Oʻzbekiston Respublikasining 25.04.2003 y. 478-II-son "Oʻzbekiston Respublikasi Qurolli Kuchlari rezervidagi хizmat toʻgʻrisida"gi Qonuni
OʻZBEKISTON RESPUBLIKASINING
QONUNI
25.04.2003 y.
N 478-II
OʻZBEKISTON RESPUBLIKASI
QUROLLI KUChLARI REZERVIDAGI
XIZMAT TOʻGʻRISIDA
1-modda. Ushbu qonunning maqsadi
Ushbu Qonunning maqsadi Oʻzbekiston Respublikasi fuqarolarining (bundan buyon matnda - fuqarolar deb yuritiladi) Oʻzbekiston Respublikasi Qurolli Kuchlari (bundan buyon matnda - Qurolli Kuchlar deb yuritiladi) rezervidagi хizmatni oʻtashi bilan bogʻliq munosabatlarni tartibga solishdan iborat.
2-modda. Qurolli Kuchlar rezervidagi
хizmat toʻgʻrisidagi qonunchilik
Qurolli Kuchlar rezervidagi хizmat toʻgʻrisidagi qonunchilik ushbu Qonun, "Umumiy harbiy majburiyat va harbiy хizmat toʻgʻrisida"gi Oʻzbekiston Respublikasi Qonuni va boshqa qonunchilik hujjatlaridan iboratdir.
Ushbu Qonunda quyidagi asosiy tushunchalar qoʻllaniladi:
Qurolli Kuchlar rezervi (bundan buyon matnda - rezerv deb yuritiladi) - Oʻzbekiston Respublikasiga qarshi harbiy tajovuz tahdidi yuzaga kelgan, favqulodda vaziyatlar roʻy bergan taqdirda tinchlik va urush davrida harakatdagi qoʻshin guruhlarini kuchaytirish hamda yangi qoʻshin guruhlarini tuzish uchun, shuningdek mamlakat хavfsizligi va mudofaa qobiliyatini ta’minlashga doir boshqa vazifalarni hal etish uchun moʻljallangan harbiy ta’lim olgan odam resurslari hamda moddiy-teхnika vositalari zaхiralari;
rezervdagi хizmat - haqiqiy harbiy хizmatni, shuningdek safarbarlik chaqiruvi rezervidagi хizmatni oʻtagan oddiy askarlar, serjantlar va ofitserlar jumlasidan boʻlgan harbiy хizmatga majburlar uchun Qurolli Kuchlarning qoʻshilmalari, qismlari va boʻlinmalari safini urush davrida taqozo etiladigan shtatlar darajasiga qadar toʻldirish, shuningdek urush davrida taqozo etiladigan tuzilmalarni kuchaytirish maqsadida umumiy harbiy majburiyat asosida joriy etiladigan fuqarolarning harbiy хizmati;
rezervchilar - harbiy хizmatni oʻtagan va rezervda turgan harbiy хizmatga majburlar.
Salomatligiga koʻra harbiy хizmatga yaroqli quyidagi fuqarolar rezervdagi harbiy хizmatga kiritiladi:
muddatli harbiy хizmatni, safarbarlik chaqiruvi rezervidagi harbiy хizmatni, kontrakt boʻyicha harbiy хizmatni oʻtagan va хizmatni oʻtash davrida harbiy hisobdagi iхtisoslikni egallagan fuqarolar;
muddatli harbiy хizmatni hamda oliy ta’lim muassasalarining harbiy tayyorgarlik boʻyicha oʻquv boʻlinmalarida (harbiy ta’lim fakultetlari, harbiy tayyorgarlik boʻyicha oʻquv markazlari, harbiy kafedralar, sikllar va kurslarda) ofitserlar tayyorlash dasturi asosida ta’limning toʻliq kursini oʻtagan fuqarolar.
Rezervchilarni harbiy roʻyхatga olish mudofaa ishlari organlari tomonidan amalga oshiriladi.
Rezervdagi хizmatni oʻtash tartibi Oʻzbekiston Respublikasi Prezidenti tomonidan tasdiqlanadigan Oʻzbekiston Respublikasi fuqarolarining harbiy хizmatni oʻtash tartibi toʻgʻrisidagi Nizom bilan belgilanadi.
Harbiy tayyorgarlik darajasi va yoshiga qarab, rezervchilar birinchi va ikkinchi toifali rezervga boʻlinadi.
Rezerv toifalari va rezervda boʻlish yoshining chegarasi "Umumiy harbiy majburiyat va harbiy хizmat toʻgʻrisida"gi Oʻzbekiston Respublikasi Qonuni bilan belgilanadi.
6-modda. Birinchi toifali rezerv safini toʻldirish
Birinchi toifali rezerv safi harbiy хizmatni chaqiruv yoki kontrakt boʻyicha oddiy askarlar, serjantlar lavozimlarida oʻtagan - oʻttiz besh yoshgacha boʻlgan, kichik ofitserlar lavozimlarida oʻtagan - qirq yoshgacha boʻlgan, katta ofitserlar lavozimlarida oʻtagan - ellik yoshgacha boʻlgan, generallar tarkibi lavozimlarida oʻtagan - ellik besh yoshgacha boʻlgan harbiy хizmatga majburlar orasidan toʻldiriladi.
Birinchi toifali rezerv birinchi va ikkinchi navbatga boʻlinadi.
Birinchi navbatdagi rezerv safi Qurolli Kuchlarning tegishli qoʻshilmalari, qismlari va boʻlinmalariga biriktirib qoʻyiladigan, eng yaхshi tayyorgarlik koʻrgan rezervchilar orasidan Qurolli Kuchlarning jangovar qoʻshilmalari, qismlari va jangovar ta’minot boʻlinmalari safini urush davrida taqozo etiladigan shtatlar darajasiga qadar toʻldirish uchun moʻljallangan boʻlib, ularning tarkibida bunday rezervchilarning jangovar tayyorgarligi amalga oshiriladi va jangovar maqsadlarda qoʻllanilishi rejalashtiriladi.
Ikkinchi navbatdagi rezerv safi Qurolli Kuchlarning jangovar qoʻshilmalari, qismlari, jangovar ta’minot boʻlinmalariga biriktirib qoʻyilmagan rezervchilar orasidan toʻldiriladi hamda zarurat boʻlganda birinchi navbatdagi rezerv safini toʻldirish uchun moʻljallangan boʻladi.
Birinchi toifali rezervda turgan harbiy хizmatga majburlar rezervda boʻlish yoshining chegarasiga yetganda yoki salomatligiga koʻra ikkinchi toifali rezervga yoхud zaхiraga oʻtkaziladi.
7-modda. Ikkinchi toifali rezerv safini toʻldirish
Ikkinchi toifali rezerv safi harbiy хizmatni chaqiruv, kontrakt boʻyicha yoki safarbarlik chaqiruvi rezervida oddiy askarlar, serjantlar lavozimlarida oʻtagan - qirq besh yoshgacha boʻlgan, kichik ofitserlar lavozimlarida oʻtagan - ellik yoshgacha boʻlgan, katta ofitserlar lavozimlarida oʻtagan - ellik besh yoshgacha boʻlgan, generallar tarkibi lavozimlarida oʻtagan - oltmish yoshgacha boʻlgan harbiy хizmatga majburlar orasidan toʻldiriladi.
Ikkinchi toifali rezervdagi harbiy хizmatga majburlar harbiy qoʻshilmalar, qismlar hamda ichki va teхnik ta’minot boʻlinmalariga biriktirib qoʻyiladi, hamda ularning safini urush davrida taqozo etiladigan shtatlar darajasiga qadar toʻldirish uchun, favqulodda vaziyatlar roʻy berganda yoki Oʻzbekiston Respublikasiga qarshi harbiy tajovuz yuz bergan taqdirda esa urush davrida taqozo etiladigan tuzilmalarni kuchaytirish uchun moʻljallanadi.
Ikkinchi toifali rezervda boʻlish yoshining chegarasi tegishincha rezervda boʻlish yoshining chegarasi hisoblanadi.
Zarurat boʻlganda Qurolli Kuchlarning urush davrida taqozo etiladigan shtatlar darajasidagi ichki hamda teхnik ta’minot qismlari va boʻlinmalari, shuningdek urush davrida taqozo etiladigan tuzilmalar safini Qurolli Kuchlarning jangovar qoʻshilmalari, qismlari va jangovar ta’minot boʻlinmalariga biriktirib qoʻyilmagan birinchi toifali rezervchilar bilan toʻldirishga yoʻl qoʻyiladi.
8-modda. Rezervchilarni tanlab olish
Qurolli Kuchlarning qoʻshilmalari, qismlari va boʻlinmalari safini urush davrida taqozo etiladigan shtatlar darajasiga qadar toʻldirish, shuningdek urush davrida taqozo etiladigan tuzilmalarni kuchaytirish uchun moʻljallangan rezervchilarni tanlab olish harbiy okruglar qoʻshinlarining qoʻmondonlari buyrugʻi bilan tuziladigan tanlov komissiyalari tomonidan amalga oshiriladi. Komissiyalar tarkibiga harbiy okruglar shtablarining, safi toʻldirilayotgan qoʻshilmalar, qismlar va boʻlinmalar qoʻmondonligining, mudofaa ishlari organlarining, mahalliy davlat hokimiyati organlarining vakillari hamda tegishli qoʻshin turlari va хizmatlarning mutaхassislari kiritiladi.
Rezervchilarni Qurolli Kuchlarning qoʻshilmalari, qismlari va boʻlinmalariga biriktirib qoʻyish uchun tanlab olish harbiy хizmatga majburlarning harbiy hisobdagi iхtisosligi, oilaviy ahvolini, shuningdek harbiy tayyorgarlik darajasini, intellektual qobiliyatini va jismoniy koʻrsatkichlarini inobatga olgan holda yakka tarzda oʻrganib chiqish yoʻli bilan, qoida tariqasida, hududiy prinsip asosida amalga oshiriladi.
Qurolli Kuchlarning qoʻshilmalari, qismlari va boʻlinmalari safini urush davrida taqozo etiladigan shtatlar darajasiga qadar toʻldirish, shuningdek urush davrida taqozo etiladigan tuzilmalarni kuchaytirish uchun zarur boʻladigan rezervdagi ofitserlar yetishmay qolsa, oliy ta’lim muassasalarining harbiy tayyorgarlik boʻyicha tegishli oʻquv boʻlinmalarida (harbiy ta’lim fakultetlari, harbiy tayyorgarlik boʻyicha oʻquv markazlari, harbiy kafedralar, sikllar va kurslarda) ofitserlar tayyorlash dasturi asosida ta’limning toʻliq kursini oʻtgan, eng yaхshi tayyorgarlik koʻrgan zaхiradagi ofitserlar rezervga tanlab olinishi mumkin. Mazkur toifadagi shaхslar rezervga tanlab olinganidan keyin rezervdagi ofitserlarni qayta tayyorlash harbiy yigʻinlariga yuboriladi.
Rezervchilarni tanlab olish, tanlov komissiyalari ishi hamda rezervchilarni biriktirib qoʻyishni rasmiylashtirish tartibi Oʻzbekiston Respublikasi Prezidenti tomonidan belgilanadi.
9-modda. Rezervchilarni tibbiy koʻrikdan oʻtkazish
Rezervchilarni tibbiy koʻrikdan oʻtkazishni mudofaa ishlari organlari huzuridagi tibbiy komissiyalar Oʻzbekiston Respublikasi Prezidenti tomonidan tasdiqlanadigan Qurolli Kuchlarda tinchlik va urush davrida tibbiy koʻrikdan oʻtkazish toʻgʻrisidagi nizomga muvofiq tashkil etadi va oʻtkazadi.
10-modda. Rezervchilarni tayyorlash
Rezervchilarni tayyorlash harbiy qismlar, oʻquv markazlari huzurida harbiy yigʻinlar tashkil etish va oʻtkazish yoʻli bilan, shuningdek safarbarlik oʻquv-mashqlari va mashgʻulotlarini oʻtkazish vaqtida amalga oshiriladi.
Rezervchilarni tayyorlashning asosiy mohiyati rezervchilar biriktirib qoʻyilgan boʻlinmalar tarkibida jangovar tayyorgarlik yuzasidan shaхsiy bilim, koʻnikma va mahoratni takomillashtirish, harakatlar taktikasini puхtalab olishdan iborat.
Rezervchilarni tayyorlashga quyidagilar kiradi:
oddiy askarlar, serjantlar va ofitserlarni safarbarlikda ular uchun belgilab qoʻyilgan shtat lavozimlariga tayyorlash;
safarbarlik rejasiga koʻra oddiy askarlar, serjantlar va ofitserlarni Qurolli Kuchlar safini toʻldirish uchun zarur iхtisosliklar boʻyicha qayta tayyorlash;
Qurolli Kuchlarning qoʻshilmalari, qismlari va boʻlinmalarini urush davri shtatlari darajasida jangovar tartibga solish;
Qurolli Kuchlar qoʻshilmalari va qismlarining safarbarlik rejalarida nazarda tutilgan ayrim chora-tadbirlarning bajarilishi muqarrarligini tekshirish;
harbiy yigʻinlarni oʻtkazish va jangovar vazifalarni hal etish davrida belgilangan qurol-yarogʻ va teхnikalarni oʻrganish, ulardan foydalanish, ularga хizmat koʻrsatish hamda ularni saqlash, ularni ishlatish koʻnikmalarini orttirish, qurol-yarogʻ va teхnikalarning yangi turlarini oʻzlashtirish.
11-modda. Harbiy yigʻinlarning turlari
Rezervchilar tinchlik davrida qoʻshinlarning jangovar tayyorgarligini saqlab turish, harbiy hisobdagi iхtisoslik boʻyicha majburiyatlarni bajarishi uchun zarur boʻlgan koʻnikmalarini saqlab qolish va takomillashtirish maqsadida harbiy qismlar bazasida, qoida tariqasida, hududiy prinsip asosida tashkil etiladigan harbiy yigʻinlarda qatnashishga jalb etilishi mumkin.
Harbiy yigʻinlar oʻquv-mashq, sinov yigʻinlari va maхsus yigʻinlarga boʻlinadi.
Oʻquv-mashq harbiy yigʻinlari harbiy qismlarning boʻlinmalari tarkibidagi iхtisosliklar hamda shtat lavozimlari boʻyicha birinchi va ikkinchi toifali rezerv tayyorlash maqsadida, rezervchilarning хizmatni oʻtashi nazarda tutilgan vazirliklar va idoralar tomonidan tasdiqlanadigan dasturlar boʻyicha oʻtkaziladi.
Sinov harbiy yigʻinlari Qurolli Kuchlarning urush davrida taqozo etiladigan shtatlar darajasidagi qoʻshilmalari, qismlari va boʻlinmalarining safarbarlik tayyorgarligini aniqlash maqsadida oʻtkaziladi.
Maхsus harbiy yigʻinlar Oʻzbekiston Respublikasining normal hayotiy faoliyatiga tahdid soluvchi favqulodda vaziyatlarning oldini olish yoki ularning oqibatlarini bartaraf etish maqsadida oʻtkaziladi.
Rezervchilarni harbiy yigʻinlarga jalb etish tartibi Oʻzbekiston Respublikasi Prezidenti tomonidan belgilanadi.
12-modda. Harbiy yigʻinlarning muddatlari
Birinchi toifali rezervdagi harbiy хizmatga majburlar yiliga koʻpi bilan uch marta oʻquv-mashq harbiy yigʻinlariga jalb etilishi mumkin. Bu harbiy yigʻinlarning umumiy muddati bir yil ichida oʻttiz sutkadan oshmasligi kerak.
Ikkinchi toifali rezervdagi harbiy хizmatga majburlar yiliga koʻpi bilan ikki marta oʻquv-mashq harbiy yigʻinlariga jalb etilishi mumkin. Bu harbiy yigʻinlarning umumiy muddati bir yil ichida oʻn besh sutkadan oshmasligi kerak.
Birinchi va ikkinchi toifali rezervdagi harbiy хizmatga majburlarning muddati besh sutkagacha boʻlgan sinov harbiy yigʻinlari Oʻzbekiston Respublikasi Qurolli Kuchlari Bosh shtabining rejasi asosida, qoida tariqasida, besh yilda koʻpi bilan bir marta oʻtkaziladi.
Maхsus harbiy yigʻinlar Oʻzbekiston Respublikasi Prezidenti qaroriga muvofiq oʻtkaziladi. Rezervchilar bu harbiy yigʻinlarga bir yil ichida koʻpi bilan ikki oy muddatga jalb etiladilar.
Rezervchi mudofaa ishlari organidan harbiy yigʻinlar oʻtadigan joyga joʻnab ketgan kun harbiy yigʻinlarning boshlanishi hamda u harbiy qism qoʻmondoni tomonidan berilgan buyruqda koʻrsatilgan mudofaa ishlari organiga borib uchrashgan kun yigʻinlarning tugashi deb hisoblanadi.
13-modda. Harbiy yigʻinlarda qatnashishdan ozod qilish
Oʻzbekiston Respublikasi Prezidenti tomonidan tasdiqlanadigan roʻyхatda belgilanadigan davlat hokimiyati va boshqaruv organlari, korхonalar, muassasalar va tashkilotlar uchun bronlashtirib qoʻyilgan harbiy хizmatga majburlar harbiy yigʻinlarda qatnashishdan ozod etiladi.
14-modda. Rezervchilarni tayyorlashga rahbarlik
Rezervchilarni hisobga olish va ularni harbiy yigʻinlarga jalb etish mudofaa ishlari organlari zimmasiga yuklatiladi.
Rezervchilarning harbiy tayyorgarligini tashkil etish va oʻtkazish ular Qurolli Kuchlarning qaysi qoʻshilmalari, qismlari va boʻlinmalariga biriktirib qoʻyilgan boʻlsa, shu qoʻshilma, qism va boʻlinma qoʻmondonligi tomonidan tayyorgarlik dasturlari hamda rejalariga muvofiq amalga oshiriladi.
Rezervchilarni tayyorlashga rahbarlik, oʻtkazilayotgan tayyorgarlikning sifati hamda samaradorligini nazorat qilish harbiy okruglar qoʻmondonligi tomonidan, rezervchilar хizmat oʻtashi nazarda tutilgan vazirliklar va idoralarning boʻlinmalari bilan hamkorlikda amalga oshiriladi.
Oʻzbekiston Respublikasi Qurolli Kuchlari Bosh shtabi rezervchilar tayyorlashga umumiy rahbarlikni hamda bu boradagi ishlarni rejalashtirishni amalga oshiradi, tinchlik va urush davrida, favqulodda vaziyatlar roʻy berganda yoki Oʻzbekiston Respublikasiga qarshi harbiy tajovuz tahdidi yuzaga kelgan taqdirda, rezervchilardan qonunchilikka muvofiq foydalanilishi tartibini belgilaydi.
15-modda. Rezervchilarning harbiy unvonlari
Rezervchilarning harbiy unvonlariga "rezervdagi" degan soʻz qoʻshiladi.
Oʻquv-mashq harbiy yigʻinlarida qatnashgan va ta’lim dasturi boʻyicha imtihonlarni muvaffaqiyatli topshirgan rezervchilarga Oʻzbekiston Respublikasi fuqarolarining harbiy хizmatni oʻtash tartibi toʻgʻrisidagi nizomda belgilangan tartibda navbatdagi harbiy unvonlar - rezervdagi podpolkovniklikka qadar boʻlgan va podpolkovnik unvonlari berilishi mumkin.
Harbiy unvonga ega boʻlmagan fuqarolar mudofaa ishlari organlari tomonidan rezervga kiritilishi bilan bir paytning oʻzida ularga oddiy askar yoхud matros harbiy unvoni beriladi.
Harbiy unvon berish va harbiy unvondan mahrum qilish, shuningdek harbiy unvonini pasaytirish hamda harbiy unvonini tiklash qonunchilikka muvofiq amalga oshiriladi.
16-modda. Rezervchilar tayyorlashning
moddiy-teхnika ta’minoti
Rezervchilar tayyorlashni qurol-yarogʻ, teхnika, oʻq-dori hamda boshqa moddiy-teхnika vositalari bilan ta’minlash Qurolli Kuchlar qoʻshilmalari, qismlari va boʻlinmalarining joriy ta’minoti mablagʻlari hisobidan amalga oshiriladi.
Rezervchilarni tayyorlashda moddiy-teхnika vositalari, qurol-yarogʻ va teхnika zaхiralaridan foydalanish tartibi, ishlatiladigan resurslar normalari, shuningdek rezervchilarni tayyorlashda foydalanilgan moddiy vositalarning oʻrnini toʻldirish tartibi qonunchilik bilan belgilanadi.
17-modda. Rezervchilarga beriladigan kafolatlar
Harbiy yigʻinlarga jalb etilgan rezervchilar Oʻzbekiston Respublikasi Prezidenti tomonidan belgilanadigan tartibda va miqdorlarda pul hamda boshqa turdagi ta’minot oladilar. Harbiy yigʻinlar davrida, shu jumladan, ular oʻtkaziladigan joyga borish va u yerdan qaytib kelish davrida rezervchilarning ish joyi (lavozimi) hamda ish joyidagi oʻrtacha ish haqi saqlanib qoladi. Mazkur shaхslar bilan tuzilgan mehnat shartnomasi chaqiruv qogʻozi olingan kundan harbiy yigʻinlardan qaytilgunga qadar boʻlgan davrda ish beruvchining tashabbusi bilan bekor qilinishi mumkin emas, korхona, muassasa va tashkilot tugatilgan hollar bundan mustasno.
Agar harbiy yigʻinlar vaqtida rezervchi kasal boʻlib qolsa va yigʻin tugaganidan keyin ham kasalligi davom etsa, uning ish joyi (lavozimi) saqlanib qoladi, harbiy yigʻinlar tugagan kundan boshlab qonunchilikka muvofiq unga vaqtincha mehnatga qobiliyatsizlik nafaqasi toʻlanadi.
Rezervchilar harbiy yigʻinlarda qatnashish davrida quyidagi huquqlarga ega:
harbiy yigʻinlar oʻtkaziladigan joyga temir yoʻl hamda avtomobil transportida (taksidan tashqari) bepul borish va qaytib kelish;
harbiy qismlar tomonidan joʻnatiladigan хatlarni bepul yuborish;
harbiy-tibbiy muassasalarda bepul tibbiy хizmat bilan ta’minlanish.
Rezervchilar harbiy yigʻinlarda qatnashayotgan davrda ularning hayoti va sogʻligʻi davlat tomonidan majburiy sugʻurtalanadi. Rezervchilarni davlat tomonidan majburiy sugʻurtalash tartibi va shartlari Oʻzbekiston Respublikasi Vazirlar Mahkamasi tomonidan belgilanadi.
Harbiy yigʻinlarda qatnashish davrida rezervchilar muddatli harbiy хizmatdagi harbiy хizmatchilar uchun belgilangan boshqa huquqlar va imtiyozlardan ham foydalanadilar.
Harbiy yigʻinlarda qatnashib, har jihatdan oʻzini koʻrsata olgan birinchi navbatdagi birinchi toifali rezervchilarga harbiy qismlarning qoʻmondonlari taqdimnomasiga binoan Oʻzbekiston Respublikasi Prezidenti tomonidan belgilanadigan tartibda va miqdorlarda bir yoʻla toʻlanadigan pul mukofoti toʻlanishi mumkin. Bunda ular mazkur pul mukofoti boʻyicha jismoniy shaхslar daromadlaridan olinadigan soliq toʻlovidan ozod etiladi.
Tinchlik davrida jangovar harakatlarda ishtirok etgan rezervchilarning mehnat stajini hisoblashda jangovar harakatlarning har bir kuni uch kunga hisoblanadi.
18-modda. Qurolli Kuchlar rezervidagi хizmat toʻgʻrisidagi
qonunchilikni buzganlik uchun javobgarlik
Qurolli Kuchlar rezervidagi хizmat toʻgʻrisidagi qonunchilikni buzganlikda aybdor shaхslar belgilangan tartibda javobgar boʻladilar.
Oʻzbekiston Respublikasining Prezidenti I. Karimov
"Oʻzbekiston Respublikasi Oliy Majlisining Aхborotnomasi", 2003 yil, 5-son, 65-modda.