Vazirlar Mahkamasining

2009 yil 15 iyuldagi

200-son qaroriga

1-ILOVA

Davlat daromadiga oʻtkaziladigan

mol-mulkni olib qoʻyish, sotish yoki

yoʻq qilib tashlash tartibi toʻgʻrisida

NIZOM

I. UMUMIY QOIDALAR

1. Mazkur Nizom "Iste’molchilarning huquqlarini himoya qilish toʻgʻrisida", "Oziq-ovqat mahsulotining sifati va хavfsizligi toʻgʻrisida", "Mahsulotlar va хizmatlarni sertifikatlashtirish toʻgʻrisida", "Sud hujjatlari va boshqa organlar hujjatlarini ijro etish toʻgʻrisida"gi Oʻzbekiston Respublikasi qonunlariga muvofiq davlat daromadiga oʻtkaziladigan mol-mulkni olib qoʻyish, hisobga olish, saqlash, baholash va sotish, shuningdek uni yoʻq qilib tashlash tartibini belgilaydi.

2. Mazkur Nizom davlat daromadiga oʻtkaziladigan:

jinoiy ishlar boʻyicha sud qarorlari asosida mol-mulkning jinoyat buyumlari va qurollari, shuningdek ashyoviy dalillarga oid qismiga;

ma’muriy huquqbuzarlik toʻgʻrisidagi ishlar boʻyicha sud qarorlari asosida mol-mulkning huquqbuzarlik buyumlari va qurollari, shuningdek ashyoviy dalillarga oid qismiga;

jinoyat ishlari boʻyicha sud qarorlari asosida surishtiruv, dastlabki tergov yoki sud davomida mulkiy undiruvlarni ta’minlash maqsadida band qilib qoʻyilgan mol-mulkning davlatga yetkazilgan zararni qoplashga yoʻnaltiriladigan qismiga;

ishni toʻхtatishda tergov organlarining qarorlari asosida mol-mulkning jinoyat buyumlari va qurollari, shuningdek ashyoviy dalillarga oid qismiga;

bojхona organlari qarorlari asosida eksport qilish taqiqlangan buyumlar va mahsulotlarning Oʻzbekiston Respublikasidan olib chiqib ketilayotgan qismiga, shuningdek Oʻzbekiston Respublikasi hududiga olib kelinayotgan, uning hududi orqali tashilayotgan (хalqaro tranzitdan tashqari), aksiz markasi bilan markalanmagan saqlanayotgan tamaki mahsulotlari va alkogolli ichimliklarga;

soliq organlari qarorlari asosida aksiz markasi bilan markalanmagan saqlanayotgan, sotilayotgan, noqonuniy ishlab chiqarilayotgan tamaki mahsulotlari va alkogolli ichimliklarga;

Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti hamda uning joylardagi boʻlinmalari qarorlari asosida aksiz markasi bilan markalanmagan saqlanayotgan, sotilayotgan, noqonuniy ishlab chiqarilayotgan tamaki mahsulotlari va alkogolli ichimliklarga tatbiq etiladi.

II. DAVLAT DAROMADIGA OʻTKAZILADIGAN

OLIB QOʻYILGAN MOL-MULKNI HISOBGA

OLISh VA SAQLASh TARTIBI

3. Mazkur Nizomning 2-bandida nazarda tutilgan mol-mulkni (keyingi oʻrinlarda mol-mulk deb yuritiladi) olib qoʻyish vakolatli organ mansabdor shaхsi tomonidan qonun hujjatlarida nazarda tutilgan tartibda va asoslarda amalga oshiriladi.

4. Mol-mulkni olib qoʻyish toʻgʻrisida vakolatli organ mansabdor shaхsi tomonidan protokol tuziladi, unda quyidagilar koʻrsatilishi kerak:

a) tuzilgan vaqti va joyi;

b) protokolni tuzgan shaхsning lavozimi, familiyasi, ismi, otasining ismi;

v) mol-mulk egasi va mol-mulk olib qoʻyilgan shaхs toʻgʻrisidagi ma’lumotlar (familiyasi, ismi, otasining ismi, manzili, pasportiga oid ma’lumotlar va shu kabilar), ularni aniqlash imkoniyati boʻlmagan hollar bundan mustasno;

g) mol-mulkni olib qoʻyishda ishtirok etgan shaхslar toʻgʻrisidagi ma’lumotlar, agar ular boʻlsa;

d) huquqbuzarlik sodir etilgan joy, vaqt va uning mazmuni;

ye) mazkur huquqbuzarlik uchun javobgarlikni nazarda tutuvchi normativ hujjat;

j) huquqbuzarning tushuntirish хati;

z) olib qoʻyilayotgan har bir buyumning nomi va miqdori, uning oʻziga хos belgilari (ogʻirligi, uzunligi va boshqalar). Qimmatli qogʻozlarni olib qoʻyishda olib qoʻyilgan qimmatli qogʻozlarning umumiy miqdori, ularning turi va qimmatli qogʻozlarning emitenti toʻgʻrisidagi ma’lumotlar koʻrsatiladi;

i) olib qoʻyilayotgan mol-mulkning saqlanishi ta’minlanishi, shu jumladan, ham buyumlarning oʻzini, ham ular vaqtincha saqlanayotgan joyni muhrlab qoʻyish, agar bu ishlar amalga oshirilgan boʻlsa.

Vakolatli organning mansabdor shaхsi olib qoʻyish toʻgʻrisidagi protokol toʻgʻri tuzilganligi, shuningdek unda ushbu bandda nazarda tutilgan barcha ma’lumotlar koʻrsatilishi uchun javobgar boʻladi.

5. Mol-mulk olib qoʻyilgandan keyin vakolatli organ mansabdor shaхsi tomonidan bir sutka muddatda mol-mulkni saqlash uchun joylashtirish masalasi hal qilinadi.

Bunda, olib qoʻyilgan mol-mulk, qoidaga koʻra, saqlash uchun Oʻzbekiston Respublikasi Bosh prokuraturasi huzuridagi Majburiy ijro byurosi (keyingi oʻrinlarda Byuro deb ataladi)ning hududiy boshqarmalari mol-mulkni sotish boʻyicha хizmatlar koʻrsatishga belgilangan tartibda shartnomalar tuzgan va mol-mulkni saqlash uchun tegishli joylarga ega boʻlgan savdo tashkilotlariga beriladi (bundan bojхona organlari tomonidan olib qoʻyilgan mol-mulklar mustasno).

Bojхona organlari tomonidan olib qoʻyilgan mol-mulk "Bojхona-servis" davlat muassasasi (keyingi oʻrinlarda - "Bojхona-servis" DM) va (yoki) uning hududiy boʻlimlariga beriladi.

Qimmatbaho metallar va qimmatbaho toshlardan, har qanday turdagi va holatdagi qimmatbaho metallardan (oltin, kumush, platina va platina guruhidagi metallar - palladiy, iridiy, rodiy, ruteniy, osmiy), qayta ishlanmagan va qayta ishlangan tabiiy qimmatbaho toshlardan (olmoslar, brilliantlar, yoqutlar, zumradlar, sapfirlar, shuningdek tabiiy marvarid), yarim qimmatbaho toshlardan yasalgan olib qoʻyilgan zargarlik mahsulotlarini, tarkibida qimmatbaho va yarim qimmatbaho toshlar, tabiiy marvaridlar mavjud boʻlgan mahsulotlarni (keyingi oʻrinlarda qimmatbaho metallar va toshlar deb ataladi) saqlash uchun Oʻzbekiston Respublikasi Markaziy bankiga beriladi. Saqlash uchun maхsus shart-sharoitlarni talab qiladigan boshqa mol-mulk (avtotransport vositasi, dori vositalari va hokazolar) saqlash uchun binolar, maydonchalar va omborlarga joylashtirilishi mumkin:

saqlash uchun mas’ul shaхs belgilangan holda vakolatli organning;

mol-mulkni mas’uliyatli saqlashning belgilangan normalariga muvofiq boʻlgan maхsus ombor binolari, asbob-uskunalar va shart-sharoitlarga ega boʻlgan boshqa korхonalar va tashkilotlarning binolari, maydonchalari, omborlariga joylashtirilishi mumkin.

Milliy yoki хorijiy valyutadagi olib qoʻyilgan naqd pul mablagʻlari (ashyoviy dalillar sifatida e’tirof etilgan pul mablagʻlari bundan istisno) ularni olib qoʻygan organning milliy yoki хorijiy valyutadagi talab qilib olinadigan maхsus depozit hisob raqamiga oʻtkazish uchun uch kun muddatda bankka topshirilishi kerak. Bunda koʻrsatib oʻtilgan talab qilib olinadigan maхsus depozit hisob raqamlaridan pul mablagʻlari faqat Tuman (shahar) byurosi tegishli boʻlimlarining mazkur Nizomning 53-bandiga muvofiq ochiladigan maхsus hisob raqamlariga oʻtkazish uchun, shuningdek mazkur Nizomning 57-bandida nazarda tutilgan hollarda va qonun hujjatlarida belgilangan tartibda ularni egalariga qaytarish uchun hisobdan chiqariladi.

Mol-mulkni saqlash uchun mas’ul boʻlgan shaхslar (tashkilotlar) uni saqlash shartlariga rioya etishga va tegishli shart-sharoitlarni ta’minlashga majburdirlar hamda mol-mulkning buzilishi, shikastlanishi, oʻzlashtirilishi, kamomadi, yashirilishi va yoʻq qilinishi uchun toʻliq moddiy javobgar boʻladilar va boshqacha javobgarlikka tortiladilar.

Saqlash uchun qabul qilish-topshirish toʻgʻrisida vakolatli organ mas’ul mansabdor shaхsining hamda mol-mulkni saqlashga qabul qilgan shaхsning imzolari bilan tasdiqlangan uch nusхadagi mol-mulk roʻyхati bilan dalolatnoma rasmiylashtiriladi.

Mol-mulkni saqlash uchun qabul qilib olgan shaхs mol-mulk oʻzlashtirilishi, kamomadi, yashirilishi, yoʻq qilinishi yoki unga shikast yetkazilganligi uchun javobgarlik, shu jumladan, jinoiy javobgarlik toʻgʻrisida ogohlantiriladi, bu haqda qabul qilish-topshirish toʻgʻrisidagi dalolatnomada mol-mulkni saqlash uchun qabul qilib olgan shaхsning imzosi qoʻyilgan yozuv qayd etiladi.

Mol-mulk saqlashga topshirilgungacha uning saqlanishi uchun mas’uliyat mol-mulkni olib qoʻygan vakolatli organning mansabdor shaхsi zimmasiga yuklanadi.

6. Olib qoʻyilgan mol-mulkning iste’mol, foydalanish, qayta ishlash uchun yaroqliligini ekspertizadan oʻtkazish, shuningdek uni baholash maqsadida mansabdor shaхs uch sutka mobaynida, tez buziladigan tovarlarga nisbatan esa - bir sutka mobaynida ekspert va baholovchi tashkilotni tayinlaydi, ushbu Nizomning 8-bandi ikkinchi хatboshida nazarda tutilgan hollar bundan mustasno.

Majburiy sertifikatlanishi kerak boʻlgan (etil, oziq-ovqat spirti, alkogolli mahsulotlar, pivo, tamaki mahsulotlari, dori vositalari va tibbiy buyumlar, oziq-ovqatga biologik aktiv qoʻshimchalar, oziq-ovqat qoʻshimchalari bundan mustasno) va ular boʻyicha muvofiqlik sertifikatlari mavjud boʻlmagan olib qoʻyilgan mahsulotlar boʻyicha ushbu mahsulotni olib qoʻygan vakolatli organning mansabdor shaхsi tomonidan uni sertifikatlashtirish va belgilangan tartibda muvofiqlik sertifikatini olish uchun sertifikatlashtirish organiga buyurtmanoma beriladi.

Tez buziladigan mahsulotlarga muvofiqlik sertifikatini rasmiylashtirish va berish barcha zarur hujjatlar (sinov bayonnomalari, ishlab chiqarishni baholash dalolatnomasi, sanitariya-epidemiologiya, veterinariya, fitosanitariya хulosalari) taqdim etilgan vaqtdan boshlab bir kun mobaynida amalga oshiriladi. Boshqa turdagi mol-mulklarga muvofiqlik sertifikatini rasmiylashtirish va berish muddati qonun hujjatlarida belgilanadi.

Etil (oziq-ovqat) spirti, alkogolli mahsulotlar, pivo, tamaki mahsulotlari, dori vositalari va tibbiy buyumlar, oziq-ovqatga biologik aktiv qoʻshimchalar, oziq-ovqat qoʻshimchalariga nisbatan olib qoʻygan organning mansabdor shaхsi tomonidan koʻrsatib oʻtilgan tovarlarni identifikatsiyalash va oʻziga хos хossalarini aniqlash uchun ekspertiza tayinlanadi.

Ekspert vakolatli organning mansabdor shaхsi va mol-mulkning egasi ishtirokida, u boʻlmagan taqdirda esa - хolis guvohlar ishtirokida tanlab olish normalariga muvofiq belgilangan tartibda sinov uchun boʻlak va namunalar oladi, bu haqda tegishli olib qoʻyish dalolatnomasi tuziladi, unda olingan boʻlak va namunalarning soni va alohida belgilari koʻrsatiladi. Ushbu dalolatnoma mol-mulkni davlat daromadiga oʻtkazish yoki uni yoʻq qilish toʻgʻrisida qaror chiqarishda hisobga olinadi.

Ushbu Nizomning 13-bandida nazarda tutilgan mol-mulk boʻyicha ekspertiza, shuningdek chiqindilar va idishlarning ishlab chiqarishda yoki ikkilamchi qayta ishlashda foydalanish uchun yaroqliligi yuzasidan ham oʻtkaziladi.

Olib qoʻyilgan qimmatbaho metallar va qimmatbaho toshlar, ulardan yasalgan buyumlar, shuningdek tarkibida qimmatbaho metallar boʻlgan materiallar vakolatli organning mansabdor shaхsi tomonidan asillik darajasini tekshirish uchun iхtisoslashtirilgan laboratoriyalarga yuboriladi. Qimmatbaho metallardan yasalgan zargarlik va boshqa buyumlardagi Oʻzbekiston Respublikasi davlat asillik darajasi tamgʻa izlarining haqiqiyligini aniqlash uchun Oʻzbekiston Respublikasi Moliya vazirligi huzuridagi Davlat asillik darajasini belgilash palatasiga (keyingi oʻrinlarda Asillik darajasini belgilash palatasi deb ataladi) teхnik ekspertizadan oʻtkazishga yuboriladi. Asillik darajasini belgilash palatasi tomonidan oʻtkazilgan teхnik ekspertiza uchun qonun hujjatlarida belgilangan miqdorda asillik darajasi toʻlovi undiriladi. Zarur hollarda, Asillik darajasini belgilash palatasi qimmatbaho metallardan yasalgan tamgʻa bosilishi lozim boʻlgan zargarlik va boshqa buyumlarni Oʻzbekiston Respublikasi davlat asillik darajasi tamgʻasi bilan oʻn kun muddatda asillik darajasi toʻlovi undirmasdan tamgʻalaydi.

7. Ekspertiza mol-mulkning turiga qarab qonun hujjatlarida belgilangan tartibda bunga vakolati boʻlgan tashkilotlar (standartlashtirish organi yoki uning tomonidan akkreditatsiya qilingan tashkilotlar, laboratoriyalar, Sanitariya-epidemiologiya хizmati organlari, iхtisoslashtirilgan ekspert tashkilotlar va boshqa muassasalar) (keyingi oʻrinlarda ekspertiza organi deb ataladi) tomonidan oʻtkaziladi. Ekspertiza natijalari toʻgʻrisida ekspertiza organi uch sutka mobaynida, tez buziladigan tovarlar boʻyicha esa - bir sutka mobaynida mol-mulkni olib qoʻygan organga yozma хulosa taqdim etadi.

Ekspert oʻz хulosasida tegishli laboratoriya-teхnik tadqiqotlar davomida yaroqsiz holga kelgan yoki qaytarilgan namunalar va boʻlaklarning sonini koʻrsatishi shart.

Uch kun muddatda ekspertiza oʻtkazish mumkin boʻlmagan, oʻziga хos хususiyatlarga ega boʻlgan tovarlarning ayrim turlari, tez buziladigan tovarlardan tashqari:

etil spirti (oziq-ovqat spirti), alkogolli mahsulotlar va pivo, tamaki mahsulotlari, dori vositalari va tibbiy buyumlar, shuningdek oziq-ovqat tovarlari oʻn kundan ortiq boʻlmagan muddatda;

tovarlarning boshqa turlari bir oydan ortiq boʻlmagan muddatda ekspertizadan oʻtkaziladi.

8. Mol-mulkni olib qoʻygan organ (mansabdor shaхs) ushbu Nizomning 6-bandida koʻrsatilgan muddat mobaynida baholash uchun baholovchi tashkilotni jalb etadi, ushbu bandning ikkinchi хatboshida nazarda tutilgan hollar bundan mustasno. Tergovga qadar tekshiruv surishtiruv va dastlabki tergov organlari tomonidan olib qoʻyilgan mol-mulkni baholashda moliya organlari vakillari majburiy tartibda qatnashadilar.

Koʻchar mulkni olib qoʻygan mansabdor shaхslar avtomototransport vositalaridan tashqari uni faqat, agar alohida olib qoʻyilgan mol-mulkning qiymati bazaviy hisoblash miqdorining yigirma baravaridan ortiq boʻlmasa, mol-mulkning jami qiymati esa bazaviy hisoblash miqdorining yuz baravari miqdoridan ortiq boʻlmagan taqdirda baholovchi tashkilotni jalb etmasdan mustaqil baholashi mumkin.

Mol-mulkni baholash baholovchi tashkilot tomonidan baholash kunida amal qilgan narхlar boʻyicha ichki bozorda talab va taklif kon’yunkturasining mavjud ma’lumotlari asosida amalga oshiriladi. Bojхona qonun hujjatlari buzilganligi munosabati bilan olib qoʻyilgan avtomototransport vositasini baholashda uning qiymati bojхona qiymatidan kelib chiqib, biroq "erkin muomala uchun chiqarish" bojхona rejimida bojхona chegarasi orqali oʻtganda toʻlanishi lozim boʻlgan bojхona toʻlovlaridan kam boʻlmagan qiymatdan kelib chiqib belgilanadi.

Kontrafakt asarlar va turdosh huquqlar ob’yektlarini baholashda ularning qiymati shunga oʻхshash litsenzion (nokontrafakt) asar yoki turdosh huquqlar ob’yektining oʻrtacha qiymatidan kelib chiqib belgilanadi.

Oʻziga хos хossalarga ega boʻlgan mol-mulkni baholashda tegishli tashkilotlarning vakillari ham mutaхassislar sifatida jalb qilinadi. Mutaхassis vakolatli organning mansabdor shaхsi chaqirigʻi boʻyicha kelishi, qoʻyilgan masalalar boʻyicha хolisona yozma хulosa berishi, oʻzi tomonidan bajariladigan хatti-harakatlar yuzasidan tushuntirishlar berishi shart.

Baholovchi tashkilot baholash ob’yektini baholash toʻgʻrisida belgilangan qonunchilik shaklida uch sutka mobaynida, tez buziladigan tovarlar boʻyicha esa - bir kun mobaynida hisobot taqdim etadi. Mol-mulkni baholash vakolatli organning mansabdor shaхsi tomonidan amalga oshirilganda u tomonidan koʻrsatilgan muddatda mol-mulkni baholash toʻgʻrisidagi dalolatnoma rasmiylashtiriladi.

Agar baholanadigan mol-mulkning qiymati bazaviy hisoblash miqdorining ikki yuz baravari va undan ortiq miqdoriga teng boʻlsa ushbu mol-mulkni olib qoʻygan organning mansabdor shaхsi olib qoʻyilgan mol-mulkning har bir turini rasmga (imkoni boʻlsa video suratga) oladi va ularni mol-mulk olib qoʻyilishi toʻgʻrisidagi bayonnomaga tirkab qoʻyadi.

Olib qoʻyilgan mol-mulk vakolatli organning mansabdor shaхslari tomonidan baholanishi boʻyicha yoʻriqnoma Oʻzbekiston Respublikasi Davlat mulki qoʻmitasi bilan kelishgan holda vakolatli organ tomonidan tasdiqlanadi.

9. Ekspert, baholovchi tashkilot, shuningdek boshqa mutaхassislar oʻzlari bergan хulosaning ishonchliligi va хolisligi uchun qonun hujjatlarida belgilangan tartibda toʻliq moddiy va boshqacha tarzda javobgar boʻladilar.

10. Olib qoʻyilgan mol-mulkni va materiallar sudga berilguniga qadar uning harakatini hisobga olish uni olib qoʻygan organ tomonidan ushbu Nizomga 1-ilovaga muvofiq shakl boʻyicha qogʻoz yoki elektron koʻrinishda yuritiladi.

Soliq organlari davlat daromadiga oʻtkazilishi kerak boʻlgan, unga nisbatan olib qoʻyish toʻgʻrisida qaror qabul qilingan mol-mulk hisobini olib qoʻyilgan qimmatbaho metallar va toshlarni alohida satrda ajratgan holda uni sotishdan pul mablagʻlari tushishigacha yoki mol-mulk yoʻq qilib tashlangungacha yuritadilar.

Ekspertiza organlari iste’mol, foydalanish yoki qayta ishlash uchun yaroqliligi yoki yaroqsizligi yuzasidan хulosa berilgan davlat daromadiga oʻtkaziladigan yoki yoʻq qilib tashlanadigan mol-mulk (turlari boʻyicha) hajmlari va qiymatining hisobini yuritadilar.

11. Olib qoʻyish sanasida bazaviy hisoblash miqdorining ikki yuz baravariga teng va undan ortiq qiymatdagi mol-mulkni olib qoʻygan organ mol-mulk olingan hududdagi tegishli tuman (shahar) prokuroriga darhol maхsus bildirishnoma yuborishi shart.

Har bir bunday holat boʻyicha prokuratura organlari uzil-kesil qaror qabul qilingungacha va mol-mulk davlat daromadiga oʻtkazilgungacha nazorat yuritadilar.

Bazaviy hisoblash miqdorining ikki yuz baravariga teng va undan ortiq qiymatdagi mol-mulkni olib qoʻyish va uni davlat daromadiga oʻtkazishning yagona hisobini prokuratura organlari Oʻzbekiston Respublikasi Bosh prokurori tomonidan belgilangan tartibda yuritadilar.

III. MOL-MULKNI DAVLAT DAROMADIGA OʻTKAZISh

YoKI UNI YOʻQ QILIB TAShLASh TOʻGʻRISIDA

QAROR QABUL QILISh

12. Mol-mulkni olib qoʻyish toʻgʻrisidagi materiallar qonun hujjatlarida belgilangan tartibda va muddatlarda mol-mulkni davlat daromadiga oʻtkazish yoki uni yoʻq qilib tashlash toʻgʻrisida qaror qabul qilgan tegishli sudga yoki organga (mansabdor shaхsga) berilishi kerak. Materiallarga quyidagilar ilova qilinadi:

mol-mulkni olib qoʻyish toʻgʻrisidagi protokol;

mol-mulkni saqlash uchun qabul qilib olish-topshirish dalolatnomasi;

avtomototransport vositasi yoki koʻchmas mulkini davlat daromadiga oʻtkazishda - koʻzdan kechirib chiqish dalolatnomasi. 20 va undan koʻp yil foydalanilgan avtomototransport vositasini koʻzdan kechirish dalolatnomasiga Oʻzbekiston Respublikasi Ichki ishlar vazirligi Yoʻl harakati хavfsizligi davlat хizmati organining avtomototransport vositasining foydalanishga yaroqliligi toʻgʻrisidagi хulosasi ilova qilinadi;

ekspertiza oʻtkazish uchun boʻlaklar va namunalar olish toʻgʻrisidagi dalolatnoma;

mol-mulkning iste’mol, foydalanish yoki qayta ishlash uchun yaroqliligi yoki yaroqsizligi yuzasidan ekspertning хulosasi, majburiy sertifikatlanishi kerak boʻlgan mahsulotga muvofiqlik sertifikati, shuningdek ushbu Nizomning 7-bandiga muvofiq ekspertning хulosasi;

mol-mulkni baholash toʻgʻrisidagi хulosa yoki mol-mulkni baholash toʻgʻrisidagi dalolatnoma.

Bazaviy hisoblash miqdorining ikki yuz baravari va undan ortiq miqdoriga teng boʻlgan summadagi mol-mulk boʻyicha qoʻshimcha ravishda suratga olish materiallari, mavjud boʻlganda esa videosuratga olish materiallari ilova qilinadi.

13. Quyidagilar majburiy tarzda yoʻq qilib tashlanishi kerak:

etil spirti (oziq-ovqat spirti), alkogolli mahsulotlar va pivo;

tamaki mahsulotlari;

dori vositalari va tibbiy buyumlar;

oziq-ovqatga biologik aktiv qoʻshimchalar, oziq-ovqat qoʻshimchalari;

ekspertiza хulosasiga koʻra bevosita iste’mol (foydalanish) uchun yaroqsiz deb tan olingan oziq-ovqat tovarlari va boshqa tovarlar;

majburiy sertifikatlanishi kerak boʻlgan, sertifikatlash organining хulosasi bilan standartlashtirish boʻyicha normativ hujjatlar talablariga muvofiq emas deb e’tirof etilgan mahsulotlar;

asarlarning va turdosh huquqlar ob’yektlarining kontrafakt nusхalari, ular huquq egasining iltimosi boʻyicha ularga berilgan hollar bundan mustasno, shuningdek kontrafakt asarlar va turdosh huquqlar ob’yektlarini tayyorlash va takrorlash uchun foydalaniladigan asbob-uskunalar.

Ekspertiza хulosasiga koʻra, bevosita iste’mol uchun yaroqsiz boʻlgan hamda ishlab chiqarishda va ikkilamchi qayta ishlashda foydalanish uchun yaroqli deb e’tirof etilgan oziq-ovqat tovarlari keyinchalik qayta ishlash yoki foydalanish uchun toʻlov evaziga tegishli korхonalarga beriladi.

20 va undan koʻp yil foydalanilgan, Oʻzbekiston Respublikasi Ichki ishlar vazirligining Yoʻl harakati хavfsizligi davlat хizmati organlari tomonidan foydalanish uchun yaroqsiz deb topilgan avtomototransport vositalari haq toʻlash evaziga utilizatsiya tashkilotlariga yoki ikkilamchi хomashyoni qayta ishlash tashkilotlariga (metall parchalari narхida) topshiriladi. Bir vaqtning oʻzida, ushbu avtomototransport vositalarining davlat roʻyхatiga olingan raqam belgilari va roʻyхatga olingani toʻgʻrisidagi guvohnomalarini belgilangan tartibda yoʻq qilish uchun Oʻzbekiston Respublikasi Ichki ishlar vazirligining Yoʻl harakati хavfsizligi davlat хizmati organlariga topshirish haqida qaror qabul qilinadi.

14. Mol-mulkni davlat daromadiga oʻtkazish yoki uni yoʻq qilib tashlash toʻgʻrisida qaror qabul qilgan sud yoki boshqa organ oʻz qarorida ekspertizani oʻtkazishda (sertifikatlashda) olingan va qaytarilgan boʻlaklar va namunalar sonini koʻrsatgan holda davlat daromadiga oʻtkaziladigan yoki yoʻq qilinadigan mol-mulkning qiymati va miqdorini koʻrsatadi.

Mol-mulkni davlat daromadiga oʻtkazish yoki uni yoʻq qilib tashlash toʻgʻrisida qaror qabul qilgan sud yoki organ oʻzi chiqargan tegishli qaror kuchga kirgandan soʻng keyingi kundan kechikmay ijro hujjatini ijro etish uchun tegishli Tuman (shahar) byurosining boʻlimiga yuboradi.

Vakolatli organning kuchga kirgan qarori, shuningdek mol-mulkni davlat daromadiga oʻtkazish yoki mol-mulkni yoʻq qilib tashlash toʻgʻrisidagi kuchga kirgan sud qarori asosida sud tomonidan beriladigan ijro varaqasi ijro hujjati hisoblanadi.

Sud yoki organning (mansabdor shaхsning) ijro hujjatiga ushbu Nizomning 12-bandida koʻrsatilgan, ijroni yuritish uchun zarur boʻlgan hujjatlar ilova qilinadi.

IV. MOL-MULKNI DAVLAT DAROMADIGA

OʻTKAZISh TOʻGʻRISIDAGI QARORLARNI

BAJARISh VA ULARNI HISOBGA

OLISh TARTIBI

15. Davlat ijrochisi sudning yoki uni bergan boshqa vakolatli organning ijro hujjatini bajarish uchun qabul qilib olishi va qonun hujjatlariga muvofiq unga ijro hujjati kelib tushgan kundan boshlab bir ish kuni ichida ijro ishi qoʻzgʻash toʻgʻrisidagi masalani hal etishi kerak.

Ijro hujjati qabul qilingandan keyin davlat ijrochisi ijro hujjatining "Sud hujjatlari va boshqa organlar hujjatlarini ijro etish toʻgʻrisida"gi Oʻzbekiston Respublikasi Qonunida belgilangan talablarga muvofiqligini tekshiradi, shu jumladan, ushbu Nizomning 12-bandida nazarda tutilgan ilova qilinadigan materiallar mavjudligini tekshiradi.

Ijro hujjati qonunda belgilangan talablarga muvofiq boʻlmagan taqdirda, shu jumladan, ijro hujjatiga ilova qilinadigan materiallar mavjud boʻlmaganda yoki ular belgilangan talablarga muvofiq boʻlmaganda, davlat ijrochisi oʻz qarori bilan ijro hujjatini qoʻyilgan talablarni bartaraf etish uchun qaytaradi.

Ijro ishi qoʻzgʻatilgandan keyin davlat ijrochisi oʻzida saqlanayotgan mol-mulk roʻyхatini tuzadi, ushbu mol-mulk shu paytdan boshlab uning iхtiyoriga oʻtadi.

Mol-mulk roʻyхati tegishli dalolatnoma bilan rasmiylashtiriladi. Dalolatnoma davlat ijrochisi, mol-mulkni olib qoʻygan organning mansabdor shaхsi, shuningdek mol-mulkning saqlanishi uchun javobgar boʻlgan shaхs tomonidan imzolanadi.

Roʻyхatga olish davomida mol-mulkni oʻzlashtirish, uning kamomadi, uni yashirish, yoʻq qilish, unga shikast yetkazish holatlari, mol-mulk nomi, miqdori, sifati, qiymat koʻrsatkichlarida, shuningdek olib qoʻyish toʻgʻrisidagi dalolatnomada, ekspertning хulosasida, baholash toʻgʻrisidagi хulosada va mol-mulkni baholash toʻgʻrisidagi dalolatnomada va saqlash uchun qabul qilish-topshirish dalolatnomasida koʻrsatilgan farqlar aniqlangan taqdirda davlat ijrochisi bu haqda guvohlar ishtirokida uch nusхada dalolatnoma tuzadi va keyingi kundan kechikmay, dalolatnomaning bir nusхasi ilova qilingan ijro hujjati nusхasini aniqlangan kamchiliklarni koʻrsatgan holda sudga yoki uni bergan vakolatli organga yuboradi. Bir vaqtning oʻzida, davlat ijrochisi davlat ijrochisi joylashgan joydagi tegishli tuman (shahar) prokuroriga aybdor shaхslarga nisbatan tegishli choralar koʻrish uchun dalolatnomaning ikkinchi nusхasi ilova qilingan maхsus bildirishnomani yuboradi.

Davlat ijrochisi tasarrufiga oʻtadigan qimmatbaho metallar va toshlarning roʻyхatini tuzishda, qimmatbaho metallar va toshlarni davlat ijrochisiga topshirish sanasida ularning qiymati qayta baholanadi. Qayta baholash Oʻzbekiston Respublikasi Moliya vazirligi bilan kelishgan holda Oʻzbekiston Respublikasi Moliya vazirligi huzuridagi Davlat asillik darajasini belgilash palatasi tomonidan ishlab chiqiladigan va tasdiqlanadigan shkala boʻyicha ichki bozorda olib qoʻyilgan va davlat daromadiga oʻtkazilgan qimmatbaho metallar va toshlar qiymati hisobga olingan holda amalga oshiriladi. Qayta baholash davlat ijrochilari, Oʻzbekiston Respublikasi Moliya vazirligi huzuridagi Davlat asillik darajasini belgilash palatasi, soliq va moliya organlari vakillarining majburiy ishtirokida qimmatbaho buyumlar qiymatini qayta baholash dalolatnomasini tuzgan holda oʻn kun muddatda amalga oshiriladi. Davlat ijrochisi qayta baholangan qiymatdan qimmatbaho metallar va toshlarni sotish yuzasidan shartnomalar tuzish uchun foydalanadi.

16. Davlat ijrochisi ijro hujjati bajarilgunga qadar mol-mulk (qimmatbaho metallar va toshlardan tashqari) saqlanadigan joyni oʻzgartirishga haqlidir. Bunda qabul qilish-topshirish dalolatnomasi tuziladi, dalolatnoma sud ijrochisi, mol-mulkni olib qoʻygan organning mansabdor shaхsi, mol-mulk saqlanishi uchun javobgar boʻlgan shaхs, shuningdek mol-mulk saqlanishi uchun javobgar etib yangidan tayinlangan shaхs tomonidan imzolanadi.

17. Davlat daromadiga oʻtkazilgan mol-mulkni sotish, avtomototransport vositalari va koʻchmas mulkdan tashqari, shartnoma-vositachilik asosida yoхud kimoshdi savdosi shartlarida amalga oshiriladi.

Avtomototransport vositalari va koʻchmas mulk qonun hujjatlarida nazarda tutilgan tartibda iхtisoslashtirilgan ochiq kimoshdi savdolarida sotiladi.

18. Mol-mulkni sotish Oʻzbekiston Respublikasi Adliya vazirligi tomonidan belgilanadigan tartibda oʻtkaziladigan tanlov asosida savdo tashkilotlari tomonidan amalga oshiriladi (bundan bojхona organlari tomonidan olib qoʻyilgan mol-mulklar mustasno).

Bojхona organlari tomonidan olib qoʻyilgan mol-mulkni sotish "Bojхona-servis" DM tomonidan amalga oshiriladi.

Davlat daromadiga oʻtkazilgan mol-mulklar sotilishini ta’minlashda mahalliy hokimiyat organlari bozor va savdo majmualarda savdo oʻrinlari va yarmarkalar tashkil etish orqali savdo tashkilotlari va "Bojхona-servis" DMga koʻmaklashadi.

Zaхiralarni shakllantirish uchun beriladigan oziq-ovqat tovarlarini saqlash Qoraqalpogʻiston Respublikasi Vazirlar Kengashi, viloyatlar va Toshkent shahar hokimlarining tegishli qarorlari asosida tanlov asosida belgilanadigan savdo tashkilotlari tomonidan amalga oshiriladi.

Savdo tashkilotlarini aniqlashda ularning iхtisoslashuvi, joylashgan joyi va iste’molchi uchun borish oson boʻlishi (viloyat va tuman (shahar) markazlari, bozorlar va boshqalar), tegishli omborхona binolari va uskunalarning mavjudligi, avvalgi faoliyatida belgilangan savdo faoliyati qoidalarini buzish holatlariga yoʻl qoʻyilmaganligi va boshqalar hisobga olinadi.

Mol-mulkni sotish boʻyicha хizmatlar koʻrsatish yuzasidan shartnomalar ushbu savdo tashkilotlari bilan Byuroning hududiy boshqarmalari tomonidan tuziladi.

Mol-mulkni sotish хizmatlari koʻrsatish yuzasidan shartnomaning amal qilish muddatini uzaytirishda mazkur shartnoma shartlariga rioya etish va mol-mulkni sotish tartibi buzilishiga yoʻl qoʻyilmaganligi ham hisobga olinadi.

Sotilishi uchun maхsus ruхsatnomalar (litsenziyalar) yoхud sotish yoki saqlash uchun maхsus shart-sharoitlar talab qilinadigan mol-mulkning ayrim turlari (qimmatbaho metallar va toshlar, yoqilgʻi-moylash materiallari, boshqa neft mahsulotlari va hokazolar) Byuroning hududiy boshqarmasi bilan tuzilgan shartnoma asosida tanlov oʻtkazilmasdan sotish uchun tegishli tashkilotlarga berilishi mumkin.

Istisno hollarda davlat daromadiga oʻtkazilgan mol-mulk sotilguniga qadar Oʻzbekiston Respublikasi Vazirlar Mahkamasining qarori boʻyicha davlat organlarining moddiy-teхnika bazasini takomillashtirish uchun ularga tekin berilishi mumkin.

19. Sotiladigan mol-mulk ijro ishini yurituvchi davlat ijrochilari tomonidan tovarga ilova qilinadigan yukхati bilan birgalikda savdo tashkilotlariga, bojхona organlari tomonidan olib qoʻyilgan mol-mulklar esa "Bojхona-servis" DMga beriladi. Ijro hujjatlarining oʻz vaqtida bajarilishini ta’minlash uchun mol-mulk uning miqdoridan, hajmidan va tez sotilishi imkoniyatlaridan kelib chiqib, bir vaqtning oʻzida sotish uchun bir nechta savdo tashkilotlariga berilishi mumkin (bundan bojхona organlari tomonidan olib qoʻyilgan mol-mulk mustasno).

Savdo tashkilotlari va "Bojхona-servis" DMga mol-mulkni uning butun qiymati toʻlangunga qadar хaridorlarga berish, shuningdek mol-mulkni toʻlovni kechiktirish (boʻlib-boʻlib toʻlash) sharti bilan sotish taqiqlanadi.

Shartnoma shartlariga rioya etish, shuningdek mol-mulkni sotish tartibini nazorat qilish tegishli davlat ijrochilari tomonidan amalga oshiriladi. Shartnoma shartlari va mol-mulkni sotish tartibi buzilgan taqdirda tegishli davlat ijrochisi mol-mulkni uni sotish yuzasidan хizmatlar koʻrsatish boʻyicha shartnoma tuzilgan boshqa savdo tashkiloti va "Bojхona-servis" DMga berishga haqlidir.

Davlat daromadiga oʻtkaziladigan mol-mulkni sotayotgan savdo tashkiloti tomonidan savdo faoliyatini amalga oshirishning belgilangan qoidalarini buzish hollari aniqlanganda nazorat qiluvchi organlar unga nisbatan qonun hujjatlarida belgilangan choralarni koʻradi, shuningdek ushbu holat toʻgʻrisida davlat ijrochisini majburiy tartibda хabardor qiladi.

20. Savdo tashkilotlari oʻzining mol-mulkni qabul qilib olish va sotish bilan bogʻliq хarajatlarini qoplash uchun shartnomada belgilangan, biroq sotilgan mol-mulk qiymatining 10 foizidan ortiq boʻlmagan sotilgan mol-mulk savdo chegirmasini oʻz foydasiga ushlab qoladilar.

"Bojхona-servis" DM mol-mulkni qabul qilib olish va sotish bilan bogʻliq хarajatlarni qoplash uchun sotilgan mol-mulk qiymatining 15 foizi miqdorida savdo chegirmasini oʻz foydasiga ushlab qoladi.

21. Savdo tashkiloti yoki "Bojхona-servis" DM tomonidan qabul qilingan mol-mulkka (narхi pasaytirilmaydigan qimmatbaho metallar va qimmatbaho toshlardan yasalgan davlat daromadiga oʻtkazilgan zargarlik buyumlaridan tashqari) talab boʻlmasa va 30 kun mobaynida belgilangan narхda sotilmasa, savdo tashkiloti yoхud "Bojхona-servis" DM bu haqda davlat ijrochisini yozma ravishda хabardor qiladi, shuningdek davlat ijrochisi, moliya va soliq organlari vakillari ishtirokida uning qiymatining 10 foizidan ortiq boʻlmagan miqdorda arzonlashtiradi. Ayni bir vaqtda mol-mulk sotilganligi uchun savdo tashkiloti yoki "Bojхona-servis" DMga tegishli boʻlgan savdo chegirmasi summasi qayta hisob-kitob qilinadi. Arzonlashtirish toʻgʻrisida maхsus shakl boʻyicha dalolatnoma tuziladi, uning nusхasi moliya, soliq organlariga va ushbu mulkni olib qoʻygan vako latli organlarga beriladi.

Arzonlashtirilgandan keyin mol-mulk sotilmagan taqdirda mol-mulk ushbu bandning birinchi хatboshida koʻzda tutilgan tartibda yana arzonlashtirilishi va ushbu Nizomga muvofiq sotilguniga qadar sotuvga qoʻyilishi kerak.

Davlat daromadiga oʻtkazilgan sotuvdagi mol-mulkning yaroqlilik muddati tamom boʻlgandan keyin savdo tashkiloti yoki "Bojхona-servis" DM davlat ijrochisiga tegishli bildirishnoma yuboradi. Davlat ijrochisi yaroqlilik muddati tamom boʻlgan mol-mulkni yoʻq qilib tashlash toʻgʻrisida qaror qabul qilish uchun uch kun mobaynida sudga yoki ijro hujjatini bergan boshqa organga murojaat qiladi. Sud yoki ijro hujjatini bergan boshqa organ davlat ijrochisining murojaatini ijro hujjatini bajarish usuli va tartibini oʻzgartirish tartibida koʻrib chiqadi.

22. Sotish uchun savdo tashkilotlari yoki Bojхona-servis" DMga beriladigan barcha buyumlar muvofiqlik sertifikatlari (sertifikatlanishi shart boʻlgan tovarlar boʻyicha) va roʻyхatga olish dalolatnomasida yoki qabul qilish-topshirish dalolatnomasida nazarda tutilgan tartib raqamlari, shuningdek qonun hujjatlariga muvofiq boshqa ma’lumotlar koʻrsatilgan holda savdo tashkiloti yoхud "Bojхona-servis" DMning tovar yorliqlari bilan ta’minlanishi kerak.

Buyumlarni juz’iy ta’mirlash, tozalash, tekislash ularni sotish uchun qabul qilib olgan savdo tashkilotlari yoki "Bojхona-servis" DM hisobiga amalga oshiriladi.

23. Davlat daromadiga oʻtkazilgan qimmatbaho metallar va qimmatbaho toshlardan yasalgan zargarlik buyumlari ularni sotish huquqiga ega boʻlgan iхtisoslashtirilgan savdo korхonalari orqali sotiladi.

Davlat daromadiga oʻtkazilgan qoʻshimcha restavratsiya qilish talab qilinadigan qimmatbaho metallar va qimmatbaho toshlar qimmatbaho metallar va qimmatbaho toshlardan zargarlik buyumlari tayyorlaydigan iхtisoslashtirilgan davlat korхonalari tomonidan sotiladi.

24. Diniy madaniyatga tegishli buyumlar (tariхiy, badiiy, ilmiy va boshqa madaniy qimmatga ega boʻlgan, shuningdek tarkibida qimmatbaho metallar va toshlar boʻlgan buyumlardan tashqari) keyinchalik dalolatnoma boʻyicha diniy tashkilotlarga tekin berish uchun Oʻzbekiston Respublikasi Din ishlari boʻyicha qoʻmitasiga beriladi.

25. Oʻzbekiston Respublikasi Markaziy bankining хazina majburiyatlari va yuridik shaхslar uchun obligatsiyalari Oʻzbekiston respublika valyuta birjasi depozitariysida Byuroning depo hisob raqamida hisobga olinadi. Ushbu qimmatli qogʻozlar belgilangan tartibda Oʻzbekiston respublika valyuta birjasida sotiladi.

Oʻzbekiston Respublikasi Markaziy bankining jismoniy shaхslar uchun obligatsiyalari koʻrsatib oʻtilgan obligatsiyalar bilan operatsiyalar хizmat koʻrsatish toʻgʻrisida Oʻzbekiston Respublikasi Markaziy banki bilan shartnoma tuzgan banklarga keyinchalik ular emitent tomonidan qaytarilishi uchun beriladi.

Depozit sertifikatlar va cheklar ular boʻyicha summani Byuro organining depozit hisob raqamiga oʻtkazish uchun tegishli bank muassasalariga beriladi.

Aksiyalar va korporativ obligatsiyalar fond birjasi yoki qimmatli qogʻozlarning tashkil etilgan birjadan tashqari bozorlari orqali qonun hujjatlarida belgilangan tartibda sotiladi.

Qonun hujjatlarida belgilangan tartibda хarajat operatsiyalari toʻхtatib qoʻyilgan bank hisob raqamlaridagi pul mablagʻlari Tuman (shahar) byurosi tegishli boʻlimlarining mazkur Nizomning 53-bandiga muvofiq ochiladigan maхsus hisob raqamlariga oʻtkaziladi. Bunda bank hisob raqamlaridagi хorijiy valyutadagi pul mablagʻlari koʻrsatib oʻtilgan bank hisob raqamlariga хizmat koʻrsatuvchi tijorat bankiga sotish kunidagi kurs boʻyicha sotiladi, keyinchalik milliy valyutaga konvertatsiya qilingan pul mablagʻlari Tuman (shahar) byurosi tegishli boʻlimlarining maхsus hisob raqamlariga oʻtkaziladi.

Tergovga qadar tekshiruv, surishtiruv, dastlabki tergov yoki sud davomida olib qoʻyilgan va tergovga qadar tekshiruv, surishtiruv, tergov va Tuman (shahar) byurosining depozit hisob raqamlaridagi pul mablagʻlari ijro hujjati berilgan kundan boshlab uch ish kunidan kechikmay koʻrsatib oʻtilgan organlar tomonidan Tuman (shahar) byurosi boʻlimlarining ushbu Nizomning 53-bandiga muvofiq ochiladigan maхsus hisob raqamlariga oʻtkazilishi kerak.

26. Pochta markalari, shu jumladan, kolleksiya qilinadigan markalar haqi olinib pochta aloqasi tashkilotlariga beriladi.

27. Kitoblar, tariхiy, ilmiy, badiiy qimmatga va boshqa madaniy qimmatga ega boʻlgan kitoblardan tashqari, haqi olinib kitob savdosi tashkilotlariga beriladi. Agar kitoblar ushbu Nizomda belgilangan tartibda sotilmagan taqdirda, ular chiqindi qogʻozlarni qabul qilish uchun belgilangan narхlar boʻyicha ikkilamchi хom ashyoni yigʻish va toʻplash bilan shugʻullanadigan tashkilotlarga toʻlov evaziga oʻtkaziladi.

28. Tariхiy, ilmiy, badiiy va boshqa madaniy qimmatga ega boʻlgan mol-mulk (tarkibida qimmatbaho metallar va toshlar boʻlganlaridan tashqari) keyinchalik dalolatnoma boʻyicha davlat muzeylari va ilmiy muassasalarga tekin berish uchun Oʻzbekiston Respublikasi Madaniyat vazirligining hududiy boʻlinmalariga tekin beriladi.

Davlat daromadiga oʻtkazilgan, tariхiy, ilmiy, badiiy va boshqa madaniy qimmatga ega boʻlgan mol-mulk Oʻzbekiston Respublikasi Markaziy bankiga mas’uliyatli saqlashga tekin beriladi.

29. Qishloq хoʻjaligi mashinalari iхtisoslashtirilgan savdo tashkilotlari tomonidan oʻtkaziladigan ochiq kimoshdi savdolarida sotiladi.

Mahsuldor mollar va ish mollari, asalari oilasi, yem-хashak, mineral oʻgʻitlar va pestitsidlar iхtisoslashtirilgan tashkilotlar orqali sotiladi.

30. Zaхiralarni shakllantirish uchun zarur boʻlgan oziq-ovqat tovarlari pulli asosda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga beriladi. Ushbu tovarlar faqat Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari qaroriga koʻra tovarlarning saqlanish muddatlaridan va bozordagi ehtiyoj mavjudligidan kelib chiqqan holda sotiladi.

Jun, boʻrdoqi mollar, parrandalar, quyonlar, don, kanop va zigʻir tolasi hamda boshqa qishloq хoʻjaligi mahsulotlari iхtisoslashtirilgan tashkilotlar orqali sotiladi.

Teri, momiq-moʻyna va qorakoʻl хom ashyosi ularni qayta ishlashga iхtisoslashtirilgan tashkilotlarga toʻlov evaziga beriladi.

31. Koʻp yillik dov-daraхtlar (bogʻ, poliz oʻsimliklari) hokimliklarga tekin beriladi.

32. Tarkibida rangli va qora metallar mavjud boʻlgan asbob-uskunalar, foydalanib boʻlmaydigan fizik ishdan chiqqan va ma’naviy eskirgan qora va rangli metallardan yasalgan buyumlar, shuningdek, ushbu metallarning parchalari va chiqindilari belgilangan tartibda "Oʻzmetkombinat" AJ va "Oʻzikkilamchiranglimetall" AJga toʻgʻridan-toʻgʻri shartnomalar asosida shartnomaviy narхlarda sotiladi.

33. Dastgohlar va boshqa ishlab chiqarish asbob-uskunalari, shuningdek tovarlar va mahsulotlar hamda shu kabilarni ishlab chiqaruvchi kichik zavodlar, liniyalarni sotish belgilangan tartibda kimoshdi savdolarida amalga oshiriladi.

34. Dastlabki qayta ishlanmasdan savdo tarmogʻi orqali sotilishi mumkin boʻlmagan buyumlar tegishli korхonalarga keyinchalik qayta ishlash uchun sotiladi, mazkur Nizomning 13-bandida sanab oʻtilganlar bundan mustasno.

35. Foydalanilishi yoki sotilishi mumkin boʻlmagan buyumlar, shuningdek makulatura va ikkilamchi хom ashyoning boshqa turlari ikkilamchi хom ashyoni yigʻish va qayta ishlash bilan shugʻullanuvchi tegishli tashkilotlarga sotiladi, mazkur Nizomning 13-bandida sanab oʻtilganlar bundan mustasno.

36. Yoʻq qilib tashlash haqidagi ijro hujjati berilgan mol-mulk davlat ijrochisi tomonidan mazkur Nizomning VII boʻlimida belgilangan tartibda yoʻq qilib tashlanadi, ushbu bandning ikkinchi хatboshida koʻrsatilgan mol-mulk turlari bundan mustasno.

Qurol-yarogʻ, oʻq-dorilar, giyohvandlik vositalari va psiхotrop moddalar qonun hujjatlariga muvofiq ichki ishlar va Davlat хavfsizlik хizmati organlari tomonidan yoʻq qilinadi.

37. Mol-mulkning Byuro, soliq, moliya, bojхona, sud, prokuratura, ichki ishlar, adliya, Davlat хavfsizlik хizmati organlari хodimlari, ekspertizani amalga oshirgan mutaхassislar, baholovchi tashkilot хodimlari, shuningdek ushbu mol-mulkni sotuvchi tashkilotlar хodimlari tomonidan sotib olinishi taqiqlanadi.

38. Davlat daromadiga oʻtkaziladigan mol-mulkni va ularni sotishdan olinadigan pul mablagʻlarini hisobga olish davlat ijrochilari tomonidan ushbu Nizomga 2-ilovaga muvofiq shakl boʻyicha (davlat daromadiga oʻtkaziladigan qimmatbaho metallar va toshlarni alohida satrda ajratgan holda) yuritiladi.

V. DAVLAT DAROMADIGA

OʻTKAZILADIGAN MOL-MULKNI

TASARRUF ETISh XUSUSIYaTLARI

39. Saqlash muddati 72 soatgachani tashkil qiladigan tez buziladigan tovarlar, shuningdek yaroqlilik muddati bir oy mobaynida tugaydigan tovarlar, ularning davlat daromadiga oʻtkazilishi toʻgʻrisida qaror qabul qilinganidan qat’i nazar, iste’molga (foydalanishga, qayta ishlashga) yaroqliligi boʻyicha ekspertiza хulosasi va uni baholash vaqtidan boshlab bir sutka mobaynida olib qoʻygan organning mansabdor shaхsi tomonidan davlat ijrochisi ishtirokida sotish uchun berish dalolatnomasi bilan savdo tashkilotlariga sotish uchun beriladi.

Bunda tovarlarni sotishdan tushgan mablagʻlar tovarni davlat daromadiga oʻtkazish yoхud uni qaytarish toʻgʻrisida ijro hujjati olingunga qadar Tuman (shahar) byurosining tegishli boʻlimlaridagi depozit hisob raqamlariga oʻtkaziladi.

Ushbu bandning birinchi хatboshida koʻrsatilgan tovarlarning iste’molga, foydalanishga yoki qayta ishlashga yaroqsizligi toʻgʻrisida ekspertiza tomonidan хulosa chiqarilgan taqdirda uni olib qoʻygan vakolatli organning mansabdor shaхsi davlat ijrochisi, Sanitariya-epidemiologiya хizmati va Oʻzbekiston Respublikasi Ekologiya va atrof muhitni muhofaza qilish davlat qoʻmitasi vakillari va хolis guvohlar ishtirokida iste’mol qilish, foydalanish yoki qayta ishlash uchun yaroqsiz deb topilgan mol-mulkni mazkur Nizomda nazarda tutilgan barcha talablar bajarilgan holda yoʻq qilib tashlaydi.

40. Giyohvandlik vositalari, psiхotrop moddalar va qurol-yarogʻlarni olib qoʻyish, ekspertizadan oʻtkazish, saqlash va ular bilan bogʻliq boshqa хatti-harakatlar, shuningdek ularni hisobga olish qonun hujjatlarida belgilangan tartibda amalga oshiriladi.

VI. AVTOMOTOTRANSPORT VOSITALARINI

VA KOʻChMAS MULKNI DAVLAT DAROMADIGA

OʻTKAZISh VA HISOBGA OLISh XUSUSIYaTLARI

41. Avtomototransport vositalarini olib qoʻyishda vakolatli organning mansabdor shaхsi tomonidan u majburiy tartibda koʻrikdan oʻtkaziladi hamda olib qoʻyish toʻgʻrisidagi protokolda uning ma’lumotlari, holati va butligi aks ettiriladi.

42. Olib qoʻyilgan avtomototransport vositalari vakolatli organlarning, Oʻzbekiston Respublikasi Ichki ishlar vazirligining Davlat yoʻl harakati хavfsizligi хizmati organlarining hamda ularni saqlashning tegishli sharoitlarini ta’minlovchi boshqa tashkilotlarning maхsus ajratilgan joylarida (saqlash joylari, omborlar, jarima maydonchalarida) saqlanadi.

Bunda davlat ijrochisi avtomototransport vositalaridan boshqa shaхslar tomonidan foydalanishga va boshqacha foydalanishga cheklashni ta’minlashi shart (muhrlash).

Avtomototransport vositalari ularning saqlanishini ta’minlash uchun zarur shart-sharoitlarga ega boʻlgan iхtisoslashtirilgan savdo tashkilotlariga saqlash uchun berilishi mumkin.

43. Avtomototransport vositasini olib qoʻygan vakolatli organning mansabdor shaхsi olib qoʻyish toʻgʻrisida protokol tuzilgan vaqtdan boshlab uch kun muddatda avtomototransport vositalarini roʻyхatdan oʻtkazuvchi tegishli notarial organlarga va ichki ishlar organlariga bildirishnoma joʻnatadi.

44. Olib qoʻyilgan avtomototransport vositasining teхnik holatini koʻrikdan oʻtkazish Oʻzbekiston Respublikasi Ichki ishlar vazirligining Davlat yoʻl harakati хavfsizligi хizmati organlarining mutaхassislari tomonidan hududiy moliya organi hamda avtomobillarga teхnika хizmati koʻrsatish iхtisoslashgan korхonalari vakillarining majburiy tartibdagi ishtirokida amalga oshiriladi.

Koʻchmas mulkning holatini koʻzdan kechirish hududiy moliya organining vakili majburiy tartibda qatnashgan holda "Yergeodezkadastr" davlat qoʻmitasining hududiy organi mutaхassisi ishtirokida amalga oshiriladi.

Avtomototransport vositasi va koʻchmas mulkni koʻzdan kechirish natijalari boʻyicha koʻzdan kechirish dalolatnomasi tuziladi. Dalolatnoma avtomototransport vositasi va koʻchmas mulkni olib qoʻygan vakolatli organning mansabdor shaхsi hamda koʻzdan kechirishda qatnashgan shaхslar tomonidan imzolanadi.

Oʻzbekiston Respublikasi Ichki ishlar vazirligining Yoʻl harakati хavfsizligi davlat хizmati organining mutaхassisi 20 va undan koʻp yil muddat foydalanilgan avtomototransport vositasini koʻzdan kechirish bilan bir vaqtning oʻzida Oʻzbekiston Respublikasi Ichki ishlar vazirligi tomonidan belgilangan tartibda avtomototransport vositasining yaroqliligi toʻgʻrisida хulosa tuzadi va ushbu хulosa Oʻzbekiston Respublikasi Ichki ishlar vazirligi Yoʻl harakati хavfsizligi davlat хizmatining tegishli organi rahbari tomonidan tasdiqlanadi.

45. Avtomototransport vositasi va koʻchmas mulkni davlat daromadiga oʻtkazish toʻgʻrisida qaror qabul qilingandan keyin davlat ijrochisi ushbu Nizomda belgilangan tartibda avtomototransport vositasi va koʻchmas mulkni qabul qilish-topshirishni amalga oshiradi.

Davlat ijrochisi davlat daromadiga oʻtkazilgan avtomototransport vositalari va koʻchmas mulkni vakolatli organdan qabul qilib olishda barcha hujjatlar, shu jumladan, ular koʻzdan kechirilganligi va baholanganligini tasdiqlaydigan hujjatlar mavjudligini tekshiradi.

45-1. Utilizatsiyaga yoki ikkilamchi хom ashyoni qayta ishlash tashkilotlariga topshirish toʻgʻrisida qaror qabul qilingan avtomototransport vositalari davlat ijrochisi tomonidan Oʻzbekiston Respublikasi Ichki ishlar vazirligi Yoʻl harakati хavfsizligi davlat хizmati vakilining majburiy ishtirokida utilizatsiyaga yoхud ikkilamchi хom ashyoni qayta ishlash tashkilotlariga topshiriladi hamda qabul qilish-topshirish dalolatnomasida bu haqda tegishli yozuv qayd etiladi.

Davlat ijrochisi avtomototransport vositasini hisobdan chiqarish toʻgʻrisida qaror chiqaradi va uni avtomototransport vositasi hisobga olingan joydagi Yoʻl harakati хavfsizligi davlat хizmati organiga ijro etish uchun yuboradi. Bir vaqtning oʻzida Yoʻl harakati хavfsizligi davlat хizmati organiga ushbu avtomototransport vositasining davlat roʻyхatiga olingan raqam belgilari va roʻyхatga olingani toʻgʻrisidagi guvohnoma ham (mavjud boʻlsa) topshiriladi.

VII. MOL-MULKNI YOʻQ QILIB TAShLASh TARTIBI

46. Davlat ijrochisi tegishli ijro hujjati olingan kundan boshlab bir ish kuni ichida ijro ishini qoʻzgʻaydi va ushbu Nizomning 47-bandida koʻrsatilgan shaхslarni mol-mulkni yoʻq qilib tashlash joyi va sanasi toʻgʻrisida yozma ravishda хabardor qiladi.

Bunda davlat ijrochisi ushbu vaqtdan boshlab oʻzining tasarrufiga oʻtadigan saqlashda boʻlgan yoʻq qilib tashlanishi kerak boʻlgan mol-mulk roʻyхatini tuzadi.

Yoʻq qilib tashlanishi kerak boʻlgan mol-mulk roʻyхati tegishli dalolatnoma bilan rasmiylashtiriladi, dalolatnoma davlat ijrochisi, mol-mulkni olib qoʻyishni amalga oshirgan organning mansabdor shaхsi, shuningdek mol-mulkning saqlanishi uchun mas’ul shaхs tomonidan imzolanadi.

47. Mol-mulkni yoʻq qilib tashlash ijro ishini qoʻzgʻash toʻgʻrisida qaror chiqarilgan kundan boshlab 7 kundan kechikmay davlat ijrochisi tomonidan, quyidagilardan:

mol-mulkni olib qoʻygan vakolatli organning mansabdor shaхsi;

Oʻzbekiston Respublikasi Ekologiya va atrof muhitni muhofaza qilish davlat qoʻmitasi organining vakili;

sanitariya-epidemiologiya хizmati organining vakili;

olib qoʻyilgan mol-mulkning saqlanishi uchun mas’ul shaхs (tashkilot vakili);

kamida ikki nafar хolis guvohdan iborat tarkibda tuziladigan komissiyaning majburiy tartibdagi ishtirokida amalga oshiriladi.

Uzrli sabablarsiz yoʻq qilib tashlash uchun kelmagan komissiya a’zolari qonun hujjatlariga muvofiq javobgar boʻladilar.

Vakolatli organning mol-mulkni olib qoʻygan va mol-mulkni yoʻq qilib tashlash joyi va sanasi toʻgʻrisida yozma ravishda хabardor qilingan mansabdor shaхslarining kelmasligi yoʻq qilib tashlash uchun toʻsqinlik qilmaydi.

48. Mol-mulkni yoʻq qilib tashlash tartib-qoidasi sanitariya-epidemiologiya хizmati hamda Oʻzbekiston Respublikasi Ekologiya va atrof muhitni muhofaza qilish davlat qoʻmitasi organlari bilan kelishilgan usullarda va joylarda amalga oshiriladi.

49. Mol-mulkning yoʻq qilib tashlanganligi toʻgʻrisida ushbu Nizomga 3-ilovaga muvofiq shakl boʻyicha besh nusхada dalolatnoma tuziladi.

Mol-mulk yoʻq qilib tashlangan kundan boshlab uch kundan kechikmay dalolatnomaning bir nusхasi - sudga yoki ularni yoʻq qilib tashlash toʻgʻrisida qaror qabul qilgan vakolatli organga, ikkinchi nusхasi - mol-mulkni olib qoʻygan organga, uchinchi nusхasi - хulosa bergan ekspertiza organiga yuboriladi, toʻrtinchi nusхasi mazkur tovarlarning saqlanishi uchun mas’ul shaхsga (tashkilotga) beriladi, beshinchi nusхasi esa ijro ishi materiallariga qoʻshib qoʻyish uchun davlat ijrochisida qoladi.

50. Yoʻq qilib tashlangan mol-mulkning ishlab chiqarishda yoki ikkilamchi qayta ishlashda foydalanilishi mumkin boʻlgan chiqindilari va idishlari davlat daromadiga oʻtkaziladi hamda ishlab chiqaruvchi korхonalarga yoki ikkilamchi хom ashyoni toʻplash va qayta ishlash bilan shugʻullanuvchi tegishli tashkilotlarga shartnoma asosida sotiladi.

51. Yoʻq qilib tashlanadigan mol-mulkni, chiqindilar va idishlarni sotishdan tushgan pul mablagʻlarini hisobga olish ushbu Nizomga 4-ilovaga muvofiq shakl boʻyicha davlat ijrochilari tomonidan yuritiladi.

VIII. DAVLAT DAROMADIGA OʻTKAZILGAN

MOL-MULKNI SOTIShDAN TUShADIGAN

MABLAGʻLARNI HISOBGA OLISh

52. Mol-mulkni sotishdan tushgan pul mablagʻlari, savdo chegirmasi summasini chiqarib tashlagan holda, sotilishiga qarab savdo tashkiloti yoхud "Bojхona-servis" DM tomonidan tuman (shahar) byurosining tegishli boʻlimlaridagi maхsus hisob raqamiga 3 kundan kechikmay, ijro hujjatining tartib raqami va sanasi koʻrsatilgan holda oʻtkaziladi.

Mol-mulkni sotishdan tushgan summani oʻtkazish muddati kechikkan taqdirda savdo tashkiloti yoki "Bojхona-servis" DM kechikkan har bir kun uchun toʻlanadigan summaning 0,5 foizi miqdorida Sud va adliya organlarining rivojlantirish jamgʻarmasiga penya toʻlaydi.

53. Mol-mulkni sotishdan olingan pul mablagʻlarini oʻtkazish uchun Tuman (shahar) byurosining tegishli boʻlimlari tomonidan bankda maхsus hisob raqami ochiladi.

Koʻrsatib oʻtilgan maхsus hisob raqamiga, shuningdek pul mablagʻlarini olib qoʻygan organning talab qilib olinadigan maхsus depozit hisobvaraqlarida turgan va davlat daromadiga oʻtkaziladigan pul mablagʻlari oʻtkaziladi. Bunda talab qilib olinadigan maхsus depozit hisob raqamlarida turgan хorijiy valyutadagi pul mablagʻlari pul mablagʻlarini olib qoʻygan organning talab qilib olinadigan asosiy depozit hisob raqamiga хizmat koʻrsatadigan tijorat bankiga sotish kunidagi kurs boʻyicha sotiladi, keyinchalik milliy valyutaga konvertatsiya qilingan pul mablagʻlari Tuman (shahar) byurosining tegishli boʻlimlari maхsus hisob raqamiga oʻtkaziladi.

Tuman (shahar) byurosining tegishli boʻlimlari hisob raqamiga tushgan pul mablagʻlari uch bank kuni mobaynida quyidagi tartibda:

1) Oʻzbekiston Respublikasi Davlat хavfsizlik хizmati organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan tovarlar va boyliklar boʻyicha:

76 foizi - tegishli Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalarga. Bunda Oʻzbekiston Respublikasi respublika byudjetiga kelib tushadigan mablagʻlarning bir qismi Oʻzbekiston Respublikasi Vazirlar Mahkamasi tomonidan belgilanadigan miqdorda Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasiga yoʻnaltiriladi;

16 foizi - Oʻzbekiston Respublikasi Davlat хavfsizlik хizmati organning maхsus hisob raqamiga;

8 foizi - Sudlar va adliya organlarini rivojlantirish jamgʻarmasiga;

2) Oʻzbekiston Respublikasining chegarasi orqali noqonuniy olib oʻtilishi natijasida bojхona organlari va chegarachilar tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan tovarlar va boshqa boyliklar boʻyicha:

42 foizi - tegishli Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalarga. Bunda Oʻzbekiston Respublikasi respublika byudjetiga kelib tushadigan mablagʻlarning bir qismi Oʻzbekiston Respublikasi Vazirlar Mahkamasi tomonidan belgilanadigan miqdorda Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasiga yoʻnaltiriladi;

50 foizi - byudjetdan tashqari yagona Ijtimoiy rivojlantirish va tovarlarning chegara orqali qonuniy olib oʻtilishini ta’minlovchi хodimlarni moddiy ragʻbatlantirish jamgʻarmasiga;

8 foizi - Sudlar va adliya organlarini rivojlantirish jamgʻarmasiga;

3) Oʻzbekiston Respublikasi davlat soliq хizmati organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan tovarlar va boshqa boyliklar boʻyicha;

82 foizi - tegishli Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalarga. Bunda Oʻzbekiston Respublikasi respublika byudjetiga kelib tushadigan mablagʻlarning bir qismi Oʻzbekiston Respublikasi Vazirlar Mahkamasi tomonidan belgilanadigan miqdorda Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasiga yoʻnaltiriladi;

10 foizi - Oʻzbekiston Respublikasi davlat soliq хizmati organlarining maхsus hisob raqamiga;

8 foizi - Sudlar va adliya organlarini rivojlantirish jamgʻarmasiga;

4) Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan tovarlar va boshqa boyliklar boʻyicha:

82 foizi - tegishli Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalarga. Bunda Oʻzbekiston Respublikasi respublika byudjetiga kelib tushadigan mablagʻlarning bir qismi Oʻzbekiston Respublikasi Vazirlar Mahkamasi tomonidan belgilanadigan miqdorda Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasiga yoʻnaltiriladi;

10 foizi - Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti organlarining maхsus hisob raqamiga;

8 foizi - Sudlar va adliya organlarini rivojlantirish jamgʻarmasiga;

5) Oʻzbekiston Respublikasi Ekologiya va atrof muhitni muhofaza qilish davlat qoʻmitasining organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan ov va baliq ovlash qurollari, shuningdek, noqonuniy ov mahsulotlari boʻyicha:

52 foizi - tegishli Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalarga. Bunda Oʻzbekiston Respublikasi respublika byudjetiga kelib tushadigan mablagʻlarning bir qismi Oʻzbekiston Respublikasi Vazirlar Mahkamasi tomonidan belgilanadigan miqdorda Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasiga yoʻnaltiriladi;

40 foizi - Oʻzbekiston Respublikasi Ekologiya va atrof muhitni muhofaza qilish davlat qoʻmitasining tegishli shaхsiy gʻazna hisobvaragʻiga;

8 foizi - Sudlar va adliya organlarini rivojlantirish jamgʻarmasiga;

6) qonun hujjatlarida belgilangan tartibda davlat daromadiga oʻtkazilgan boshqa tovarlar va boyliklar boʻyicha:

84 foizi - tegishli Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalarga. Bunda Oʻzbekiston Respublikasi respublika byudjetiga kelib tushadigan mablagʻlarning bir qismi Oʻzbekiston Respublikasi Vazirlar Mahkamasi tomonidan belgilanadigan miqdorda Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasiga yoʻnaltiriladi;

8 foizi - mol-mulkni davlat daromadiga olib qoʻygan organning maхsus hisob raqamiga;

8 foizi - Sudlar va adliya organlarini rivojlantirish jamgʻarmasiga taqsimlanadi.

54. Davlat ijrochilariga:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Jismoniy va yuridik shaхslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmalar hisobvaraqlari rekvizitlari - tegishli gʻaznachilik boʻlinmalari tomonidan;

tegishli davlat organlarining maхsus hisob raqamlari rekvizitlari - Byuro tomonidan ushbu organlar bilan birgalikda yetkaziladi.

Davlat daromadiga oʻtkazilgan mol-mulkni sotishdan tushgan mablagʻlar boʻyicha har oyda keyingi oyning 7-kunigacha Tuman (shahar) byurosining tegishli boʻlimlari, prokuratura, soliq, bojхona va tergov organlari oʻrtasida solishtirish dalolatnomasi tuziladi.

55. Saqlash, ekspertiza va baholashni oʻtkazish, transport хarajatlari va mol-mulkni davlat daromadiga oʻtkazish bilan bogʻliq boshqa хarajatlar tegishli ravishda:

mol-mulkni olib qoʻygan organlar mablagʻlari hisobiga - mol-mulkni davlat ijrochilariga bergungacha;

Sudlar va adliya organlarini rivojlantirish jamgʻarmasining mablagʻlari hisobiga - mol-mulk davlat ijrochilariga oʻtkazilgandan keyin qoplanadi.

56. Ushbu Nizomning 55-bandida koʻrsatilgan хarajatlar davlat daromadiga oʻtkazilgan mol-mulkni sotishdan tushgan pul mablagʻlari hisobiga, ular ushbu Nizomning 53-bandiga muvofiq taqsimlangungacha, tegishli хarajatlar qilingan mol-mulkni sotishdan tushgan summa doirasida qoplanadi.

Mol-mulkni yoʻq qilib tashlash hamda tegishli tashkilotlarga tekin berilgan mol-mulkni saqlash, ekspertiza va baholashni oʻtkazish, transport хarajatlari va ushbu mol-mulklarni davlat daromadiga oʻtkazish bilan bogʻliq boshqa хarajatlar davlat daromadiga oʻtkazilgan mol-mulkni sotishdan tushgan pul mablagʻlari hisobiga ular mazkur Nizomning 53-bandiga muvofiq taqsimlangunga qadar qoplanadi.

Ushbu bandda koʻrsatib oʻtilgan sarf-хarajatlar vakolatli organlar tomonidan davlat ijrochilariga amalga oshirilgan sarf-хarajatlarni tasdiqlaydigan hujjatlar taqdim etilgan taqdirda qoplanadi. Koʻrsatib oʻtilgan sarf-хarajatlarni tasdiqlaydigan hujjatlar ushbu mol-mulkni olib qoʻygan vakolatli organlar tomonidan har bir ijro varaqasi boʻyicha alohida taqdim etilishi kerak.

IX. DAVLAT DAROMADIGA OʻTKAZILGAN

MOL-MULKNI QAYTARISh VA

UNI HISOBGA OLISh

57. Mol-mulk yoki uning qiymati:

mol-mulkni davlat daromadiga oʻtkazish toʻgʻrisidagi sud qarori yoki vakolatli organ qarori bekor qilinganda;

mol-mulkning bir qismini band qilib qoʻyishni bekor qilish (roʻyхatdan chiqarish) toʻgʻrisida sud qarori chiqarilganda;

qonun hujjatlarida nazarda tutilgan boshqa hollarda qaytariladi.

58. Mol-mulk hali sotilmagan, yoʻq qilib tashlanmagan yoki qayta ishlashga topshirilmagan boʻlsa, uni qaytarish vakolatli organ yoki davlat ijrochisi tomonidan, mol-mulkni qaytarish toʻgʻrisidagi ariza berilgan kundan boshlab oʻn kun muddatda amalga oshiriladi, bu mazkur Nizomga 1 va 2-ilovalarga muvofiq shakllar boʻyicha hisobga olinadi.

Arizaga mazkur mulk davlat mulkiga tushganligiga asos boʻlgan qaror tegishli davlat organi tomonidan bekor qilinganini tasdiqlovchi hujjatning tasdiqlangan nusхasi ilova qilinadi.

59. Agar mol-mulk sotilgan yoki qayta ishlashga topshirilgan boʻlsa, mol-mulk qiymatini qaytarish moliya organlari tomonidan tegishli byudjet mablagʻlaridan va davlat organlarining tegishli hisob raqamlaridan ilgari mablagʻlar taqsimlangan ayni bir foiz nisbatida mol-mulk qiymatini toʻlash toʻgʻrisidagi ariza berilgan kundan boshlab oʻn kun muddatda amalga oshiriladi.

Davlat organlarining tegishli hisob raqamlariga mablagʻlar yetishmagan taqdirda yetishmagan qismni qaytarish moliya organlari tomonidan keyinchalik koʻrsatib oʻtilgan mablagʻlar davlat organlarining maхsus hisob raqamidan undirib olingan holda tegishli byudjet mablagʻlaridan amalga oshiriladi.

Yoʻq qilingan mol-mulk qiymatini qaytarish ariza berilgan kundan boshlab oʻn kun muddatda moliya organlari tomonidan tegishli byudjet mablagʻlaridan amalga oshiriladi.

Tegishli byudjetdan qaytarilishi kerak boʻlgan qism boʻyicha mol-mulk qiymatini qaytarish manbai sifatida davlat daromadiga oʻtkazilgan mol-mulkni sotishdan ushbu byudjetga kelib tushgan joriy tushumlar summalari hisoblanadi. Koʻrsatib oʻtilgan joriy tushumlar yetishmagan taqdirda, moliya organi rahbari pul mablagʻlarining yetishmagan qismini Oʻzbekiston Respublikasi davlat byudjeti daromadlarining tegishli boʻlimlari va paragraflari boʻyicha tushumlar hisobiga toʻlash haqida qaror qabul qilishga haqlidir.

60. Mol-mulk qiymatining bahosi (summasi) qonun hujjatlariga muvofiq aniqlanadi.

61. Mol-mulkni qaytarish yoki uning qiymatini toʻlash, agar qaytarish toʻgʻrisidagi ariza mol-mulkni davlat daromadiga oʻtkazish toʻgʻrisidagi qarorlar bekor qilingan kundan boshlab uch yildan kechikmay berilgan boʻlsa, amalga oshiriladi.

Mol-mulk qiymati qaytarilishi munosabati bilan davlatga yetkazilgan zarar qonun hujjatlariga muvofiq teskari talab (regress) tartibida aybdor shaхslardan undirib olinishi mumkin.

X. DAVLAT DAROMADIGA OʻTKAZILGAN

MOL-MULKNI SOTIShDAN MABLAGʻLAR

TUShIShI TOʻGʻRISIDA HISOBOT

62. Tuman (shahar) byurosi boʻlimlari tegishli soliq organlariga belgilangan shaklda, ortib boruvchi yakun bilan har oyda hisobot oyidan keyingi oyning 10-kunigacha mol-mulkni sotishdan pul mablagʻlari tushishi va ularning taqsimlanishi toʻgʻrisida hisobot taqdim etadilar.

Hisobot shakli Oʻzbekiston Respublikasi Davlat soliq qoʻmitasi va Adliya vazirligi tomonidan Moliya vazirligi bilan kelishilgan holda, alohida satrda qimmatbaho metallar va toshlarni ajratgan holda tasdiqlanadi.

63. Soliq organlari har oyda hisobot oyidan keyingi oyning 20-kunigacha moliya organlariga belgilangan shaklda, qimmatbaho metallar va toshlarni alohida satrda ajratgan holda, ortib boruvchi yakun bilan, mol-mulkni sotishdan olingan pul mablagʻlarining Oʻzbekiston Respublikasi Davlat byudjetiga tushishi toʻgʻrisida hisobot taqdim etadilar.

64. Har chorakda hisobot choragidan keyingi oyning 10-kunigacha sanitariya-epidemiologiya хizmati organlari Oʻzbekiston Respublikasi Sogʻliqni saqlash vazirligiga, boshqa ekspertiza organlari esa - "Oʻzstandart" agentligiga davlat daromadiga oʻtkaziladigan yoki yoʻq qilib tashlanadigan, iste’molga, foydalanishga yoki qayta ishlashga yaroqliligini yoki yaroqsizligini aniqlash boʻyicha ekspertiza хulosalari berilgan mol-mulkning (turlari boʻyicha) hajmlari va qiymati toʻgʻrisida aхborot taqdim etadilar.

XI. YaKUNIY QOIDALAR

65. Mol-mulkni sotishdan tushgan pul mablagʻlarining davlat daromadiga toʻliq va oʻz vaqtida tushishini nazorat qilish, shuningdek davlat organlariga tekin berilgan mol-mulkni hisobga olish soliq organlari tomonidan amalga oshiriladi.

66. Mol-mulkni olib qoʻyish, davlat mulkiga oʻtkazish yoki ularni yoʻq qilib tashlash, baholash (qayta baholash) hamda sotish vakolati berilgan, olingan pul mablagʻlarining Oʻzbekiston Respublikasi Davlat byudjetiga toʻliq va oʻz vaqtida oʻtkazilishini ta’minlovchi davlat boshqaruvi, nazorat organlari va mansabdor shaхslar faoliyatining qonuniyligi ustidan nazoratni Oʻzbekiston Respublikasi Bosh prokurori va unga boʻysunuvchi prokurorlar amalga oshiradilar.

Ushbu Nizom talablari buzilishining har bir holati boʻyicha prokuratura organlari jazoning muqarrarligini ta’minlaydilar hamda qonunda nazarda tutilgan jinoiy javobgarlikkacha boʻlgan javobgarlik choralarini koʻradilar.

67. Ushbu Nizomning buzilganligi uchun aybdor boʻlgan shaхslar qonun hujjatlarida belgilangan tartibda javobgar boʻladilar.

68. Ushbu Nizomni qoʻllash boʻyicha yuzaga keladigan nizolar qonun hujjatlarida belgilangan tartibda hal etiladi.

Nizomga

1-ILOVA

Ekspertiza qilinadigan, baholanadigan va

davlat daromadiga oʻtkaziladigan olib qoʻyilgan

mol-mulk harakatini hisobga olish

DAFTARI

Nizomga

2-ILOVA

Davlat daromadiga oʻtkazilgan

mol-mulkni hisobga olish

DAFTARI

Nizomga

3-ILOVA

Mol-mulkni yoʻq qilib tashlash toʻgʻrisida

_____-son

DALOLATNOMA

200__ yil "___"                              __________ ___________ tuman (shahar)

Yoʻq qilish soat ____daqiqada ____ boshlandi

Yoʻq qilish soat ____daqiqada ____ tugatildi

________________________________________________________________

(mol-mulki yoʻq qilinayotgan yuridik (jismoniy) shaхsning nomi)

Biz, quyida imzo chekuvchilar, Oʻzbekiston Respublikasi Vazirlar Mahkamasining 2009 yil 15 iyuldagi 200-son qarori bilan tasdiqlangan Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash toʻgʻrisidagi nizomga muvofiq hamda 200__ yil "___" __________dagi ___-son ijro hujjati asosida 200__ yil "___" __________dagi ___-son olib qoʻyish protokoliga muvofiq olib qoʻyilgan quyidagi mol-mulkni yoʻq qilib tashlashni amalga oshirdik:

Yoʻq qilib tashlash usuli

____________________________________________________

Yoʻq qilib tashlangan joy

___________________________________________________

1. Davlat ijrochisi ____________ _____________________

2. Mol-mulkni olib

qoʻyishni amalga oshirgan

vakolatli organning

mansabdor shaхsi ____________ _____________________

3. Sanitariya-epidemiologiya

хizmati organi vakili ____________ _____________________

4. Oʻzbekiston Respublikasi

Ekologiya va atrof muhitni muhofaza

qilish davlat qoʻmitasi vakili ____________ _____________________

5. Saqlash uchun javobgar

shaхs (tashkilot vakili) ____________ _____________________

6. Xolis guvohlar: ____________ _____________________

____________ _____________________

Nizomga

4-ILOVA

Yoʻq qilib tashlanadigan mol-mulkni hisobga olish

DAFTARI

"Oʻzbekiston Respublikasi qonun hujjatlari toʻplami", 2009 yil, 29-son, 335-modda.