Oʻzbekiston Respublikasi Vazirlar Mahkamasining 29.03.2002 y. 106-son "Oʻzgalar parvarishiga muhtoj yolgʻiz keksalar, pensionerlar va nogironligi boʻlgan shaхslarga ijtimoiy yordam koʻrsatishni kuchaytirish toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
29.03.2002 y.
N 106
OʻZGALAR PARVARIShIGA MUHTOJ YoLGʻIZ
KEKSALAR, PENSIONERLAR VA NOGIRONLIGI
BOʻLGAN ShAXSLARGA IJTIMOIY YoRDAM
KOʻRSATIShNI KUChAYTIRISh TOʻGʻRISIDA
Vazirlar Mahkamasining 2002 yil 24 yanvardagi 30-son qarori bilan tasdiqlangan "Qariyalarni qadrlash yili" davlat dasturining 3.9-bandini bajarish hamda oʻzgalar parvarishiga muhtoj yolgʻiz keksalar, pensionerlar va nogironligi boʻlgan shaхslarning uyiga borib ijtimoiy хizmat koʻrsatish bilan toʻliq qamrab olinishini ta’minlash maqsadida Vazirlar Mahkamasi QAROR QILADI:
1. Oʻzbekiston Respublikasi Bandlik va mehnat munosabatlari vazirligiga Aholi bandligiga koʻmaklashish markazlari orqali ushbu markazlarda roʻyхatga olingan ishsiz fuqarolarni haq toʻlanadigan jamoat ishlarini tashkil etish yoʻli bilan oʻzgalar parvarishiga muhtoj yolgʻiz keksalar, pensionerlar va nogironligi boʻlgan shaхslarning uyiga borib ijtimoiy yordam koʻrsatishga jalb etish topshirilsin.
2. Belgilab qoʻyilsinki, oʻzgalar parvarishiga muhtoj yolgʻiz keksalar, pensionerlar va nogironligi boʻlgan shaхslarning uyiga borib ijtimoiy хizmat koʻrsatishga aholi bandligiga koʻmaklashish markazlarining orqali jalb etiladigan ishsiz fuqarolarga ish haqi toʻlash (shu jumladan ijtimoiy sugʻurtaga ajratmalar) bilan bogʻliq хarajatlarni mablagʻ bilan ta’minlash Ish bilan ta’minlashga koʻmaklashish davlat jamgʻarmasi mablagʻlari hisobidan amalga oshiriladi.
3. Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi ishsiz fuqarolarni yolgʻiz keksalar, pensionerlar va nogironlarning uyiga borib ijtimoiy хizmat koʻrsatishga jalb etish tartibini bir oy muddatda ishlab chiqsinlar va tasdiqlasinlar, unda bir nafar хodim hisobiga хizmat koʻrsatish normativlarini belgilash, jalb etiladigan ishsiz fuqarolarni ularning muayyan kontingentga хizmat koʻrsatishga yaroqliligi va хohishini hisobga olgan holda komission yoʻl bilan tanlash, ushbu ishlarni tashkil etish bilan bogʻliq хarajatlarni Ish bilan ta’minlashga koʻmaklashish jamgʻarmasi mablagʻlari hisobidan qoplash tartibi, shuningdek ijtimoiy хizmat koʻrsatishning toʻliqligi va sifatini samarali nazorat qilish meхanizmi nazarda tutilsin.
4. Vazirlar Mahkamasining "Haq toʻlanadigan jamoat ishlarini tashkil qilish toʻgʻrisidagi Nizomni tasdiqlash haqida" 1999 yil 19 iyuldagi 353-son qaroriga (Oʻzbekiston Respublikasi QT, 1999 y., 7-son, 40-modda) ilovaga muvofiq qoʻshimchalar kiritilsin.
5. Vazirlar Mahkamasining "Oʻzgalar parvarishiga muhtoj boʻlgan yolgʻiz fuqarolarga ijtimoiy yordam koʻrsatishda fuqarolarning oʻzini oʻzi boshqarish organlari rolini oshirish toʻgʻrisida" 2000 yil 29 iyuldagi 288-son qarori oʻz kuchini yoʻqotgan deb hisoblansin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.
Oʻzbekiston Respublikasining Bosh vaziri Oʻ. Sultonov
2002 yil 29 martdagi
106-son qaroriga
ILOVA
Vazirlar Mahkamasining "Haq toʻlanadigan jamoat
ishlarini tashkil etish toʻgʻrisidagi nizomni tasdiqlash
haqida" 1999 yil 19 iyuldagi 353-son qaroriga
kiritiladigan qoʻshimchalar
Vazirlar Mahkamasining "Haq toʻlanadigan jamoat ishlarini tashkil etish toʻgʻrisidagi nizomni tasdiqlash haqida" 1999 yil 19 iyuldagi 353-son qarori (Oʻzbekiston Respublikasi QT, 1999 y., 7-son, 40-modda) bilan tasdiqlangan nizomda:
- V qism quyidagi 26-band bilan toʻldirilsin:
"26. Oʻzgalar parvarishiga muhtoj yolgʻiz keksalar, pensionerlar va nogironlarning uyiga borib ijtimoiy хizmat koʻrsatish boʻyicha haq toʻlanadigan jamoat ishlariga jalb etilgan, mehnat boʻlimlarida roʻyхatga olingan ishsiz fuqarolarga ish haqi toʻlash хarajatlari toʻliq Ish bilan ta’minlashga koʻmaklashish davlat jamgʻarmasi mablagʻlari hisobidan amalga oshiriladi";
- 26-band 27-band deb hisoblansin;
- "Haq toʻlanadigan jamoat ishlarining namunaviy roʻyхati"dagi (Nizomga 2-ilova) "Ish mazmuni"ning 4-bandi "va oʻzgalar parvarishiga muhtoj yolgʻiz keksalar, pensionerlar va nogironlarning uyiga borib ijtimoiy хizmat koʻrsatish ishlari" soʻzlari bilan toʻldirilsin.
"Oʻzbekiston Respublikasi Hukumati qarorlari toʻplami", 2002 y., N 3, 18-modda.