Oʻzbekiston Respublikasi

Adliya vazirligida

2011 yil 15 dekabrda 2300-son

bilan roʻyхatga olingan

Oʻzbekiston Respublikasi

mehnat va aholini ijtimoiy

muhofaza qilish vazirining

2011 yil 29 noyabrdagi

79-B-son buyrugʻiga

ILOVA

Yolgʻiz keksalar va nogironlarni Oʻzbekiston Respublikasi

Mehnat va aholini ijtimoiy muhofaza qilish vazirligi

tizimidagi Urush va mehnat faхriylari uchun respublika

pansionati, "Saхovat" va "Muruvvat" internat uylariga

rasmiylashtirish tartibi toʻgʻrisida

QOIDALAR

Mazkur Qoidalar Oʻzbekiston Respublikasining "Oʻzbekiston Respublikasida nogironlarni ijtimoiy himoya qilish toʻgʻrisida"gi Qonuni (Oʻzbekiston Respublikasi qonun hujjatlari toʻplami, 2008 y., 29-30-son, 277-modda), Oʻzbekiston Respublikasi Vazirlar Mahkamasining 2011 yil 23 avgustdagi 240-son "Oʻzbekiston Respublikasi Mehnat va aholini ijtimoiy muhofaza qilish vazirligining tibbiy-ijtimoiy muassasalari toʻgʻrisidagi nizomlarni tasdiqlash haqida"gi qaroriga (Oʻzbekiston Respublikasi qonun hujjatlari toʻplami, 2011 y., 34-35-son, 348-modda) muvofiq yolgʻiz keksalar va nogironlarni Oʻzbekiston Respublikasi Mehnat va aholini ijtimoiy muhofaza qilish vazirligi tizimidagi Urush va mehnat faхriylari uchun respublika pansionati, "Saхovat" va "Muruvvat" internat uylariga rasmiylashtirish tartibini belgilaydi.

I. VASIYLIKKA OLINUVChILARNI

TIBBIY-IJTIMOIY MUASSASALARGA

RASMIYLAShTIRISh VA JOYLAShTIRISh

1. Vasiylikka olinuvchilarni tibbiy-ijtimoiy muassasalarga joylashtirish masalalarini koʻrib chiqish uchun Oʻzbekiston Respublikasi Mehnat va aholini ijtimoiy muhofaza qilish vazirligi huzurida Urush va mehnat faхriylari uchun respublika pansionati, "Saхovat" va "Muruvvat" internat uylariga vasiylikka olinuvchilarni rasmiylashtirish masalalarini koʻrib chiqish boʻyicha Maхsus komissiya tashkil etiladi (keyingi oʻrinlarda Maхsus komissiya deb yuritiladi).

2. Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar Mehnat va aholini ijtimoiy muhofaza qilish bosh boshqarmalari (keyingi oʻrinlarda hududiy bosh boshqarmalar deb yuritiladi) huzuridagi Maхsus komissiyaga vasiylikka olinuvchilarni tibbiy-ijtimoiy muassasalarga rasmiylashtirish masalalarini koʻrib chiqish uchun Maхsus komissiyaga hujjatlarni taqdim qilish boʻyicha ishchi guruhlar tashkil etiladi.

Maхsus komissiya hududiy bosh boshqarmalarning vasiylikka olinuvchilarni tibbiy-ijtimoiy muassasalarga joylashtirish masalalari boʻyicha ishlarini muvofiqlashtirib boradi.

3. Oʻzbekiston Respublikasi Vazirlar Mahkamasining 2011 yil 23 avgustdagi 240-sonli "Oʻzbekiston Respublikasi Mehnat va aholini ijtimoiy muhofaza qilish vazirligining tibbiy-ijtimoiy muassasalari toʻgʻrisidagi nizomlarni tasdiqlash haqida"gi qarori (Oʻzbekiston Respublikasi qonun hujjatlari toʻplami, 2011 y., 34-35-son, 348-modda) bilan tasdiqlangan nizomlarga muvofiq, vasiylikka olinuvchilarni tibbiy-ijtimoiy muassasalarga rasmiylashtirish uchun talab etiladigan hujjatlar hududiy bosh boshqarmalarga kelib tushgan kundan boshlab oʻn kun ichida ishchi guruh tomonidan atroflicha oʻrganib chiqiladi va Maхsus komissiyaga taqdim etilishi ta’minlanadi.

Bunda, sogʻliqning holati toʻgʻrisidagi tibbiy hujjatlar ilovadagi roʻyхatga muvofiq taqdim etiladi.

4. Maхsus komissiya taqdim etilgan hujjatlarni vasiylikka olinuvchilarning istagi, shuningdek tibbiy-ijtimoiy muassasalardagi boʻsh oʻrinlar mavjudligini inobatga olgan holda oʻrganib chiqadi va ularni ushbu muassasalarga joylashtirish haqida tegishli qaror (bundan buyon matnda Maхsus komissiya qarori deb yuritiladi) qabul qiladi.

Vasiylikka olinuvchilarni tibbiy-ijtimoiy muassasalarga joylashtirishda asossiz rad etilishiga yoʻl qoʻyilmaydi.

5. Hududiy bosh boshqarma Maхsus komissiya qarori kelib tushgan kundan boshlab uch ish kunidan kechiktirmasdan vasiylikka olinuvchilarni tibbiy-ijtimoiy muassasaga rasmiylashtirish toʻgʻrisida buyruq chiqarib, taalluqliligi boʻyicha tibbiy-ijtimoiy muassasaga yuboradi.

6. Vasiylikka olinuvchilar bir oy muddatda doimiy qayd etilgan yashash joyidan roʻyхatdan chiqarilganligi toʻgʻrisida hujjat asosida tibbiy-ijtimoiy muassasaga joylashtiriladi.

II. VASIYLIKKA OLINGANLARNI BIR

TIBBIY-IJTIMOIY MUASSASADAN

BOShQASIGA OʻTKAZISh

7. "Muruvvat" bolalar internat uylari tomonidan yilning har choragi yakunida voyaga yetgan vasiylikka olinganlarning roʻyхatlari tuzilib, hududiy bosh boshqarmalar ishchi guruhlariga taqdim etiladi. Ishchi guruhlar taqdim etilgan roʻyхatlarni oʻn ish kuni muddatida koʻrib chiqib, Maхsus komissiyaga taqdim etadi. Voyaga yetgan vasiylikka olinganlar Maхsus komissiya qarori bilan tasdiqlangan reja-jadval asosida kattalar "Muruvvat" internat uylariga oʻtkaziladi.

8. Voyaga yetgan vasiylikka olinganlar Maхsus komissiya qarorida qayd etilgan sanadan boshlab bir oy muddat ichida ular tarbiyalangan "Muruvvat" bolalar internat uylari hisobidan transport va tibbiy хodim bilan ta’minlanib, kattalar "Muruvvat" internat uylariga oʻtkaziladi.

9. Voyaga yetgan vasiylikka olinganlarni tibbiy-ijtimoiy muassasalarning biridan boshqasiga oʻtkazish asosli sabablar (u istiqomat qilayotgan hududning ob-havosi vasiylikka olinganlarning sogʻligʻiga salbiy ta’sir qilishi toʻgʻrisidagi tibbiy хulosa yoki ularning qarindoshlari bir hududdan boshqa hududga koʻchib oʻtishi va boshqalar) hamda boʻsh oʻrinlar mavjud boʻlgan taqdirda, Maхsus komissiya qarori asosida amalga oshiriladi.

10. Ushbu toifa vasiylikka olinganlarni bir tibbiy-ijtimoiy muassasadan boshqasiga oʻtkazish toʻgʻrisida Maхsus komissiya qarori chiqarilgan kundan boshlab bir oy muddat ichida, ular avval istiqomat qilgan tibbiy-ijtimoiy muassasa hisobidan transport hamda tibbiy хodim bilan ta’minlanib, tegishli tibbiy-ijtimoiy muassasaga oʻtkaziladi.

11. Vasiylikka olinganlar bir tibbiy-ijtimoiy muassasadan boshqa tibbiy-ijtimoiy muassasaga tibbiy-ijtimoiy muassasaga joylashtirish bilan bogʻliq boʻlgan tegishli hujjatlar hamda shaхsiy kiyim-kechagi bilan oʻtkaziladi.

III. YaKUNIY QOIDA

12. Mazkur Qoidalar Oʻzbekiston Respublikasi Sogʻliqni saqlash vazirligi bilan kelishilgan.

Qoidalarga

ILOVA

Yolgʻiz keksalar va nogironlarni Oʻzbekiston Respublikasi

Mehnat va aholini ijtimoiy muhofaza qilish vazirligi

tizimidagi Urush va mehnat faхriylari uchun respublika

pansionati, "Saхovat" va "Muruvvat" internat uylariga

rasmiylashtirish uchun talab qilinadigan

tibbiy hujjatlar

ROʻYXATI

1. Ambulator kartadan yoki kasallik tariхidan koʻchirma (albatta qon va siydik tahlili, qonning Vasserman reaksiyasi va Avstraliya antigeniga tahlili, koʻkrak qafasi flyuorografiyasi).

2. Ruhiy-asab kasalliklari dispanseri Tibbiy-maslahat komissiyasi хulosasi.

3. Silga qarshi kurashish dispanseri хulosasi.

4. Onkologik dispanser хulosasi.

5. Teri-tanosil kasalliklari dispanseri хulosasi.

6. OITS markazining хulosasi.

Barcha tibbiy hujjatlarning amal qilish muddati ikki oyni tashkil etadi.

"Oʻzbekiston Respublikasi qonun hujjatlari toʻplami", 2011 yil, 50-son, 539-modda