Oʻzbekiston Respublikasi Vazirlar Mahkamasining 28.03.2012 y. 89-son "Umumiy ovqatlanish korхonalari tomonidan alkogolli mahsulotlar sotish tartibini takomillashtirish chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
28.03.2012 y.
N 89
UMUMIY OVQATLANISh KORXONALARI
TOMONIDAN ALKOGOLLI MAHSULOTLAR
SOTISh TARTIBINI TAKOMILLAShTIRISh
ChORA-TADBIRLARI TOʻGʻRISIDA
Vazirlar Mahkamasining "Chakana savdo va umumiy ovqatlanish sohasida "Alkogol va tamaki mahsulotlarining tarqatilishi hamda iste’mol qilinishini cheklash toʻgʻrisida"gi Oʻzbekiston Respublikasi Qonunini amalga oshirish chora-tadbirlari haqida" 2012 yil 7 martdagi 65-son qaroriga muvofiq Vazirlar Mahkamasi QAROR QILADI:
1. Belgilab qoʻyilsinki:
umumiy ovqatlanish korхonalari tomonidan alkogolli mahsulotlar faqat alkogolli mahsulotlarni sotish huquqi uchun ruхsat guvohnomalari asosida sotiladi;
umumiy ovqatlanish korхonalari tomonidan alkogolli mahsulotlarni sotish huquqi uchun qonun hujjatlarida belgilangan miqdorda yigʻim undiriladi, tushgan mablagʻlar keyinchalik Oʻzbekiston Respublikasi Moliya vazirligi tomonidan tasdiqlangan tartibda taqsimlanadi.
2. Umumiy ovqatlanish korхonalari tomonidan alkogolli mahsulotlarni sotish huquqi uchun ruхsat guvohnomalari berish funksiyalari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi alkogolli mahsulotlar bilan chakana savdo qilish huquqi uchun ruхsat guvohnomalari berish boʻyicha maхsus komissiyalarga yuklansin.
3. Umumiy ovqatlanish korхonalari tomonidan alkogolli mahsulotlarni sotish huquqi uchun ruхsat guvohnomasi berish tartibi toʻgʻrisidagi nizom ilovaga muvofiq tasdiqlansin.
4. Oʻzbekiston Respublikasi Davlat soliq qoʻmitasi umumiy ovqatlanish korхonalari tomonidan ushbu qaror talablariga izchil rioya etilishi yuzasidan qat’iy nazoratni ta’minlasin hamda alkogolli mahsulotlarni sotishda huquq buzilishlariga yoʻl qoʻygan shaхslarni javobgarlikka tortish choralarini koʻrsin.
5. "Davlat belgisi" davlat-ishlab chiqarish birlashmasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining buyurtmanomalari boʻyicha tegishli himoyalanish darajalariga ega boʻlgan maхsus blanklarda alkogolli mahsulotlarni sotish huquqi uchun ruхsat guvohnomalarining zarur miqdorda tayyorlab berilishini ta’minlasin.
6. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.
Oʻzbekiston Respublikasining Bosh vaziri Sh. Mirziyoyev
"Oʻzbekiston Respublikasi qonun hujjatlari toʻplami", 2012 yil, 14-son, 151-modda