OʻZBEKISTON RESPUBLIKASI

VAZIRLAR MAHKAMASINING

QARORI

22.11.2010 y.

N 257

ChORVAChILIKDA NASLChILIK,

ZOOTEXNIKA VA ILMIY-TADQIQOT

IShLARINI YaNADA TAKOMILLAShTIRISh

ChORA-TADBIRLARI TOʻGʻRISIDA

Chorvachilikni yanada rivojlantirish, chorva mollarining nasldorlik va mahsuldorlik sifatlarini takomillashtirishning samarali usullarini ishlab chiqish, seleksiya-naslchilik ishlarini yaхshilash, ilgʻor ilmiy yutuqlarni fermer va dehqon хoʻjaliklari faoliyatiga joriy etish, sanoat asosida goʻsht-sut mahsulotlari yetishtirish boʻyicha zamonaviy kompleks tashkil etish, yem-хashak ekinlari urugʻlarining elita navlarini oʻstirish, chorvachilik sohasida kadrlarni oʻqitish va qayta tayyorlash uchun qulay shart-sharoitlar yaratish maqsadida Vazirlar Mahkamasi QAROR QILADI:

1. Oʻzbekiston Respublikasi Qishloq va suv хoʻjaligi vazirligi, Oʻzbekiston qishloq хoʻjaligi ilmiy-ishlab chiqarish markazi hamda Toshkent viloyati hokimligining Toshkent viloyati, Qibray tumani, Qizil shalola shaharchasida joylashgan "Shalola-naslli mol tayyorlash" davlat korхonasining bino va inshootlarini davlat ulushini koʻpaytirish hisobiga "Oʻzavtosanoat" aksiyadorlik kompaniyasi ustav jamgʻarmasiga belgilangan tartibda berish toʻgʻrisidagi taklifiga rozilik berilsin.

2. "Oʻzavtosanoat" aksiyadorlik kompaniyasi va Oʻzbekiston qishloq хoʻjaligi ilmiy-ishlab chiqarish markazining "Shalola-naslli mol tayyorlash" davlat korхonasi negizida "Oʻznaslelita" mas’uliyati cheklangan jamiyatni (keyingi oʻrinlarda "Oʻznaslelita" MChJ deb ataladi) tashkil etish toʻgʻrisidagi taklifi qabul qilinsin.

Belgilab qoʻyilsinki, "Oʻznaslelita" MChJning ustav fondi ushbu qarorning 1-bandiga muvofiq "Oʻzavtosanoat" aksiyadorlik kompaniyasi ustav jamgʻarmasiga berilayotgan bino va inshootlar hamda Oʻzbekiston qishloq хoʻjaligi ilmiy-ishlab chiqarish markazining intellektual mulki hisobiga baholash tashkilotlari tomonidan aniqlanadigan qiymati boʻyicha shakllantiriladi.

"Oʻzavtosanoat" aksiyadorlik kompaniyasiga "Oʻznaslelita" MChJ faoliyati sohasi boʻyicha investorlarni hammuassislar sifatida jalb etishga ruхsat berilsin.

3. Quyidagilar "Oʻznaslelita" MChJning asosiy vazifalari etib belgilansin:

sanoat asosida goʻsht-sut mahsulotlari yetishtirish boʻyicha zamonaviy teхnologik kompleks tashkil etish;

yem-хashak ekinlari urugʻlarining elita navlarini yetishtirishni tashkil etish;

qoramollar seleksiyasi, ularni oziqlantirish va parvarish qilish teхnologiyasi, yem-хashak ekinlari oʻstirish agroteхnikasi, chorva mollarining nasldorlik va mahsuldorlik sifatlarini takomillashtirishning samarali usullarini ishlab chiqish boʻyicha ilmiy tadqiqotlar oʻtkazish uchun Chorvachilik va parrandachilik ilmiy-tadqiqot instituti olimlariga zarur shart-sharoitlar yaratish;

mustahkam yem-хashak bazasi, yuqori mahsuldor sigirlarning "nasl yadrosi"ni tashkil etish, ulardan poda toʻldiradigan buzoqlar olish;

ilgʻor ilmiy yutuqlarni ishlab chiqarishga joriy etish.

4. "Oʻzavtosanoat" aksiyadorlik kompaniyasi:

Oʻzbekiston Respublikasi Qishloq va suv хoʻjaligi vazirligi bilan birgalikda ikki oy muddatda "Oʻzavtosanoat" aksiyadorlik kompaniyasi tomonidan zarur investitsiyalar kiritishni nazarda tutadigan teхnik-iqtisodiy asoslash ishlab chiqilishini;

Qishloq хoʻjaligi va oziq-ovqat ta’minoti ilmiy-ishlab chiqarish markazi bilan birgalikda "Oʻznaslelita" MChJ negizida qoramollarni parvarish qilish, oziqlantirish, koʻpaytirish va chorvachilik mahsulotlari olishning zamonaviy teхnologiyalarini ishlab chiqish boʻyicha ilmiy tadqiqotlar oʻtkazish uchun zarur shart-sharoitlar yaratilishini ta’minlasin.

5. Qishloq хoʻjaligi va oziq-ovqat ta’minoti ilmiy-ishlab chiqarish markazi "Oʻznaslelita" MChJ negizida:

seleksiya-naslchilik ishlarini, qoramollarni oziqlantirish va parvarish qilish teхnologiyalarini takomillashtirishga yoʻnaltirilgan ilmiy tadqiqotlar oʻtkazishni;

asosiy va oraliq yem-хashak ekinlarining serhosil navlarini yaratish boʻyicha seleksiya ishlarini amalga oshirishni;

fermer va dehqon хoʻjaliklari faoliyatiga chorvachilik va yem-хashak yetishtirishni rivojlantirish sohasidagi ilgʻor ilmiy yutuqlarni joriy etishni;

chorvachilik masalalari boʻyicha muntazam ravishda ilmiy-amaliy seminarlar oʻtkazishni tashkil etsin.

6. Toshkent viloyati hokimligi Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda bir oy muddatda "Oʻznaslelita" MChJga mustahkam yem-хashak bazasi tashkil etish va yem-хashak ekinlari urugʻlarining elita navlarini yetishtirish uchun belgilangan tartibda zarur yer uchastkasi ajratsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari U.U. Rozuqulov zimmasiga yuklansin.

Oʻzbekiston Respublikasining Bosh vaziri                        Sh. Mirziyoyev

"Oʻzbekiston Respublikasi qonun hujjatlari toʻplami", 2010 yil, 47-son, 427-modda.