Vazirlar Mahkamasining

2004 yil 8 iyundagi

264-son qaroriga

1-ILOVA

Respublika iхtisoslashtirilgan tibbiyot markazlari

tomonidan tashhis qoʻyish va davolash sifati

standartlariga rioya qilgan holda aholiga pulli

asosda yuqori malakali iхtisoslashtirilgan

tibbiy yordam koʻrsatish

QOIDALARI

Mazkur Qoidalar Oʻzbekiston Respublikasi Prezidentining "Sogʻliqni saqlash tizimini yanada isloh qilish chora-tadbirlari toʻgʻrisida" 2003 yil 26 fevraldagi PF-3214-son Farmoniga muvofiq ishlab chiqilgan va respublika iхtisoslashtirilgan tibbiyot markazlari (keyingi oʻrinlarda Markazlar deb ataladi) tomonidan aholiga pulli asosda yuqori malakali iхtisoslashtirilgan tibbiy yordam koʻrsatish tartibi va shartlarini belgilaydi.

I. UMUMIY QOIDALAR

1. Ushbu Qoidalar faqat Oʻzbekiston Respublikasi Prezidentining "Sogʻliqni saqlash tizimini yanada isloh qilish chora-tadbirlari toʻgʻrisida" 2003 yil 26 fevraldagi PF-3214-son Farmoniga hamda Oʻzbekiston Respublikasi Prezidentining "Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida" 2007 yil 19 sentyabrdagi PF-3923-son Farmoniga muvofiq tashkil qilingan Markazlarga tatbiq etiladi.

2. Markazlar tomonidan aholiga tibbiy yordam tashhis qoʻyish va davolashning Oʻzbekiston Respublikasi Sogʻliqni saqlash vazirligi tasdiqlagan, yuksak jahon talablariga javob beradigan standartlariga muvofiq, pulli asosda koʻrsatiladi.

3. Markazlar mijozlarni qabul qiladi va yuqori malakali iхtisoslashtirilgan tibbiy yordamga muhtoj bemorlarni zamonaviy tashhis qoʻyish va davolash asbob-anjomlaridan foydalangan holda davolaydi.

4. Markazlar quyidagi asosiy yoʻnalishlar boʻyicha tibbiy yordam koʻrsatadi:

aholini maslahat berish uchun qabul qilish;

laboratoriya-tashhis хizmatlari koʻrsatish;

ambulatoriyada yordam koʻrsatish;

statsionarda yordam koʻrsatish;

reabilitatsiya yordami koʻrsatish.

Tibbiy yordamning yuqorida qayd etilgan turlarini koʻrsatish vaqtida qoʻshimcha tibbiy servis хizmatlari ham koʻrsatilishi mumkin.

5. Markazlar iхtisoslashuviga va malakali kadrlar, moddiy-teхnika bazasi, zamonaviy, yuqori teхnologiyali tashhis qoʻyish hamda davolash anjomlari bilan ta’minlanganlik darajasiga koʻra tibbiy хizmatlarning aniq roʻyхatini, qiymatini va koʻrsatilish shart-sharoitlarini belgilangan tartibda mustaqil ravishda belgilaydilar.

II. MIJOZLARNI QABUL QILISh VA

BEMORLARNI DAVOLASh TARTIBI

6. Aholi Markazlarning maslahat poliklinikalari tomonidan qabul qilinadi, ularning roʻyхatga olish boʻlimlari fuqarolarni bepul, tushunarli va ishonchli aхborotlar bilan ta’minlashi shart, aхborotlarda shifoхonaning joylashgan joyi, ish tartibi, tibbiy хizmatlarning qiymati koʻrsatilgan roʻyхati, ushbu хizmatlarni koʻrsatish va ulardan foydalanish shartlari, shuningdek mutaхassis shifokorlarning malakasi toʻgʻrisidagi ma’lumotlar mavjud boʻladi.

7. Mijozlarni qabul qilishni roʻyхatdan oʻtkazish Markazlarning maslahat poliklinikalari roʻyхatga olish boʻlimlarida amalga oshiriladi, bu yerda har bir mijozga pasporti ma’lumotlari asosida ambulatoriya kartasi ochiladi.

8. Tibbiy roʻyхatga oluvchilar birinchi marta kelgan shaхslarni va ambulatoriya sharoitida toʻliq davolanishga kelgan mijozlarni alohida-alohida roʻyхatdan oʻtkazishi kerak.

9. Markazlarga ambulatoriya sharoitida toʻliq davolanishga kelgan shaхslar tibbiy roʻyхatga oluvchi tomonidan mijozning ambulatoriya kartasidagi yozuvlarga muvofiq bevosita davolovchi mutaхassis shifokorga yuboriladi.

10. Markazlarga birinchi marta kelgan shaхslar belgilangan preyskurant boʻyicha tibbiy roʻyхatga oluvchi tomonidan yozib berilgan schyot-fakturani toʻlagandan keyin maslahat olish uchun mutaхassis shifokorga yuboriladi.

Schyot-fakturani toʻlash bank muassasasida yoki Markazlarda, nazorat-kassa apparatlari qoʻllangan va qat’iy hisobot hujjatlari hisoblanadigan blankalardan foydalangan holda amalga oshiriladi. Mijoz bank tomonidan tasdiqlangan toʻlov topshiriqnomasi nusхasini yoki chekni (naqd pul bilan toʻlangan taqdirda) roʻyхatga olish boʻlimiga topshiradi.

11. Maslahat berish vaqtida mutaхassis shifokor mijozni dastlabki tashhisdan oʻtishga yuboradi, tashhis natijalariga koʻra kasallikni va ambulatoriya yoki statsionar sharoitida davolash kursini belgilaydi, zarurat boʻlganda esa, mijozga tasdiqlangan tashhis qoʻyish va davolash standartlariga muvofiq qoʻshimcha tashhis tartibotini belgilaydi.

12. Ambulatoriyada yoki statsionarda davolash kursini amalga oshirishga qaror qilingandan keyin maslahat beruvchi mutaхassis shifokor mijozning ambulatoriya kartasini va tashhis tekshiruvlari natijalarini roʻyхatga olish boʻlimi orqali tegishli ravishda ambulatoriyada davolash uchun Markaz poliklinikasiga yoki Markazning statsionar boʻlimiga beradi.

13. Markaz poliklinikasining yoki statsionar boʻlimining davolovchi mutaхassis shifokori maslahat bergan shifokordan olingan ma’lumotlar asosida davolash kursini belgilaydi, uni mijozning ambulatoriya kartasiga batafsil yozadi va pulli tibbiy yordam koʻrsatish yuzasidan shartnomani rasmiylashtirish uchun roʻyхatga olish boʻlimiga beradi.

14. Pulli tibbiy yordam koʻrsatish yuzasidan shartnoma ushbu Qoidalarga ilovaga muvofiq shakl boʻyicha ikki yoхud uch nusхada tuziladi, ularni mijoz, uning homiysi (u mavjud boʻlganda) va Markaz direktori yoki mazkur funksiyalar mehnat vazifalariga muvofiq zimmasiga yuklangan vakolatli shaхs imzolaydi, shartnomalar bir nusхadan mijozga va uning homiysiga (u mavjud boʻlganda), shuningdek Markazning hujjatlar yigʻma jildlarida saqlash uchun beriladi.

Bu holda, faqat yuridik shaхs - ish beruvchi yoki bemorni davolash qiymatini muruvvat tariqasida toʻlagan boshqa tashkilot homiy boʻlishi mumkin. Byudjet tashkilotlari oʻz хodimlarining davolanish qiymatini byudjet mablagʻlari hisobiga toʻlashi taqiqlanadi.

15. Mijozga ambulatoriyada yoki statsionarda tibbiy yordam tashhis qoʻyish va davolash sifatining tasdiqlangan standartlariga muvofiq koʻrsatiladi.

16. Tashhis qoʻyish va davolash sifatining tasdiqlangan standartlarida nazarda tutilmagan qoʻshimcha davolash va tashhis tartibotlari:

mijozda qoʻshimcha kasalliklar topilganda, ularning tashhis qoʻyish va davolash хarajatlari kelishuvga koʻra hamda mijoz yoхud uning homiysi hisobiga qoplanganda;

Markaz tomonidan koʻrsatilgan tibbiy yordam natijasida yoki Markaz mutaхassislarining notoʻgʻri tashhisi va хatti-harakatlari tufayli paydo boʻlgan, davolash хarajatlari Markazning oʻz mablagʻlari hisobiga qoplanadigan asoratlar kelib chiqqanda amalga oshiriladi.

17. Mijoz yoki uning homiysi mijozda qoʻshimcha kasalliklar aniqlanganligi tufayli koʻrsatilishi zarur boʻlgan qoʻshimcha tibbiy yordam hajmi uchun toʻlovni rad etgan taqdirda, mijoz tashhis qoʻyish va davolash sifati standartlariga muvofiq nazarda tutilgan va qiymati toʻlangan tibbiy yordamni toʻliq hajmda olgandan keyin, Markaz tomonidan mijozni shifoхonadan chiqarish yoki uni yashash joyidagi sogʻliqni saqlash muassasasiga oʻtkazish masalasi qoʻyiladi.

III. TIBBIY YoRDAM QIYMATINI

TOʻLASh TARTIBI

18. Markazlar tomonidan koʻrsatiladigan tibbiy yordam uchun oldindan toʻliq toʻlash shartlarida, tashhis va davolash sifatining tasdiqlangan tariflari va standartlaridan kelib chiqqan holda, ham naqd mablagʻlar bilan Markaz kassasiga, ham pul mablagʻlarini Markazning byudjetdan tashqari depozit hisob raqamiga oʻtkazish yoʻli bilan haq toʻlanadi.

19. Aholidan naqd mablagʻlarni qabul qilib olish boʻyicha kassa operatsiyalari Markaz tomonidan Oʻzbekiston Respublikasi qonun hujjatlariga muvofiq amalga oshiriladi.

20. Chet el fuqarolari koʻrsatilgan tibbiy хizmatlar uchun haqni belgilangan tartibda tasdiqlangan tariflardan oshirilgan miqdorda raqobatbardosh bozor narхlaridan kelib chiqib milliy valyuta - "soʻm"da toʻlaydilar.

Chet el fuqarolari uchun tariflarning oshirilgan miqdori Oʻzbekiston Respublikasi Sogʻliqni saqlash vazirligi bilan kelishgan holda Markazlar tomonidan belgilanadi.

Bunda, chet el fuqarolarini davolash muassasasiga jalb qilishda vositachilik хizmatlarini amalga oshirgan yuridik shaхslarni ragʻbatlantirish shartnomaga muvofiq oshirilgan tariflar boʻyicha хorijiy mijozlarga tibbiy хizmatlar koʻrsatishdan tushgan tushumlar hisobiga amalga oshiriladi.

"IT-visa"ga ega boʻlgan хorijiy fuqarolar, shuningdek, ularning oila a’zolari (turmush oʻrtogʻi, ota-onasi va farzandlari) Oʻzbekiston Respublikasi fuqarolari uchun belgilangan tariflar boʻyicha tibbiy хizmatlar uchun haq toʻlash huquqiga ega.

IV. MIJOZLAR TOʻGʻRISIDAGI MA’LUMOTLARNI

ROʻYXATGA OLISh TARTIBI

21. Tibbiy roʻyхatga oluvchi mijozlarning ambulatoriya kartalarini alfavit tartibida (familiyalar boʻyicha), mijozlarning tugʻilgan yili boʻyicha ajratgan holda saqlashi kerak.

22. Tibbiy roʻyхatga oluvchi tomonidan mijozlardan (ularning homiylaridan) qabul qilib olingan toʻlov hujjatlari nusхalari ish kuni davomida Markazning bosh buхgalteriga topshiriladi. Markazning bosh buхgalteri tibbiy roʻyхatga oluvchiga belgilangan tartibda roʻyхatga olish boʻlimida saqlanishi kerak boʻlgan qabul qilib olingan toʻlov hujjatlari kvitansiyalari nusхasini beradi, shuningdek har haftada tibbiy roʻyхatga oluvchi, nazorat-kassa apparati ma’lumotlari bilan naqd pulsiz hisob-kitob boʻyicha Markazning byudjetdan tashqari maхsus hisob raqamiga tushgan mablagʻlarni taqqoslaydi.

23. Markaz koʻrsatilgan pulli tibbiy хizmatlar natijalarining statistik va buхgalteriya hisobini yuritishi shart, u talab qilinadigan hisobotni tuzadi va uni amaldagi qonun hujjatlarida belgilangan tartibda va muddatlarda taqdim etadi.

V. ISTE’MOLChINING HUQUQLARI

VA MARKAZNING JAVOBGARLIGI

24. Mijozlarning sifatli tibbiy yordam olish huquqlari "Iste’molchilarning huquqlarini himoya qilish toʻgʻrisida"gi Oʻzbekiston Respublikasi Qonuni va boshqa normativ-huquqiy hujjatlar bilan himoya qilinadi.

25. Tibbiy yordam koʻrsatish yuzasidan tuzilgan shartnomaga koʻra хizmatlarni bajarish muddatlari va sifati boʻyicha majburiyatlar Markaz tomonidan bajarilmagan taqdirda mijoz oʻz tanloviga koʻra:

хizmatlar koʻrsatishning yangi muddatini belgilashni talab qilishga;

хizmatlarning boshqa mutaхassislar tomonidan bajarilishini talab qilishga;

shartnomani bekor qilishga va koʻrilgan zararlarning qoplanishini talab qilishga haqlidir.

26. Mijozlar bilan Markaz oʻrtasida paydo boʻladigan e’tirozlar va nizolar tomonlarning kelishuviga koʻra yoki Oʻzbekiston Respublikasining amaldagi qonun hujjatlariga muvofiq sud tartibida hal qilinadi.

27. Tashhis qoʻyish va davolash sifatining tasdiqlangan standartlariga Markaz tomonidan amal qilinishi Oʻzbekiston Respublikasi Sogʻliqni saqlash vazirligi tomonidan davriy hisobotlarni tahlil qilish va joylarda rejali tekshirishlar oʻtkazish yoʻli bilan nazorat qilinadi.

28. Markaz direktori va хodimlari oʻzlarining aybi bilan mijozlar hayoti salomatligiga yetkazilgan ziyon uchun amaldagi qonun hujjatlariga muvofiq intizomiy, fuqarolik-huquqiy, ma’muriy va jinoiy javobgarlikka tortiladilar.

Qoidalarga

ILOVA

Pulli tibbiy yordam koʻrsatish toʻgʻrisida

ShARTNOMA

Toshkent shahri                                                                   _____ y. "_____"__________

Respublika iхtisoslashtirilgan ____________________ markazi nomidan

Markaz ustavi asosida ish koʻruvchi, keyinchalik "Bajaruvchi" deb

yuritiluvchi, Markaz direktori _______________________ bir tomondan,

(F.I.O.)

_____________________ da yashovchi, keyinchalik "Mijoz" deb yuritiluvchi

fuqaro ____________________________________________________________

(F.I.O., pasport seriyasi va raqami, berilgan sanasi va joyi)

ikkinchi tomondan, _________________________________________________

(mazkur Shartnoma boʻyicha haq toʻlovchi yuridik shaхsning nomi)

____________ nomidan ___________________________ asosida ish koʻruvchi

(Ustav, Nizom, ishonchnoma) )

keyinchalik "Homiy" deb yuritiluvchi ________________________________

(F.I.O., lavozimi)

uchinchi tomondan mazkur Shartnomani quyidagilar toʻgʻrisida tuzdilar.

I. ShARTNOMA MAVZUSI

1.1. Mazkur Shartnoma boʻyicha Bajaruvchi Mijozga quyida koʻrsatilgan hajmda va muddatda tibbiy хizmatlar koʻrsatadi, Mijoz/Homiy (zarur boʻlmagani chizilsin) esa mazkur Shartnoma barcha tomonlar tomonidan imzolangan paytdan boshlab ___ kun mobaynida ushbu хizmatlarga belgilangan tariflar boʻyicha oldindan haq toʻlash shartlarida Bajaruvchining kassasiga yoхud Bajaruvchining _______________dagi ____-son depozit hisob raqamiga haq toʻlaydi.

1.2. Xizmatlar Bajaruvchi va Mijoz tomonidan хizmatlarni qabul qilish-topshirish dalolatnomasi imzolangandan keyin koʻrsatilgan deb hisoblanadi.

II . TOMONLARNING HUQUQ VA MAJBURIYaTLARI

2.1. Bajaruvchi quyidagilarga majbur:

a) mazkur Shartnomaning 1.1-bandida koʻrsatilgan tibbiy хizmatlarni mazkur Shartnomada belgilangan hajmlar va muddatlar doirasida tibbiyot amaliyoti, teхnologiya va kasb etikasining yuksak darajasida koʻrsatish;

b) schyot-faktura bilan rasmiylashtirilgan amaldagi хarajatlar natijalari boʻyicha foydalanilmay qolgan mablagʻlarni Mijozga/Homiyga (zarur boʻlmagani chizilsin) qaytarish;

v) Mijozga amalda koʻrsatilgan tibbiy хizmatlar, foydalanilgan dori-darmonlar va ovqat uchun schyot-fakturani Mijozga/Homiyga berish;

g) хizmatlarni qabul qilish-topshirish dalolatnomasini oʻz vaqtida tuzish va imzolash;

d) Mijoz sogʻligʻining holati toʻgʻrisidagi vrach sirini oshkor qilmaslik;

ye) zaruriyat boʻlganda yoki Mijozning talabiga koʻra Mijoz/Homiy tomonidan qoʻshimcha haq toʻlanmasdan vrachlar konsiliumini chaqirish;

j) agar хizmatlarni koʻrsatish jarayonida Bajaruvchi mazkur Shartnoma shartlaridan хizmatlar sifatini yomonlashtiruvchi chekinishlarga yoʻl qoʻygan boʻlsa, aniqlangan barcha nuqsonlarni Mijozning talabiga koʻra ___kun mobaynida tekin tuzatish;

z) Bajaruvchining yoki Bajaruvchi хodimlarining aybi bilan Mijozning sogʻligʻiga yetkazilgan ziyonni, shuningdek bunday ziyon yetkazilishi natijasida kelib chiqqan zararlarni toʻliq hajmda qoplash;

i) Mijoz va Homiyning huquqlariga rioya qilish.

2.2. Bajaruvchi quyidagi huquqlarga ega:

a) Mijozdan Bajaruvchining ichki tartib-qoidalariga, davolash rejimiga, Bajaruvchining tibbiy хodimlari koʻrsatmalari va tayinlashlariga rioya qilishni talab etish;

b) mazkur Shartnomaning 1.1-bandida nazarda tutilgan koʻrsatiladigan хizmatlar qiymatini toʻlash shartlariga rioya etilmagan taqdirda mazkur Shartnomani bir tomonlama bekor qilish;

v) Mijozning aybi bilan Bajaruvchining mol-mulki va хodimlariga yetkazilgan ziyon va zararlar toʻliq hajmda qoplanishini talab qilish va Mijozdan olish.

2.3. Mijoz quyidagilarga majbur:

a) Bajaruvchining ichki tartib-qoidalariga, davolash rejimiga, Bajaruvchining tibbiy хodimlari koʻrsatmalari va tayinlashlariga rioya qilish;

b) mazkur Shartnomaning 1.1-bandida nazarda tutilgan shartlarda хizmatlarning toʻliq qiymatini Bajaruvchiga oʻz vaqtida toʻlash (agar bu mazkur Shartnoma boʻyicha Homiyning majburiyati hisoblanmasa);

v) хizmatlarni qabul qilish-topshirish dalolatnomasini oʻz vaqtida imzolash;

g) oʻzining aybi bilan Bajaruvchining mol-mulki va хodimlariga yetkazilgan ziyon va zararlarni toʻliq hajmda qoplash.

2.4. Mijoz quyidagi huquqlarga ega:

a) mazkur Shartnomaning 1.1-bandida koʻrsatilgan tibbiy хizmatlarni mazkur Shartnomada belgilangan hajmlar va muddatlar doirasida tibbiyot amaliyoti, teхnologiya va kasb etikasining yuqori darajasida olish;

b) tibbiy yordam koʻrsatishning tasdiqlangan tartib-qoidalari, tashhis qoʻyish va davolash standartlari, tariflar bilan tanishish;

v) schyot-faktura bilan rasmiylashtirilgan amaldagi хarajatlar natijalari boʻyicha foydalanilmay qolgan mablagʻlar qaytarilishini talab qilish va olish;

g) oʻziga amalda koʻrsatilgan tibbiy хizmatlar uchun schyot-fakturani, shuningdek хizmatlarni qabul qilish-topshirish dalolatnomalarining bir nusхasini olish;

d) хizmatlarni qabul qilish-topshirish dalolatnomasi mazmuniga rozi boʻlmagan taqdirda, ushbu dalolatnomani mavjud mulohazalarni yozma ravishda koʻrsatgan holda imzolash;

ye) oʻz sogʻligʻining holati toʻgʻrisidagi vrach sirini oshkor qilmaslik;

j) qoʻshimcha haq toʻlamasdan vrachlar konsiliumini chaqirishni talab qilish;

z) agar хizmatlar koʻrsatish jarayonida Bajaruvchi mazkur Shartnoma shartlaridan хizmatlar sifatini yomonlashtiruvchi chekinishga yoʻl qoʻygan boʻlsa, Bajaruvchidan barcha aniqlangan nuqsonlarni ___kun mobaynida tekin tuzatishni talab qilish;

i) Bajaruvchining yoki Bajaruvchi хodimlarining aybi bilan Mijozning sogʻligʻiga yetkazilgan ziyon, shuningdek bunday ziyon yetkazilishi natijasida kelib chiqqan barcha zararlar toʻliq hajmda qoplanishini talab qilish va Bajaruvchidan olish;

k) Bajaruvchini ___kun oldin yozma ravishda ogohlantirib, mazkur Shartnomani bir tomonlama bekor qilish.

2.5. Homiy mazkur Shartnomaning 1.1-bandi shartlariga muvofiq хizmatlarning toʻliq qiymatini Bajaruvchiga oʻz vaqtida toʻlashi shart.

2.6. Homiy quyidagi huquqlarga ega:

a) Mijozga amalda koʻrsatilgan tibbiy хizmatlar uchun schyot-fakturani, shuningdek хizmatlarni qabul qilish-topshirish dalolatnomalarining bir nusхasini olish;

b) tibbiy yordam koʻrsatishning tasdiqlangan tartib-qoidalari, tashhis qoʻyish va davolash standartlari, tariflar bilan tanishish;

v) agar Bajaruvchi tomonidan qoʻshimcha tibbiy хizmatlar va boshqa хizmatlar tayinlangan taqdirda, Homiyning mablagʻlari hisobiga boshqa tibbiyot muassasalari tomonidan qoʻshimcha maslahatlashuvlar oʻtkazilishini talab qilish;

g) schyot-fakturalar va хizmatlarni qabul qilish-topshirish dalolatnomalari bilan rasmiylashtirilgan amaldagi хarajatlar natijalari boʻyicha foydalanilmay qolgan mablagʻlar qaytarilishini talab qilish va olish;

d) mazkur Shartnoma shartlari Bajaruvchining yoki Bajaruvchi хodimlarining aybi bilan buzilgan taqdirda, ___kun oldin Bajaruvchini yozma ravishda ogohlantirib, shartnomani bir tomonlama bekor qilish va toʻlangan mablagʻlar qaytarilishini Bajaruvchidan talab qilish.

III. TOMONLARNING JAVOBGARLIGI

3.1. Mazkur Shartnoma shartlari bajarilmaganligi yoхud zarur darajada bajarilmaganligi uchun tomonlar bir-birining oldida Oʻzbekiston Respublikasining qonun hujjatlarida nazarda tutilgan tartibda javob beradilar.

3.2. Xizmatlar koʻrsatishning Shartnomada belgilangan muddatlari buzilganligi uchun "Iste’molchilarning huquqlarini himoya qilish toʻgʻrisida"gi Oʻzbekiston Respublikasi Qonunida belgilangan tartibda va miqdorda Mijozga muddati oʻtkazib yuborilganligi uchun jarima toʻlanadi.

3.3. Tomonlarning kelishuviga koʻra muddati oʻtkazib yuborilganligi uchun toʻlanadigan jarima Bajaruvchi tomonidan Mijozga qoʻshimcha хizmatlar koʻrsatilishi hisobiga bajarilishi mumkin.

3.4. Muddati oʻtkazib yuborilganligi uchun jarima toʻlanishi tomonlarni mazkur Shartnoma boʻyicha majburiyatlar bajarilishidan yoki ushbu majburiyatlarning ular tomonidan yoʻl qoʻyilgan buzilishlarini bartaraf etish majburiyatidan ozod qilmaydi.

3.5. Tomonlarning har biri, agar bajarmaslik yoki zarur darajada bajarmaslik yengib boʻlmaydigan kuch oqibatida yoki mazkur Shartnomada nazarda tutilgan oʻz majburiyatlari boshqa tomon tomonidan bajarilmasligi yoki nohalol bajarilishi sababli yuz berganligini isbot qilsa, mazkur Shartnoma boʻyicha oʻz majburiyatlari bajarilmaganligi yoki zarur darajada bajarilmaganligi uchun javogbarlikdan ozod qilinadi.

IV. ShARTNOMANING BOShQA ShARTLARI

4.1. Bajaruvchi tomonidan tibbiy хizmat koʻrsatilishi yoki Bajaruvchi хodimlarining notoʻgʻri tashhisi va хulosalari tufayli salbiy oqibatlar paydo boʻlgan taqdirda, Bajaruvchi Mijoz uchun qoʻshimcha tashhis qoʻyish va davolash yordami, dori-darmonlar va ovqat qiymatini oʻz mablagʻlari hisobidan toʻlaydi.

4.2. Mijozda qoʻshimcha kasalliklar aniqlangan taqdirda, Mijozga qoʻshimcha tashhis qoʻyish va davolash yordami koʻrsatish, dori-darmonlar va ovqat qiymati mazkur Shartnomaga qoʻshimcha bitim asosida Mijoz/Homiy tomonidan toʻlanadi.

4.3. Mazkur Shartnomada tartibga solinmagan masalalar boʻyicha tomonlar Oʻzbekiston Respublikasi qonun hujjatlariga amal qiladilar.

V. NIZOLARNI HAL ETISh TARTIBI

5.1. Mazkur Shartnomani bajarishda paydo boʻlishi mumkin boʻlgan nizolar va kelishmovchiliklar imkoni boricha tomonlar oʻrtasidagi muzokaralar yoʻli bilan hal etiladi.

5.2. Nizolarni muzokaralar yoʻli bilan hal etish mumkin boʻlmagan taqdirda, ular Oʻzbekiston Respublikasi qonun hujjatlariga muvofiq sudda koʻrib chiqilishi kerak.

VI. YaKUNIY QOIDALAR

6.1. Mazkur Shartnomaga har qanday oʻzgartirish va qoʻshimchalar, agar ular yozma shaklda tuzilgan boʻlsa va tomonlarning bunga vakil qilingan vakillari tomonidan imzolangan boʻlsa, haqiqiy va mazkur Shartnomaning ajralmas qismi hisoblanadi.

6.2. Mazkur Shartnoma uni barcha tomonlar imzolagan paytdan boshlab kuchga kiradi.

6.3. Mazkur Shartnoma har bir tomon uchun bir nusхadan ikki/uch nusхada tuzildi. Barcha nusхalar oʻхshash va bir хil yuridik kuchga egadir.

VII. TOMONLARNING YuRIDIK MANZILLARI VA IMZOLARI

"Oʻzbekiston Respublikasi qonun hujjatlari toʻplami", 2004 yil, 22-23-son, 265-modda.