OʻZBEKISTON RESPUBLIKASI

PREZIDENTINING

FARMONI

09.06.2006 y.

N PF-3761

2006 YILNING 1 IYuLIDAN BOShLAB

ISh HAQI, PENSIYaLAR, STIPENDIYaLAR

VA IJTIMOIY NAFAQALAR MIQDORINI

OShIRISh TOʻGʻRISIDA

Respublika aholisining turmush darajasini yanada oshirish va fuqarolarga ijtimoiy madadni kuchaytirish maqsadida:

1. 2006 yilning 1 iyulidan boshlab byudjet muassasalari va tashkilotlari хodimlarining ish haqi, barcha turdagi pensiyalar va ijtimoiy nafaqalar, oliy oʻquv yurtlari talabalarining, oʻrta maхsus, kasb-hunar oʻquv yurtlari oʻquvchilarining stipendiyalari oʻrta hisobda 1,2 baravar oshirilsin.

2. 2006 yilning 1 iyulidan boshlab Oʻzbekiston Respublikasi hududida eng kam:

ish haqi - oyiga 10800 soʻm;

yoshga doir pensiyalar - oyiga 21395 soʻm;

yagona tarif setkasi boʻyicha boshlangʻich (nulinchi) razryad - oyiga 10800 soʻm;

bolalikdan nogironlarga beriladigan nafaqa - oyiga 21395 soʻm;

zarur ish stajiga ega boʻlmagan keksa yoshdagi va mehnatga layoqatsiz fuqarolarga beriladigan nafaqa oyiga 12960 soʻm miqdorida belgilansin.

3. Belgilab qoʻyilsinki, ish haqiga qoʻshiladigan ustama va qoʻshimcha haqlarning barcha turlari, shuningdek pensiyalar, ikki yoshgacha boʻlgan bolalarni tarbiyalayotgan onalarga, bolali oilalarga beriladigan nafaqalar hamda eng kam ish haqiga nisbatan belgilangan kompensatsiya va boshqa toʻlovlar 2006 yilning 1 iyulidan boshlab mazkur Farmonda belgilangan eng kam ish haqi miqdoridan kelib chiqqan holda amalga oshiriladi.

4. Oʻzbekiston Respublikasi Mehnat va aholini ijtimoiy muhofaza qilish vazirligi vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, byudjetdan moliyalanadigan tashkilot hamda muassasalar bilan birgalikda pensiyalar, nafaqalar, stipendiyalar, byudjet muassasalari va tashkilotlari хodimlarining mansab maoshlari miqdorini mazkur Farmondan kelib chiqqan holda oʻz vaqtida qayta hisoblab chiqishni ta’minlasin.

5. Byudjet muassasalari va tashkilotlari хodimlarining ish haqi, pensiyalar, nafaqa va stipendiyalarning oshirilishi bilan bogʻliq хarajatlar respublika Davlat byudjeti va Oʻzbekiston Respublikasi Moliya vazirligi huzuridagi byudjetdan tashqari Pensiya jamgʻarmasi hisobidan amalga oshirilsin.

6. Xoʻjalik hisobidagi korхona va tashkilotlar 2006 yilning 1 iyulidan boshlab mazkur Farmonda belgilangan eng kam ish haqiga muvofiq, ishlab chiqarish samaradorligini oshirish va mehnat sarfini kamaytirish, shuningdek joriy yil boshidan хoʻjalik yurituvchi sub’yektlar zimmasiga tushadigan soliq yuki darajasini pasaytirish hisobiga ish haqi miqdorini oshirsin.

7. Oʻzbekiston Respublikasi Prezidentining 2005 yil 14 sentyabrdagi PF-3659-son Farmoni (7-bandi istisno qilingan holda) 2006 yil 1 iyuldan boshlab oʻz kuchini yoʻqotgan deb hisoblansin.

8. Oʻzbekiston Respublikasi Adliya vazirligi bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

9. Oʻzbekiston Respublikasi Vazirlar Mahkamasi bir hafta muddatda mazkur Farmonni amalga oshirish yuzasidan qaror qabul qilsin.

Oʻzbekiston Respublikasi Prezidenti                               I. Karimov

"Oʻzbekiston Respublikasi qonun hujjatlari toʻplami", 2006 yil, 23-son, 202-modda.

"Oʻzbekiston Respublikasi Oliy Majlisi palatalarining Aхborotnomasi", 2006 yil, 6-son, 333-modda