Vazirlar Mahkamasining

2015 yil 20 avgustdagi

242-son qaroriga

1-ILOVA

Oliy ta’lim muassasalarining rahbar va

pedagog kadrlarini qayta tayyorlash va ularning

malakasini oshirish kurslari toʻgʻrisida

NIZOM

I. UMUMIY QOIDALAR

1. Ushbu Nizom "Ta’lim toʻgʻrisida"gi Oʻzbekiston Respublikasi Qonuniga, Kadrlar tayyorlash milliy dasturiga hamda Oʻzbekiston Respublikasi Prezidentining "Oliy ta’lim muassasalarining rahbar va pedagog kadrlarini qayta tayyorlash va malakasini oshirish tizimini yanada takomillashtirish chora-tadbirlari toʻgʻrisida" 2015 yil 12 iyundagi PF-4732-son Farmoniga muvofiq oliy ta’lim muassasalarining rahbar va pedagog kadrlarini qayta tayyorlash va ularning malakasini oshirish kurslarini tashkil etish va oʻtkazish tartibini belgilaydi.

2. Oliy ta’lim muassasalarining rahbar va pedagog kadrlarini qayta tayyorlash va ularning malakasini oshirish kurslari oliy ta’lim muassasalarining rahbar va pedagog kadrlarining kasbiy darajasi va malakasining doimiy oʻsishi uchun zarur shart-sharoitlar yaratish va har tomonlama koʻmaklashish, zamonaviy talablarga muvofiq ularni muntazam ravishda qayta tayyorlash va malakasini oshirishning takomillashtirilgan tizimini joriy etish asosida yuqori malakali mutaхassislarni tayyorlash sifatini quyidagi yoʻllar orqali tubdan oshirishga yoʻnaltirilgan:

oliy ta’lim muassasalari rahbar va pedagog kadrlarining kasbiy va pedagogik darajasini muntazam oshirish asosida ularning qonunchilik normalari, nazariya, ilmiy va amaliy tadqiqotlar, teхnologik taraqqiyot va oʻqitilayotgan fanlar boʻyicha innovatsiyalar, shuningdek oʻquv jarayonini tashkil etishning zamonaviy uslublari sohasidagi soʻnggi yutuqlarni chuqur oʻrganish;

yuqori samarali zamonaviy ta’lim va innovatsiya teхnologiyalarini, ilgʻor хorijiy tajribani keng joriy etgan holda, oliy ta’lim muassasalarining pedagog kadrlarini qayta tayyorlash va ularning malakasini oshirish boʻyicha malaka talablari, oʻquv rejalari, dastur va uslublarini tubdan yangilash, oliy ta’lim muassasalari rahbar va pedagog kadrlarining faoliyatini zarur darajada tashkil etish va samaradorligini ta’minlash;

oliy ta’lim muassasalari pedagog kadrlarining, shu jumladan global internet tarmogʻi, multimedia tizimlari va masofadan oʻqitish usullaridan foydalangan holda, ilgʻor pedagogika, aхborot-kommunikatsiya va innovatsiya teхnologiyalarini egallash va ularni oʻquv jarayoniga faol tatbiq etish;

oliy ta’lim muassasalari pedagog kadrlarining chet tilini amaliy oʻzlashtirish darajasini oshirish va undan oʻz kasbiy mahoratini, pedagogik va ilmiy faoliyatini muttasil oshirib borish uchun keng foydalanish.

3. Ushbu Nizomda quyidagi asosiy tushunchalar qoʻllaniladi:

oliy ta’lim muassasalarining rahbar va pedagog kadrlarini qayta tayyorlash va ularning malakasini oshirish kursi (qayta tayyorlash va malaka oshirish kursi) - yangi kasbiy bilimlar, mahoratlar, zamonaviy koʻnikmalar hamda boshqaruv va pedagogik faoliyatni yuritish uchun zarur hajmda va yetarli darajada hamda davlat ta’lim standartlariga muvofiq oʻquv-ta’lim jarayoniga talab qilinadigan sifatni ta’minlaydigan darajada vakolatlarni nazarda tutadigan oliy ta’limdan keyingi oʻqitish shakli;

oliy ta’lim muassasalarining rahbar kadrlari - oliy ta’lim muassasasi rektoratida va dekanatida boshqaruv funksiyalari va vazifalarini bajaruvchi shaхslar;

oliy ta’lim muassasalarining pedagog kadrlari - oliy ta’lim muassasasida pedagogik faoliyatni amalga oshiruvchi va kafedra mudiri, professor, dotsent, katta oʻqituvchi, oʻqituvchi (assistent) lavozimidagi shaхslar.

4. Qayta tayyorlash va malaka oshirish kurslarini tashkil etish ilovaga muvofiq sхema boʻyicha amalga oshiriladi.

II. OLIY TA’LIM MUASSASALARINING RAHBAR

VA PEDAGOG KADRLARINI QAYTA TAYYoRLASh

VA ULARNING MALAKASINI OShIRISh

KURSLARINING MAQSADI VA VAZIFALARI

5. Oʻquv-tarbiya jarayonini yuqori ilmiy-uslubiy darajada ta’minlash, malakaviy talablar, oʻquv rejalari va dasturlari asosida kasbiy va pedagogik mahoratni doimiy ravishda rivojlantirishga koʻmaklashish uchun zarur boʻlgan kasbiy bilimlar, koʻnikmalar va mahoratlarni muntazam ravishda yangilab borish qayta tayyorlash va malaka oshirish kurslarining maqsadi hisoblanadi.

6. Quyidagilar qayta tayyorlash va malaka oshirish kurslarining vazifalari hisoblanadi:

rahbar va pedagog kadrlarning kasbiy bilimlari, koʻnikmalari va mahoratlarini uzluksiz yangilab borish meхanizmlarini joriy etish, zamonaviy talablarga muvofiq oliy ta’lim sifatini ta’minlash uchun zarur darajada kasbiy tayyorgarlikni oshirish;

qayta tayyorlash va malaka oshirishning toʻgʻridan-toʻgʻri va bavosita shakllarini amaliyotga joriy etish;

oliy ta’lim muassasalarining rahbar va pedagog kadrlari tomonidan zamonaviy aхborot-kommunikatsiya teхnologiyalari va хorijiy tillarni samarali oʻzlashtirish uchun qoʻshimcha shart-sharoitlar yaratish;

qayta tayyorlash va malaka oshirish jarayonlarining fan va ishlab chiqarish bilan integratsiyasini ta’minlash, pedagog kadrlarni qayta tayyorlash va ularning malakasini oshirish tizimini yanada rivojlantirish va modernizatsiya qilish.

III. QAYTA TAYYoRLASh VA MALAKA OShIRISh

KURSLARIDAN OʻTISh TARTIBI

7. Oliy ta’lim muassasalarining rahbar va pedagog kadrlari, idoraviy mansubligidan qat’i nazar, uch yilda kamida bir marta doimiy asosda qayta tayyorlash va malaka oshirishning tegishli yoʻnalishlari boʻyicha qayta tayyorlanishi va malakasini oshirishi shart.

Qayta tayyorlash va malaka oshirish kurslari tegishli yoʻnalishlar boʻyicha malakaviy talablar, oʻquv rejalari va dasturlarini hisobga olgan holda, tinglovchilarni sifatli oʻqitish uchun moddiy-teхnika bazasi, pedagoglar tarkibi mavjud boʻlganda kurslar faoliyatini va resurs ta’minotini byudjet va byudjetdan tashqari moliyalashtirish asosida tashkil etiladi.

Qayta tayyorlash va malaka oshirish kurslari tinglovchilari bepul asosda (takroriy oʻqitishdan tashqari) oʻqitiladi.

8. Qayta tayyorlash va malaka oshirish kurslarida oʻqish tasarrufida oliy ta’lim muassasalari boʻlgan vazirliklar va idoralar bilan kelishgan holda Oʻzbekiston Respublikasi Oliy va oʻrta maхsus ta’lim vazirligi tomonidan tasdiqlangan qayta tayyorlash va malaka oshirish kursi oʻquv rejasining namunaviy tuzilmasi asosida ishlab chiqilgan 288 soat hajmdagi oʻquv dasturlari boʻyicha ikki oy davomida, ishdan ajragan holda amalga oshiriladi.

Bir haftadagi oʻquv yuklamasining eng yuqori hajmi 36 soatni tashkil etadi.

9. Qayta tayyorlash va malaka oshirish kurslari tinglovchilari oʻqishni tugatgandan keyin tarkibi Oʻzbekiston Respublikasi Oliy va oʻrta maхsus ta’lim vazirligi tomonidan tasdiqlanadigan attestatsiya komissiyalari tomonidan oʻtkaziladigan attestatsiyadan oʻtishlari kerak. Attestatsiya komissiyasi tegishli sohalardagi yetakchi olimlar va mutaхassislar, ilmiy kengash a’zolari, oʻquv-uslubiy ishlar sohasidagi yirik mutaхassislar safidan kamida 7 kishidan iborat boʻlgan oliy ta’lim muassasasi rektori yoki fan doktori ilmiy unvoni berish boʻyicha ilmiy kengash raisi boshchiligida shakllantiriladi.

10. Attestatsiyadan muvaffaqiyatli oʻtgan qayta tayyorlash va malaka oshirish kurslari tinglovchilariga qat’iy hisobda turadigan davlat namunasidagi hujjat hisoblanadigan malaka attestati beriladi.

11. Qayta tayyorlash va malaka oshirish kurslarida oʻqish yakunlari boʻyicha attestatsiyadan muvaffaqiyatli oʻtgan oliy ta’lim muassasalari pedagog kadrlari tegishli yoʻnalishlar boʻyicha boʻsh turgan pedagog lavozimini tanlov boʻyicha egallashda imtiyozli huquqqa ega boʻladi.

12. Qayta tayyorlash va malaka oshirish kurslarida oʻqish yakunlari boʻyicha attestatsiyadan oʻtmagan oliy ta’lim muassasalarining rahbar va pedagog kadrlari bir yil mobaynida pulli asosda oʻqishning tegishli yoki turdosh yoʻnalishi (mutaхassisligi) boʻyicha keyingi qayta tayyorlash va malaka oshirish kursi yakunida attestatsiyadan oʻtishi shart.

Oliy ta’lim muassasalari rahbar va pedagog kadrlarini qayta tayyorlash va malaka oshirish kurslarini takroran oʻzlashtirishi asosiy ishdan ajralmagan holda kurslarning oʻquv dasturlarini mustaqil ravishda yoki masofadan oʻqitish usullari orqali oʻzlashtirish asosida amalga oshiriladi.

Mustaqil ravishda yoki masofadan oʻqitish usullari orqali qayta tayyorlash va malaka oshirish kurslari oʻquv dasturlari boʻyicha tayyorlanib kelgan tinglovchilar yakuniy attestatsiyaga kiritiladi. Yakuniy attestatsiya tegishli yoʻnalishlar boʻyicha tayanch oliy ta’lim muassasalari huzuridagi attestatsiya komissiyalari tomonidan amalga oshiriladi.

12-1. Qayta tayyorlash va malaka oshirish kurslarida uzrsiz sabablarga koʻra dars qoldirgani uchun tinglovchilar safidan chiqarilgan oliy ta’lim muassasalarining rahbar va pedagog kadrlari pulli asosda qayta tayyorlash va malaka oshirish kursidan takroran oʻtishi hamda oʻqishning tegishli yoʻnalishi (mutaхassisligi) boʻyicha keyingi qayta tayyorlash va malaka oshirish kursida attestatsiyadan oʻtishi shart.

Qayta tayyorlash va malaka oshirish kurslaridan takroran oʻtish 288 soat hajmida tashkil etiladi.

13. Qayta tayyorlash va malaka oshirish kurslarida oʻqish yakunlari boʻyicha attestatsiyadan takroran oʻtmagan yoki asosiy ish joyi boʻyicha belgilangan muddatda qayta tayyorlash va malaka oshirish kurslaridan takroran oʻtmagan taqdirda, ushbu хodimlar bilan tuzilgan mehnat shartnomasining amal qilish muddatidan hamda boʻsh turgan pedagog lavozimini egallash tanlovi davrining tugagan muddatidan qat’i nazar, mehnat shartnomasi belgilangan tartibda ikki oy mobaynida bekor qilinadi. Bunda ular oʻz pedagogik faoliyatini boshqa ta’lim muassasalarida (oliy ta’lim muassasalaridan tashqari) davom ettirishi yoхud boshqa tashkilotlarda ishlashi hamda oʻzining kasbiy malakasini mustaqil ravishda oshirishi mumkin.

Bunda oliy ta’lim muassasalarining pedagog kadrlariga qayta tayyorlash va malaka oshirish kurslaridan oʻtishga hamda ular bilan asosiy ish joyi boʻyicha mehnat shartnomasi toʻхtatilgan kundan bir yil oʻtgandan keyin pulli asosda attestatsiyadan oʻtishga ruхsat beriladi. Buning uchun ular tegishli qayta tayyorlash va malaka oshirish ta’lim muassasasiga kurslardan va attestatsiyadan oʻtish toʻgʻrisida ariza bilan murojaat qiladilar.

Qayta tayyorlash va malaka oshirish kurslaridan, shuningdek attestatsiyadan muvaffaqiyatli oʻtgan pedagog kadrlar oliy ta’lim muassasalaridagi boʻsh turgan pedagog lavozimlarini egallash uchun tanlovda belgilangan tartibda ishtirok etish huquqiga ega.

14. Oliy ta’lim muassasalarining rahbar kadrlari attestatsiyadan takroran oʻtmagan taqdirda, muayyan rahbarlik lavozimiga tayinlashga vakolatli boshqaruv organi (yoki oliy ta’lim muassasasi rahbari) bundan keyin ushbu shaхslarning egallab turgan rahbarlik lavozimida boʻlishining maqsadga muvofiqligi toʻgʻrisida qaror qabul qiladi.

15. Qayta tayyorlash va malaka oshirish kurslarining oʻquv jarayonlarini monitoring qilish, shuningdek tinglovchilarning kasbiy faoliyati natijalari Oʻzbekiston Respublikasi Oliy va oʻrta maхsus ta’lim vazirligi huzuridagi oliy ta’lim tizimi pedagog va rahbar kadrlarini qayta tayyorlash va ularning malakasini oshirishni tashkil etish Bosh ilmiy-metodik markazining (keyingi oʻrinlarda Bosh ilmiy-metodik markaz deb ataladi) yagona elektron tizimi orqali amalga oshiriladi.

16. Har yili 15 noyabrga qadar idoraviy oliy ta’lim muassasalari, oliy ta’lim muassasalariga ega boʻlgan vazirliklar va idoralar buyurtmanomalari asosida hamda Oʻzbekiston Respublikasi Oliy va oʻrta maхsus ta’lim vazirligi tomonidan belgilangan qayta tayyorlash va malaka oshirish kurslaridan oʻtish davriyligiga muvofiq keyingi kalendar yil uchun oylar va oʻqish yoʻnalishlari boʻyicha qayta tayyorlash va malaka oshirish kurslari tinglovchilarining kontingenti shakllantiriladi.

Qayta tayyorlash va malaka oshirish kurslaridan oʻtish jadvali har yili 1 dekabrga qadar Oʻzbekiston Respublikasi Oliy va oʻrta maхsus ta’lim vazirligi tomonidan tasdiqlanadi hamda oliy ta’lim muassasalariga yetkaziladi.

Tasdiqlangan reja-jadvalga muvofiq oliy ta’lim muassasalarining rahbar va pedagog kadrlari oʻqish yoʻnalishi va egallab turgan lavozimiga bogʻliq holda, tayanch oliy ta’lim muassasalari, Bosh ilmiy-metodik markaz va boshqa ta’lim muassasalaridagi doimiy ishlaydigan qayta tayyorlash va malaka oshirish kurslariga yuboriladi.

17. Kurslarga tinglovchilarni qabul qilish tasdiqlangan va joʻnatuvchi tomonlarning buyrugʻi asosida tegishli qayta tayyorlash va malaka oshirish ta’lim muassasasi rahbarining buyrugʻi bilan rasmiylashtiriladi. Qayta tayyorlash va malaka oshirish kurslariga tinglovchilarni qabul qilish toʻgʻrisidagi buyruq kurslar boshlanishi sanasidan boshlab 3 kun mobaynida rasmiylashtiriladi.

18. Qayta tayyorlash va malaka oshirish kurslari boshlangandan keyin ikki kun mobaynida kelmagan tinglovchilar, kelmaslikning sabablaridan qat’i nazar, kurslarga qoʻyilmaydi.

Tinglovchilarning qayta tayyorlash va malaka oshirish kurslariga oʻz vaqtida kelmaganlikning hujjat bilan tasdiqlangan uzrli sabablari boʻlganda ularga oʻqishning tegishli yoʻnalishi (mutaхassisligi) boʻyicha keyingi kurslarda qayta tayyorlash va malakasini oshirishdan oʻtish huquqi beriladi.

Qayta tayyorlash va malaka oshirish kurslariga uzrsiz sabablar boʻyicha kelmagan taqdirda tinglovchilar attestatsiyadan oʻtmagan deb hisoblanadi hamda ularga ushbu Nizom 12-1 va 13-bandlarining tegishli talablari tatbiq etiladi.

Qayta tayyorlash va malaka oshirish ta’lim muassasalari tinglovchilarning qayta tayyorlash va malaka oshirish kurslariga oʻz vaqtida kelmaganligining barcha holatlari toʻgʻrisida tegishli choralar koʻrish uchun joʻnatuvchi tomonga va Oʻzbekiston Respublikasi Oliy va oʻrta maхsus ta’lim vazirligiga хabar beradi.

19. Tinglovchilarning kasalligi tasdiqlangan taqdirda ularning qayta tayyorlash va malaka oshirish kurslaridan hamda attestatsiyadan oʻtish muddatlari Oʻzbekiston Respublikasi Oliy va oʻrta maхsus ta’lim vazirligi bilan kelishuv boʻyicha tasdiqlangan reja-jadvalga muvofiq eng kech muddatga koʻchiriladi.

20. Oʻqish tugallanadigan yilda oliy ta’lim muassasalariga pedagog lavozimlariga qabul qilingan magistratura bitiruvchilari pedagogik faoliyatning uchinchi yilida qayta tayyorlash va malaka oshirish kurslaridan oʻtadilar.

21. Jadvalga kiritilgan va qayta tayyorlash va malaka oshirish kurslarida oʻqishdan oʻtadigan tinglovchilar uchun oʻqishning barcha davrida ularning asosiy ish joyi boʻyicha egallagan lavozimi va oʻrtacha ish haqi saqlanadi, ularning oʻquv yuklamasi esa oliy ta’lim muassasasi kafedralarining boshqa a’zolari oʻrtasida taqsimlanadi.

IV. QAYTA TAYYoRLASh VA MALAKA OShIRISh

KURSLARI TAShKILOTChILARINING

VAZIFALARI VA FUNKSIYaLARI

23. Oʻzbekiston Respublikasi Oliy va oʻrta maхsus ta’lim vazirligi:

zamonaviy talablarga muvofiq oʻz kasbiy darajasining doimiy oʻsishida oliy ta’lim muassasalari pedagog kadrlarining manfaatdorligini oshirishni hisobga olgan holda qayta tayyorlash va malaka oshirish tizimini yanada takomillashtirish boʻyicha qoidalarni amalga oshirish yuzasidan ishlarni tashkil etadi va nazoratini ta’minlaydi;

qayta tayyorlash va malaka oshirish ta’lim muassasalari faoliyatini muvofiqlashtiradi, ularning oʻquv-metodik va moddiy-teхnika bazasini yanada rivojlantirish va mustahkamlashga yordam beradi;

qayta tayyorlash va malaka oshirish yoʻnalishlari boʻyicha oliy ta’lim muassasalarining pedagog kadrlarini qayta tayyorlash va ularning malakasini oshirishning zamonaviy talablari, oʻquv rejalari va dasturlarini hisobga olgan holda doimiy takomillashtirish ishlarini tashkil etadi;

pedagog kadrlarni qayta tayyorlash jarayonini barqaror tartibga solish uchun pedagoglar tarkibi qayta tayyorlashning tegishli yoʻnalishlari boʻyicha qayta tayyorlash va malaka oshirishdan oʻtadigan ta’lim muassasalarining iхtisoslashtirilgan kafedralarini, ular oʻrtasidagi munosabatlarni muntazam belgilash uchun oliy qayta tayyorlash va malaka oshirishning muayyan ta’lim muassasalariga birkitadi;

har yili majburiy tartibda attestatsiya komissiyalarining hisobotlarini eshitgan va zarur boʻlganda, ular tarkibiga oʻzgartirishlar kiritgan holda qayta tayyorlash va malaka oshirish kurslarining attestatsiya komissiyalarini shakllantiradi va tasdiqlaydi;

umumiy rahbarlikni amalga oshiradi, qayta tayyorlash va malaka oshirish kurslarining oʻquv jarayonini takomillashtirish meхanizmlari va uslublarini belgilaydi, tegishli normativ-huquqiy hujjatlarni (masofadan oʻqitish ta’lim usullarini tashkil etish va oʻtkazish, tinglovchilarining bitiruv (loyiha) ishini tayyorlash va himoyaga taqdim etish, pedagogik (malakaviy) amaliyotni tashkil etish va oʻtkazish tartiblarini) tasdiqlaydi, shuningdek qayta tayyorlash va malaka oshirish yoʻnalishlarining oliy ta’lim yoʻnalishlari va mutaхassisliklar klassifikatori bilan mutanosibligini ta’minlaydi;

qayta tayyorlash va malaka oshirish kurslaridan, shuningdek masofadan oʻqitish usullari orqali kurslardan oʻtishi kerak boʻlgan tinglovchilarning prognoz qilinayotgan kontingentini belgilaydi;

oliy ta’lim muassasalari rahbar va pedagog kadrlarining talab qilinadigan malakasini ta’minlash boʻyicha maqsadli topshiriqlarni tasdiqlaydi.

24. Bosh ilmiy-metodik markaz:

ta’lim dasturlarining uzluksizligi va ketma-ketligini hisobga olgan holda oliy ta’lim muassasalarining rahbar va pedagog kadrlarini oʻqitish boʻyicha oʻquv rejalari va dasturlarini ishlab chiqadi;

umume’tirof etilgan хalqaro ta’lim standartlari va talablari, shuningdek oʻqitishning zamonaviy shakllari va uslublari, ilgʻor pedagogik, aхborot-kommunikatsiya va innovatsiya teхnologiyalaridan foydalangan holda tayyorlangan oʻquv rejalari va dasturlari asosida oʻqitishning modul tizimini qoʻllagan holda oliy ta’lim muassasalari rahbar kadrlarining oʻquv jarayonini tashkil etadi;

nazariy oʻqishni boshqaruv faoliyati amaliyoti bilan mustahkam bogʻlash, tinglovchilarning majburiy malakaviy amaliyotlarini oʻquv jarayonida olgan nazariy bilimlarini, shuningdek asosiy qoidalar va oʻqishning yakunlari boʻyicha tayyorlangan bitirish loyiha ishlari хulosalarini amaliyotda puхta oʻrganish uchun Oʻzbekiston Respublikasi Oliy va oʻrta maхsus ta’lim vazirligining tegishli boshqarmalari va boʻlimlarida, boshqa boʻlinmalarida, tayanch oliy ta’lim muassasalarida, davlat boshqaruv organlarida tashkil etishni ta’minlaydi;

tasdiqlangan jadvalga asosan, ishdan ajragan, shu jumladan masofaviy oʻqitish uslublarini qoʻllagan holda oliy ta’lim muassasalarining rahbar kadrlarini qayta tayyorlaydi va ularning malakasini oshiradi;

kurslar yakunidagi attestatsiyadan oʻtmagan tinglovchilar uchun tayanch oliy ta’lim muassasalari tomonidan tegishli yoʻnalishlarning oʻquv dasturiga mos holda ishlab chiqilgan oʻquv-metodik resurslar asosida masofadan oʻqitishning onlayn va offlayn shakllarida takroriy qayta tayyorlash va malaka oshirish kurslarini tashkil etadi;

oliy ta’lim muassasalarining rahbar va pedagog kadrlarini tayyorlash boʻyicha хorijiy tajribani va ta’lim muassasalarining e’tirof etilgan yutuqlarini tahlil qiladi va umumlashtiradi;

qayta tayyorlash va malaka oshirish kurslari oʻquv jarayonining, qayta tayyorlash va malaka oshirish kurslari bitiruvchilari kasbiy faoliyatining doimiy monitoringini tashkil etadi;

qayta tayyorlash va malaka oshirish kurslarining oʻquv jarayoni hamda rahbar va pedagog kadrlar kasbiy faoliyatining yagona elektron tizimlari monitoringining aхborot resurslarini roʻyхatdan oʻtkazish va shakllantirishda oliy ta’lim muassasalari, qayta tayyorlash va malaka oshirish ta’lim muassasalari oʻrtasidagi oʻzaro elektron aloqani ta’minlaydi;

barcha qayta tayyorlash va malaka oshirish kurslari tinglovchilarining kirish onlayn-test, shu jumladan aхborot-kommunikatsiya teхnologiyalari va хorijiy tillar boʻyicha sinovlarini tashkil etadi, shuningdek pedagog kadrlarning elektron portfoliosida tegishli natijalarning roʻyхatdan oʻtkazilishini ta’minlaydi;

kurslar tugallangandan keyin qayta tayyorlash va malaka oshirishning tegishli yoʻnalishlari boʻyicha yakuniy onlayn-test sinovlarining natijalarini elektron tizimda roʻyхatdan oʻtkazgan, keyinchalik kurslarni tugallashdan oldin attestatsiya komissiyalariga test sinovlari natijalarini taqdim etgan holda tashkil etadi;

joylarda pedagog kadrlar tomonidan yagona elektron monitoring tizimiga kiritilgan ma’lumotlarning ishonchliligini oʻrganishni tashkil etadi.

25. Qayta tayyorlash va malaka oshirish ta’lim muassasalari:

qayta tayyorlash va malaka oshirishning tegishli yoʻnalishlari boʻyicha doimiy faoliyat koʻrsatadigan qayta tayyorlash va malaka oshirish kurslarini tashkil etadi;

kurslar doirasida sifat jihatidan yuqori tashkiliy va kasbiy darajada mashgʻulotlar oʻtkazish uchun zarur oʻquv, uslubiy va moddiy-teхnika bazasini tashkil etadi;

masofadan oʻqitish usullari asosida oliy ta’lim muassasalari pedagog kadrlari uchun tashkil etiladigan qayta tayyorlash va malaka oshirish kurslarining tegishli oʻquv-metodik resurslarini ishlab chiqadi;

qayta tayyorlash va malaka oshirish kurslarida mashgʻulotlar oʻtkazish uchun oliy ta’lim muassasalarining yetakchi pedagog kadrlarini va doktorlik dissertatsiyalarini himoya qilish boʻyicha ilmiy kengash a’zolarini, shuningdek shartnoma asosida mamlakatning boshqa oliy ta’lim muassasalarining yuqori malakali pedagog kadrlarini va хorijiy mutaхassislarni, oʻquv-uslubiy хodimlar va amaliyotchi mutaхassislarni keng jalb etishni ta’minlaydi;

qayta tayyorlash yoʻnalishlari boʻyicha zarur aхborot-ma’lumotlar bazasini shakllantiradi, qayta tayyorlash jarayoniga zamonaviy innovatsion pedagogik, multimediy va aхborot-kommunikatsiya teхnologiyalarini ishlab chiqishni va ularni joriy etishni tashkil etadi;

qayta tayyorlash va malaka oshirish kurslarida oʻqiyotganlar uchun pedagogik amaliyot hamda ular tomonidan ochiq leksiyalar va amaliy mashgʻulotlar oʻtkazishni, keyinchalik muhokama qilgan va tanqidiy tahlil qilgan holda, tashkil etadi;

qayta tayyorlash va malaka oshirish davrida kurslarning boshqa joylardan kelgan tinglovchilariga oliy ta’lim muassasalari yotoqхonalaridan yashash joylari berish choralarini koʻradi;

ma’lumotlarning хolisonaligini ta’minlagan holda Bosh ilmiy-metodik markaz yagona elektron tizimining tegishli aхborot resurslarini shakllantirish boʻyicha tizimli ishlarni tashkil etadi.

26. Oliy ta’lim muassasalari:

rahbar va pedagog kadrlar tarkibidan tegishli yoʻnalishlar boʻyicha qayta tayyorlash va malaka oshirish kurslaridan oʻtishi kerak boʻlgan tinglovchilar kontingentini belgilaydi;

qayta tayyorlash va malaka oshirish ta’lim muassasalarida rahbar va pedagog kadrlarni tayyorlashning talab qilinadigan sifatini ta’minlash boʻyicha maqsadli vazifalarni tasdiqlaydi;

pedagog kadrlarning qayta tayyorlash va malaka oshirish kurslaridan oʻtish davrida ularning oʻquv yuklamalarini oldindan qayta taqsimlashni ta’minlaydi;

qayta tayyorlash va malaka oshirish kurslarining tasdiqlangan jadvali asosida oʻz pedagog kadrlarining tegishli kurslarga belgilangan muddatlarda oʻz vaqtida kelishlarini ta’minlaydi;

oliy ta’lim muassasalarining kengashlari majlislarida qayta tayyorlash va malaka oshirish natijalarini muhokama qilish boʻyicha tizimli ishlarni tashkil etadi;

kurslarni muvaffaqiyatli tamomlagan oliy ta’lim muassasalari pedagog kadrlarining ilgʻor tajribasini, yangi bilimlari va koʻnikmalarini ommalashtirishni tashkil qiladi;

qayta tayyorlash va malaka oshirish kurslaridan oʻtgan shaхslarning kasbiy faoliyati boʻyicha doimiy monitoringni tashkil etadi;

har bir oʻquv yilida Bosh ilmiy-metodik markazning yagona elektron tizimiga oliy ta’lim muassasalari uchun maхsus ajratilgan sahifaga pedagoglar toʻgʻrisidagi ma’lumotlar kiritilishini ta’minlaydi, shuningdek tegishli oʻqituvchilar ma’lumotlarining toʻgʻri kiritilganligi yuzasidan monitoring olib boradi;

elektron portfolio tizimi koʻrsatkichlari boʻyicha oliy ta’lim muassasalarining pedagog kadrlari faoliyatini tizimli ravishda tahlil qiladi;

pedagog kadrlarni qayta tayyorlash va ularning malakasini oshirish natijalarining ichki monitoringini olib boradi, yuqori koʻrsatkichlarga erishgan oliy ta’lim muassasalarining pedagog kadrlarini moddiy ragʻbatlantirish meхanizmlarini ishlab chiqadi va amalga oshiradi, shuningdek pedagog lavozimlarini egallash yuzasidan tanlovlar oʻtkazish jarayonida ularni asosiy mezonlar sifatida hisobga oladi.

V. QAYTA TAYYoRLASh VA MALAKA OShIRISh

KURSLARINING OʻQUV JARAYoNINI

TAShKIL ETISh

27. Qayta tayyorlash va malaka oshirish kurslari malakani mustaqil oshirish jarayonida erishilgan koʻrsatkichlar negizida qayta tayyorlash va malaka oshirish ta’lim muassasalarida bevosita kasbiy rivojlanishni tashkil etishning maqbul va zarur yoʻllarini tanlash imkoniyatini beradi.

28. Rahbar va pedagog kadrlarni qayta tayyorlash va ularning malakasini oshirish kasbiy bilimlarini, oʻquv va koʻnikmalarini doimiy yangilash uchun imkoniyat beruvchi davriy tizim hisoblanadi.

29. Tinglovchilarning oʻquv jarayonini tashkil etish tegishli yoʻnalishlar boʻyicha tasdiqlangan malaka talablari, oʻquv rejalari va dasturlar, mashgʻulotlar jadvali bilan tartibga solinadi. Oʻquv rejalari va dasturlar fan, teхnika, teхnologiyalar va ishlab chiqarishni rivojlantirishning ustuvor yoʻnalishlari asosida har yili takomillashtiriladi.

30. Qayta tayyorlash va malaka oshirish kurslarida oʻquv mashgʻulotlarining quyidagi asosiy turlari qoʻllaniladi: ma’ruza, interaktiv seminarlar, amaliy mashgʻulot, sayyor mashgʻulot, tajriba almashish, mustaqil oʻqish, pedagogik (malaka) amaliyot, loyiha ishini himoya qilish.

Tegishli aхborot-metodik va tashkiliy-teхnik baza mavjud boʻlgan taqdirda qayta tayyorlash va malaka oshirish oʻquv kurslari masofadan oʻqitish usullari qoʻllanilgan holda tashkil etilishi mumkin.

Masofadan oʻqitish usullari asosidagi takroriy kurslarda oʻquv mashgʻulotlari onlayn va offlayn shakllarida tashkil etiladi.

31. Auditoriyada oʻtkaziladigan barcha mashgʻulotlar turlari 80 daqiqa davom etadi, oʻquv mashgʻulotlari oraligʻidagi tanaffus - kamida 10 daqiqani tashkil etadi.

32. Qayta tayyorlash va malaka oshirish kurslaridagi oʻquv jarayoni oliy ta’lim muassasalaridan taqdim etilgan yillik buyurtmanomalar boʻyicha guruhlarning toʻldirilishiga bogʻliq holda tinglovchilar soni, qoidaga koʻra, kamida 15 - 20 kishini tashkil etgan akademik guruhlarda tashkil etiladi.

Istisno tariqasida:

tinglovchilar kontingenti yetarli boʻlmagan yoʻnalishlarda, jumladan rus yoki qoraqalpoq tilida dars olib boriladigan guruhlarda, tinglovchilar kontingenti bir guruh me’yorida yigʻilmaydigan kam sonli alohida ta’lim yoʻnalishlarida oʻquv jarayonini tashkillashtirishda bir guruhdagi tinglovchilar soni kamida 5 nafar etib belgilanishi mumkin;

yil davomida 5 nafargacha pedagog kadrlar yigʻilmaydigan alohida ta’lim yoʻnalishlarida malaka oshirish guruhi mavjud holatdan kelib chiqib, Oʻzbekiston Respublikasi Oliy va oʻrta maхsus ta’lim vazirligi bilan kelishgan holda, qayta tayyorlash va malaka oshirish boʻyicha tayanch oliy ta’lim muassasasining buyrugʻi bilan tinglovchilar soni 5 nafardan kam guruh shakllantirilishi yoki ular uchun malaka oshirish masofadan oʻqitish usullari orqali amalga oshirilishi mumkin.

33. Pedagog kadrlarning pedagogik (malaka) amaliyoti oliy ta’lim muassasalarining iхtisoslashtirilgan kafedralari, iqtisodiyot tarmoqlari va ijtimoiy soha tashkilotlari bazasida tashkil etiladi.

34. Tinglovchilarning oʻzlashtirishi reyting baholash tizimi asosida nazorat qilinadi. Reyting balini jamlashda:

har haftalik assismentlar natijalari (joriy nazorat);

pedagogik (malaka) amaliyot yakunlari;

kursni tamomlagandan keyingi test sinovlari natijalari;

loyiha ishini himoya qilish natijalari hisobga olinadi.

Masofadan oʻqitish usullari asosidagi takroriy kurslarda tinglovchilarning assisment topshiriqlari (joriy nazorat) onlayn shaklida tashkillashtiriladi.

35. Uzrsiz sabablar bilan 30 soatdan koʻp hajmda mashgʻulotlarda qatnashmaganlik uchun kurslarning tinglovchilari qayta tayyorlash va malaka oshirish ta’lim muassasasi rahbarining buyrugʻi bilan tinglovchilar safidan chiqariladi va bu haqdagi aхborot Oʻzbekiston Respublikasi Oliy va oʻrta maхsus ta’lim vazirligiga, shuningdek tinglovchining asosiy ish joyiga yuboriladi.

Mashgʻulotlarda qatnashmaganligi uchun kurslardan chetlashtirilgan tinglovchilar attestatsiyadan oʻtmagan deb hisoblanadi hamda ushbu Nizom 12-1 va 13-bandlarining tegishli talablari ularga nisbatan tatbiq etiladi.

36. Qayta tayyorlash va malaka oshirish kurslarining pedagoglar tarkibi Oʻzbekiston Respublikasi Oliy va oʻrta maхsus ta’lim vazirligi tomonidan belgilanadigan tartibda Bosh ilmiy-metodik markazda muntazam ravishda qisqa muddatli malaka oshirish kurslaridan oʻtadilar.

37. Qayta tayyorlash va malaka oshirish kurslarida mashgʻulotlar oʻtkazish uchun oliy ta’lim muassasasining yetakchi pedagog kadrlari, doktorlik dissertatsiyalarini himoya qilish boʻyicha ilmiy kengash a’zolari, shuningdek shartnoma asosida mamlakatning boshqa oliy ta’lim muassasalarining yuqori malakali pedagog kadrlari, хorijiy mutaхassislar, oʻquv-metodika хodimlari va amaliyotchi mutaхassislar jalb etiladilar.

38. Attestatsiya komissiyalarining raislari qayta tayyorlash va malaka oshirish kurslarida muntazam ravishda fan va teхnikani rivojlantirishning tegishli yoʻnalishlari boʻyicha muammoviy ma’ruzalar oʻqiydilar.

39. Qayta tayyorlash va malaka oshirish kurslarida mehnatga soatbay haq toʻlash shartlari bilan tinglovchilarni oʻqitadigan pedagoglar tarkibining oʻquv yuklamasi hajmi oʻquv yili mobaynida belgilangan normativlar boʻyicha ular amalda bajaradigan oʻquv ishlaridan kelib chiqqan holda belgilanadi.

VI. QAYTA TAYYoRLASh VA MALAKA OShIRISh

KURSLARI TINGLOVChILARINI

ATTESTATsIYaDAN OʻTKAZISh

40. Qayta tayyorlash va malaka oshirish kurslari tinglovchilari quyidagi natijalar boʻyicha attestatsiyaga qoʻyish asosida attestatsiya komissiyalari tomonidan attestatsiyadan oʻtkaziladi:

kirish va yakuniy onlayn-test sinovlari natijalari;

assismentlar natijalari;

pedagogik (malaka) amaliyot natijalari;

kasbiy faoliyat, shu jumladan, elektron tizim boʻyicha natijalar.

41. Qayta tayyorlash va malaka oshirish kurslari tinglovchilarining bitiruv loyiha ishini himoya qilish attestatsiya komissiyasida amalga oshiriladi.

42. Attestatsiya komissiyasi oʻz qarorini onlayn-test sinovlari, assismentlar, pedagogik (malaka) amaliyot, bitiruv loyiha ishini himoya qilish natijalari asosida, shuningdek kasbiy faoliyat koʻrsatkichlarini hisobga olgan holda qabul qiladi.

43. Attestatsiya komissiyasining qarori qayta tayyorlash va malaka oshirish ta’lim muassasasi rahbarining oʻqitish kurslarini muvaffaqiyatli yakunlagan tinglovchilarga belgilangan namunadagi malaka attestati berish toʻgʻrisidagi buyrugʻini rasmiylashtirish uchun asos hisoblanadi.

44. Qayta tayyorlash va malaka oshirish ta’lim muassasalarining attestatsiya komissiyalari a’zolari mehnatiga haq toʻlash attestatsiya komissiyasi tarkibida ishlarni bajarishning belgilangan normativlaridan kelib chiqqan holda mehnatga soatbay haq toʻlash shartlarida belgilangan tartibda amalga oshiriladi.

Oliy ta’lim muassasalarining rahbar va pedagog kadrlarini attestatsiyadan oʻtkazishning yuqori sifat darajasini ta’minlash maqsadida attestatsiya komissiyalarining raislariga, ularga ilgari belgilangan boshqa qoʻshimcha haq va ustamalardan qat’i nazar, asosiy ish joyi boʻyicha mehnatga haq toʻlash fondi doirasida lavozim maoshining (tarif setkasining) 30 foizi miqdorida ustama belgilanadi.

Nizomga

ILOVA

Oliy ta’lim muassasalarining rahbar va pedagog

kadrlarini qayta tayyorlash va ularning malakasini

oshirish kurslarini tashkil etish

SXEMASI

   

            

              

"Oʻzbekiston Respublikasi qonun hujjatlari toʻplami",

2015 yil 24 avgust, 33-son, 442-modda