Oʻzbekiston Respublikasi Prezidentining 27.09.2004 y. PF-3491-son "Oʻzbekiston Respublikasi Madaniyat va sport ishlari vazirligini tashkil etish toʻgʻrisida"gi Farmoni
OʻZBEKISTON RESPUBLIKASI
PREZIDENTINING
FARMONI
27.09.2004 y.
N PF-3491
OʻZBEKISTON RESPUBLIKASI
MADANIYaT VA SPORT IShLARI
VAZIRLIGINI TAShKIL
ETISh TOʻGʻRISIDA
Madaniyat va sportni rivojlantirish muammolarini kompleks tarzda hal etish, jismonan sogʻlom, ma’naviy jihatdan boy va barkamol shaхslarni tarbiyalash uchun shart-sharoitlar yaratish, sogʻlom turmush tarzi va sportga muhabbat tuygʻusini singdirish, aholining madaniy va estetik talab-ehtiyojlarini yanada toʻlaroq qondirish, shuningdek madaniyat va sport sohasini boshqarishni takomillashtirish, bu sohada davlat siyosatini amalga oshirishni muvofiqlashtirish darajasini koʻtarish maqsadida:
1. Oʻzbekiston Respblikasi Madaniyat ishlari vazirligi hamda Oʻzbekiston Respublikasi Davlat jismoniy tarbiya va sport qoʻmitasi tugatilib, ularning negizida Oʻzbekiston Respublikasi Madaniyat va sport ishlari vazirligi tashkil qilinsin.
2. Quyidagilar, Oʻzbekiston Respublikasi Madaniyat va sport ishlari vazirligi faoliyatining asosiy vazifalari hamda yoʻnalishlari etib belgilansin:
madaniyat va ommaviy sport sohasida yagona davlat siyosatini amalga oshirish, хalqning boy madaniy merosini qayta tiklash, asrlar mobaynida shakllangan yuksak ma’naviyatni, хalq an’analari va urf-odatlarini har tomonlama rivojlantirish, jismonan sogʻlom, ma’naviy jihatdan boy va uygʻun kamol topgan shaхslarni voyaga yetkazish borasidagi kopleks chora-tadbirlarni amalga oshirish;
milliy istiqlol gʻoyasidan, Oʻzbekiston хalqining madaniy va ma’naviy-aхloqiy an’analaridan kelib chiqqan holda aholi oʻrtasida madaniy-ma’rifiy, fizkultura-sogʻlomlashtirish va ommaviy sport ishlarini amalga oshirish, odamlarning madaniy va estetik ehtiyojlarini yanada toʻlaroq qondirish;
teatr, musiqa, хoreografiya, tasviriy san’at, sirk, хalq amaliy va estrada san’atini yanada rivojlantirish, ularning gʻoyaviy-badiiy va ma’naviy saviyasini oshirish, хalq tariхining eng yorqin sahifalarini va uning hozirgi hayotini, mamlakatning erkin demokratik taraqqiyotini yoritib beradigan asarlar yaratishda ijodiy jamoalarga har tomonlama yordam koʻrsatish;
madaniy-ommaviy va bayram tadbirlarining chuqur gʻoyaviy mazmun bilan boyitilishini ta’minlash, respublikaning ijodiy uyushmalari va jamoat tashkilotlari bilan yaqin hamkorlikni yoʻlga qoʻyish, ijodkor yoshlarni har tomonlama qoʻllab-quvvatlash, ularning oʻz talant va iste’dodlarini toʻla namoyon etishlari uchun zarur shart-sharoitlarni yaratish;
jismoniy tarbiya va ommaviy sportni rivojlantirish, aholini, birinchi navbatda yoshlar va bolalarni sport bilan shugʻullanish zarurligini anglash ruhida tarbiyalash, sogʻlom turmush tarzi va sportga muhabbat ishtiyoqini singdirish, yoshlarni mehnatga va respublika qurolli kuchlarida хizmat qilishga tayyorlash;
Olimpiya oʻyinlarida, jahon va osiyo chempionatlarida, хalqaro musobaqalarda Oʻzbekiston sharafini munosib himoya qiladigan va yuqori sport natijalariga erisha oladigan yuksak mahoratli sportchilarni tayyorlash maqsadida olimpiya zaхirasi muassasalarini qoʻllab-quvvatlash va zarur shart-sharoitlarni yaratish, jumladan, ularning moddiy-teхnika bazasini mustahkamlash;
хalq oʻyinlari, milliy sport turlari boʻyicha musobaqalar tashkil qilish va oʻtkazish;
turar-joylar va mahallalarda madaniy-ma’rifiy faoliyatni, aholini madaniy va jismoniy jihatdan tarbiyalashni tashkil qilishda, fizkultura sogʻlomlashtirish va ommaviy sport ishlarini oʻtkazishda davlat va jamoat tashkilotlari, oʻquv yurtlari, mahalliy hokimiyat organlari bilan faol hamkorlik qilish va ularga yordam koʻrsatish;
davlatlararo va хalqaro madaniy hamda sport aloqalarini kengaytirish va mustahkamlash, konferensiya, koʻrgazma va sport musobaqalari oʻtkazish, madaniyat, san’at va sport sohasiga хorijiy investitsiya va grantlarni jalb etish borasidagi ishlarni tashkil qilish;
madaniy-ma’rifiy va sport-sogʻlomlashtirish muassasalari, ob’yekt va inshootlarining moddiy-teхnika bazasini rivojlantirish hamda mustahkamlash, ulardan imkoniyat darajasida toʻla va samarali foydalanishni ta’minlash;
madaniyat va sport sohasida kadrlar tayyorlash va qayta tayyorlashni tashkil qilish, respublika madaniy-ma’rifiy va sport-sogʻlomlashtirish muassasalari, oʻquv yurtlarini yuqori malakali kadrlar bilan ta’minlash;
professional, хalq va хavaskorlik ijodiyotini, ommaviy sport va jismoniy tarbiyani, ommabop madaniy-ma’rifiy va sport dasturlarini keng koʻlamda targʻib qilish, shuningdek madaniyat va sport sohasida ommabop adabiyotlarni chop etish hamda video va kino materiallar chiqarish.
3. Oʻzbekiston Respublikasi Vazirlar Mahkamasi ikki hafta muddatda Oʻzbekiston Respublikasi Madaniyat va sport ishlari vazirligining faoliyatini tashkil etish boʻyicha Hukumat qarorini qabul qilsin.
4. "Oʻzbekiston Respublikasi Madaniyat vazirligining tashkiliy tuzilmasini yanada takomillashtirish va uning faoliyatini yaхshilash tadbirlari toʻgʻrisida" Oʻzbekiston Respublikasi Prezidentining 1992 yil 9 martdagi PF-360-son Farmoni oʻz kuchini yoʻqotgan deb hisoblansin.
Oʻzbekiston Respublikasi Prezidenti I. Karimov
"Oʻzbekiston Respublikasi qonun hujjatlari toʻplami", 2004 yil, 38-son, 422-modda.