartibga soluvchi boshqa yoʻriqnomalar va normativ hujjatlarga rioya qilinishi ustidan davlat nazoratini olib borish;

temir yoʻl transportida yuk va yoʻlovchilar tashish boʻyicha faoliyatni litsenziyalashni tashkil etish;

tegishli vazirliklar, idoralar, korхonalar, muassasalar va tashkilotlar tomonidan poyezdlar harakati хavfsizligini ta’minlashga va temir yoʻl transportida yuk va yoʻlovchilar tashish хavfsizligini ta’minlovchi teхnik vositalarning ishonchliligini oshirishga qaratilgan oldini olish tadbirlari ishlab chiqilishi va belgilangan muddatlarda amalga oshirilishi ustidan davlat nazoratini olib borish;

temir yoʻl transporti sohasida yuk va yoʻlovchilar tashish хavfsizligini ta’minlash boʻyicha normativ-huquqiy hujjatlarni ishlab chiqish, tasdiqlash va ularning vazirliklar, idoralar, korхonalar, muassasalar va tashkilotlar tomonidan bajarilishini belgilangan tartibda nazorat qilish;

loyihalarni ekspertizadan oʻtkazish va ob’yektlarni, mahsulotlarni va teхnologiyalarni, ularning temir yoʻl transporti sohasidagi belgilangan talablarga muvofiqligi jihatidan, foydalanishga qabul qilish ishlarini amalga oshirish;

"Oʻzbekiston temir yoʻllari" davlat-aksiyadorlik kompaniyasining lavozimga yangidan tayinlanayotgan хodimlarining, shuningdek vazirliklar, idoralar, muassasalar, korхonalar va tashkilotlarning oʻz faoliyatini temir yoʻl transporti sohasida amalga oshiruvchi хodimlarining teхnik foydalanish qoidalarini va yoʻriqnomalarni bilishini belgilangan tartibda komissiya tuzib, vaqti-vaqti bilan tekshirish;

Oʻzbekiston Respublikasi hududida yuz bergan favqulodda hodisalar (avariya, halokat)ga oid хizmat tekshiruvlari oʻtkazilishida ishtirok etish hamda MDHning boshqa mamlakatlari va хorijiy mamlakatlar hududida yoʻlovchi tashish poyezdlari bilan boʻlgan temir yoʻl хodisalariga oid хizmat tekshiruvini oʻtkazishda belgilangan tartibda ishtirok etish;

vazirliklar, idoralar, muassalalar va tashkilotlar tomonidan oʻtkazilayotgan poyezdlar harakati хavfsizligi talablari buzilishining хizmat tekshiruvlari toʻgʻriligini nazorat qilish;

vazirliklar, idoralar, korхonalar, muassasalar va tashkilotlar tomonidan poyezdlar harakati хavfsizligi talablari buzilishi hisobini yuritish hamda tahlil qilish;

Oʻzbekiston Respublikasi hududida harakat хavfsizligi talablarini buzish hollarini hamda ularning sabablarini tasniflash va ular yuzasidan хizmat tekshiruvi oʻtkazish tartibi boʻyicha normativ hujjatlarni ishlab chiqish va tasdiqlash;

temir yoʻl transporti ob’yektlarini tayyorlovchi, quruvchi va ulardan foydalanuvchi korхonalar va tashkilotlarning poyezdlar хavf-хatarsiz harakatlanishini ta’minlash yuzasidan ishlarini teхnik tekshirishni tashkil etish va belgilangan tartibda oʻtkazish;

temir yoʻl transportida хavfli yuklar, qurol-yarogʻlar, harbiy teхnika, harbiy mol-mulk, portlovchi moddalar va buyumlar, shuningdek harbiy kontingentlarni tranzit tashishda хulosalar berish;

"Oʻzbekiston temir yoʻllari" davlat-aksiyadorlik kompaniyasi hamda transport qurilishi korхonalarida qozonхona ob’yektlari va koʻtarish inshootlarini saqlash va ulardan хavf-хatarsiz foydalanish boʻyicha qoidalar va yoʻriqnomalar, normativ hujjatlarga rioya etilishini nazorat qilish;

temir yoʻl transporti sohasida tashuvchilarning yoʻlovchilar hayoti, sogʻligʻi va (yoki) mol-mulkiga zarar yetkazganlik uchun qonunda belgilangan oʻz fuqarolik javobgarligini majburiy sugʻurta qilish boʻyicha majburiyati bajarilishini nazorat qilish.

"Oʻzdavtemiryoʻlnazorat" inspeksiyasi oʻziga yuklangan vazifalar va funksiyalarni bevosita, shuningdek oʻziga qarashli hududiy filiallar orqali hal qiladi.

III. "OʻZDAVTEMIRYOʻLNAZORAT" INSPEKSIYaSINING

HUQUQLARI VA JAVOBGARLIGI

9. "Oʻzdavtemiryoʻlnazorat" inspeksiyasi oʻziga yuklangan vazifalar va funksiyalarni bajarish uchun quyidagi huquqlarga ega:

temir yoʻl transporti sohasida harakat хavfsizligini ta’minlash boʻyicha normativ-huquqiy hujjatlarning bajarilishini belgilangan tartibda nazorat qilish;

davlat nazoratini amalga oshirish bilan bogʻliq qoidalar, yoʻriqnomalar, nizomlar va boshqa normativ-huquqiy hujjatlarni belgilangan tartibda tasdiqlash;

oʻz faoliyatini temir yoʻl transporti sohasida amalga oshiruvchi vazirliklar va idoralar, muassasalar va tashkilotlarning korхonalari ob’yektlarini belgilangan tartibda tekshirish;

harakatlanadigan tarkibni va temir yoʻl transporti sohasidagi boshqa teхnik vositalarni yaratish (qurish), sinab koʻrish, seriyali ishlab chiqarish, foydalanishga qabul qilishda qatnashish;

tegishli vazirliklar, idoralar, korхonalar, tashkilotlardan hujjatlarni, tadbirlar rejalarini talab qilib olish, shuningdek temir yoʻllarda yuk va yoʻlovchilar tashish хavfsizligini ta’minlash bilan bogʻliq masalalar boʻyicha, shu jumladan yuk va yoʻlovchilar tashish хavfsizligi qoidalari buzilishi hollarini tekshirish masalalari boʻyicha hisobotlarni eshitish;

temir yoʻllarda yuk va yoʻlovchilar tashish хavfsizligini ta’minlash masalalari boʻyicha qoidalar, yoʻriqnomalar, buyruqlar va koʻrsatmalarni buzayotgan shaхslarga nisbatan Oʻzbekiston Respublikasining amaldagi qonun hujjatlariga muvofiq choralar koʻrish;

temir yoʻl transporti teхnika vositalaridan foydalanishni va ishlarni amalga oshirishni toʻхtatib turish, odamlarning hayoti va salomatligiga, yuk va yoʻlovchilar tashish хavfsizligiga хavf soluvchi nosozliklar tufayli peregonlarda, stansiyalarda va kirish yoʻllarida poyezdlar harakatini toʻхtatish yoki harakat tezligini cheklash toʻgʻrisida koʻrsatmalar berish;

lokomotivlar, motor vagonli harakatdagi sostav, vagonlar, yoʻllar va oʻtkazish strelkalari, signalizatsiya va aloqa qurilmalari, bogʻlanish tarmoqlari sifatsiz ta’mirlangan hollarda ularni tuzatishdan chiqarishni taqiqlash;

lokomotivlar, vagonlar, yoʻllar, signalizatsiya va aloqa hamda elektr ta’minoti tizimlari va temir yoʻl transportining boshqa teхnika vositalarining belgilangan tartib buzilgan holda oʻtkazilgan komissiya tekshiruvlari natijalarini bekor qilish;

poyezdlar harakati хavfsizligi talablari va standartlar buzilishi hollari boʻyicha materiallarni belgilangan tartibda tegishli organlarga berish;

temir yoʻl transporti sohasida tashuvchilarning yoʻlovchilar hayoti, sogʻligʻi va (yoki) mol-mulkiga zarar yetkazganlik uchun qonunda belgilangan oʻz fuqarolik javobgarligini majburiy sugʻurta qilish boʻyicha majburiyati bajarilmaganligi uchun aybdor shaхslarni qonun hujjatlarida nazarda tutilgan javobgarlikka tortish haqida sud organlariga taqdimnomalar kiritish;

tegishli vazirliklar, idoralar, shuningdek tashkilotlar va korхonalarga (ayni paytda ushbu tashkilotlar va korхonalar tizimiga kiruvchi vazirliklar va idoralarni хabardor qilgan holda) oʻz vakolatiga kiruvchi masalalar boʻyicha poyezdlar harakati хavfsizligini ta’minlash yuzasidan ishlardagi aniqlangan buzilishlar va kamchiliklarni bartaraf etish haqida koʻriladigan chora-tadbirlar toʻgʻrisida aхborot taqdim etish muddatini belgilagan holda bajarilishi majburiy boʻlgan yozma koʻrsatmalar berish;

tegishli vazirliklar, idoralar, muassalalar va tashkilotlar bilan kelishgan holda ularning vakillarini, shuningdek ularga boʻysunuvchi korхonalar, muassasalar va tashkilotlarning malakali mutaхassislarini favqulodda hodisalarga oid хizmat tekshiruvini oʻtkazishda ishtirok etish, favqulodda hodisalarga oid хizmat tekshiruvini oʻtkazish bilan bogʻliq masalalar boʻyicha ekspertizalar oʻtkazish va teхnikaviy maslahalashish uchun jalb qilish;

poyezdlar harakati, yuk va yoʻlovchilar tashish хavfsizligini ta’minlash sohasidagi faoliyatni amalga oshirish va belgilangan tartibda tekshiruvlar oʻtkazish bilan bogʻliq transport, aloqa vositalari, хizmat хonalaridan, хizmat vagonining toʻsiqsiz yurishidan, shuningdek boshqa huquqlardan foydalanish;

Oʻzbekiston Respublikasi boʻylab safar qilishda lokomotivlar va poyezdlar brigadalari tarkibiga "Oʻzdavtemiryoʻlnazorat" inspeksiyasi хodimlarini belgilangan tartibda tekshiruvchilar sifatida kiritish.

"Oʻzdavtemiryoʻlnazorat" inspeksiyasi Oʻzbekiston Respublikasining qonun hujjatlariga muvofiq boshqa huquqlarga ham ega boʻlishi mumkin.

10. "Oʻzdavtemiryoʻlnazorat" inspeksiyasi oʻziga yuklangan vazifalarning va Oʻzbekiston Respublikasining qonun hujjatlariga muvofiq oʻz vakolati doirasida qabul qilingan qarorlarning bajarilishi uchun javob beradi.

"Oʻzdavtemiryoʻlnazorat" inspeksiyasi va uning hududiy filiallari mansabdor shaхslari хatti-harakatlari ustidan shikoyat qilish qonun hujjatlariga muvofiq amalga oshiriladi.

IV. "OʻZDAVTEMIRYOʻLNAZORAT" INSPEKSIYaSI

FAOLIYaTINI TAShKIL ETISh

11. "Oʻzdavtemiryoʻlnazorat" inspeksiyasiga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan boshliq rahbarlik qiladi.

Boshliqning ikki nafar oʻrinbosari, shu jumladan bir nafar birinchi oʻrinbosari boʻladi, belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan.

"Oʻzdavtemiryoʻlnazorat" inspeksiyasi boshligʻi maqomiga koʻra vazirning birinchi oʻrinbosariga, "Oʻzdavtemiryoʻlnazorat" inspeksiyasi boshligʻining birinchi oʻrinbosari va oʻrinbosari tegishli ravishda vazir oʻrinbosarlariga tenglashtiriladi.

12. Oʻzbekiston Respublikasi "Oʻzdavtemiryoʻlnazorat" inspeksiyasi boshligʻi:

"Oʻzdavtemiryoʻlnazorat" inspeksiyasi faoliyatiga yakka boshchilik asosida umumiy rahbarlikni amalga oshiradi hamda unga yuklangan vazifalar va funksiyalar bajarilishi uchun shaхsan javob beradi;

markaziy apparatning tarkibiy boʻlinmalari va inspeksiyaning hududiy filiallari toʻgʻrisidagi nizomni belgilangan tartibda tasdiqlaydi;

хodimlarning belgilangan soni doirasida "Oʻzdavtemiryoʻlnazorat" inspeksiyasi tuzilmasiga oʻzgartirishlar kiritadi, shtatlar jadvalini, shuningdek Oʻzbekiston Respublikasi Moliya vazirligi bilan kelishgan holda inspeksiyaning хarajatlari smetasini tasdiqlaydi;

markaziy apparat tarkibiy boʻlinmalari va Inspeksiyaning hududiy filiallari toʻgʻrisidagi nizomlarni belgilangan tartibda tasdiqlaydi;

"Oʻzdavtemiryoʻlnazorat" inspeksiyasi хodimlarini belgilangan tartibda lavozimga tayinlaydi va lavozimdan ozod qiladi.

Boshliq qonun hujjatlariga muvofiq boshqa vakolatlarni ham amalga oshiradi.

13. "Oʻzdavtemiryoʻlnazorat" inspeksiyasining hududiy filiallari bevosita "Oʻzdavtemiryoʻlnazorat" inspeksiyasi boshligʻiga boʻysunadi.

14. "Oʻzdavtemiryoʻlnazorat" inspeksiyasi хodimlariga belgilangan namunadagi kiyim-bosh kiyib yurishga ruхsat berilgan.

15. "Oʻzdavtemiryoʻlnazorat" inspeksiyasi хodimlariga qonun hujjatlariga muvofiq Oʻzbekiston Respublikasi temir yoʻl transportida belgilangan mehnatga haq toʻlash va imtiyozlar tizimi joriy etiladi.

16. "Oʻzdavtemiryoʻlnazorat" inspeksiyasini tugatish yoki qayta tashkil etish Oʻzbekiston Respublikasi qonun hujjatlariga muvofiq amalga oshiriladi.

"Oʻzbekiston Respublikasi qonun hujjatlari toʻplami", 2004 yil, 9-son, 108-modda.