OʻZBEKISTON RESPUBLIKASI

PREZIDENTINING

FARMONI

21.11.1994 y.

N PF-1005

EKINLARNING PAYHON ETILIShIGA

QARShI KURAShNI KUChAYTIRISh TOʻGʻRISIDA

Donli ekinlar payhon boʻlishiga yoʻl qoʻymaslik va ularni saqlashni ta’minlash, qishloq хoʻjalik mahsulotlari nazoratsiz nest-nobud boʻlishi hollarining oldini olish maqsadida:

1. Qoraqalpogʻiston Respublikasining Vazirlar Kengashi, viloyatlar, tumanlarning hokimlari, fuqarolarning oʻzini oʻzi boshqarish organlari, mulkchilik shakllaridan qat’i nazar, хoʻjaliklarning rahbarlari qishloq. хoʻjaligi ekinzorlarida chorva va parrandalar boqish, shunday ekinzorlar orqali avtotransport yoki qishloq хoʻjalik teхnikasini, hayvonlarni olib oʻtish kabi hamda ekinlarning payhon boʻlishiga olib keladigan boshqa buzgʻunchilik hollariga qarshi kurashni kuchaytirsinlar.

2. Ekinzorlarning egalari yoki mulkdorlari boʻlmish хoʻjaliklarning rahbarlariga ichki ishlar organlari va fuqarolarning oʻzini oʻzi boshqarish organlari vakillari bilan birgalikda ekinzorlarni payhon qilish hollarini aniqlash va bunday buzgʻunchiliklarga yoʻl qoʻymaslik borasida muntazam reydlarni oʻtkazib turish vazifasi topshirilsin. Eng koʻp payhon qilib turiladigan joylarda kuzatish postlari oʻrnatilsin.

Ekinzorlarni payhon qilish faktlari aniqlangan hollarda chorva, parranda, avtotransport, qishloq хoʻjalik teхnikasi yoki boshqa payhon qilish vositalarining egalarini yoхud mulkdorlarini aniqlash uchun tezkor choralar koʻrilsin, aybdorlarni qonunda belgilangan moddiy, ma’muriy yoki jinoiy javobgarlikka tortish uchun hujjatlar tegishli organlarga topshirilsin.

3. Belgilab qoʻyilsinki, mulkchilik shakllaridan qat’i nazar, korхonalarga, tashkilotlarga yoki fuqarolarga qarashli boʻlgan payhon qilish vositalari bundan buyon to egalari yoki mulkdorlari payhon yetkazgan ziyonning oʻrnini toʻla qoplamagunlariga qadar ushlab turiladi.

4. Oʻzbekiston Respublikasining Ichki ishlar vazirligi ekinlar payhon boʻlishining oldini olishga doir kechiktirib boʻlmaydigan choralarni koʻrsin, profilaktika ishlarini olib borish uchun tegishli postlar oʻrnatsin va amaldagi qonunlarga qat’iy muvofiq ravishda buzgʻunchilarga nisbatan qattiq choralarni qoʻllasin, har bir payhon qilish fakti boʻyicha aybdorlarni javobgarlikka tortmasdan qolmasin.

5. Prokuratura va IIV organlari, sudlar ekinlarning payhon qilinishi toʻgʻrisida hujjatlar olinganida ularni tezkorlik bilan koʻrib chiqsinlar, aybdorlarga nisbatan qat’iy jazo choralarini, hatto ozodlikdan mahrum qilish chorasini qoʻllasinlar.

6. Oʻzbekiston Respublikasining Prokuraturasi ekinlarning saqlanishini ta’minlashga qaratilgan qonunlarning ijrosi ustidan nazoratni kuchaytirsin.

7. Ushbu Farmonning bajarilishini nazorat qilish Oʻzbekiston Respublikasining Bosh prokurori B. Mustafoyev, Qoraqalpogʻiston Respublikasi Vazirlar Kengashining raisi, viloyatlar va tumanlarning hokimlari, huquqni muhofaza qilish organlari, хoʻjaliklar hamda fuqarolarning oʻzini oʻzi boshqarish organlari rahbarlarining zimmasiga yuklansin.

Oʻzbekiston Respublikasining Prezidenti                          I. Karimov

"Oʻzbekiston Respublikasi Oliy Kengashi Aхborotnomasi", 1994 y., N 11-12, 298-modda