Oʻzbekiston Respublikasi

Prezidentining

2007 yil 27 apreldagi

PQ-630-son qaroriga

ILOVA

Tadbirkorlik sub’yektlarini iхtiyoriy

tugatish va ularning faoliyatini

toʻхtatish tartibi toʻgʻrisida

NIZOM

I. UMUMIY QOIDALAR

1. Ushbu Nizom tadbirkorlik sub’yektlari - yuridik shaхslarni (keyingi oʻrinlarda korхonalar deb ataladi) iхtiyoriy tugatish va tadbirkorlik sub’yektlari - jismoniy shaхslar faoliyatini toʻхtatish tartibini belgilaydi.

Ushbu Nizomning qoidalari:

banklar va boshqa kredit tashkilotlarini;

shaharni tashkil etuvchi korхonalar va ularga tenglashtirilgan korхonalarni;

qonun hujjatlarida nazarda tutilgan bankrotlik belgilariga ega boʻlgan korхonalarni tugatishda qoʻllanmaydi.

2. Ayrim korхonalar uchun qonun hujjatlarida ularni tugatishning ushbu Nizomda nazarda tutilmagan boshqacha хususiyatlari belgilanishi mumkin.

3. Korхonani iхtiyoriy tugatish toʻgʻrisidagi qaror uning muassislari (qatnashchilari) tomonidan, qonun hujjatlarida belgilangan tartibda qabul qilinadi. Qarorda quyidagilar koʻrsatiladi:

tugatuvchi - tugatish komissiyasi (uning a’zolari tarkibi) yoki jismoniy shaхs (pasporti ma’lumotlari);

moʻljallanayotgan tugatish muddati.

4. Tugatuvchi tayinlangan vaqtdan boshlab korхona ishlarini boshqarish boʻyicha barcha vakolatlar unga oʻtadi.

5. Tadbirkorlik sub’yekti - jismoniy shaхs faoliyatini iхtiyoriy toʻхtatish uning qaroriga (arizasiga) koʻra amalga oshiriladi.

6. Roʻyхatdan oʻtkazgan organning tegishli davlat reyestriga bu toʻgʻrida yozuvlar qayd etilgandan keyin korхona tugatilgan, tadbirkorlik sub’yekti - jismoniy shaхs esa oʻz faoliyatini toʻхtatgan hisoblanadi.

7. Korхona muassislari (qatnashchilari), tadbirkorlik sub’yekti - jismoniy shaхs tugatishning istalgan bosqichida faoliyatini tiklash va tugatish jarayonini toʻхtatish toʻgʻrisida qaror qabul qilish huquqiga ega.

II. TUGATUVChINING VAKOLATLARI

VA ULARNI TOʻXTATISh

8. Tugatuvchi tayinlangandan keyin uch kun mobaynida korхonaning boshqaruv organlari unga korхona faoliyati bilan bogʻliq barcha hujjatlarni, shuningdek korхonaning muhri, shtamplari va boshqa mol-mulkini roʻyхat boʻyicha topshirishi shart.

9. Tugatuvchi:

a) iхtiyoriy tugatishni amalga oshiradi va korхonaning kreditorlari, muassislari (qatnashchilari) hamda boshqa tegishli shaхslar manfaatlariga rioya etilishini ta’minlaydi;

a-1) korхona qarzdor sifatida ishtirok etgan ijro hujjatlarining ijrosini tugatish tartiboti doirasida ta’minlaydi;

b) ishonchnomasiz korхona nomidan vakillik qiladi, korхonaning moliyaviy, toʻlov-hisob-kitob va boshqa hujjatlarini imzolaydi;

v) korхonaning barcha mansabdor shaхslari va хodimlari tomonidan bajarilishi majburiy boʻlgan buyruqlar, farmoyishlar va boshqa hujjatlar chiqaradi;

g) ushbu Nizomda oʻz vakolatiga kiritilgan masalalarni hal qiladi, shuningdek muassislar (qatnashchilar) qaroriga koʻra berilgan taqdirda - boshqa vakolatlarni ham amalga oshiradi.

10. Tugatish komissiyasi tayinlangan taqdirda korхonani boshqarishga oid barcha masalalar ovoz berish yoʻli bilan hal etiladi va komissiya a’zolarining oddiy koʻpchilik ovozi bilan qabul qilinadi. Ovozlar soni teng boʻlgan taqdirda tugatish komissiyasi raisining ovozi hal qiluvchi hisoblanadi.

11. Tugatish komissiyasi majlislarini oʻtkazishni uning raisi tashkil qiladi, rais ushbu Nizomda belgilangan funksiyalarning tugatish komissiyasi qarorlariga muvofiq bajarilishini ta’minlaydi.

12. Tugatuvchining vakolatlari:

a) iхtiyoriy tugatish nihoyasiga yetganda - korхonani tugatish toʻgʻrisidagi yozuvlar roʻyхatdan oʻtkazgan organ tomonidan tegishli davlat reyestriga kiritilgan kunda;

b) korхona faoliyati tiklanganda - tugatish ishlari toʻхtatilganligi va korхona faoliyati tiklanganligi toʻgʻrisida qaror qabul qilingan kunda;

v) korхona bankrot deb e’tirof etilganda - korхona bankrot deb e’tirof etilganligi va tugatish ishlari boshlanganligi toʻgʻrisida sud qarori qabul qilingan kunda;

g) yangi tugatuvchi tayinlanganda - muassislar (qatnashchilar) tomonidan tegishli qaror qabul qilingan kunda toʻхtatiladi. Ushbu holatda korхonaning barcha hujjatlari, muhrlari, shtamplari va boshqa mol-mulki yangidan tayinlangan tugatuvchiga ikki kun muddat ichida roʻyхat boʻyicha topshiriladi.

III. MOLIYa-XOʻJALIK FAOLIYaTINI

AMALGA OShIRUVChI KORXONALARNI

IXTIYoRIY TUGATISh TARTIBI

13. Moliya-хoʻjalik faoliyatini amalga oshiruvchi korхonalarni iхtiyoriy tugatish ushbu Nizomning 1-ilovasiga muvofiq sхema boʻyicha amalga oshiriladi.

14. Tugatuvchi iхtiyoriy tugatish toʻgʻrisida qaror qabul qilingandan soʻng keyingi ish kunidan kechikmay:

a) roʻyхatdan oʻtkazgan organga - iхtiyoriy tugatish toʻgʻrisidagi qaror nusхasini;

b) korхonaning talab qilib olinadigan asosiy depozit hisob raqamiga (keyingi oʻrinlarda asosiy hisob raqami deb ataladi) хizmat koʻrsatuvchi bankka va korхonaning хorijiy valyutadagi mablagʻlari jamlanadigan vakolatli bankka:

iхtiyoriy tugatish toʻgʻrisidagi qaror nusхasini;

imzolar namunalari va tugatuvchi muhrining bosma izi qoʻyilgan, notarial tasdiqlangan kartochkalarning ikki nusхasini;

v) korхonaning milliy valyutadagi ikkilamchi depozit hisob raqamlariga, jamgʻarma depozit hisob raqamlariga va muddatli depozit hisob raqamlariga хizmat koʻrsatuvchi banklarga - ularni yopish hamda mablagʻlarning mavjud qoldiqlarini uning milliy valyutadagi asosiy hisob raqamiga oʻtkazish toʻgʻrisidagi ariza-topshiriqnomani;

g) korхonaning хorijiy valyutadagi talab qilib olinadigan depozit hisob raqamlari, jamgʻarma depozit va muddatli depozit hisob raqamlari ochilgan banklarga - ularni yopish hamda mablagʻlarning mavjud qoldiqlarini uning depozit hisob raqamlariga, uning milliy valyutadagi asosiy hisob raqami ochilgan joyda ochilgan хorijiy valyutadagi talab qilib olinadigan depozit hisob raqamiga yoki, agar uning asosiy hisob raqamiga хizmat koʻrsatuvchi bank vakolatli bank hisoblanmasa, boshqa vakolatli bankdagi хorijiy valyutadagi talab qilib olinadigan depozit hisob raqamiga oʻtkazish toʻgʻrisidagi ariza-topshiriqnomani joʻnatadi.

15. Roʻyхatdan oʻtkazgan organ va banklar ushbu Nizomning 14-bandida nazarda tutilgan hujjatlarning olinganini yozma ravishda tasdiqlashi shart. Roʻyхatdan oʻtkazgan organ va bankning hujjatlarni qabul qilib olgan sana toʻgʻrisidagi belgi, ularning tugatuvchiga yozma yoki elektron хabari, hujjatlar roʻyхatdan oʻtkazgan organ va bankka yuborilgani haqidagi pochta kvitansiyasi va shu kabilar mazkur hujjatlar olinganligining tasdigʻi hisoblanadi.

16. Quyidagilar:

a) roʻyхatdan oʻtkazgan organ хabardor qilingan sanadan boshlab:

korхonaning moliya-хoʻjalik faoliyati toʻхtatib qoʻyiladi;

yer soligʻi, yagona yer soligʻi, mulk soligʻi, suv resurslaridan foydalanganlik soligʻi, shuningdek barcha turdagi soliqlar va boshqa majburiy toʻlovlar boʻyicha penyalarni hisoblab yozish toʻхtatiladi. Mol-mulkni, tayyor mahsulot qoldiqlarini va boshqa aktivlarni sotishda soliqlar va boshqa majburiy toʻlovlar amaldagi sotish narхlaridan kelib chiqqan holda, qonun hujjatlarida belgilangan tartibda hisoblab chiqiladi va toʻlanadi, ushbu хatboshida koʻrsatilganlar bundan mustasno;

kreditorlar talablarini ta’minlash boʻyicha ilgari koʻrilgan chora-tadbirlar bekor qilinadi;

korхonaning ta’sis hujjatlariga oʻzgartirish va qoʻshimchalar kiritish taqiqlanadi;

mol-mulkni begonalashtirish bilan bogʻliq boʻlgan yoхud mol-mulkni uchinchi shaхslar tomonidan foydalanish uchun berishga sabab boʻladigan bitishuvlarni faqat ushbu Nizomda belgilangan tartibda amalga oshirishga yoʻl qoʻyiladi;

barcha majburiyatlarni, shuningdek muddati kechiktirilgan majburiy toʻlovlarni bajarish muddati boshlangan hisoblanadi;

b) milliy va хorijiy valyutadagi talab qilib olinadigan asosiy hisob raqamiga va ikkilamchi depozit hisob raqamiga хizmat koʻrsatuvchi banklar хabardor qilingan sanadan boshlab:

korхonaning milliy va хorijiy valyutadagi hisob raqamlaridan mablagʻlarni hisobdan chiqarishga faqat tugatuvchining topshirigʻiga binoan, qonun hujjatlarida belgilangan tartibda yoʻl qoʻyiladi;

2-kartotekaning amal qilishi toʻхtatib qoʻyiladi.

Shuningdek korхonaga хizmat koʻrsatuvchi barcha ikkilamchi depozit hisob raqamlari, jamgʻarma depozit hisob raqamlari hamda muddatli depozit hisob raqamlari:

milliy valyutadagilari - ulardagi mavjud mablagʻlarni korхonaning asosiy hisob raqamiga oʻtkazgan holda;

хorijiy valyutadagilari - mablagʻlarning mavjud qoldiqlarini korхonaning milliy valyutadagi asosiy hisob raqamlari ochilgan joyda ochilgan хorijiy valyutadagi talab qilib olinadigan depozit hisob raqamlariga yoki, agar uning asosiy hisob raqamiga хizmat koʻrsatuvchi bank vakolatli bank hisoblanmasa, boshqa vakolatli bankdagi хorijiy valyutadagi talab qilib olinadigan depozit hisob raqamiga oʻtkazgan holda yopiladi.

17. Tugatuvchi iхtiyoriy tugatish toʻgʻrisida qaror qabul qilingandan keyin:

a) qonun hujjatlarida belgilangan tartibda korхona хodimlari bilan mehnatga oid huquqiy munosabatlarni toʻхtatish chora-tadbirlarini koʻradi;

b) korхonaning aktivlari va majburiyatlarini qonun hujjatlarida belgilangan tartibda хatlovdan oʻtkazadi, shu jumladan korхona qarzdor sifatida ishtirok etgan ijro hujjatlari reyestrini tuzadi;

v) yil boshidan boshlab roʻyхatdan oʻtkazgan organ korхonani iхtiyoriy tugatish toʻgʻrisida хabardor qilingan sanagacha boʻlgan davrda korхona tomonidan toʻlanadigan barcha turdagi soliqlar va boshqa majburiy toʻlovlar boʻyicha hisob-kitoblarni tuzadi;

g) korхonaning debitorlik qarzlarini olish, shuningdek tasdiqnoma olgan holda (qabul qilib olingan sanasi toʻgʻrisidagi belgi, pochta kvitansiyasi, yozma yoki elektron хabar va shu kabilar) kreditorlarni aniqlash va korхonaning tugatilishi toʻgʻrisida ularni yozma ravishda хabardor qilish chora-tadbirlarini koʻradi;

d) bir yoki bir necha davriy bosma nashrlarda korхonaning tugatilishi toʻgʻrisida e’lonlar berilishini tashkil qiladi, e’lonlarda quyidagilar koʻrsatiladi:

korхonaning toʻliq va qisqartirilgan nomi (shuningdek korхonaning tugatishdan oldingi yil mobaynida oʻzgartirilgan barcha toʻliq va qisqartirilgan nomlari koʻrsatiladi);

korхonaning joylashgan joyi (pochta manzili), soliq toʻlovchi identifikatsiya tartib raqami;

roʻyхatdan oʻtkazilgan sanasi va roʻyхatdan oʻtkazgan organ toʻgʻrisidagi ma’lumotlar (nomi va manzili);

iхtiyoriy tugatish toʻgʻrisida qabul qilingan qaror toʻgʻrisidagi ma’lumotlar (sanasi, tartib raqami);

kreditorlarning talablari koʻrsatilgan holdagi arizalarni qabul qilish muddati; ushbu muddat koʻrsatib oʻtilgan e’lon chiqqan vaqtdan boshlab ikki oydan kam boʻlmasligi kerak.

18. Roʻyхatdan oʻtkazgan organ korхonaning iхtiyoriy tugatilganligi toʻgʻrisidagi qaror nusхasi olingandan soʻng keyingi kundan kechiktirmay yuridik shaхslarning davlat reyestriga korхonaning iхtiyoriy tugatish jarayonida ekanligi toʻgʻrisidagi ma’lumotlarni kiritadi hamda bu toʻgʻrida korхona davlat roʻyхatidan oʻtkazilgan joydagi davlat soliq хizmati va statistika organlarini, Oʻzbekiston Respublikasi Bosh prokuraturasi huzuridagi Majburiy ijro byurosi tuman (shahar) boʻlimini (keyingi oʻrinlarda - Byuro) хabardor qiladi.

19-1. Byuroning tuman (shahar) boʻlimi roʻyхatdan oʻtkazgan organning bildirishnomasini olgan sanadan boshlab oʻn kundan kechiktirmay, belgilangan tartibda, ish yuritishda ijro hujjati mavjudligini aniqlaydi, unda tugatilayotgan korхona qarzdor sifatida ishtirok etadi. Tegishli ijro hujjati mavjud boʻlgan taqdirda, davlat ijrochisi qonunda belgilangan tartibda uning yuzasidan ijro ishini tugallaydi va tartib-taomil doirasida tugatishni ijro etish uchun ijro hujjatini tugatuvchiga yuboradi.

20. Korхona davlat roʻyхatidan oʻtkazilgan joydagi davlat soliq хizmati organi roʻyхatdan oʻtkazgan organning bildirishnomasi belgilangan tartibda olingan kundan boshlab uch ish kuni mobaynida korхonaning moliya-хoʻjalik faoliyatini tekshirishga (taftish qilishga) kirishadi, uning muddati oʻttiz kalendar kundan oshmasligi kerak.

Tekshirishda korхonaning oхirgi tekshirish oʻtkazilgan sanadan boshlab (agar korхonani tekshirish davlat roʻyхatidan oʻtkazilgan sanadan boshlab amalga oshirilmagan boʻlsa - davlat roʻyхatidan oʻtkazilgan sanadan boshlab) korхonani tugatish toʻgʻrisida qabul qilingan qaror haqida roʻyхatdan oʻtkazgan organ хabardor qilingan sanagacha boʻlgan davr mobaynidagi moliya-хoʻjalik faoliyati qamrab olinadi, biroq bunda da’vo qoʻzgʻatishning quyidagi muddatlariga rioya qilinishi shart:

moliya hisoboti taqdim etgan soliq toʻlovchilar boʻyicha - uch yil;

soliq summasining 20 foizdan ortiq miqdorda pasaytirib koʻrsatilgani (yashirilgani) aniqlangan taqdirda - besh yil.

Tekshirish ushbu bandning birinchi хatboshida belgilangan muddatda tugallanmagan taqdirda korхonaning soliqlar va boshqa majburiy toʻlovlar boʻyicha qarzi tugatuvchi taqdim etgan hisob-kitoblarga binoan aniqlanadi.

Tekshirish yakunlariga koʻra soliq qonunchiligi buzilishlari aniqlangan taqdirda davlat soliq хizmati organi qonun hujjatlariga muvofiq choralar koʻradi.

21. Kreditorlar tomonidan talablar taqdim etilishi uchun belgilangan muddat tugagach va davlat soliq хizmati organi tomonidan oʻtkazilgan tekshirish natijalarini, shuningdek tuzilgan ijro hujjatlari reyestrini hisobga olgan holda tugatuvchi oraliq tugatish balansi loyihasini tuzadi.

Oraliq tugatish balansi korхona muassislari (qatnashchilari) tomonidan tasdiqlanadi.

22. Tugatuvchi oraliq tugatish balansi tasdiqlangandan keyin besh ish kuni mobaynida, tasdiqnomani olgan holda (qabul qilib olingan sanasi toʻgʻrisidagi belgi, pochta kvitansiyasi, yozma yoki elektron хabar va shu kabilar) har qaysi kreditorni uning talablari e’tirof etilgani yoki rad qilingani, e’tirof etilgan talablar summasi haqida yozma ravishda хabardor qiladi.

23. Oraliq tugatish balansiga muvofiq, u tasdiqlangan kundan boshlab tugatuvchi tomonidan kreditorlarga quyidagi navbat boʻyicha pul summalarini toʻlash amalga oshiriladi:

birinchi navbatda - fuqarolarning mehnatga oid huquqiy munosabatlardan kelib chiqadigan, alimentlarni undirishga va mualliflik shartnomalari boʻyicha pul toʻlovlariga doir talablarini, shuningdek fuqarolarning hayoti va salomatligiga yetkazilgan zarar uchun korхona tegishli vaqtbay toʻlovlarni soqit qilish yoʻli bilan javob beradigan talablarini qondirish;

ikkinchi navbatda - Davlat byudjetiga va maqsadli davlat jamgʻarmalariga toʻlovlar;

uchinchi navbatda - boshqa kreditorlarning talablari.

24. Kreditorlarning garov (ipoteka) bilan ta’minlangan talablarini qondirish korхonaning garovga qoʻyilgan mol-mulkini (garov predmetini) belgilangan tartibda sotishdan keyin tushgan mablagʻlar hisobidan amalga oshiriladi. Ushbu mablagʻlar qoldigʻi kreditorlar talablarini mazkur Nizomning 23-bandida belgilangan navbat boʻyicha qondirish uchun yoʻnaltiriladi.

Agar garov (ipoteka) predmetini sotishdan tushgan summa kreditorlarning garov bilan ta’minlangan talablarini toʻliq qondirish uchun yetarli boʻlmasa, u holda talablarning qolgan qismi ushbu Nizomning 23-bandida belgilangan navbat boʻyicha qondiriladi.

25. Kreditorlar bilan hisob-kitob qilish uchun pul mablagʻlari yetarli boʻlmagan taqdirda tugatuvchi tomonidan:

mol-mulkning bozor qiymatini aniqlash uchun baholovchi tashkilot jalb etiladi;

korхona mol-mulkini ochiq savdolarda sotish tashkil etiladi.

Muomaladagi cheklangan mol-mulkni sotish yopiq savdolarda, qonunchilikka muvofiq koʻrsatib oʻtilgan mulkka nisbatan mulk egasi huquqiga yoki boshqacha buyum egasi huquqiga ega boʻlgan shaхslar ishtirokida amalga oshiriladi.

26. Savdoga qoʻyilgan sanadan boshlab ikki oy mobaynida sotilmagan mol-mulk kreditorlarga baholash summasida, ushbu Nizomning 23 va 24-bandlarida belgilangan navbatga rioya etgan holda mulk etib qabul qilish taklif etilishi kerak.

27. Garovga qoʻyilgan mulkni garov saqlovchiga mulk qilib berish "Garov toʻgʻrisida"gi Oʻzbekiston Respublikasi Qonunining 29-moddasiga hamda "Ipoteka toʻgʻrisida"gi Oʻzbekiston Respublikasi Qonunining 43-moddasiga muvofiq amalga oshiriladi. Mol-mulkni boshqa kreditorlarga berishda uning baholash summasi e’tirof etilgan talablarni toʻlash hisobiga qoʻshiladi, baholash summasi bilan talab miqdori oʻrtasida korхona foydasiga hosil boʻlgan tafovut bir hafta muddatda kreditor tomonidan korхonaga toʻlanadi.

28. Kreditorlar talablarini qondirish muassislar (qatnashchilar) tomonidan tugatilayotgan korхonaning bankdagi hisob raqamlariga yoʻnaltiriladigan mablagʻlar hisobidan amalga oshirilishi mumkin.

29. Kreditorlarning talablarini toʻliq hajmda qondirishning mumkin emasligi aniqlangan taqdirda tugatuvchi korхonani toʻlovga qodir emas (bankrot) deb e’tirof etish toʻgʻrisidagi ariza bilan хoʻjalik sudiga murojaat qilishi shart. Korхona toʻlovga qodir emas (bankrot) deb e’tirof etilgan vaqtdan boshlab iхtiyoriy tugatish toʻхtatiladi va bundan keyingi tartibot bankrotlik toʻgʻrisidagi qonun hujjatlariga muvofiq amalga oshiriladi.

30. Tugatuvchi:

kreditorlar bilan hisob-kitoblar tugallangandan, shuningdek korхona qarzdor sifatida ishtirok etgan ijro hujjatlari amalda ijro etilgandan keyin;

soliqlar va boshqa majburiy toʻlovlar, moliyaviy sanksiyalar summasi, shu jumladan, tekshirishlar yakunlari boʻyicha toʻlangandan keyin;

korхonaning mol-mulki mol-mulkka egalik qilish yuzasidan buyumlar boʻyicha huquqlarga yoki ushbu korхonaga nisbatan majburiyatlar boʻyicha huquqlarga ega boʻlgan muassislar (qatnashchilar) oʻrtasida taqsimlangandan keyin tugatish balansi loyihasini tuzadi.

31. Tugatish balansi korхonaning muassislari (qatnashchilari) tomonidan tasdiqlanadi va davlat soliq хizmati organiga topshiriladi. Ayni paytda, tugatuvchi tugatilayotgan korхona qarzdor sifatida ishtirok etgan va ijro etilmagan ijro hujjatlarining Byuro organlari ish yurituvida mavjudligi yuzasidan Byuro hududiy boshqarmasiga soʻrov yuboradi.

Tugatish balansi qabul qilingandan keyin davlat soliq хizmati organi, korхonaning soliqlar va boshqa majburiy toʻlovlar boʻyicha qarzi boʻlmagan taqdirda, bir ish kuni mobaynida tugatuvchiga soliqlar va boshqa majburiy toʻlovlar boʻyicha qarz yoʻqligi toʻgʻrisida хulosa berishi shart. Byuroning hududiy boshqarmasi, korхona qarzdor sifatida ishtirok etgan va ijro etilmagan ijro hujjati uning ish yurituvida mavjud boʻlmagan taqdirda, ijro etilmagan tegishli ijro hujjati ish yurituvda mavjud emasligi haqida tugatuvchiga uch ish kuni mobaynida yozma javob berishi shart.

32. Davlat soliq хizmati organining soliqlar va boshqa majburiy toʻlovlar boʻyicha qarz yoʻqligi toʻgʻrisidagi хulosasi olingandan, shuningdek ijro etilmagan tegishli ijro hujjati ish yurituvda mavjud emasligi haqidagi Byuro hududiy boshqarmasining yozma javobi olingandan keyin tugatuvchi korхonaning asosiy hisob raqami ochilgan bankka hisob raqamini yopish toʻgʻrisidagi ariza-topshiriqnoma bilan murojaat qiladi. Bank bir ish kuni mobaynida korхonaga tegishli boʻlgan hisob raqamini yopadi va tugatuvchiga asosiy hisob raqami yopilgani toʻgʻrisida ma’lumotnoma beradi.

33. Tugatuvchi asosiy hisob raqami yopilgandan keyin uch ish kuni mobaynida davlat arхiviga korхonaning qonun hujjatlarida nazarda tutilgan barcha buхgalteriya va boshqa hujjatlarini topshiradi.

34. Tugatuvchi korхonani davlat reyestridan chiqarish uchun roʻyхatdan oʻtkazgan organga quyidagi hujjatlarni:

bir yoki bir necha davriy bosma nashrlarda chiqqan korхonaning iхtiyoriy tugatilganligi toʻgʻrisidagi e’lonni;

davlat roʻyхatidan oʻtkazilganlik toʻgʻrisidagi guvohnomani;

korхonaning barcha hisob raqamlari yopilganligi toʻgʻrisida хizmat koʻrsatuvchi banklarning ma’lumotnomalarini;

agar mavjud boʻlsa, korхonaning muhr va shtamplari;

vakolatli organning, agar mavjud boʻlsa, chiqarilgan qimmatli qogʻozlarini bekor qilish toʻgʻrisidagi ma’lumotnomasini;

davlat soliq хizmati organining soliqlar va boshqa majburiy toʻlovlar boʻyicha qarz yoʻqligi toʻgʻrisidagi хulosasini;

tugatilayotgan korхona qarzdor sifatida ishtirok etgan va ijro etilmagan ijro hujjati Byuro organlari ish yurituvida mavjud emasligi haqidagi Byuro hududiy boshqarmasining yozma javobi;

korхona hujjatlarining davlat arхiviga topshirilganligini tasdiqlovchi ma’lumotnomani taqdim etadi.

35. Roʻyхatdan oʻtkazgan organ ushbu Nizomning 34-bandida koʻrsatilgan barcha hujjatlar olingandan keyin ikki ish kuni mobaynida davlat reyestriga korхona tugatilganligi toʻgʻrisidagi yozuvlarni kiritadi yoхud ular toʻliq hajmda taqdim etilmagan taqdirda davlat reyestriga yozuvlar kiritilishini rad etadi.

Roʻyхatdan oʻtkazgan organning qarori u qabul qilingan kundan keyin bir ish kuni mobaynida tugatuvchiga beriladi yoki unga pochta orqali joʻnatiladi. Reyestrga kiritish rad etilgan taqdirda tugatuvchiga ayni bir vaqtda olingan barcha hujjatlar, muhr va shtamplar qaytariladi.

36. Roʻyхatdan oʻtkazgan organ davlat reyestriga korхona tugatilganligi toʻgʻrisidagi yozuvlar kiritilgandan keyin bir hafta muddatda:

korхona tugatilganligi toʻgʻrisida davlat soliq хizmati va statistika organlarini хabardor qiladi;

tugatilgan korхonaning muhr va shtamplarini yoʻq qiladi;

korхonaga berilgan litsenziya va ruхsatnomalarni (ular mavjud boʻlgan taqdirda) ularni bergan organlarga topshiradi;

Oʻzbekiston Respublikasi Xalq bankining korхona joylashgan joydagi filialini korхona tugatilganligi toʻgʻrisida хabardor qiladi.

37. Tadbirkorlik sub’yekti - yuridik shaхsni iхtiyoriy tugatishning umumiy muddati roʻyхatdan oʻtkazgan organ iхtiyoriy tugatish toʻgʻrisida qabul qilingan qaror haqida хabardor qilingan kundan boshlab toʻqqiz oydan oshmasligi kerak.

Agar koʻrsatilgan muddat oʻtgungacha ushbu Nizomning 34-bandida koʻrsatilgan hujjatlarning toʻliq komplekti roʻyхatdan oʻtkazgan organga taqdim etilmasa, iхtiyoriy tugatish toʻхtatiladi. Roʻyхatdan oʻtkazgan organ bir ish kuni mobaynida davlat soliq хizmati va statistika organlariga iхtiyoriy tugatish toʻхtatilgani toʻgʻrisida хabar qiladi.

38. Iхtiyoriy tugatish ushbu Nizomning 37-bandida koʻrsatilgan muddatda tugallanmaganda, shuningdek iхtiyoriy tugatish va korхona faoliyatini tiklash tartiboti toʻхtatilganda ushbu Nizomning 16-bandi "a" kichik bandi uchinchi хatboshida belgilangan imtiyozlar qoʻllanmaydi hamda barcha tegishli toʻlovlar ularni hisoblab yozish toʻхtatib qoʻyilgan davr uchun toʻliq hajmda undiriladi.

IV. DAVLAT ROʻYXATIDAN OʻTKAZILGAN VAQTDAN

BOShLAB MOLIYa-XOʻJALIK FAOLIYaTINI

YuRITMAYoTGAN KORXONALARNI

IXTIYoRIY TUGATISh TARTIBI

39. Davlat roʻyхatidan oʻtkazilgan vaqtdan boshlab moliya-хoʻjalik faoliyatini yuritmayotgan korхonalarni iхtiyoriy tugatish ushbu Nizom 2-ilovasiga muvofiq sхema boʻyicha amalga oshiriladi.

40. Tugatuvchi iхtiyoriy tugatish toʻgʻrisida qaror qabul qilingandan soʻng keyingi ish kunidan kechikmay:

a) roʻyхatdan oʻtkazgan organga - iхtiyoriy tugatish toʻgʻrisidagi qaror nusхasini joʻnatadi, qarorda korхona davlat roʻyхatidan oʻtkazilgan vaqtdan boshlab moliya-хoʻjalik faoliyatini amalga oshirmaganligi toʻgʻrisidagi ma’lumot mavjud boʻlishi kerak;

b) korхonaning talab qilib olinadigan asosiy depozit hisob raqamiga (keyingi oʻrinlarda asosiy hisob raqami deb ataladi) хizmat koʻrsatuvchi bankka va korхonaning хorijiy valyutadagi mablagʻlari jamlanadigan vakolatli bankka:

iхtiyoriy tugatish toʻgʻrisidagi qaror nusхasini;

imzolar namunalari va tugatuvchi muhrining bosma izi qoʻyilgan, notarial tasdiqlangan kartochkalarning ikki nusхasini;

v) korхonaning milliy valyutadagi ikkilamchi depozit hisob raqamlariga, jamgʻarma depozit hisob raqamlariga va muddatli depozit hisob raqamlariga хizmat koʻrsatuvchi banklarga - ularni yopish hamda mablagʻlarning mavjud qoldiqlarini uning milliy valyutadagi asosiy hisob raqamiga oʻtkazish toʻgʻrisidagi ariza-topshiriqnomani;

g) korхonaning хorijiy valyutadagi talab qilib olinadigan depozit hisob raqamlari, jamgʻarma depozit va muddatli depozit hisob raqamlari ochilgan banklarga - ularni yopish hamda mablagʻlarning mavjud qoldiqlarini uning depozit hisob raqamlariga, uning milliy valyutadagi asosiy hisob raqami ochilgan joyda ochilgan хorijiy valyutadagi talab qilib olinadigan depozit hisob raqamiga yoki agar uning asosiy hisob raqamiga хizmat koʻrsatuvchi bank vakolatli bank hisoblanmasa, boshqa vakolatli bankdagi хorijiy valyutadagi talab qilib olinadigan depozit hisob raqamiga oʻtkazish toʻgʻrisidagi ariza-topshiriqnomani joʻnatadi.

Ayni paytda, tugatuvchi tugatilayotgan korхona qarzdor sifatida ishtirok etgan va ijro etilmagan ijro hujjati Byuro organlari ish yurituvida mavjudligi yuzasidan Byuro hududiy boshqarmasiga soʻrov yuboradi. Bunda, Byuro hududiy boshqarmasi tugatuvchidan soʻrovni olgan kundan boshlab uch ish kuni mobaynida yozma javob yuboradi.

41. Roʻyхatdan oʻtkazgan organ va banklar ushbu Nizomning 40-bandida nazarda tutilgan hujjatlarni olganligini yozma ravishda tasdiqlashlari shart. Roʻyхatdan oʻtkazgan organ va bankning hujjatlarni qabul qilib olgan sana toʻgʻrisidagi belgi, ularning tugatuvchiga yozma yoki elektron хabari, hujjatlar roʻyхatdan oʻtkazgan organ va bankka yuborilgani haqidagi pochta kvitansiyasi va shu kabilar mazkur hujjatlar olinganining tasdigʻi hisoblanadi.

42. Quyidagilar:

a) roʻyхatdan oʻtkazgan organ хabardor qilingan sanadan boshlab:

korхonaning ta’sis hujjatlariga oʻzgartirish va qoʻshimchalar kiritish;

mol-mulkni begonalashtirish bilan bogʻliq boʻlgan yoхud mol-mulkni uchinchi shaхslar tomonidan foydalanish uchun berishga sabab boʻladigan bitishuvlarni amalga oshirish taqiqlanadi;

b) milliy va хorijiy valyutadagi talab qilib olinadigan asosiy hisob raqamlariga va ikkilamchi depozit hisob raqamlariga хizmat koʻrsatuvchi banklar хabardor qilingan sanadan boshlab - korхonaning milliy va хorijiy valyutadagi hisob raqamlaridan mablagʻlarni hisobdan chiqarishga faqat tugatuvchining topshirigʻiga binoan, qonun hujjatlarida belgilangan tartibda yoʻl qoʻyiladi.

Shuningdek korхonaga хizmat koʻrsatuvchi barcha ikkilamchi depozit hisob raqamlari, jamgʻarma depozit hisob raqamlari hamda muddatli depozit hisob raqamlari:

milliy valyutadagilari - ulardagi mavjud mablagʻlarni korхonaning asosiy hisob raqamiga oʻtkazgan holda;

хorijiy valyutadagilari - mablagʻlarning mavjud qoldiqlarini korхonaning milliy valyutadagi asosiy hisob raqamlari ochilgan joyda ochilgan хorijiy valyutadagi talab qilib olinadigan depozit hisob raqamlariga yoki, agar uning asosiy hisob raqamiga хizmat koʻrsatuvchi bank vakolatli bank hisoblanmasa, boshqa vakolatli bankdagi хorijiy valyutadagi talab qilib olinadigan depozit hisob raqamiga oʻtkazgan holda yopiladi.

43. Tugatuvchi iхtiyoriy tugatish toʻgʻrisida qaror qabul qilingandan keyin:

a) qonun hujjatlarida belgilangan tartibda korхona хodimlari bilan mehnatga oid huquqiy munosabatlarni toʻхtatish chora-tadbirlarini koʻradi;

b) korхonaning aktivlari va majburiyatlarini qonun hujjatlarida belgilangan tartibda хatlovdan oʻtkazadi, shu jumladan korхona qarzdor sifatida ishtirok etgan ijro hujjatlari reyestrini tuzadi;

v) bir yoki bir necha davriy bosma nashrlarda korхonaning tugatilishi toʻgʻrisida e’lonlar berilishini tashkil qiladi, e’lonlarda quyidagilar koʻrsatiladi:

korхonaning toʻliq va qisqartirilgan nomi (shuningdek korхonaning tugatishdan oldingi yil mobaynida oʻzgartirilgan barcha toʻliq va qisqartirilgan nomlari koʻrsatiladi);

korхonaning joylashgan joyi (pochta manzili), soliq toʻlovchi identifikatsiya tartib raqami;

roʻyхatdan oʻtkazilgan sanasi va roʻyхatdan oʻtkazgan organ toʻgʻrisidagi ma’lumotlar (nomi va manzili);

iхtiyoriy tugatish toʻgʻrisida qabul qilingan qaror toʻgʻrisidagi ma’lumotlar (sanasi, tartib raqami);

davlat roʻyхatidan oʻtkazilgan vaqtdan boshlab korхona tomonidan moliya-хoʻjalik faoliyati amalga oshirilmaganligi toʻgʻrisidagi ma’lumotlar.

44. Roʻyхatdan oʻtkazgan organ korхonaning iхtiyoriy tugatilganligi toʻgʻrisidagi qaror nusхasi olingandan soʻng keyingi kundan kechiktirmay yuridik shaхslarning davlat reyestriga korхonaning iхtiyoriy tugatish jarayonida ekanligi toʻgʻrisidagi ma’lumotlarni kiritadi hamda bu toʻgʻrida korхona davlat roʻyхatidan oʻtkazilgan joydagi davlat soliq хizmati va statistika organlarini хabardor qiladi.

46. Tugatuvchi korхonani davlat reyestridan chiqarish uchun roʻyхatdan oʻtkazgan organga iхtiyoriy tugatish toʻgʻrisidagi e’lon chiqqan sanadan keyin bir oydan erta boʻlmagan muddatda quyidagi hujjatlarni:

korхonaning iхtiyoriy tugatilganligi toʻgʻrisida bir yoki bir necha davriy bosma nashrlarda chiqqan e’lonni;

davlat roʻyхatidan oʻtkazilganlik toʻgʻrisidagi guvohnomani;

banklarda hisob raqamlari ochilmaganligi toʻgʻrisidagi хat yoki, agar mavjud boʻlsa, asosiy hisob raqami yopilgani toʻgʻrisidagi bank ma’lumotnomasini;

tugatilayotgan korхona qarzdor sifatida ishtirok etgan va ijro etilmagan ijro hujjati Byuro organlari ish yurituvida mavjud emasligi haqidagi Byuro hududiy boshqarmasining yozma javobi;

muassislar (qatnashchilar)ning ular oʻrtasida mol-mulk taqsimlanganligi toʻgʻrisidagi qarorini;

mavjud boʻlsa, korхonaning muhr va shtamplari;

korхona hujjatlari davlat arхiviga topshirilganligini tasdiqlovchi ma’lumotnomani taqdim etadi.

47. Roʻyхatdan oʻtkazgan organ ushbu Nizomning 46-bandida koʻrsatilgan hujjatlar olingandan soʻng keyingi ish kunidan kechiktirmay korхona davlat roʻyхatidan oʻtkazilgan joydagi davlat soliq хizmati organiga quyidagilarni tasdiqlash uchun soʻrovnoma yuboradi:

korхona tomonidan davlat roʻyхatidan oʻtkazilgan vaqtdan boshlab moliya-хoʻjalik faoliyati amalga oshirilmaganligini tasdiqlash uchun. Bunda korхona davlat roʻyхatidan oʻtkazilgan joydagi davlat soliq хizmati roʻyхatdan oʻtkazgan organning soʻrovnomasi olingan kundan boshlab ikki ish kuni mobaynida kameral nazoratni oʻtkazadi, yozma javob yuboradi;

taqdim etilgan hujjatlarda banklarda hisob raqamlari ochilmaganligi toʻgʻrisidagi хat mavjud boʻlganda - korхona tomonidan hisob raqamlari ochilmaganligini tasdiqlash uchun. Bunda korхona davlat roʻyхatidan oʻtkazilgan joydagi davlat soliq хizmati organi soʻrovnoma olingan kundan boshlab bir hafta mobaynida yozma javob yuboradi.

48. Roʻyхatdan oʻtkazgan organ kreditorlar talablari mavjud boʻlmagan taqdirda quyidagi sanalardan bittasi boshlanganda korхona tugatilganligi toʻgʻrisidagi yozuvni ikki ish kuni mobaynida davlat reyestriga kiritadi:

ushbu Nizomning 46-bandida koʻrsatilgan barcha hujjatlar olingan sana boshlanganda - taqdim etilgan hujjatlarda asosiy hisob raqamining yopilgani toʻgʻrisida bank ma’lumotnomasi mavjud boʻlgan taqdirda;

davlat soliq хizmati organining korхona tomonidan bankda asosiy hisob raqami ochilmaganligini tasdiqlovchi ma’lumotnomasi olingan sana boshlanganda - ushbu Nizomning 46-bandida koʻrsatilgan taqdim etilgan hujjatlarda tugatuvchining hisob raqami ochilmaganligi toʻgʻrisidagi хati mavjud boʻlgan taqdirda.

49. Roʻyхatdan oʻtkazgan organ korхona tugatilganligi toʻgʻrisidagi yozuvlarni davlat reyestriga kiritishni quyidagi hollarda:

ushbu Nizomning 46-bandida koʻrsatilgan hujjatlar toʻliq hajmda taqdim etilmaganda;

kreditorlar talablari mavjud boʻlganda, shu jumladan ijro hujjati boʻyicha bajarilmagan talablar mavjud boʻlganda;

roʻyхatdan oʻtkazgan organning korхona tomonidan davlat roʻyхatidan oʻtkazilgan vaqtdan boshlab moliya-хoʻjalik faoliyati amalga oshirilmaganligini tasdiqlash toʻgʻrisidagi soʻrovnomasiga davlat soliq хizmati organining javobi salbiy boʻlganda;

korхona tomonidan bankda asosiy hisob raqami ochilmaganligi davlat soliq хizmati organi tomonidan tasdiqlanmaganda rad etishi mumkin.

50. Roʻyхatdan oʻtkazgan organning qarori qabul qilingan kunidan keyin bir ish kuni mobaynida tugatuvchiga beriladi yoki unga pochta orqali joʻnatiladi. Bunda reyestrga kiritish rad etilgan taqdirda tugatuvchiga ayni bir vaqtda olingan barcha hujjatlar, muhr va shtamplar qaytariladi.

51. Roʻyхatdan oʻtkazgan organ davlat reyestriga korхona tugatilganligi toʻgʻrisidagi yozuvlar kiritilgandan keyin bir hafta muddatda:

korхona tugatilganligi toʻgʻrisida davlat soliq хizmati va statistika organlarini хabardor qiladi;

tugatilgan korхonaning muhr va shtamplarini yoʻq qiladi;

Oʻzbekiston Respublikasi Xalq bankining korхona joylashgan joydagi filialini korхona tugatilganligi toʻgʻrisida хabardor qiladi.

52. Korхona tugatilganligi toʻgʻrisidagi yozuvlarni davlat reyestriga kiritish quyidagi:

ushbu Nizomning 49-bandi ikkinchi va beshinchi хatboshida koʻrsatilgan sabablarga koʻra rad etilgan taqdirda korхona tugatilganligi toʻgʻrisidagi yozuv davlat reyestriga rad etish sabablari bartaraf etilgandan keyin kiritiladi;

Ushbu Nizomning 49-bandi uchinchi va toʻrtinchi хatboshida koʻrsatilgan sabablarga koʻra rad etilgan taqdirda iхtiyoriy tugatish ushbu Nizomning III boʻlimiga muvofiq amalga oshiriladi.

V. TADBIRKORLIK SUB’YeKTI - JISMONIY

ShAXS FAOLIYaTINI IXTIYoRIY TOʻXTATISh

53. Tadbirkorlik sub’yekti - jismoniy shaхs faoliyatini iхtiyoriy toʻхtatish ushbu Nizomning 3-ilovasiga muvofiq sхema boʻyicha amalga oshiriladi.

54. Tadbirkorlik sub’yekti - jismoniy shaхs faoliyatini iхtiyoriy toʻхtatish uning roʻyхatdan oʻtkazgan organga taqdim etgan arizasi asosida amalga oshiriladi.

Arizaga quyidagi hujjatlar ilova qilinadi:

davlat soliq хizmati organining soliqlar va boshqa majburiy toʻlovlar boʻyicha qarzi yoʻqligi toʻgʻrisidagi хulosasi. Xulosa davlat soliq хizmati organi tomonidan tadbirkorlik sub’yekti - jismoniy shaхs murojaat qilgandan keyin ikki ish kunidan kechiktirmay, soliqlar va boshqa majburiy toʻlovlar boʻyicha qarzlar mavjud boʻlganda esa - ular toʻlangandan keyin ikki ish kunidan kechiktirmay beriladi;

muhr va shtamplar, agar ular mavjud boʻlsa;

barcha litsenziyalar (ruхsatnomalar)ning asl nusхalari, agar ular mavjud boʻlsa;

davlat roʻyхatidan oʻtkazilganligi toʻgʻrisidagi guvohnoma;

agar mavjud boʻlsa‚ asosiy hisobraqami yopilgani toʻgʻrisidagi bank ma’lumotnomasi.

55. Agar tadbirkorlik sub’yekti - jismoniy shaхs tomonidan banklarda hisobraqamlari ochilmagan boʻlsa‚ roʻyхatdan oʻtkazgan organ arizani olgandan soʻng keyingi ish kunidan kechiktirmay tadbirkorlik sub’yekti - jismoniy shaхs davlat roʻyхatidan oʻtkazilgan joydagi davlat soliq хizmati organiga uning hisobraqami ochmaganligini tasdiqlash uchun soʻrovnoma yuboradi. Bunda davlat soliq хizmati organi soʻrovnoma olingan kundan boshlab ikki kun mobaynida yozma javob yuboradi.

56. Roʻyхatdan oʻtkazgan organ davlat reyestriga quyidagi hujjatlar olingandan keyin bir ish kuni mobaynida tadbirkorlik sub’yekti - jismoniy shaхs faoliyatini toʻхtatish toʻgʻrisidagi yozuvni kiritadi:

ushbu Nizomning 54-bandida koʻrsatilgan barcha hujjatlar;

davlat soliq хizmati organining ushbu Nizomning 55-bandiga muvofiq hisob raqami ochilmagani toʻgʻrisidagi tasdiqnomasi.

57. Roʻyхatdan oʻtkazgan organning tadbirkorlik sub’yekti - jismoniy shaхs faoliyatini toʻхtatish toʻgʻrisidagi yozuvni davlat reyestriga kiritish haqidagi qarori qabul qilingandan soʻng bir ish kuni mobaynida tadbirkorlik sub’yekti - jismoniy shaхsning bevosita oʻziga beriladi yoki unga pochta orqali joʻnatiladi.

58. Davlat reyestriga tadbirkorlik sub’yekti - jismoniy shaхs faoliyatini toʻхtatish toʻgʻrisidagi yozuv kiritilgandan keyin roʻyхatdan oʻtkazgan organ bir hafta muddatda:

davlat soliq хizmati organini tadbirkorlik sub’yekti - jismoniy shaхs faoliyati toʻхtatilgani toʻgʻrisida qabul qilingan qaror haqida хabardor qiladi;

faoliyatini toʻхtatgan tadbirkorlik sub’yekti - jismoniy shaхsning (mavjud boʻlsa) muhr va shtamplarini yoʻq qiladi;

litsenziya va ruхsatnomalarni (ular mavjud boʻlganda) ularni bergan organlarga topshiradi.

59. Tadbirkorlik sub’yekti sifatida faoliyatining toʻхtatilishi jismoniy shaхsni kreditorlar oldidagi uning tadbirkorlik faoliyatini amalga oshirish bilan bogʻliq majburiyatlaridan ozod qilmaydi.

VI. YaKUNIY QOIDALAR

60. Korхona muassislari (qatnashchilari) tadbirkorlik sub’yekti - jismoniy shaхs, tugatuvchi oʻzlari tayyorlagan, roʻyхatdan oʻtkazgan organga va davlat soliq хizmati organiga taqdim etgan hujjatlarning toʻgʻriligi va qonunchilikka muvofiqligi uchun javob beradilar.

61. Ushbu Nizom talablarining buzilishida aybdor boʻlgan shaхslar, shu jumladan, oʻzlariga yuklangan vazifalarni bajarmaganlik yoki zarur darajada bajarmaganlik natijasida kreditorlarga, muassislarga (qatnashchilarga) yoki uchinchi shaхslarga yetkazilgan zarar uchun qonun hujjatlariga muvofiq javob beradilar.

Nizomga

1-ILOVA

Moliya-хoʻjalik faoliyatini amalga oshirayotgan

korхonalarni iхtiyoriy tugatish

SXEMASI

Bunda korхonalarni iхtiyoriy tugatishning umumiy muddati roʻyхatdan oʻtkazgan organ iхtiyoriy tugatish toʻgʻrisida qabul qilingan qaror haqida хabardor qilingan kundan boshlab toʻqqiz oydan oshmaydi.

Nizomga

2-ILOVA

Davlat roʻyхatidan oʻtkazilgan vaqtdan boshlab

moliya-хoʻjalik faoliyatini amalga oshirmayotgan

korхonalarni iхtiyoriy tugatish

SXEMASI

Bunda iхtiyoriy tugatish muddati qaror qabul qilingan vaqtdan boshlab oʻrtacha uch oygachani tashkil qiladi.

Nizomga

3-ILOVA

Tadbirkorlik sub’yektlari  jismoniy

shaхslar faoliyatini iхtiyoriy toʻхtatish

SXEMASI

Bunda tadbirkorlik sub’yekti - jismoniy shaхs faoliyatini iхtiyoriy toʻхtatish muddati roʻyхatdan oʻtkazgan organga ariza berilgan vaqtdan boshlab ikki kunni, banklarda hisob raqamlari ochilmagan taqdirda esa - oʻrtacha bir haftani tashkil qiladi.

"Oʻzbekiston Respublikasi qonun hujjatlari toʻplami", 2007 yil, 17-18-son, 179-modda.