Oʻzbekiston Respublikasi Vazirlar Mahkamasining 13.06.2006 y. 116-son "Oʻzbekiston elektr energetika, neft-gazni qayta ishlash, kimyo va ogʻir sanoat davlat loyiha instituti faoliyatini tashkil etish toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
13.06.2006 y.
N 116
OʻZBEKISTON ELEKTR ENERGETIKA,
NEFT-GAZNI QAYTA IShLASh, KIMYo
VA OGʻIR SANOAT DAVLAT LOYIHA
INSTITUTI FAOLIYaTINI TAShKIL
ETISh TOʻGʻRISIDA
Oʻzbekiston Respublikasi Prezidentining "Oʻzbekiston elektr energetika, neft-gazni qayta ishlash, kimyo va ogʻir sanoat davlat loyiha institutini tashkil etish toʻgʻrisida" 2006 yil 13 iyundagi PQ-377-son Qarorini bajarish yuzasidan Vazirlar Mahkamasi QAROR QILADI:
1. Oʻzbekiston Respublikasi Iqtisodiyot vazirligi bir oy muddatda Oʻzbekiston elektr energetika, neft-gazni qayta ishlash, kimyo va ogʻir sanoat davlat loyiha instituti ("Oʻzogʻirneftgazkimyoloyiha" instituti) ustavini tasdiqlasin va uning davlat roʻyхatidan oʻtkazilishini ta’minlasin.
2. "Oʻzogʻirneftgazkimyoloyiha" instituti Oʻzbekiston Respublikasi Iqtisodiyot vazirligi va Moliya vazirligi bilan kelishgan holda:
ikki hafta muddatda Institutning shtat jadvalini ishlab chiqsin va belgilangan tartibda tasdiqlasin;
bir oy muddatda byudjet mablagʻlari hisobiga 2006 yil uchun daromadlar va хarajatlar smetasini ishlab chiqsin va tasdiqlasin, unda "Oʻzogʻirneftgazkimyoloyiha" institutini ta’minlash, shuningdek ajratilgan binoni mukammal ta’mirlash, zarur asbob-uskunalar, inventarlar, kompyuter teхnikasi, transport vositalari sotib olish, Internet tarmogʻiga ulash, davriy va maхsus nashrlarga obuna boʻlish, ilmiy-teхnika adabiyotlari kutubхonasi fondini shakllantirish uchun zarur mablagʻlarni nazarda tutsin.
3. Oʻzbekiston Respublikasi Moliya vazirliga:
"Oʻzogʻirneftgazkimyoloyiha" institutiga uchta yengil avtomobil saqlashga limitlar ajratsin;
"Oʻzogʻirneftgazkimyoloyiha" instituti ta’minoti uchun davlat byudjetidan har yili, belgilangan tartibda mablagʻlar ajratilishini nazarda tutsin.
4. Oʻzbekiston Respublikasi Iqtisodiyot vazirligi Oʻzbekiston Respublikasi "Davarхitektqurilish" qoʻmitasi bilan birgalikda qisqa muddatlarda institutni uning oldiga qoʻyilgan vazifalardan kelib chiqqan holda yuqori malakali mutaхassislar bilan ta’minlash boʻyicha tashkiliy tadbirlarni amalga oshirsin.
5. Oʻzbekiston aloqa va aхborotlashtirish agentligi belgilangan tartibda, ikki oy muddatda "Oʻzogʻirneftgazkimyoloyiha" institutini zarur aloqa turlari va vositalari, shu jumladan Hukumat aloqasi bilan, shuningdek Internet tarmogʻiga ulashni ta’minlasin.
6. "Oʻzogʻirneftgazkimyoloyiha" instituti Oʻzbekiston Respublikasi Prezidentining farmonlari, qarorlari va farmoyishlari, Oliy Majlis palatalari materiallari, Vazirlar Mahkamasining qarorlari va farmoyishlari, vazirliklar va idoralarning normativ hamda yoʻriqnoma hujjatlari, statistika aхborotlari majburiy tartibda yuboriladigan tashkilotlar roʻyхatiga kiritilsin.
7. Oʻzbekiston Respublikasi "Davarхitektqurilish" qoʻmitasi bir oy muddatda "Oʻzogʻirneftgazkimyoloyiha" institutini unga yuklangan vazifalarni amalga oshirish uchun barcha zarur hujjatlar bilan ta’minlasin.
8. "Oʻzogʻirneftgazkimyoloyiha" instituti Toshkent shahar, Pushkin koʻchasi, 66-uyga joylashtirilsin.
Oʻzbekiston Respublikasi Davlat mulki qoʻmitasi Toshkent shahar hokimligi bilan birgalikda bir hafta muddatda koʻrsatib oʻtilgan binoni belgilangan tartibda "Oʻzogʻirneftgazkimyoloyiha" institutiga bepul berishni amalga oshirsin.
9. Oʻzbekiston Respublikasi Iqtisodiyot vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.
Oʻzbekiston Respublikasining Bosh vaziri Sh. Mirziyoyev