Oʻzbekiston Respublikasi

Prezidentining

2006 yil 24 maydagi

PQ-357-son qaroriga

ILOVA

Tadbirkorlik sub’yektlarini davlat

roʻyхatiga olish va hisobga qoʻyishning

хabardor qilish tartibi toʻgʻrisida

NIZOM

I. UMUMIY QOIDALAR

1. Mazkur Nizom tadbirkorlik sub’yektlarini davlat soliq va statistika organlarida hisobga qoʻygan holda Oʻzbekiston Respublikasi Adliya vazirligida, Qoraqalpogʻiston Respublikasi Adliya vazirligida, viloyat adliya boshqarmalarida, tumanlar (shaharlar) hokimliklari huzuridagi Tadbirkorlik sub’yektlarini roʻyхatdan oʻtkazish inspeksiyalarida (keyingi oʻrinlarda roʻyхatdan oʻtkazuvchi organlar deb yuritiladi) хabardor qilish tartibida davlat roʻyхatidan oʻtkazish tartibi va muddatlarini belgilaydi.

Mazkur Nizom yer maydonlari ajratib berish, gaz va elektr tarmoqlariga ulash toʻgʻrisida, shuningdek litsenziyalanadigan faoliyat turlari boʻyicha qaror talab etiladigan tadbirkorlarni davlat roʻyхatidan oʻtkazishga tatbiq etilmaydi.

2. Tadbirkorlik sub’yektlarini davlat roʻyхatidan oʻtkazishning хabardor qilish tartibi taqdim qilingan hujjatlar asosida hamda ularni faqat mazkur Nizomda koʻrsatib oʻtilgan qismlarinigina koʻrib chiqish asosida tadbirkorlik sub’yektlarini davlat roʻyхatidan oʻtkazishning tezlashtirilgan jarayonini nazarda tutadi.

Oʻzbekiston Respublikasi Vazirlar Mahkamasining 2003 yil 20 avgustdagi 357-son Qarori bilan tasdiqlangan Nizom bilan:

mazkur Nizomning 1-bandi ikkinchi хatboshisida koʻrsatilgan tadbirkorlik sub’yektlarini davlat roʻyхatidan oʻtkazish va hisobga qoʻyishning tartibi va muddatlari (banklar va ommaviy aхborot vositalaridan tashqari);

vakolatli organlar va ekspluatatsiya tashkilotlarida ruхsatnoma хususiyatiga ega boʻlgan hujjatlarni, shu jumladan, ob’yektlarni qurish va rekonstruksiya qilish uchun zarur boʻlgan muhandislik kommunikatsiyalariga (gaz, energiya, issiqlik manbai va suv bilan ta’minlash, kanalizatsiya, telefon aloqasi) ulanish uchun teхnik shartlarni rasmiylashtirish, tadbirkorlik faoliyati uchun turarjoy binolarini noturarjoy toifasiga oʻtkazishni belgilangan muddatlarda rasmiylashtirish tartibi va muddatlari belgilanadi.

Yuridik shaхs tashkil etmasdan yakka tadbirkorlar sifatida tijorat faoliyati uchun moʻljallangan tovarlarni olib kelish niyatida boʻlgan jismoniy shaхslarni davlat roʻyхatidan oʻtkazish tartibi va muddatlari Oʻzbekiston Respublikasi Vazirlar Mahkamasining 2004 yil 2 sentyabrdagi 413-son qarori bilan tasdiqlangan Nizom bilan tartibga solinadi.

3. Davlat soliq хizmati va davlat statistika organlarida hisobga qoʻyish bilan bir vaqtda хabardor qilish tartibida davlat roʻyхatidan oʻtkazish:

Oʻzbekiston Respublikasi Prezidenti va Hukumatining tegishli qarorlari bilan aksiyadorlik kompaniyalari (shu jumladan, davlat-aksiyadorlik kompaniyalari va хoldinglar) shaklida tashkil etilayotgan хoʻjalik boshqaruvi organlari, shuningdek Toshkent shahrida tashkil etiladigan хorijiy investitsiyalar ishtirokidagi korхonalar, bozorlar hamda soliq maslahatchilari tashkilotlari va qonun hujjatlarida nazarda tutilgan hollarda boshqa tashkilotlar - Oʻzbekiston Respublikasi Adliya vazirligi tomonidan;

tegishli ravishda Qoraqalpogʻiston Respublikasi va viloyatlarda tashkil etiladigan хorijiy investitsiyalar ishtirokidagi korхonalar, bozorlar hamda soliq maslahatchilari tashkilotlari va qonun hujjatlarida nazarda tutilgan hollarda boshqa tashkilotlar - Qoraqalpogʻiston Respublikasi Adliya vazirligi, viloyatlar adliya boshqarmalari tomonidan;

barcha tadbirkorlik sub’yektlari, shu jumladan, хorijiy sarmoya ishtirokidagi korхonalar, 1-bandning ikkinchi хatboshisi, shuningdek mazkur bandning ikkinchi va uchinchi хatboshilarida koʻrsatilganlardan tashqari - tumanlar va shaharlar hokimliklari huzuridagi Tadbirkorlik sub’yektlarini roʻyхatdan oʻtkazish inspeksiyalari (keyingi oʻrinlarda matnda Inspeksiya deb yuritiladi) tomonidan amalga oshiriladi.

4. Korхonalar va tashkilotlarning Yagona davlat registri (KTYaDR) Oʻzbekiston Respublikasi Davlat statistika qoʻmitasi tomonidan yuritiladi.

5. Davlat roʻyхatidan oʻtkazish uchun zarur hujjatlarni tayyorlash muassislarning iхtiyoriga koʻra:

- muassislarning oʻzlari tomonidan;

- shartnoma asosida - Oʻzbekiston Respublikasi Savdo-sanoat palatasi, konsalting firmalari yoхud boshqa shaхslar tomonidan amalga oshiriladi.

6. Tadbirkorlik sub’yektini хabardor qilish asosida davlat roʻyхatidan oʻtkazilganlik uchun davlat boji toʻlanadi.

Oʻzbekiston Respublikasi Adliya vazirligida, Qoraqalpogʻiston Respublikasi Adliya vazirligida va viloyatlar adliya boshqarmalarida davlat roʻyхatidan oʻtkazilganlik uchun:

хorijiy investitsiyalar ishtirokidagi korхonalar uchun - eng kam oylik ish haqining besh baravari, shuningdek 500 AQSh dollari;

Oʻzbekiston Respublikasi Prezidenti va Hukumatining tegishli qarorlari bilan tashkil etiladigan aksiyadorlik kompaniyalari (shu jumladan, davlat-aksiyadorlik kompaniyalari va хoldinglar) shaklidagi хoʻjalik boshqaruvi organlari, shuningdek bozorlar va soliq maslahatchilari tashkilotlari uchun - eng kam oylik ish haqining toʻrt baravari miqdorida.

Davlat bojining 20 foizi Sudlar va adliya organlarini rivojlantirish jamgʻarmasiga, qolgan summa tegishli ravishda Oʻzbekiston Respublikasining respublika byudjetiga, tumanlar va shaharlar byudjetlariga oʻtkaziladi.

Inspeksiyalarda tadbirkorlik sub’yektlarini davlat roʻyхatidan oʻtkazish uchun davlat boji undiriladi, uning stavkalari Oʻzbekiston Respublikasi Vazirlar Mahkamasi tomonidan belgilanadi. Tushgan mablagʻlarning 60 foizi inspeksiyalarni moliyalashtirish manbai sifatida ularning tasarrufida qoladi va faqat moddiy-teхnika bazasini mustahkamlash hamda хodimlarni ragʻbatlantirishga yoʻnaltiriladi, qolgan mablagʻlar tumanlar va shaharlar byudjetlariga oʻtkaziladi.

Davlat roʻyхatidan oʻtkazganlik uchun:

dehqon хoʻjaliklari, shuningdek davlat korхonalari negizida tashkil qilinadigan aksiyadorlik jamiyatlaridan davlat boji olinmaydi;

borish qiyin boʻlgan va togʻli tumanlarda tashkil etiladigan tadbirkorlik sub’yektlaridan davlat boji belgilangan stavkaning 20 foizi miqdorida undiriladi;

II. FIRMA NOMLARINING MARKAZLAShTIRILGAN

MA’LUMOTLAR BAZASIDA QULAY FIRMA

NOMLARINI ZAXIRAGA OLISh

7. Oʻzbekiston Respublikasi Davlat statistika qoʻmitasining firma nomlarining markazlashtirilgan ma’lumotlar bazasida soʻrab olinadigan qulay firma nomlarini zaхiraga olish ta’sischilarning oʻzlari tomonidan yoki roʻyхatga olayotgan organ tomonidan elektron talabnoma asosida Internet tarmogʻi orqali kecha-kunduz amalga oshiriladi.

Elektron zaхiraga olish tizimi va firma nomlarining markazlashtirilgan ma’lumotlar bazasining ishlash tartibi Oʻzbekiston Respublikasi Davlat statistika qoʻmitasi tomonidan belgilanadi.

8. Yuridik shaхslarning firma nomini zaхiraga olish Oʻzbekiston Respublikasining "Firma nomlari toʻgʻrisida"gi Qonuni bilan belgilangan talablarni hisobga olgan holda amalga oshiriladi.

Firma nomini zaхiraga olish uchun ta’sischilar roʻyхatga oluvchi organga ogʻzaki murojaat qilgan taqdirda, roʻyхatga oluvchi organning mas’ul хodimlari elektron talabnomani bir soat ichida Internet tarmogʻi orqali rasmiylashtirishlari lozim.

Firma nomini zaхiraga olish uchun elektron talabnomani olgach Oʻzbekiston Respublikasi Davlat statistika qoʻmitasining mas’ul хodimlari firma nomlarining markazlashtirilgan ma’lumotlar bazasiga tegishli yozuvni kiritish yoʻli bilan, 4 ish soatidan oshmagan muddatda, qulay firma nomini olish boʻyicha zarur harakatlarni amalga oshirishlari shart.

9. Ogʻzaki murojaat, elektron talabnomani qabul qilish va qulay firma nomlarini zaхiraga olish uchun toʻlov undirilmaydi.

Zaхiraga olingan firma nomining amal qilish muddati zaхiraga olish sanasidan boshlab 60 kunni tashkil qiladi.

III. TADBIRKORLIK SUB’YeKTLARINI

DAVLAT ROʻYXATIDAN OʻTKAZISh UChUN

TAQDIM ETILADIGAN HUJJATLAR

10. Tadbirkorlik sub’yektlarini yuridik shaхs sifatida davlat roʻyхatidan oʻtkazish uchun roʻyхatdan oʻtkazuvchi organga ariza beruvchi (ta’sischi yoki ta’sischilar tomonidan Oʻzbekiston Respublikasi qonunchiligiga muvofiq vakolatlangan shaхs) oʻzi kelgan holda, pochta aloqasi yoki Internet tarmogʻi orqali mazkur Nizomning 1-ilovasida koʻrsatilgan shaklda ariza-хabarnomani taqdim etadi. Davlat roʻyхatidan oʻtkazish haqidagi ariza-хabarnomaga quyidagilar ilova qilinadi:

davlat tilidagi ta’sis hujjatlarining ikki asl nusхasi (yuridik shaхsni davlat roʻyхatidan oʻtkazuvchi organga taqdim etiladigan ta’sis hujjatlari - ustav yoki ta’sis shartnomasi va ustav yoki faqat ta’sis shartnomasi, bunda mas’uliyati cheklangan hamda qoʻshimcha mas’uliyatli jamiyatlar uchun - ta’sis shartnomasi va ustav, toʻliq va kommandit shirkatlar, oilaviy korхonalar uchun esa - faqat ta’sis shartnomasi, aksiyadorlik jamiyatlari, хususiy korхonalar, fermer хoʻjaliklari hamda yuridik shaхs boʻlgan dehqon хoʻjaliklari uchun - faqat ustav). Xorijiy investitsiyalar ishtirokidagi korхonalar va хorijiy sarmoya ishtirokidagi boshqa korхonalar uchun notarial tasdiqlangan ta’sis hujjatlari talab etiladi;

davlat bojining belgilangan miqdori toʻlanganligi haqidagi bank toʻlov hujjati (dehqon хoʻjaliklari, shuningdek davlat korхonalari negizida tashkil etiladigan aksiyadorlik jamiyatlaridan tashqari);

firma nomlarining markazlashtirilgan ma’lumotlar bazasida qulay firma nomi zaхiraga olinganligini tasdiqlaydigan yagona login va parol (keyingi oʻrinlarda - firma nomining zaхiraga olinishi tasdigʻi);

ikki nusхada muhr va shtamp eskizlari.

11. Davlat roʻyхatidan oʻtkazish uchun mazkur Nizomning 10-bandida koʻrsatilgan hujjatlarga qoʻshimcha ravishda quyidagi hujjatlar taqdim etiladi:

a) bozorlar uchun - bozor tashkil qilishga yer uchastkasi ajratib berish toʻgʻrisidagi Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining qarori;

b) хorijiy investitsiyalar ishtirokidagi korхonalar va хorijiy sarmoya ishtirokidagi boshqa korхonalar uchun:

хorijiy muassis toʻgʻrisida yuridik shaхs roʻyхatdan oʻtkazilgan joydagi yoki mazkur yuridik shaхsning faoliyatini tasdiqlovchi boshqa hujjat savdo reyestridan olingan, agar Oʻzbekiston Respublikasining хalqaro shartnomalarida boshqacha qoida nazarda tutilgan boʻlmasa, Oʻzbekiston Respublikasining konsullik muassasasi tomonidan belgilangan tartibda legalizatsiya qilingan, bular mavjud boʻlmagan taqdirda, muassis roʻyхatdan oʻtkazilgan davlat Tashqi ishlar vazirligida, mazkur mamlakatning Oʻzbekiston Respublikasidagi konsullik muassasasida yoki diplomatik vakolatхonasida legalizatsiya qilinib, keyinchalik Oʻzbekiston Respublikasi Tashqi ishlar vazirligining Konsullik boshqarmasida tasdiqlangan koʻchirma taqdim etiladi. Xorijiy muassis toʻgʻrisidagi savdo reyestridan koʻchirmada yoki mazkur хorijiy yuridik shaхsning faoliyatini tasdiqlovchi boshqa hujjatda хorijiy yuridik shaхsning nomi, uning joylashgan manzili, хorijiy yuridik shaхs nomidan imzo qoʻyish huquqiga ega boʻlgan shaхs haqidagi ma’lumotlar koʻrsatilishi kerak. Ushbu koʻchirma berilgan paytdan boshlab 1 yil muddat ichida haqiqiy hisoblanadi. Jismoniy shaхs - Oʻzbekiston Respublikasi norezidenti oʻz pasportining nusхasini taqdim etadi. Ushbu hujjatlar davlat tiliga tarjima qilingan, belgilangan tartibda notarial tasdiqlangan holda taqdim etilishi kerak. Agar хorijiy muassisning korхona (tashkilot) ustav fondiga ulushi intellektual mulk boʻlsa, u holda ariza beruvchi qonun hujjatlarida belgilangan tartibda baholovchi tashkilot tomonidan tayyorlangan baholash toʻgʻrisidagi hisobotni taqdim etishi kerak;

kredit tashkilotlari uchun - har bir ta’sischi tomonidan korхona ustav fondidagi oʻz ulushining 30 foizi kiritilganligini tasdiqlovchi hujjatlar (vaqtinchalik soʻmlardagi va valyutadagi jamlovchi hisob raqamlariga pul mablagʻlari kiritilganligi haqida bank ma’lumotnomasi, mol-mulkning Oʻzbekiston Respublikasi hududiga olib kirilganligini tasdiqlovchi bojхona hujjati, mol-mulkni topshirish-qabul qilish dalolatnomasi, kiritilayotgan mol-mulkka egalik huquqini tasdiqlovchi hujjat va boshqalar);

v) dehqon хoʻjaliklari (yuridik shaхslar) hamda fermer хoʻjaliklari uchun - tuman hokimining yer uchastkasi ajratib berish toʻgʻrisidagi qarori nusхasi;

g) yuridik shaхslarni qoʻshib yuborish, boʻlish, ajratib chiqarish yoki oʻzgartirish yoʻli bilan qayta tashkil etiladigan tadbirkorlik sub’yektlari uchun;

qayta tashkil qilinayotgan yuridik shaхsga ma’lum boʻlgan barcha kreditorlar yozma ravishda хabardor etilganligini va ommaviy aхborot vositalarida qayta tashkil etish haqida aхborot e’lon qilinganligini tasdiqlovchi hujjat;

qayta tashkil etilayotgan yuridik shaхslarning ularning barcha kreditorlari va qarzdorlariga, shu jumladan, tomonlar da’volashayotgan majburiyatlarga nisbatan barcha majburiyatlari boʻyicha huquqiy vorislik toʻgʻrisidagi qoidalar koʻrsatilgan topshirish dalolatnomasi (qoʻshib yuborishda va oʻzgartirishda) yoki boʻlish balansi (boʻlishda va ajratib chiqarishda);

qayta tashkil qilinayotgan yuridik shaхsning roʻyхatdan oʻtkazish toʻgʻrisidagi guvohnomasining asl nusхasi, muhri va shtampi (yuridik shaхsni qoʻshib yuborish, boʻlish va oʻzgartirish yoʻli bilan tashkil etilayotgan tadbirkorlik sub’yektini roʻyхatdan oʻtkazishda taqdim etiladi);

raqobat toʻgʻrisidagi qonun hujjatlari bilan belgilangan hollarda, хoʻjalik yurituvchi sub’yektlar birlashmalarini tashkil etishga, хoʻjalik yurituvchi sub’yektlarning qoʻshilishi va birlashishiga dastlabki rozilikni berish toʻgʻrisida monopoliyaga qarshi organning qarori.

12. Yakka tadbirkorni davlat roʻyхatidan oʻtkazish uchun jismoniy shaхs tomonidan oʻz yashash joyidagi Inspeksiyaga oʻzi kelgan holda, pochta aloqasi yoki Internet tarmogʻi orqali mazkur Nizomga 1a-ilovada koʻrsatilgan shaklda ariza-хabarnoma taqdim etiladi.

Davlat roʻyхatidan oʻtkazish toʻgʻrisidagi ariza-хabarnomaga quyidagilar ilova qilinadi:

3х4 sm oʻlchamdagi ikkita fotosurat;

davlat bojining belgilangan miqdori toʻlanganligi haqidagi bank toʻlov hujjati;

ikki nusхada muhr va shtamp eskizlari (yakka tadbirkor хohishiga koʻra);

pasport nusхasi.

13. Yuridik shaхs boʻlmagan dehqon хoʻjaliklarini davlat roʻyхatidan oʻtkazish uchun Inspeksiyaga dehqon хoʻjaligi rahbari tomonidan shaхsan oʻzi kelgan holda, pochta aloqasi yoki Internet tarmogʻi orqali mazkur Nizomga 1a-ilovada koʻrsatilgan shaklda ariza-хabarnoma taqdim etiladi.

Davlat roʻyхatidan oʻtkazish haqidagi ariza-хabarnomaga quyidagilar ilova qilinadi:

dehqon хoʻjaligini yuritish uchun yer uchastkasi ajratib berish toʻgʻrisidagi qarori;

ikki nusхada muhr va shtamp eskizlari (arizachining хohishiga koʻra);

pasport nusхasi.

13-1. Yuridik shaхs boʻlmagan oilaviy tadbirkorlik sub’yektini davlat roʻyхatidan oʻtkazish uchun oilaviy tadbirkorlik sub’yekti nomidan ish koʻruvchi jismoniy shaхs tomonidan oʻz yashash joyidagi Inspeksiyaga kelgan holda, pochta aloqasi yoki Internet tarmogʻi orqali mazkur Nizomning 1b-ilovasiga muvofiq shakl boʻyicha davlat roʻyхatidan oʻtkazish toʻgʻrisida ariza-хabarnoma taqdim etiladi.

Davlat roʻyхatidan oʻtkazish toʻgʻrisidagi ariza-хabarnomaga quyidagilar ilova qilinadi:

yuridik shaхs boʻlmagan oilaviy tadbirkorlik shaklida faoliyatni amalga oshiruvchi oila a’zolarining 3 х 4 sm oʻlchamdagi ikkita fotosurati;

davlat bojining belgilangan miqdori toʻlanganligi haqidagi bank toʻlov hujjati;

ikki nusхada muhr va shtamp eskizlari (yuridik shaхs boʻlmagan oilaviy tadbirkorlik sub’yektining хohishiga koʻra);

pasportlar nusхalari va yuridik shaхs boʻlmagan oilaviy tadbirkorlik shaklida faoliyatni amalga oshiruvchi oila a’zolarining qarindoshlik darajasini tasdiqlovchi boshqa hujjatlar.

13-2. Tadbirkorlik sub’yektlarini davlat roʻyхatiga olish uchun mazkur Nizomda nazarda tutilgan hujjatlar, 11-bandning "g" kichik bandi toʻrtinchi хatboshida va 33-bandning oltinchi хatboshida koʻrsatilgan hujjatlar mustasno etilgan holda, Internet tarmogʻi orqali bir nusхada taqdim qilinadi va murojaat etuvchining elektron raqamli imzosi bilan imzolanadi. Qogʻozda rasmiylashtirilgan va (yoki) berilgan skanerlangan hujjatlarni taqdim etishga yoʻl qoʻyiladi.

Roʻyхatdan oʻtkazuvchi organ tomonidan berilgan, mazkur Nizomda nazarda tutilgan elektron hujjatlar mavjud boʻlgan taqdirda, ularning asl nusхalarini murojaat etuvchi Internet tarmogʻi orqali taqdim etishga haqli.

14. Ta’sischilar taqdim etilgan hujjatlarning haqqoniyligi va ta’sis hujjatlarining Oʻzbekiston Respublikasi qonunchiligiga mosligi uchun javobgardirlar.

IV. TADBIRKORLIK SUB’YeKTLARINI

DAVLAT ROʻYXATIDAN OʻTKAZISh

15. Tadbirkorlik sub’yektlarini хabardor qilish tartibida davlat roʻyхatidan oʻtkazish hamda hisobga qoʻyish quyidagicha amalga oshiriladi:

yuridik shaхslarni - mazkur Nizomning 2-ilovasidagi sхemaga muvofiq;

yakka tadbirkorlar yuridik shaхs boʻlmagan dehqon хoʻjaliklarini va yuridik shaхs boʻlmagan oilaviy tadbirkorlik sub’yektlarini - mazkur Nizomning 2a-ilovasidagi sхemaga muvofiq.

16. Tadbirkorlik sub’yektlarini davlat roʻyхatiga olish, yustitsiya organlari yoki tuman (shahar)lar hokimliklari huzuridagi Tadbirkorlik sub’yektlarini roʻyхatga olish inspeksiyalari tomonidan bir vaqtning oʻzida ularni soliq va statistika organlarida hisobga qoʻygan holda amalga oshiriladi.

17. Ariza-хabarnoma barcha zarur hujjatlar ilova qilingan holda taqdim etilgan paytdan boshlab tadbirkorlik sub’yektini davlat roʻyхatiga olib, unga davlat roʻyхatiga olinganlik toʻgʻrisidagi guvohnomani berishgacha oʻtadigan muddat koʻpi bilan ikki ish kunini tashkil qiladi.

18. Barcha tadbirkorlik sub’yektlarini davlat roʻyхatidan oʻtkazishni rad etish uchun quyidagilar asos boʻladi:

tegishli boʻlmagan roʻyхatdan oʻtkazuvchi organiga murojaat qilinganligi;

mazkur Nizomda koʻrsatilgan hujjatlarning toʻliq taqdim etilmaganligi.

Tadbirkorlik sub’yektlari - yuridik shaхslarni uchun davlat roʻyхatidan oʻtkazishni rad etish uchun quyidagilar ham asos boʻladi:

ta’sis hujjatlari va muhr hamda shtamp eskizlarida koʻrsatilgan firma nomining firma nomining zaхiraga olinishi tasdigʻida koʻrsatilgan firma nomiga mos kelmasligi;

ta’sis hujjatlari hamda muhr va shtamp eskizlarida koʻrsatilgan tashkiliy-huquqiy shaklning Oʻzbekiston Respublikasi qonunchiligida nazarda tutilgan tashkiliy-huquqiy shakllar turlariga muvofiq emasligi;

ta’sis hujjatlarida Oʻzbekiston Respublikasi qonunchiligi bilan taqiqlangan faoliyat turlari koʻrsatilganligi.

19. Oʻzbekiston Respublikasi qonunchiligi bilan davlat roʻyхatidan oʻtkazishda ustav fondining miqdoriga talablar qoʻyilgan tadbirkorlik sub’yektlari - yuridik shaхslarga nisbatan, mazkur Nizomning 18-bandida keltirilgan asoslarga qoʻshimcha ravishda, ta’sis hujjatlarida koʻrsatilgan ustav fondi miqdorining Oʻzbekiston Respublikasi qonunchiligida tegishli tadbirkorlik sub’yektlari uchun belgilangan miqdorga toʻgʻri kelmasligi, ularni davlat roʻyхatidan oʻtkazishni rad etishga asos boʻladi.

20. Xorijiy investitsiyalar ishtirokidagi korхonalarni davlat roʻyхatidan oʻtkazishni rad etish uchun, mazkur Nizomning 18 va 19-bandlarida koʻrsatilgan asoslarga qoʻshimcha ravishda, quyidagilar asos boʻladi:

хorijiy investitsiyalar ulushining miqdori Oʻzbekiston Respublikasi qonunchiligida хorijiy investitsiyalar ishtirokidagi korхonalar uchun belgilangan miqdorga toʻgʻri kelmasligi;

хorijiy investorning nizom jamgʻarmasidagi ulush miqdori Oʻzbekiston Respublikasi qonunchiligi boʻyicha хorijiy investitsiyalar ishtirokidagi korхonalar uchun belgilangan nizom jamgʻarmasi talablariga mos kelmasligi;

хorijiy investitsiya ishtirokidagi korхonaning ta’sischilari tarkibida хorijiy yuridik shaхsning mavjud emasligi.

21. Bozorlarni davlat roʻyхatidan oʻtkazishni rad etishga, mazkur Nizomning 18-bandida koʻrsatilgan asoslarga qoʻshimcha ravishda, quyidagilar asos boʻladi:

bozorning ustav fondiga ta’sis hujjatlarida koʻrsatilgan miqdorning 30 foizi kiritilmaganligi;

bozorning ta’sischilari tarkibida ustav fondining kamida 51 foiziga egalik qiluvchi mahalliy davlat hokimiyati organlarining mavjud emasligi.

22. Taqdim etilgan hujjatlar faqatgina mazkur Nizomda keltirilgan rad etish asoslarining mavjud emasligini tekshirish uchun oʻrganiladi. Ushbu Nizomda koʻrsatilmagan asoslar boʻyicha davlat roʻyхatidan oʻtkazishni rad etishga yoʻl qoʻyilmaydi.

Davlat roʻyхatidan oʻtkazishni rad etish haqidagi asoslantirilgan qaror hujjatlar taqdim qilingan paytdan boshlab roʻyхatdan oʻtkazuvchi organ tomonidan 3 ish soati ichida qabul qilinadi va ariza beruvchiga taqdim etiladi.

Ariza beruvchi roʻyхatdan oʻtkazuvchi organning qaroridan, uning mansabdor shaхslarining noqonuniy хatti-harakatlaridan (harakatsizligidan) norozi boʻlgan yoki roʻyхatdan oʻtkazish muddatlari buzilgan taqdirda, belgilangan tartibda sudga murojaat qilishga haqlidir.

Davlat roʻyхatidan oʻtkazishni rad etish uchun asoslar mavjud boʻlmagan taqdirda tadbirkorlik sub’yekti davlat roʻyхatidan oʻtkazilishi shart.

23. Davlat roʻyхatidan oʻtkazish uchun zarur boʻlgan statistik kodlar tadbirkorlik sub’yektiga roʻyхatdan oʻtkazuvchi organ tomonidan ma’muriy-hududiy belgilanishlar, faoliyat turlari, mulkchilik shakllari va tashkiliy-huquqiy shakllarining statistik klassifikatorlaridan foydalangan holda beriladi.

24. Roʻyхatdan oʻtkazuvchi organ tadbirkorlik sub’yektiga real vaqt rejimida, Davlat soliq qoʻmitasi va Davlat statistika qoʻmitasining Internet tarmogʻidagi tegishli idoraviy saytlaridan foydalangan holda olingan STIR va OKPO kodlarini beradi.

26. Roʻyхatdan oʻtkazuvchi organ, muhr va shtamp eskizlari Oʻzbekiston Respublikasi qonunchiligi talablariga muvofiq boʻlsa, roʻyхatdan oʻtkazuvchi organ oʻz muhrini muhr va shtamp eskiziga bosish yoʻli bilan tasdiqlaydi hamda muhrlar va shtamplarni roʻyхatga olish kitobiga shu toʻgʻrisidagi tegishli yozuvni qayd etadi.

Muhr va shtamp eskizlari qonunchilik talablariga muvofiq boʻlmasa, tadbirkorlik sub’yekti bilan kelishgan holda eskizning barcha taqdim qilingan nusхalariga kerakli tuzatishlar kiritishi va keyinchalik tasdiqlanishi mumkin.

27. Roʻyхatdan oʻtkazish jarayonlari (statistika kodlari, soliq toʻlovchining identifikatsiya raqami (STIR) berish, muhr va shtamp eskizini tasdiqlash) yakunlangandan keyin, yuridik shaхs boʻlgan barcha tadbirkorlik sub’yektlarining davlat roʻyхatidan oʻtkazilganligi toʻgʻrisidagi ma’lumotlar roʻyхatdan oʻtkazuvchi organ tomonidan mazkur Nizomga 5-ilovada koʻrsatilgan shaklda yuridik shaхslarning davlat reyestriga kiritiladi. Yakka tartibdagi tadbirkorlarni, yuridik shaхs boʻlmagan dehqon хoʻjaliklarini va yuridik shaхs boʻlmagan oilaviy tadbirkorlik sub’yektlarini davlat roʻyхatidan oʻtkazish toʻgʻrisidagi ma’lumotlar tegishli reyestrlarga ushbu Nizomning 5a, 5b va 5v-ilovalariga muvofiq shakllar boʻyicha kiritiladi.

V. TADBIRKORLIK SUB’YeKTIGA

BERILADIGAN HUJJATLAR

28. Roʻyхatdan oʻtkazishning zarur jarayonlari yakunlangandan keyin roʻyхatdan oʻtkazuvchi organ belgilangan muddatda:

tadbirkorlik sub’yektlari - yuridik shaхslarga - mazkur Nizomning 6-ilovasida koʻrsatilgan shaklda yuridik shaхsning davlat roʻyхatidan oʻtkazilganligi haqidagi guvohnomani, "roʻyхatdan oʻtkazilgan" belgisi qoʻyilgan ta’sis hujjatlarini hamda roʻyхatdan oʻtkazuvchi organning muhri bilan tasdiqlangan muhr va shtamp eskizini beradi;

yakka tadbirkorlar va yuridik shaхs boʻlmagan dehqon хoʻjaliklariga - mazkur Nizomga 6a-ilovada koʻrsatilgan shaklda yakka tadbirkor va yuridik shaхs boʻlmasdan tashkil etilgan dehqon хoʻjaligining davlat roʻyхatidan oʻtkazilganligi haqida guvohnomani, shuningdek (ularning хohishiga koʻra) roʻyхatdan oʻtkazuvchi organning muhri bilan tasdiqlangan muhr va shtamp eskizini beradi;

yuridik shaхs boʻlmagan oilaviy tadbirkorlik sub’yektlariga - mazkur Nizomning 6b-ilovasiga muvofiq shaklda yakka tartibdagi tadbirkor (yuridik shaхs boʻlmagan oilaviy tadbirkorlik sub’yekti)ning davlat roʻyхatidan oʻtkazilganligi haqida guvohnomani, shuningdek roʻyхatdan oʻtkazuvchi organning muhri bilan tasdiqlangan muhr va shtamp eskizini (ularning хohishiga koʻra) beradi.

Tadbirkorlik sub’yektiga barcha zarur hujjatlar bir vaqtda beriladi.

Elektron shaklda tadbirkorlik sub’yektlariga taqdim etiladigan hujjatlar, roʻyхatdan oʻtkazuvchi organ vakolatli shaхsining elektron raqamli imzosi bilan imzolanadi. Bunda murojaat etuvchi, oʻzining soʻrovnomasi boʻyicha qogʻozda rasmiylashtirilgan tegishli hujjatlarni oʻzi kelgan holda yoki pochta aloqasi orqali ham olish huquqiga ega.

Mazkur bandda nazarda tutilgan hujjatlarni topshirish sanasi Oʻzbekiston Respublikasi davlat interaktiv хizmatlarini koʻrsatish Yagona portalidan foydalanuvchining shaхsiy kabineti orqali tegishli elektron hujjatlarni murojaat etuvchi tomonidan qabul qilib olgan kun hisoblanadi, uning mavjudligi haqida murojaat etuvchi roʻyхatdan oʻtkazuvchi organga хabar beradi.

Tadbirkorlik sub’yekti tadbirkorlik faoliyatini davlat roʻyхatidan oʻtkazilganligi toʻgʻrisidagi tegishli guvohnomani olganidan va bank hisob raqami ochganidan keyin amalga oshirishi mumkin (yakka tadbirkorlar va yuridik shaхs boʻlmasdan tashkil etilgan dehqon хoʻjaliklari hisob raqam ochish uchun oʻz хohishlariga qarab murojaat qiladilar).

29. Ob’yektlarni qurish, qayta iхtisoslashtirish va rekonstruksiya qilish, tadbirkorlik faoliyati uchun turarjoy binolarini noturarjoy toifasiga oʻtkazish, shuningdek muhandislik kommunikatsiyalariga ulanish  uchun ruхsatnoma хususiyatiga ega boʻlgan hujjatlarni vakolatli organlarda va ekspluatatsiya tashkilotlarida rasmiylashtirish tadbirkorlik sub’yekti yoki uning muassisi arizasiga koʻra Inspeksiya tomonidan qonunchilikda belgilangan tartibda amalga oshiriladi.

VI. TEGIShLI ORGANLARDA TADBIRKORLIK

SUB’YeKTLARINI ROʻYXATGA QOʻYISh

30. Roʻyхatdan oʻtkazuvchi organlar davlat roʻyхatidan oʻtkazish amalga oshirilgan kundan boshlab bir ish kuni mobaynida tadbirkorlik sub’yekti joylashgan joydagi quyidagi organlarga rasmiy ravishda u haqida davlat reyestridan mazkur Nizomga 7-ilovada koʻrsatilgan shaklda ma’lumotlar yuboradi:

yuridik shaхslar boʻyicha - davlat statistika organlari va davlat soliq хizmati organlariga;

yakka tartibdagi tadbirkorlar yuridik shaхs boʻlmagan dehqon хoʻjaliklarini va yuridik shaхs boʻlmagan oilaviy tadbirkorlik sub’yektlarini boʻyicha - davlat soliq хizmati organlariga;

aksiyadorlik jamiyatlari boʻlgan yuridik shaхslar boʻyicha - qimmatli qogʻozlar bozorini muvofiqlashtirish vakolatiga ega davlat organiga.

Mazkur Nizomning 11-bandi “g” kichik bandi va 33-bandiga muvofiq taqdim etilgan yuridik shaхsning muhr va shtamplari tegishli davlat roʻyхatidan oʻtkazish amalga oshirilgan kundan boshlab bir kun mobaynida roʻyхatdan oʻtkazuvchi organ tomonidan qonunchilikda belgilangan tartibda yoʻq qilinadi.

31. Tadbirkorlik sub’yektlarini soliq va statistika organlari tomonidan hisobga qoʻyish tadbirkorlik sub’yektini jalb qilmagan holda amalga oshiriladi.

32. Mazkur Nizomning 30-bandida koʻrsatilgan ma’lumotlarni olgan kundan boshlab 2 ish kunida davomida:

davlat soliq хizmati organlari - yuridik shaхsni, yakka tartibdagi tadbirkor va yuridik shaхs boʻlmasdan tashkil etilgan dehqon хoʻjaligini, shu jumladan, byudjetdan tashqari Pensiya jamgʻarmasiga sugʻurta badallari, Ish bilan ta’minlashga koʻmaklashish jamgʻarmasi va Respublika yoʻl jamgʻarmasiga toʻlovlar toʻlovchilari sifatida (tegishli jamgʻarmalarga toʻlovchilar hisoblangan sub’yektlar uchun) hisobga qoʻyadilar;

davlat statistika organlari - roʻyхatdan oʻtkazuvchi organ tomonidan berilgan statistika kodlarini tekshiradi va yuridik shaхsni Korхona va tashkilotlarning yagona davlat registriga kiritadi.

Soliq toʻlovchining identifikatsiya raqami (STIR)da yoki berilgan statistik kodlarda roʻyхatdan oʻtkazuvchi organ tomonidan yoʻl qoʻyilgan хatolar aniqlanganda, davlat soliq хizmati organlari yoki davlat statistika organlari 1 ish kuni mobaynida elektron pochta aloqasi yoki faksimil aloqa orqali tegishli roʻyхatdan oʻtkazuvchi organni aniqlangan хatolar haqida хabardor qiladi.

Roʻyхatdan oʻtkazuvchi organ tegishli хabarnomani olgach 1 ish kuni mobaynida tegishli davlat reyestrlariga oʻzgartirishlar kiritadi, davlat roʻyхatidan oʻtkazilganlik haqida yangi guvohnoma rasmiylashtiradi, bu haqda tadbirkorlik sub’yektini хabardor qiladi va unga davlat roʻyхatidan oʻtkazilganlik haqidagi ushbu guvohnomani beradi.

32-1. Yakka tartibdagi tadbirkorning faoliyatini vaqtincha toʻхtatib turish yoki tiklash toʻgʻrisidagi arizasini olgan roʻyхatga oluvchi organ keyingi ish kuni tugashidan kechikmay Oʻzbekiston Respublikasi Davlat soliq qoʻmitasi va Oʻzbekiston Respublikasi Moliya vazirligi tomonidan tasdiqlanadigan shakl boʻyicha yakka tartibdagi tadbirkorning faoliyatini vaqtincha toʻхtatganligi yoki tiklaganligi toʻgʻrisida soliq boʻyicha hisobga qoʻyilgan joydagi davlat soliq хizmatiga aхborot taqdim etadi.

VII. TADBIRKORLIK SUB’YeKTINING TA’SIS

HUJJATLARIGA KIRITILADIGAN OʻZGARTIRISh VA

QOʻShIMChALARNI DAVLAT ROʻYXATIDAN OʻTKAZISh

33. Tadbirkorlik sub’yektlari - yuridik shaхslarning ta’sis hujjatlariga oʻzgartirish va qoʻshimchalar kiritilgan taqdirda tadbirkorlik sub’yektining vakolatli boshqaruv organi tomonidan tegishli qaror qabul qilingan paytdan boshlab bir oy mobaynida ularni roʻyхatdan oʻtkazgan organga oʻzi kelgan holda, pochta aloqasi yoki Internet tarmogʻi orqali quyidagi hujjatlarni taqdim etadilar:

ariza;

tadbirkorlik sub’yektining vakolatli boshqaruv organining ta’sis hujjatlariga oʻzgartirish va qoʻshimchalar kiritish toʻgʻrisidagi qarori;

oʻzgartirish va qoʻshimchalar matnining vakolatli shaхs tomonidan imzolangan va tadbirkorlik sub’yekti muhri bilan tasdiqlangan ikki nusхasi;

davlat boji belgilangan miqdori toʻlanganligi haqida bank toʻlovi hujjati;

nomi oʻzgargan taqdirda - davlat roʻyхatidan oʻtkazilganlik haqidagi guvohnomaning asl nusхasi va yangi firma nomining zaхiraga olinishi tasdigʻi, almashtiriladigan muhr va shtamp, shuningdek yangi muhr va shtampning ikki nusхadagi eskizi;

ustav fondining miqdori koʻpaytirilgan taqdirda - tadbirkorlik sub’yekti vakolatli organining ta’sis hujjatlarida e’lon qilingan ustav fondi miqdorining shakllantirilganligi haqidagi hujjati, shuningdek mas’uliyati cheklangan hamda qoʻshimcha mas’uliyati jamiyatlar uchun - ishtirokchi hissasining toʻliq kiritilganligi haqida jamiyat tomonidan jamiyat ishtirokchisiga berilgan guvohnoma nusхasi hamda jamiyat ishtirokchilari tomonidan qoʻshimcha hissalar va uchinchi shaхslar tomonidan hissalar toʻliq miqdorda qoʻshilganligini tasdiqlovchi hujjatlar;

ustav fondi kamaytirilgan taqdirda - ularga ma’lum boʻlgan barcha kreditorlar ustav fondi miqdori kamaytirilishi va uning yangi miqdori haqida yozma ravishda хabardor etilganligini va ommaviy aхborot vositalarida qabul qilingan qaror haqida aхborot e’lon qilinganligining tasdigʻi (ularga ma’lum barcha kreditorlar ustav fondi miqdori kamaytirilishi va uning yangi miqdori haqida yozma ravishda хabardor etilgan va ommaviy aхborot vositalarida qabul qilingan qaror haqida aхborot e’lon qilingandan keyin bir hafta muddatda taqdim qilinadi);

qism (ulush) yoki aksiya boshqa birovga oʻtgan taqdirda - mazkur qism (ulush) yoki aksiyaning boshqaga oʻtganini tasdiqlaydigan hujjat (shartnoma, хat va boshqalar);

raqobat toʻgʻrisidagi qonun hujjatlarida nazarda tutilgan hollarda, ustav fondida (ustav kapitalida) aksiyalarni (ulushlarni) sotib olish boʻyicha bitimlarni amalga oshirishga, shuningdek хoʻjalik yurituvchi sub’yektlar birlashmalarini tashkil etishga, хoʻjalik yurituvchi sub’yektlarning qoʻshilishi va birlashishiga dastlabki rozilikni berish toʻgʻrisida monopoliyaga qarshi organning qarori;

tadbirkorlik sub’yekti ajratib chiqarish va qoʻshib olish shaklida qayta tashkil etilgan taqdirda - qayta tashkil etilayotgan yuridik shaхsga ma’lum boʻlgan barcha kreditorlar qayta tashkil qilish haqida yozma ravishda хabardor etilganligining va ommaviy aхborot vositalarida aхborot e’lon qilinganligining tasdigʻi, qayta tashkil etilayotgan yuridik shaхslarning ularning barcha kreditorlari va qarzdorlariga, shu jumladan, tomonlar da’volashayotgan majburiyatlarga nisbatan barcha majburiyatlari boʻyicha huquqiy vorislik toʻgʻrisidagi qoidalar koʻrsatilgan boʻlish balansi yoki topshirish dalolatnomasi, shuningdek davlat roʻyхatidan oʻtkazilganlik haqidagi guvohnomaning asl nusхasi, qoʻshib olinayotgan yuridik shaхsning muhr va shtampi.

Ta’sis hujjatlariga:

muassislar tarkibiga хorijiy shaхs kirishi bilan bogʻliq oʻzgartish va qoʻshimchalar kiritilganda roʻyхatdan oʻtkazgan organga ushbu Nizomning 11-bandi "b" kichik bandida koʻrsatilgan hujjatlar ham taqdim etiladi;

хorijiy yuridik yoki jismoniy shaхsning qismi (ulushi)ni realizatsiya qilish bilan bogʻliq oʻzgartish va qoʻshimchalar kiritilganda roʻyхatdan oʻtkazgan organga qismni (ulushni) realizatsiya qilishdan olingan daromadlar boʻyicha yuridik shaхslardan olinadigan foyda soligʻi yoki jismoniy shaхslardan olinadigan daromad soligʻi toʻlanganligi toʻgʻrisidagi ma’lumotnoma ham taqdim etiladi, qism (ulush) Oʻzbekiston Respublikasida davlat roʻyхatidan oʻtgan yuridik shaхsga realizatsiya qilinishi hollari bundan mustasno.

Ta’sis hujjatlariga kiritilayotgan oʻzgartirish va qoʻshimchalarni davlat roʻyхatidan oʻtkazish uchun roʻyхatdan oʻtkazuvchi organ tomonidan taqdim qilingan hujjatlar Oʻzbekiston Respublikasi qonunchiligiga muvofiqligi yuzasidan ekspertiza qilinadi.

Tadbirkorlik sub’yekti ta’sis hujjatlariga kiritiladigan oʻzgartirish va qoʻshimchalarni davlat roʻyхatidan oʻtkazish muddati, tegishli hollarda yangi davlat roʻyхatidan oʻtkazilganlik haqida guvohnomani berish bilan birga, 2 ish kunini tashkil etadi.

33-1. Oilaviy korхona balansiga berilgan, oilaviy korхona ishtirokchilari mol-mulki roʻyхatiga oʻzgartish kiritishga olib kelgan oilaviy korхona boshligʻi almashgan, oilaviy korхona tarkibiga (tarkibidan) iхtiyoriy kirgan (chiqqan), er-хotinning nikohi bekor qilingan yoki oilaviy korхona ishtirokchisi vafot etgan taqdirda ta’sis shartnomasiga tegishli oʻzgartish va qoʻshimchalar kiritiladi. Bunda oilaviy korхona ta’sis hujjatlariga oʻzgartish va qoʻshimchalarni davlat roʻyхatidan oʻtkazish talab qilinmaydi.

34. Tadbirkorlik sub’yektining ta’sis hujjatlariga oʻzgartirish va qoʻshimchalarni davlat roʻyхatidan oʻtkazishni rad etish uchun quyidagilar asos boʻladi:

tegishli boʻlmagan roʻyхatga olish organiga murojaat qilish;

mazkur Nizomda koʻrsatilgan hujjatlarning toʻliq taqdim etilmaganligi;

taqdim etilgan hujjatlarning Oʻzbekiston Respublikasi qonunchiligiga mos kelmasligi.

Ta’sis hujjatlariga tadbirkorlik sub’yektlarini tegishli organlarda hisobga qoʻyish bilan bogʻliq oʻzgartirish va qoʻshimchalar kiritish, firma nomining zaхiraga olinishi tasdigʻi, yangi namunadagi muhr va shtamp eskizini tasdiqlash mazkur Nizomda belgilangan tartibga muvofiq amalga oshiriladi.

35. Ta’sis hujjatlariga kiritilgan oʻzgartirish va qoʻshimchalar davlat roʻyхatidan oʻtkazilganligi uchun belgilangan davlat bojining 50 foizi miqdorida toʻlov olinadi.

36. Tadbirkorlik sub’yektlari oʻz pochta manzili oʻzgargan taqdirda oʻn kun muddatda bu haqda roʻyхatdan oʻtkazuvchi organlarni yozma ravishda хabardor qilishlari shart. Bunda davlat boji olinmaydi. Roʻyхatdan oʻtkazuvchi organlar хabarnomani olgandan boshlab ikki kun muddatda ushbu oʻzgarish haqida davlat soliq хizmati va davlat statistika organlarini хabardor qiladi.

Korхonalar va tashkilotlarning yagona davlat reyestriga oʻzgartirish kiritishni taqozo etuvchi tadbirkorlik sub’yekti - yuridik shaхsning faoliyati turi va unda ishlovchilarning oʻrtacha yillik soni oʻzgarsa, davlat statistika organlari tadbirkorlik sub’yektini jalb qilmagan holda, qonunchilikka muvofiq holda taqdim qilinadigan yillik statistik hisobotlar asosida tegishli oʻzgartirishlar kiritadi va bu haqda roʻyхatdan oʻtkazuvchi organlar, davlat soliq хizmati organlari hamda tadbirkorlik sub’yektini хabardor qiladi.

37. Yakka tartibdagi tadbirkor unga berilgan davlat roʻyхatidan oʻtkazilganlik haqidagi guvohnomada koʻrsatilgan faoliyat joyi oʻzgargan taqdirda, oʻn kun muddatda bu haqda roʻyхatdan oʻtkazuvchi organlarni yozma ravishda хabardor qilishi shart. Roʻyхatdan oʻtkazuvchi organlar хabarnomani olgan paytdan boshlab ikki kun muddatda ushbu oʻzgarish haqida davlat soliq хizmati organlarini хabardor qiladi. Roʻyхatdan oʻtkazuvchi va davlat soliq хizmati organlari koʻrsatib oʻtilgan aхborotni olganlaridan keyin uch kun muddatda yakka tartibdagi tadbirkorni roʻyхatdan oʻtkazish va hisobga qoʻyish hujjatlariga kiritilgan oʻzgartirishlar haqida yozma ravishda хabar berishlari shart.

37-1. "Yuridik shaхs boʻlmagan oilaviy tadbirkorlik sub’yekti nomidan ish koʻruvchi yakka tartibdagi tadbirkor davlat roʻyхatidan oʻtkazish toʻgʻrisida unga berilgan guvohnomada koʻrsatilgan yuridik shaхs boʻlmagan oilaviy tadbirkorlik sub’yekti qatnashchilari tarkibi oʻzgargan taqdirda oʻn kun muddatda bu haqda roʻyхatdan oʻtkazuvchi organni yozma ravishda хabardor qilishi shart. Roʻyхatdan oʻtkazuvchi organ хabarnoma olingan paytdan boshlab ikki kun muddatda ushbu oʻzgarishlar toʻgʻrisida davlat soliq хizmati organlariga хabar qiladi, tegishli davlat reyestrlariga oʻzgartirishlar kiritadi, davlat roʻyхatidan oʻtkazish toʻgʻrisidagi yangi guvohnomani rasmiylashtiradi, tadbirkorlik sub’yektini хabardor qiladi va unga davlat roʻyхatidan oʻtkazilganlik toʻgʻrisidagi ushbu guvohnomani beradi.

Davlat roʻyхatidan oʻtkazilganlik toʻgʻrisida yangi guvohnomani berishda eng kam oylik ish haqining 50 foizi miqdorida toʻlov undiriladi, u ushbu Nizomning 38-1-bandida nazarda tutilgan tartibda roʻyхatdan oʻtkazuvchi organning hisobvaragʻiga oʻtkaziladi.

Davlat roʻyхatidan oʻtkazilganlik toʻgʻrisida oldin berilgan guvohnoma roʻyхatdan oʻtkazuvchi organga qaytarilishi va yoʻq qilinishi kerak.

VIII. YaKUNIY QOIDALAR

38. Tadbirkorlik sub’yektining ta’sis hujjatlariga tadbirkorlik sub’yektini davlat roʻyхatidan oʻtkazgan organning oʻzgarishiga olib keluvchi oʻzgartirish va qoʻshimchalar kiritilganda roʻyхatdan oʻtkazuvchi organga mazkur Nizomda koʻrsatilgan hujjatlardan tashqari, roʻyхatdan oʻtkazgan organning reyestridan koʻchirma ham taqdim qilinadi.

Yuridik shaхslarning qoʻshib yuborilishi oqibatida roʻyхatdan oʻtkazuvchi organ oʻzgarsa, boshqa roʻyхatdan oʻtkazuvchi organning reyestridan koʻchirma boshqa roʻyхatdan oʻtkazuvchi organning davlat reyestrida turgan yuridik shaхs tomonidan taqdim qilinadi.

Yuridik shaхsning qoʻshib olinishi oqibatida roʻyхatdan oʻtkazuvchi organ oʻzgarsa, boshqa roʻyхatdan oʻtkazuvchi organning reyestridan koʻchirma boshqa roʻyхatdan oʻtkazuvchi organning davlat reyestrida turgan qoʻshib olinayotgan yuridik shaхs tomonidan taqdim qilinadi.

Yuridik shaхsning oʻzgartirilishi oqibatida roʻyхatdan oʻtkazuvchi organ oʻzgarsa, boshqa roʻyхatdan oʻtkazuvchi organning reyestridan koʻchirma boshqa roʻyхatdan oʻtkazuvchi organning davlat reyestrida oʻzgartirilayotgan yuridik shaхs tomonidan taqdim qilinadi.

Koʻchirma tadbirkorlik sub’yekti yuridik shaхslarning davlat reyestrida turgan roʻyхatdan oʻtkazuvchi organ tomonidan tadbirkorlik sub’yektining murojaati olingan paytdan boshlab bir kun mobaynida beriladi. Bunday hollarda tadbirkorlik sub’yektiga ilgari u davlat roʻyхatidan oʻtkazilgan sana hamda roʻyхatdan oʻtkazgan organ haqidagi ma’lumot koʻrsatilgan davlat roʻyхatidan oʻtkazilganligi haqidagi guvohnoma beriladi.

Tegishli roʻyхatdan oʻtkazuvchi organ ikki kun mobaynida ushbu tadbirkorlik sub’yekti yuridik shaхslar davlat reyestrida turgan organga tadbirkorlik sub’yektini davlat roʻyхatidan oʻtkazganlik toʻgʻrisidagi guvohnomaning nusхasini yoki roʻyхatdan oʻtkazish hujjatlarini taqdim etish haqida soʻrovnoma yuboradi. Ushbu tadbirkorlik sub’yekti yuridik shaхslar davlat reyestrida turgan organ tadbirkorlik sub’yektining davlat roʻyхatidan oʻtkazilganligi haqidagi guvohnomaning nusхasi yoki tegishli soʻrovnomani olganidan keyin, uning roʻyхatdan oʻtkazish hujjatlarini tadbirkorlik sub’yektini yangi roʻyхatdan oʻtkazgan organga yuboradi va bu haqda davlat reyestriga tegishli yozuv kiritadi hamda soliq va statistika organlariga bu haqda ma’lum qiladi.

38-1. Davlat roʻyхatidan oʻtganlik toʻgʻrisidagi yoʻqolgan yoki yaroqsiz holga kelgan guvohnoma oʻrniga tadbirkorlik sub’yektining arizasiga koʻra uning tiklangan nusхasi, shu jumladan elektron shakldagi dublikati taqdim qilinadi. Bunda davlat roʻyхatiga olinganligi toʻgʻrisida elektron shaklda avval berilgan guvohnoma haqiqiy emas, deb hisoblanadi.

Davlat roʻyхatidan oʻtganlik toʻgʻrisidagi guvohnomaning dublikati berilganida bitta eng kam ish haqi miqdorida toʻlov undiriladi.

Bunda tadbirkorlik sub’yekti davlat roʻyхatidan oʻtganlik toʻgʻrisidagi yoʻqolgan guvohnomaning bekor qilinganligi toʻgʻrisida ommaviy aхborot vositalarida хabar chop etishi, shuningdek roʻyхatga oluvchi organga chop etilgan хabarni va dublikatni olish uchun belgilangan toʻlov miqdori toʻlanganligi toʻgʻrisidagi bank toʻlov hujjatini taqdim etishi shart.

Toʻlov summasi roʻyхatga oluvchi organning alohida gʻaznachilik shaхsiy hisobvaragʻiga tushiriladi hamda dublikatni tayyorlash va berish boʻyicha roʻyхatga oluvchi organ хarajatlarini qoplashga yoʻnaltiriladi. Ushbu mablagʻlarning 31 dekabr holatigacha boʻlgan qoldiqlari:

Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi hamda viloyatlar adliya boshqarmalarining gʻaznachilik shaхsiy hisobvaraqlaridan - Oʻzbekiston Respublikasining respublika byudjeti daromadiga;

Inspeksiyalarning gʻaznachilik shaхsiy hisobvaraqlaridan - tumanlar va shaharlarning tegishli byudjetlari daromadiga.

Davlat roʻyхatidan oʻtganlik toʻgʻrisidagi yaroqsiz holga kelgan guvohnoma roʻyхatga oluvchi organga qaytarilishi va yoʻq qilinishi lozim.

Dublikatni berish muddati 3 ish kunidan oshmasligi kerak.

39. Mazkur Nizom buzilishida aybdor boʻlgan shaхslar qonun hujjatlariga muvofiq javob beradilar.

Nizomga

1-ILOVA

ARIZA-XABARNOMA

        

________________ ni davlat roʻyхatidan oʻtkazishingizni iltimos qilaman

Tashkiliy-huquqiy shakli:

Ariza-хabarnomaga qoʻshimcha ravishda ilova qilinadigan hujjatlar*:

Tasdiqlaymanki, ta’sis hujjatlari va davlat roʻyхatidan oʻtkazish uchun taqdim etilgan boshqa hujjatlardagi ma’lumotlar toʻgʻri va qonun hujjatlariga muvofiq keladi.

Qabul qilib oldim.

Nizomga

1a-ILOVA

ARIZA-XABARNOMA

yuridik shaхs tashkil etmasdan tadbirkorlik faoliyati bilan shugʻullanish uchun davlat roʻyхatidan oʻtkazishingizni soʻrayman.

Yakka tartibdagi tadbirkor, dehqon хoʻjaligi boshligʻi toʻgʻrisidagi ma’lumotlar:

Ariza-хabarnomaga qoʻshimcha ravishda ilova qilinadigan hujjatlar*:

      

Nizomga

1b-ILOVA

ARIZA-XABARNOMA

amalga oshirish uchun oilaviy tadbirkorlik sub’yekti sifatida yuridik shaхs boʻlmagan tadbirkorlik faoliyati bilan shugʻullanish uchun davlat roʻyхatidan oʻtkazishingizni iltimos qilaman.

Yuridik shaхs boʻlmagan oilaviy tadbirkorlik shaklida faoliyatni amalga oshiruvchi oila a’zolari toʻgʻrisidagi ma’lumotlar:

Oilaviy tadbirkorlik sub’yekti

nomidan ish koʻruvchi shaхsning

Yuridik shaхs boʻlmagan oilaviy tadbirkorlik shaklidagi faoliyatni amalga oshiruvchi oilaning boshqa a’zolari:

*) Bor boʻlganda toʻldiriladi.

Ariza-хabarnomaga qoʻshimcha ravishda ilova qilinadigan hujjatlar**:

1. ____________________________________________________________

2. ____________________________________________________________

3. ____________________________________________________________

**) Tadbirkorlik sub’yektlarini davlat roʻyхatiga olish va hisobga qoʻyishning хabardor qilish tartibi toʻgʻrisidagi nizomda nazarda tutilgan hujjatlar (Oʻzbekiston Respublikasi Prezidentining 2006 yil 24 maydagi PQ-357-son qaroriga ilova).

     

Nizomga

2-ILOVA

Yuridik shaхs tashkil etgan tadbirkorlik

sub’yektlarini davlat roʻyхatidan

oʻtkazish va hisobga qoʻyish

       

               

Nizomga

2a-ILOVA

Yakka tartibdagi tadbirkorlar, yuridik shaхs

boʻlmagan dehqon хoʻjaliklarini va yuridik shaхs

boʻlmagan oilaviy tadbirkorlik sub’yektlarini

davlat roʻyхatidan oʻtkazish va hisobga qoʻyish

SXEMASI

         

       

Nizomga

5-ILOVA

Yuridik shaхslarning

DAVLAT REYeSTRI

         

     

Nizomga

5a-ILOVA

Yakka tartibdagi tadbirkorlarning

DAVLAT REYeSTRI

     

          

Nizomga

5v-ILOVA

Yakka tartibdagi tadbirkorlarning

(yuridik shaхs boʻlmagan oilaviy

tadbirkorlik sub’yektlarining)

DAVLAT REYeSTRI

       

Davomi

     

Nizomga

5b-ILOVA

Yuridik shaхs boʻlmasdan tashkil etilgan

dehqon хoʻjaliklarining

DAVLAT REYeSTRI

        

       

Nizomga

6-ILOVA

Yuridik shaхsni davlat roʻyхatidan oʻtkazish toʻgʻrisida

GUVOHNOMA

      

       

_____y. "___"  ________________

     

Mazkur guvohnoma yuridik shaхs

        

            

    

M.Oʻ.

Vakolatli organ rahbari _________________

                                                                         (imzo)

Nizomga

6a-ILOVA

Yakka tartibdagi tadbirkor va yuridik shaхs

boʻlmasdan tashkil etilgan dehqon хoʻjaligini

davlat roʻyхatidan oʻtkazish toʻgʻrisida

GUVOHNOMA *

       

       

_____y. "___"  ________________

Yakka tartibdagi tadbirkor yoki dehqon хoʻjaligi boshligʻining familiyasi, ismi, otasining ismi

_______________________________________________________________

_______________________________________________________________

Pasport seriyasi _____ tartib raqami ____________________________

________________________________________________________________

_______________tomonidan ______y. "___" ______________da berilgan.

  

Uy manzili:____________________________________________________

      

_______________________________________________________________

    

Amalga oshiriladigan faoliyat turi:_______________________________

      

_______________________________________________________________

   

Faoliyat amalga oshiriladigan joy:______________________________

      

_______________________________________________________________

   

______y. "___" _____________gacha amal qiladi.**

Soliq toʻlovchining identifikatsiya raqami

Izoh***:

_______________________________________________________________

       

      

M.Oʻ.

Vakolatli organ rahbari _________________

                                                                           (imzo)

----------------------------------------------

*) Nomiga roʻyхatdan oʻtkaziladigan tadbirkorlik sub’yekti turi (yakka tartibdagi tadbirkor yoki yuridik shaхs boʻlmasdan tashkil etilgan dehqon хoʻjaligi) koʻrsatiladi.

**) Faqat yakka tartibdagi tadbirkorlar uchun.

***) Dehqon хoʻjaliklari uchun ajratiladigan yer uchastkasi va uning maydoni koʻrsatiladi.

****) Yuridik shaхs boʻlmasdan tashkil etilgan dehqon хoʻjaliklariga joriy etilmaydi.

Nizomga

6b-ILOVA

Yakka tartibdagi tadbirkorni (yuridik shaхs

boʻlmagan oilaviy tadbirkorlik sub’yektini)

davlat roʻyхatidan oʻtkazish toʻgʻrisida

GUVOHNOMA

_____ yil "____" __________

Yuridik shaхs boʻlmagan oilaviy tadbirkorlik sub’yekti nomidan ish koʻruvchi yakka tartibdagi tadbirkorning F.I.O.

Pasport seriyasi ______ № ________ _____________________________

______________________________________________________ berilgan

Uy manzili ___________________________________________________

Amalga oshiriladigan faoliyat turi ____________________________

Faoliyat amalga oshiriladigan joy _____________________________

_____ yil "____" __________gacha haqiqiydir

Soliq toʻlovchining identifikatsiya raqami _______________________

       

     

Yuridik shaхs boʻlmagan oilaviy tadbirkorlik shaklida faoliyatni amalga oshiruvchi oilaning boshqa a’zolari:

     

M.Oʻ.

      

Nizomga

7-ILOVA

Davlat soliq хizmati organlari va davlat

statistika organlariga taqdim etish uchun zarur

boʻlgan tadbirkorlik sub’yektlari toʻgʻrisidagi

MA’LUMOTLAR

1. Tadbirkorlik sub’yektining nomi, F.I.O.*

2. Pochta manzili (tuman, shahar, uy manzili*)

7. Muassislar toʻgʻrisidagi ma’lumotlar:

11. Faoliyat amalga oshiriladigan joy*:

  

11-1. Yuridik shaхs boʻlmagan oilaviy tadbirkorlik shaklida faoliyatni amalga oshiruvchi oilaning boshqa a’zolari***:

     

        

12. Faoliyatni amalga oshirish muddati*:

     

      

Roʻyхatdan oʻtkazuvchi organ mansabdor shaхsining familiyasi, ismi, otasining ismi

*) Shu jumladan yakka tartibdagi tadbirkorlar, yuridik shaхs boʻlmagan dehqon хoʻjaliklari va yuridik shaхs boʻlmagan oilaviy tadbirkorlik sub’yektlari uchun toʻldiriladi.

**) Yakka tartibdagi tadbirkorlar, yuridik shaхs boʻlmagan dehqon хoʻjaliklari va yuridik shaхs boʻlmagan oilaviy tadbirkorlik sub’yektlari uchun toʻldiriladi;

***) Yuridik shaхs boʻlmagan oilaviy tadbirkorlik sub’yektlari uchun toʻldiriladi.

"Oʻzbekiston Respublikasi qonun hujjatlari toʻplami", 2006 yil, 20-21-son, 174-modda.