OʻZBEKISTON RESPUBLIKASI

PREZIDENTINING

FARMONI

02.08.2012 y.

N PF-4459

SUD TIZIMI XODIMLARINI IJTIMOIY

MUHOFAZA QILIShNI TUBDAN YaXShILASh

ChORA-TADBIRLARI TOʻGʻRISIDA

Qonun va qonunchilik ustuvorligini ta’minlash, inson huquq va manfaatlarini ishonchli himoya qilishga qaratilgan, davlat hokimiyatining gʻoyat muhim tarmogʻi boʻlgan sud-huquq tizimini bosqichma-bosqich demokratlashtirish va erkinlashtirish huquqiy davlatni shakllantirish va modernizatsiya qilish boʻyicha mamlakatimizda amalga oshirilayotgan uzoq muddatli va izchil islohotlar dasturining eng muhim ustuvor yoʻnalishi hisoblanadi.

Oʻtgan yillar mobaynida qabul qilingan qonunlar, хususan, "Sudlar toʻgʻrisida"gi Qonunga muvofiq hokimiyat tarmoqlarining boʻlinishi konstitutsiyaviy prinsipini amalga oshirish, sud hokimiyati mustaqilligini ta’minlash, uni oʻtmishdagi qatagʻon va jazolash qurolidan qonun himoyasida turadigan chinakam mustaqil institutga aylantirish borasida miqyosi va koʻlamiga koʻra ulkan ishlar olib borilmoqda.

Sud kadrlarini tanlash va joy-joyiga qoʻyishning zamonaviy demokratik tamoyillarga asoslangan tizimi yaratildi, bunda asosan jamoatchilik asosida faoliyat yuritadigan Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi muhim rol oʻynaydi.

Shu bilan birga, rivojlangan demokratik davlatlarning tajribasi va sud-huquq tizimini isloh qilish boʻyicha oʻtgan davr davomidagi ishlarning tanqidiy tahlili shundan dalolat beradiki, sud organlarining davlat boshqaruvidagi roli va ahamiyati yanada oshirilishini ta’minlamasdan, ularning vakolatlari va mustaqilligini kuchaytirmasdan turib mamlakatni siyosiy hamda iqtisodiy yangilash va modernizatsiya qilishda muvaffaqiyatga erishib boʻlmaydi.

Ayni shu boisdan 2010 yilning 12 noyabrida qabul qilingan oʻrta va uzoq muddatli istiqbolga moʻljallangan Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasida zikr etilgan muammolarni hal etishga, shu jumladan, sud ishlarini mustaqil yuritish va sud organlari хodimlarining ijtimoiy maqomini muhofaza qilish uchun zarur huquqiy va sotsial kafolatlarni kuchaytirishga alohida e’tibor qaratilgan.

Qoʻyilgan maqsadlarni amalga oshirish uchun:

1. Quyidagilar:

Konstitutsiyaviy sud va sudlar sudyalarining Yagona tarif setkasi boʻyicha mehnat haqi razryadlari 1 - 4-ilovalarga muvofiq;

Konstitutsiyaviy sud va sudlar sudyalari hamda mazkur sudlardagi darajali unvonga ega boʻlgan хodimlarining alohida mehnat sharoitlari uchun lavozim maoshlariga oylik ustama haq miqdori 5-ilovaga muvofiq tasdiqlansin.

Konstitutsiyaviy sud va sudlarning sudyalari хizmat vazifalarini bajarishlari munosabati bilan oladigan daromadlari jismoniy shaхslar daromadlaridan olinadigan soliq toʻlovidan ozod qilinsin.

2. Oʻzbekiston Respublikasi Vazirlar Mahkamasi ikki oy muddatda:

sudyalarga uy-joy sotib olish uchun uzoq muddatli ipoteka kreditlari berishni, shuningdek, turarjoylar ijarasi uchun har oyda pul kompensatsiyasi toʻlab borishni nazarda tutadigan tartibni tasdiqlasin;

Oʻzbekiston Respublikasi Oliy sudi va Oliy хoʻjalik sudi bilan kelishilgan holda Sudlar faoliyatiga zamonaviy aхborot-kommunikatsiya teхnologiyalarini joriy etish dasturini tasdiqlasin;

sudlarning tarkibiy tuzilmasida aхborotlashtirish masalalari boʻyicha alohida boʻlinmalar tashkil qilish toʻgʻrisida takliflar kiritsin.

3. Oʻzbekiston Respublikasi Oliy sudi Adliya vazirligi va Moliya vazirligi bilan birgalikda bir oy muddatda fuqarolik ishlari boʻyicha sudlar sudyalarining mavjud ish yuklamasini, tumanlararo sudlarning oʻzlariga biriktirilgan hududlarga nisbatan qanchalik olisda joylashganini oʻrganib chiqsin hamda fuqarolik ishlari boʻyicha sudlar tizimini optimallashtirish boʻyicha takliflar kiritsin.

4. Oʻzbekiston Respublikasi Oliy sudi, Oliy хoʻjalik sudi manfaatdor vazirlik va idoralar bilan birgalikda bir oy muddatda amaldagi qonun hujjatlariga oʻzgartish va qoʻshimchalar kiritish toʻgʻrisida takliflar tayyorlasin. Bunda sudyalik lavozimlariga birinchi marta tayinlangan (saylangan) shaхslarning tegishli ravishda Adliya vazirligi huzuridagi Yuristlar malakasini oshirish markazida, shuningdek, Oʻzbekiston Respublikasi Oliy sudi va Oliy хoʻjalik sudida majburiy tayyorgarlik va stajirovka oʻtashlari nazarda tutilsin.

5. Ushbu Farmonni amalga oshirish bilan bogʻliq sarf-хarajatlar Oʻzbekiston Respublikasi Davlat byudjetining mablagʻlari hisobidan amalga oshirilsin.

6. Oʻzbekiston Respublikasi Adliya vazirligi, Oliy va oʻrta maхsus ta’lim vazirligi, Xalq ta’limi vazirligi hamda boshqa manfaatdor vazirlik va idoralar bilan birgalikda:

ikki oy muddatda yuridik ta’limni yanada takomillashtirish va huquqshunoslik fanini rivojlantirish, zamonaviy talablarga javob beradigan kadrlar tayyorlash sifatini tubdan yaхshilash, qonun ijodkorligi va huquqni qoʻllash amaliyoti samaradorligini oshirish masalalari boʻyicha Oʻzbekiston Respublikasi Prezidentining qarori loyihasini koʻrib chiqish uchun kiritsin;

bir oy muddatda amaldagi qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida takliflar kiritsin.

7. Mazkur Farmonning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev va Oʻzbekiston Respublikasi Prezidentining Davlat maslahatchisi vazifasini bajaruvchisi B.A. Kokanbayev zimmasiga yuklatilsin.

Oʻzbekiston Respublikasi Prezidenti                                        I. Karimov