Oʻzbekiston Respublikasi Prezidentining 19.03.1994 y. PF-796-son "1994 yilni Mirzo Ulugʻbek yili deb e’lon etish toʻgʻrisida"gi Farmoni
OʻZBEKISTON RESPUBLIKASI
PREZIDENTINING
FARMONI
19.03.1994 y.
N PF-796
1994 YILNI MIRZO ULUGʻBEK YILI
DEB E’LON ETISh TOʻGʻRISIDA
Ulugʻ oʻzbek olimi, munajjim, matematik, fizik, me’mor, temuriylar sulolasining munosib davomchisi, yirik davlat arbobi Muhammad Taragʻay - Ulugʻbek (Mirzo Ulugʻbek) tavalludiga 600 yil toʻlishi munosabati bilan:
jamoat fikrini quvvatlab, allomaning jahon ilm-fani va madaniyati ravnaqiga qoʻshgan ulkan hissasini e’tiborda tutib;
Birlashgan Millatlar Tashkilotining Ta’lim, fan va madaniyat sohasidagi tashkiloti (YuNESKO) Bosh konferensiyasining 27-sessiyasi qaroriga koʻra Mirzo Ulugʻbek yubileyi jahon qadriyatlari roʻyхatiga - 1994 yilda dunyo miqyosida nishonlanadigan bayramlar qatoriga kiritilgani va shu munosabat bilan tashkil etiladigan halqaro tadbirlarni hamda respublikada olib borilayotgan ulkan hayrli ishlarni inobatga olib;
yosh avlod qalbida milliy iftiхor va vatanparvarlik tuygʻularini shakllantirish, ularning ilm-ma’rifatga boʻlgan intilishini ragʻbatlantirish hamda mustaqil Oʻzbekiston ilm-fani rivojiga koʻmaklashish maqsadida,
1994 yil Oʻzbekiston Respublikasida Mirzo Ulugʻbek yili deb e’lon qilinsin.
Oʻzbekiston Respublikasining Prezidenti I. Karimov
"Oʻzbekiston Respublikasi Oliy Kengashi Aхborotnomasi", 1994 y., N 4, 95-modda