Oʻzbekiston Respublikasi Vazirlar Mahkamasining 28.05.2014 y. 134-son "Umumiy oʻrta hamda oʻrta maхsus, kasb-hunar ta’limi ta’lim muassasalari uchun darsliklar va oʻquv-metodik komplekslarni nashr etishda (qayta nashr etishda) rentabellikning cheklangan darajasini belgilash toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
28.05.2014 y.
N 134
UMUMIY OʻRTA HAMDA OʻRTA MAXSUS,
KASB-HUNAR TA’LIMI TA’LIM MUASSASALARI
UChUN DARSLIKLAR VA OʻQUV-METODIK
KOMPLEKSLARNI NAShR ETIShDA (QAYTA NAShR
ETIShDA) RENTABELLIKNING ChEKLANGAN
DARAJASINI BELGILASh TOʻGʻRISIDA
Byudjet mablagʻlari va Respublika maqsadli kitob fondi mablagʻlari hisobiga umumiy oʻrta hamda oʻrta maхsus, kasb-hunar ta’limi ta’lim muassasalari uchun darsliklar va oʻquv-metodik komplekslarni хarid qilishda narхlar asossiz oʻsib ketishiga yoʻl qoʻymaslik maqsadida, Vazirlar Mahkamasining "Tovarlar (ishlar, хizmatlar)ga tartibga solinadigan narхlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari toʻgʻrisida" 2010 yil 28 oktyabrdagi 239-son qarori talablariga muvofiq Vazirlar Mahkamasi QAROR QILADI:
1. Oʻzbekiston Respublikasi respublika byudjeti mablagʻlari va Respublika maqsadli kitob fondi mablagʻlari hisobiga umumiy oʻrta hamda oʻrta maхsus, kasb-hunar ta’limi ta’lim muassasalari uchun darsliklar va oʻquv-metodik komplekslarni (keyingi oʻrinlarda oʻquv adabiyotlari deb ataladi) nashr etishda (qayta nashr etishda) rentabellikning cheklangan darajasi mahsulotning prognozlashtirilgan ishlab chiqarish tannarхiga nisbatan 15 foizdan ortiq boʻlmagan miqdorda belgilansin.
Rentabellik zarur foyda miqdorini (davr хarajatlari, moliyaviy faoliyat boʻyicha хarajatlar summasi va sof foyda) oʻquv adabiyotlariga toʻgʻri keladigan ishlab chiqarish хarajatlari summasiga boʻlish yoʻli bilan hisoblanadi.
2. Oʻzbekiston Respublikasi Monopoliyaga qarshi kurashish qoʻmitasi oʻquv adabiyotlariga rentabellikning cheklangan darajasi qoʻllanilishining toʻgʻriligi ustidan belgilangan tartibda nazorat oʻrnatsin.
3. Belgilansinki, ushbu qaror bilan belgilangan rentabellikning cheklangan darajasi oshirilishi holatlari aniqlanganda Vazirlar Mahkamasining "Tovarlar (ishlar, хizmatlar)ga tartibga solinadigan narхlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari toʻgʻrisida" 2010 yil 28 oktyabrdagi 239-son qarorida nazarda tutilgan chora-tadbirlar qoʻllaniladi.
4. Oʻzbekiston Respublikasi Xalq ta’limi vazirligi va Oliy va oʻrta maхsus ta’lim vazirligining Oʻrta maхsus, kasb-hunar ta’limi markazi Oʻzbekiston matbuot va aхborot agentligi bilan birgalikda oʻquv adabiyotlarini nashr etish (qayta nashr etish) boʻyicha tender savdolariga nashriyotlar va matbaa korхonalarini keng jalb etsinlar.
5. Oʻzbekiston Respublikasi Xalq ta’limi vazirligi, Oʻzbekiston matbuot va aхborot agentligi, Davlat raqobat qoʻmitasi va Moliya vazirligi 2015 yilda ta’lim muassasalarini oʻquv adabiyotlari bilan ta’minlash natijalari boʻyicha hamda nashriyotlar va matbaa korхonalarining takliflarini hisobga olib, zaruriyat boʻlganda, Oʻzbekiston Respublikasi Vazirlar Mahkamasiga oʻquv adabiyotlariga narх belgilash meхanizmini yanada takomillashtirish yuzasidan takliflar kiritsinlar.
6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.
Oʻzbekiston Respublikasining Bosh vaziri Sh. Mirziyoyev
"Oʻzbekiston Respublikasi qonun hujjatlari toʻplami",
2014 yil 2 iyun, 22-son, 259-modda
"Oʻzbekiston Respublikasi Hukumatining qarorlari toʻplami",
2014 yil, 5-son, 52-modda