OʻZBEKISTON RESPUBLIKASI

PREZIDENTI HUZURIDAGI

VAZIRLAR MAHKAMASINING

QARORI

11.03.1992 y.

N 125

OʻZBEKISTON RESPUBLIKASI

PREZIDENTINING “YaNGI OLIY

OʻQUV YuRTLARINI TAShKIL QILISh

TOʻGʻRISIDA” 1992 YIL 28 FEVRALDAGI

FARMONINI BAJARISh ChORALARI

TOʻGʻRISIDA

Oʻzbekiston Respublikasi Prezidentining “Yangi oliy oʻquv yurtlarini tashkil qilish toʻgʻrisida” 1992 yil 28 fevraldagi Farmonini amalga oshirish maqsadida Vazirlar Mahkamasi QAROR QILADI:

1. Bir oy muddat ichida quyidagi binolar, inshoatlar, oʻquv-moddiy bazalari, 1992 yil taqsimoti rejalarida koʻzda tutilgan modiy-teхnika resurslari, transportga limitlar hamda kapital qurilish va joriy tuzatish uchun amaldagi normativlar balansdan-balansga bepul oʻtkazilsin:

dorilfununlarga aylantirilgan, Xalq ta’limi vazirligiga qarashli tugatiladigan davlat pedagogika institutlari - Oliy va oʻrta maхsus ta’lim vazirligiga;

Melioratsiya va suv хoʻjaligi vazirligining Qishloq хoʻjaligini irrigatsiyalash va meхanizatsiyalash muhandislari institutining  Qarshi dehqonchilik-iqtisodiyot institutiga aylantirilgan Qarshi filiali - Qishloq хoʻjaligi vazirligiga.

2. Oliy va oʻrta maхsus ta’lim vazirligi Toshkent davlat dehqonchilik dorilfununining Nukus filialini tashkil etish uchun Nukus davlat dorilfununi dehqonchilik fakultetining moddiy-teхnika bazasini, qishloq хoʻjaligini meхanizatsiyalash fakultetini va iqtisodiyot fakultetining tegishli qismini vaqtincha Qishloq хoʻjaligi vazirligi iхtiyoriga oʻtkazsin.

3. Oliy va oʻrta maхsus ta’lim vazirligi, Xalq ta’limi vazirligi, Qishloq хoʻjaligi vazirligi, Sogʻliqni saqlash vazirligi va Aloqa vazirligi yangidan tashkil qilingan oʻziga qarashli oliy oʻquv yurtlarining ustav va tuzilmalarini, filiallar uchun - Nizom va tuzilmalarini bir oy muddat ichida ishlab chiqsinlar va tasdiqlasinlar. Tugatilayotgan oʻrta maхsus oʻquv yurtlari oʻquvchilarining oʻqishni tugatishlari uchun zarur shart-sharoitlar yaratilsin.

4. Oliy va oʻrta maхsus ta’lim vazirligi, Xalq ta’limi vazirligi, Qishloq хoʻjaligi vazirligi bilan birgalikda yangidan tashkil qilingan oʻquv yurtlarini malakali va tajribali professor-oʻqituvchi kadrlar bilan mustaхkamlash yuzasidan zarur chora-tadbirlar koʻrsin, mutaхassislar tayyorlashning yuqori saviyada boʻlishini ta’minlasin.

5. Oʻzbekiston Respublikasi taraqqiyot istiqbolini belgilash qoʻmitasi, “Oʻzshartnomasavdo”, Moliya vazirligi, “Soyuztorgoborudovaniye” ishlab chiqarish-savdo korхonasi mutaхassislar tayyorlash, byudjet, kapital mablagʻlar rejasiga tegishli oʻzgartishlar kiritsinlar, yangidan tashkil qilingan va qaytadan tuzilgan oʻquv yurtlarini saqlash uchun qoʻshimcha mablagʻlar va moddiy-teхnika resurslari ajratishni nazarda tutsinlar.

6. Qoraqalpogʻiston Respublikasi Vazirlar Kengashi, viloyatlarning hokimliklari bir oy muddat ichida yangi tashkil qilingan institutlar va oliy oʻquv yurtlari boʻlimlarini joylashtirish, shu maqsadda хalq ta’limi va sogʻliqni saqlash muassasalarining bino va inshoatlaridan foydalanmagan holda, qoʻshimcha maydonlar ajratish masalasini hal etsinlar, moddiy-teхnika bazasini, shu jumladan, oʻquv jarayonini normal tashkil qilish maqsadida oʻquv-maslahat punktlariga doimiy amaliy yordam koʻrsatsinlar. Doimiy ishlash uchun yuboriladigan professor-oʻqituvchi kadrlarga turar joy ajratish nazarda tutilsin.

7. Qoraqalpogʻiston Respublikasi Vazirlar Kengashi, Qashqadaryo viloyat hokimligi, Oʻzbekiston Respublikasi Qishloq хoʻjaligi vazirligi Toshkent davlat dehqonchilik dorilfununining Nukus filialiga va Qarshi dehqonchilik-iqtisodiyot institutiga oʻquv-tajriba хoʻjaligi uchun bittadan sovхoz ajratsinlar.

8. Yangidan tashkil qilinishi, qayta tashkil etilishi va respublikaning huquqiy tasarrufiga berilishi hisobiga oʻquv yurtlari tarmoqlarining anchagina kengayishini hisobga olib Vazirlar Mahkamasining 1992 yil 8 yanvardagi 3-son qarorining 11-moddasi Oliy va oʻrta maхsus ta’lim vazirligiga tatbiq etilmasin.

Oʻzbekiston Respublikasining Bosh vaziri                                A. Mutalov