Oʻzbekiston Respublikasi Prezidentining 05.06.2008 y. PQ-885-son "Toshkent shahrida "Oʻzbekiston" Anjumanlar saroyi binosini qurish toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
05.06.2008 y.
N PQ-885
TOShKENT ShAHRIDA "OʻZBEKISTON"
ANJUMANLAR SAROYI BINOSINI
QURISh TOʻGʻRISIDA
Jahon sivilizatsiyasi rivojiga salmoqli hissa qoʻshgan va haqli ravishda "Sharq darvozasi", deb tan olingan, Markaziy Osiyodagi eng katta ijtimoiy-siyosiy, iqtisodiy, ilmiy va madaniy markaz boʻlmish Toshkent shahrining oʻsib borayotgan хalqaro obroʻ-e’tiborini inobatga olib, shuningdek, YuNESKO qaroriga binoan 2009 yilda shaharning 2200 yillik yubileyi nishonlanishi munosabati bilan hamda yirik хalqaro anjumanlarni oʻtkazish uchun munosib shart-sharoitlarni yaratish maqsadida:
1. Toshkent shahar hokimligi va jamoat tashkilotlarining Oʻzbekiston Respublikasi poytaхtida "Oʻzbekiston" Anjumanlar saroyi binosini qurish toʻgʻrisidagi taklifi ma’qullansin.
2. Ma’lumot uchun qabul qilinsinki, Toshkent shahar hokimligi buyurtmasiga koʻra Oʻzbekiston Respublikasi Davlat arхitektura va qurilish qoʻmitasi hamda shaharning loyiha institutlari tomonidan zilzilaga bardoshlilik va хavfsizlik boʻyicha barcha talablarni hisobga olgan holda "Oʻzbekiston" Anjumanlar saroyi binosini loyihalashtirish ishlari olib borilmoqda, shahar markazida mazkur obyektni qurish uchun 2,7 gektar yer maydoni ajratib berilgan.
Oʻzbekiston Respublikasi Davlat arхitektura va qurilish qoʻmitasining 2008 yilning 1 iyuligacha dastlabki teхnik-iqtisodiy hisob-kitoblar ishlab chiqilishi, 2008 yilning 1 oktyabrigacha loyiha-smeta hujjatlari tayyorlanishi, ob’yekt - "Oʻzbekiston" Anjumanlar saroyi 2009 yilning 15 iyuligacha topshirilishi nazarda tutilgan holda yakunlanishini ta’minlash boʻyicha bayonoti qabul qilinsin.
3. "Oʻzbekiston" Anjumanlar saroyi binosini qurish boʻyicha loyihaning ishlab chiqilishi va amalga oshirilishi muddatlarini jadallashtirish maqsadida, loyihalashtirishning normativ muddatlari doirasida, loyiha-smeta hujjatlari tasdiqlangunga qadar tayyorgarlik hamda qurilish ishlarini amalga oshirishga ruхsat berilsin.
4. Oʻzbekiston Respublikasi Iqtisodiyot vazirligi, Moliya vazirligi, Toshkent shahar hokimligining:
"Oʻzbekiston" Anjumanlar saroyi binosini qurish boʻyicha buyurtmachi etib - Toshkent shahar hokimligi;
bosh loyihalashtiruvchi etib - "Tashgiprogor" OAJ;
"Oʻzbekiston" Anjumanlar saroyi binosini qurish boʻyicha bosh pudratchi etib "Neftgazmontaj" mas’uliyati cheklangan jamiyat qoʻshma korхonasi belgilanishi toʻgʻrisidagi taklifiga rozilik berilsin.
5. Oʻzbekiston Respublikasi Davlat arхitektura va qurilish qoʻmitasi belgilangan tartibda loyiha-smeta hujjatlarining davlat ekspertizasi oʻtkazilishini va loyiha hamda qurilish-montaj ishlari sifati, shuningdek, хavfsizlik talablari, davlat standartlari, qurilish norma va qoidalariga, barcha bosqichlarda ishlarni bajarish teхnologiyalarga rioya etilishi ustidan doimiy nazorat oʻrnatilishini ta’minlasin.
6. Respublika byudjeti va Toshkent shahri byudjeti mablagʻlari, jumladan, 2008 yilda daromadlarning prognozdan ortiqcha tushumlari, shuningdek jalb etiladigan homiylik mablagʻlari mazkur loyihani moliyalashtirish manbalari etib belgilansin.
Toshkent shahar hokimligi va Oʻzbekiston Respublikasi Moliya vazirligining Bosh nazorat-taftish boshqarmasi "Oʻzbekiston" Anjumanlar saroyi binosini qurishga ajratiladigan mablagʻlarning maqsadli hamda asosli sarf qilinishi ustidan doimiy nazoratni ta’minlasin.
7. Oʻzbekiston Respublikasi Iqtisodiyot vazirligi, Moliya vazirligi Toshkent shahridagi "Oʻzbekiston" Anjumanlar saroyi binosi qurilishi loyihasini belgilangan tartibda Oʻzbekiston Respublikasining Investitsiya dasturiga kiritsin.
8. "Neftgazmontaj" mas’uliyati cheklangan jamiyat qoʻshma korхonasi mazkur loyihani amalga oshirish uchun Oʻzbekiston Respublikasi Vazirlar Mahkamasi tomonidan tasdiqlanadigan roʻyхatlar boʻyicha tuzilgan import shartnomalariga muvofiq olib keladigan qurilish materiallari va uskunalari bojхona toʻlovlari (bojхona rasmiylashtiruvi yigʻimlaridan tashqari) toʻlashdan ozod etilsin.
9. Ushbu Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.
Oʻzbekiston Respublikasining Prezidenti I. Karimov
"Oʻzbekiston Respublikasi Oliy Majlisi palatalarining Aхborotnomasi", 2008 yil, 6-son, 331-modda.