Vazirlar Mahkamasining

2008 yil 18 martdagi

48-son qaroriga

4-ILOVA

Tuman (shahar) tibbiyot birlashmasi toʻgʻrisida

NIZOM

I. UMUMIY QOIDALAR

1. Ushbu Nizom tuman (shahar) tibbiyot birlashmasi faoliyatini tashkil etish va moliyalashtirish tartibini belgilaydi.

Tuman (shahar) tibbiyot birlashmasi (keyingi oʻrinlarda Birlashma deb ataladi) Oʻzbekiston Respublikasi Prezidentining "Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida" 2007 yil 19 sentyabrdagi PF-3923-son Farmoniga muvofiq markaziy tuman (shahar) kasalхonasi, koʻp tarmoqli markaziy tuman poliklinikasi (Toshkent shahrida) negizida tashkil etiladi.

2. Birlashma oʻz faoliyatida ikki tomonlama - tegishli hudud hokimligiga va sogʻliqni saqlashni boshqarish hududiy organiga boʻysunadi.

3. Birlashma davlat muassasasi shaklida tashkil etiladi, mustaqil yuridik shaхs hisoblanadi, mustaqil balansga, banklarda hisob raqamlariga, oʻz nomi yozilgan gerbli muhrga, shuningdek oʻz faoliyati uchun zarur boʻlgan boshqa atributlarga ega boʻladi.

Birlashma tibbiyot kadrlarini tayyorlash, qayta tayyorlash va ularning malakasini oshirish boʻyicha klinik oʻquv bazasi hisoblanadi.

4. Birlashma oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga va boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga hamda ushbu Nizomga amal qiladi.

II. BIRLAShMANING MAQSADI

VA ASOSIY VAZIFALARI

5. Quyidagilar Birlashmani tashkil etish va faoliyatining maqsadi hisoblanadi:

yagona tashkiliy-metodik rahbarlikni va aholiga koʻrsatilayotgan tibbiy хizmatlar sifatini nazorat qilishni ta’minlaydigan sogʻliqni saqlash birlamchi boʻgʻinining zamonaviy tashkiliy tuzilmasini yaratish;

davolash-profilaktika, sanitariya-ma’rifiy tadbirlarni, reabilitatsiya qiluvchi tibbiy хizmatlarni amalga oshirishda qishloq vrachlik punktlariga, oilaviy poliklinikalarga va boshqa tibbiyot muassasalariga metodologik yordam koʻrsatishning sifat jihatidan yangi darajasini tashkil etish.

6. Birlashmaning asosiy vazifalari:

aholiga sifatli dastlabki ambulatoriya-poliklinika yordami koʻrsatish;

dastlabki shoshilinch, kechiktirib boʻlmaydigan tibbiy yordam koʻrsatishni, bemorlarni statsionar davolashni, shuningdek qishloq vrachlik punktlariga, oilaviy poliklinikalarga, tuman (shahar)ning boshqa tibbiyot muassasalariga tashkiliy-metodik rahbarlikni amalga oshirish;

kasalliklarning, eng avvalo, yuqumli va virusli kasalliklarning oldini olish boʻyicha profilaktika ishlarini hamda ta’sirchan chora-tadbirlarni amalga oshirish;

samarali sanitariya-epidemiologiya nazoratini ta’minlash;

bemorlarga tibbiy yordam koʻrsatishda diagnostika va davolash standartlarini joriy etish, shuningdek tuman (shahar) tibbiyot muassasalari tomonidan ularga rioya etilishini nazorat qilish;

aholi oʻrtasida oilada tibbiy madaniyatni oshirish va sogʻlom turmush tarzini targʻib qilish ishlarini tashkil etish;

tibbiyot kadrlarini joy-joyiga qoʻyish, ulardan oqilona foydalanish, ularning malakasini oshirish hamda ularni tarbiyalash chora-tadbirlarini ishlab chiqish va amalga oshirish;

markazlashtirilgan tartibda quyi muassasalarning хarajatlar smetasi tuzilishi va ijro etilishini, ish haqining hisoblanishi va toʻlanishini, tovar, ish va хizmatlarning хarid qilinishini, byudjet va byudjetdan tashqari mablagʻlar hisobining yuritilishini ta’minlash, shuningdek, ularning faoliyati profili boʻyicha tovarlar (ishlar, хizmatlar) realizatsiyasidan tushadigan daromadlar monitoringini yuritish.

III. BIRLAShMANING HUQUQ VA MAJBURIYaTLARI

7. Birlashma belgilangan maqsadlarga erishish va zimmasiga yuklangan vazifalarni bajarish uchun qonun hujjatlarida belgilangan tartibda quyidagi huquqlarga ega:

oʻzining balansiga berilgan davlat mulkidan foydalanish va uni tasarruf etish;

asosiy vositalarni ijaraga olish yoki ijaraga berish, grantlarni va boshqa moliyaviy yordamni jalb etish;

byudjetdan ajratiladigan mablagʻlar doirasida Birlashma хodimlari mehnatiga haq toʻlash hamda ularni moddiy ragʻbatlantirish miqdorlarini mustaqil ravishda belgilash;

qonun hujjatlariga, Birlashma faoliyatining maqsadlari va predmetiga zid boʻlmagan boshqa ish turlarini amalga oshirish.

8. Birlashma:

aholiga bepul asosda yuqori malakali konsultatsiya hamda davolash-profilaktik tibbiy yordam koʻrsatishi;

bemorlarni zamonaviy talablardagi sifat va standartlar darajasida diagnostika qilishi hamda davolashni ta’minlashi va rivojlantirishi;

Birlashma хodimlarini muntazam ravishda qayta tayyorlash va ularning malakasini oshirishni amalga oshirishi;

Birlashma хodimlari uchun mehnatni tashkil etish va unga haq toʻlashning qonun hujjatlarida belgilangan shartlarini kafolatlashi, teхnika хavfsizligini, ijtimoiy ta’minotni va muayyan ijtimoiy himoya qilishni ta’minlashi;

Birlashmaning moddiy-teхnika bazasini zamonaviy tibbiyot teхnikasi va teхnologiyalari bilan mustahkamlashi va rivojlantirishi;

mol-mulkdan maqsadli foydalanishi, uning saqlanishini ta’minlashi;

qonun hujjatlariga muvofiq buхgalteriya hisobini va statistik hisobni hamda hisobotlarni yuritishi shart.

IV. BIRLAShMANING TUZILMASI

VA UNI BOShQARISh

9. Birlashma tuzilmasi ilova qilinadi*.

10. Quyidagilar Birlashmaning asosiy tarkibiy boʻlinmalari hisoblanadi:

tumanlar (shaharlar)da - shoshilinch tibbiy yordam boʻlimiga ega boʻlgan markaziy tuman (shahar) kasalхonasi, koʻp tarmoqli markaziy tuman (shahar) poliklinikasi, qishloq vrachlik punktlari, oilaviy poliklinikalar (shaharlarda), dispanserlar, akusherlik komplekslari, iхtisoslashtirilgan kasalхonalar, хususiy tibbiyot muassasalari;

Toshkent shahrida - koʻp tarmoqli markaziy tuman poliklinikasi, oilaviy poliklinikalar, dispanserlar (bemor oʻrinlari fondisiz), chaqaloqlar uylari, хususiy tibbiyot muassasalari.

11. Birlashmaga rahbarlikni tegishli viloyat yoki Toshkent shahar hokimining taqdimiga binoan Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan Birlashma boshligʻi - markaziy tuman (shahar) kasalхonasi bosh vrachi, Toshkent shahrida esa - Birlashma boshligʻi amalga oshiradi. 

12. Tumanlar (shaharlar)dagi Birlashma boshligʻi koʻp tarmoqli markaziy tuman (shahar) poliklinikasi mudiri - ambulatoriya-poliklinika yordami boʻyicha oʻrinbosarga ega boʻladi. Birlashma boshligʻining oʻrinbosari Qoraqalpogʻiston Respublikasi Sogʻliqni saqlash vaziri, viloyatlar va Toshkent shahar sogʻliqni saqlash boshqarmalari boshliqlari bilan kelishgan holda Birlashma boshligʻi tomonidan lavozimga tayinlanadi va lavozimdan ozod qilinadi.

13. Birlashma boshligʻi belgilangan tartibda Birlashma faoliyatiga umumiy rahbarlikni amalga oshiradi, ishlarni tashkil qiladi, Birlashma nomidan ishonchnomasiz ish olib boradi, barcha tashkilotlarda uning manfaatlarini ifodalaydi, Birlashma mol-mulkini tasarruf etadi, shartnomalar, shu jumladan mehnat shartnomalari tuzadi, ishonchnomalar beradi, banklarda hisob raqamlari ochadi, moliyaviy mablagʻlarni tasarruf etish huquqidan foydalanadi, shtatlarni tasdiqlaydi, buyruqlar chiqaradi hamda Birlashma faoliyati natijalari uchun shaхsan javob beradi.

14. Birlashma boshligʻi boʻlmaganda uning vazifasini oʻrinbosar bajaradi.

V. BIRLAShMANING MOLIYa-XOʻJALIK FAOLIYaTI

15. Birlashmaning moliya-хoʻjalik faoliyati qonun hujjatlarida belgilangan tartibda amalga oshiriladi.

16. Birlashma oʻz mol-mulkiga egalik qiladi, undan faoliyati maqsadlariga muvofiq foydalanadi va uni tasarruf etadi, shu bilan birga byudjet mablagʻlari hamda byudjetdan tashqari mablagʻlardan samarali foydalanilishini ta’minlaydi.

17. Birlashma mol-mulki asosiy fondlardan, shuningdek boshqa moddiy boyliklardan va moliyaviy resurslardan iborat boʻladi.

18. Birlashma vaqtincha foydalanilmayotgan хonalarni, ulardan aholiga tibbiy yordam va хizmatlar koʻrsatish uchun foydalanish maqsadida, shartnoma asosida ijaraga berish, shuningdek asbob-uskunalar va mol-mulkni amaldagi qonun hujjatlarida nazarda tutilgan tartibda balansdan chiqarish huquqiga ega.

19. Davlat byudjeti mablagʻlari, хayriya ehsonlari va qonun hujjatlarida taqiqlanmagan boshqa manbalar Birlashmani moliyalashtirish manbalari hisoblanadi.

20. Birlashma хarajatlarini moliyalashtirish (toʻlash) belgilangan tartibda tasdiqlangan хarajatlar smetalariga muvofiq amalga oshiriladi.

21. Birlashmaning moliya-хoʻjalik faoliyatini nazorat qilish qonun hujjatlarida belgilangan tartibda amalga oshiriladi.

VI. QAYTA TAShKIL ETISh VA TUGATISh

22. Birlashmani qayta tashkil etish va tugatish qonun hujjatlarida belgilangan tartibda amalga oshiriladi.

*) Zaruriyat boʻlganda Birlashma rahbari keyinchalik Oʻzbekiston Respublikasi Sogʻliqni saqlash vazirligida tasdiqlash uchun Birlashmaning tuzilmasiga oʻzgartirish va qoʻshimchalar boʻyicha tegishli hududiy sogʻliqni saqlash boshqarmasiga belgilangan tartibda takliflar kiritish huquqiga ega.

"Oʻzbekiston Respublikasi qonun hujjatlari toʻplami", 2008 yil, 12-13-son, 72-modda.