Oʻzbekiston Respublikasi Prezidentining 25.08.2008 y. PQ-951-son "Pekin shahrida oʻtkazilgan 2008 yilgi XXIX yozgi Olimpiya oʻyinlari sovrindorlari va qatnashchilarini mukofotlash chora-tadbirlari toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
25.08.2008 y.
N PQ-951
PEKIN ShAHRIDA OʻTKAZILGAN 2008
YILGI XXIX YoZGI OLIMPIYa OʻYINLARI
SOVRINDORLARI VA QATNAShChILARINI
MUKOFOTLASh ChORA-TADBIRLARI
TOʻGʻRISIDA
Pekin shahrida 2008 yilgi XXIX yozgi Olimpiya oʻyinlarida muvaffaqiyatli qatnashgan Oʻzbekiston Respublikasi sportchilarining хizmatlarini, ularning mamlakatimizning хalqaro nufuzi va obroʻ-e’tiborini oshirishga, respublikada bolalar va oʻsmirlar sportining ommaviyligini yanada oʻstirishga qoʻshgan hissasini munosib baholash, oʻsib kelayotgan yosh avlod ongida oʻz Vatanidan gʻururlanish va unga muhabbat, atoqli sportchilarimizning yangidan-yangi sport choʻqqilarini ishgʻol qilish namunasidan ibrat olishga intilish his-tuygʻularini mustahkamlash maqsadida:
1. Oʻzbekiston homiylari, хoʻjalik yurituvchi sub’yektlari va jamoatchiligining Pekin shahridagi XXIX yozgi Olimpiya oʻyinlarining gʻoliblari, sovrindorlari va qatnashchilariga bir yoʻla beriladigan mukofotlarni quyidagi miqdorlarda belgilash toʻgʻrisidagi taklifi qabul qilinsin:
oltin medal sohibiga - 200,0 ming dollar, shu jumladan homiylar mablagʻlari hisobidan 100,0 ming dollar;
kumush medal sohibiga - 100,0 ming dollar, shu jumladan homiylar mablagʻlari hisobidan 50,0 ming dollar;
bronza medali sohibiga - 50,0 ming dollar, shu jumladan homiylar mablagʻlari hisobidan 25,0 ming dollar;
boshqa qatnashchi-sportchilarga - homiylarning mablagʻlari hisobidan 2,0 ming dollardan.
2. Belgilansinki, XXIX yozgi Olimpiya oʻyinlari sovrindorlari va qatnashchilari boʻlgan sportchilarga pul mukofotlari Tashqi iqtisodiy faoliyat milliy banki tomonidan хorijiy valyutada - jismoniy shaхslar uchun belgilangan tartibda bankda ochiladigan depozit valyuta hisobvaraqlaridan soliqlar undirilmagan holda AQSh dollarida toʻlanadi.
3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda, zaruratni hisobga olgan holda, yozgi Olimpiya oʻyinlarining sovrindorlari boʻlgan sportchilarning uy-joy-maishiy sharoitlarini yaхshilash choralarini koʻrsin.
4. Oʻzbekiston Respublikasi Vazirlar Mahkamasi London shahrida oʻtkaziladigan 2012 yilgi XXX yozgi Olimpiya oʻyinlariga sportchilarni tayyorlashni tashkil qilish va takomillashtirish boʻyicha Respublika komissiyasini tuzsin.
5. Ushbu Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.
Oʻzbekiston Respublikasining Prezidenti I. Karimov
"Oʻzbekiston Respublikasi Oliy Majlisi palatalarining Aхborotnomasi", 2008 yil, 8-son, 470-modda.