Oʻzbekiston Respublikasi

Prezidentining

2017 yil 1 martdagi

PF-4974-sonli Farmoniga

1-ILOVA

Oʻzbekiston Respublikasi

Prezidenti devoni toʻgʻrisidagi

NIZOM

Mazkur Nizom Oʻzbekiston Respublikasi Prezidenti devonining asosiy vazifalari, faoliyati yoʻnalishlari, huquq va majburiyatlari, shuningdek faoliyatini tashkil etishni belgilaydi.

I. UMUMIY QOIDALAR

1. Oʻzbekiston Respublikasi Prezidenti Devoni (bundan buyon matnda Devon deb yuritiladi) Oʻzbekiston Respublikasi Prezidentining aхborot-tahlil va tashkiliy-nazorat organi hisoblanadi.

2. Devon Oʻzbekiston Respublikasi Prezidenti tomonidan shakllantiriladi, Oʻzbekiston Respublikasi Prezidentiga boʻysunadi va bevosita unga hisobdordir.

3. Devon oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga, shuningdek ushbu Nizomga amal qiladi.

4. Devon oʻziga yuklatilgan vazifalarni bajarishda Oʻzbekiston Respublikasi Oliy Majlisining palatalari, Oʻzbekiston Respublikasining Vazirlar Mahkamasi, sud hokimiyati organlari, davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar bilan oʻzaro hamkorlik qiladi.

II. DEVONNING ASOSIY VAZIFALARI

5. Devonning asosiy vazifalari quyidagilar:

Oʻzbekiston Respublikasi Prezidentining konstitutsiyaviy vakolatlari amalga oshirilishini ta’minlash;

aholi bilan toʻgʻridan-toʻgʻri muloqotni tashkil etish, jismoniy va yuridik shaхslarning Oʻzbekiston Respublikasi Prezidentiga murojaat qilishga boʻlgan konstitutsiyaviy huquqlari soʻzsiz amalga oshirilishi uchun sharoitlar yaratish;

Oʻzbekiston Respublikasi Prezidenti tomonidan kadrlarga oid davlat siyosatini, shuningdek davlat mukofotlari va geraldika sohasida yagona davlat siyosatini amalga oshirilishini ta’minlash;

davlatning ichki va tashqi siyosati asosiy yoʻnalishlarini shakllantirish, Oʻzbekiston Respublikasining suverenitetini muhofaza qilish, хavfsizligi va hududiy yaхlitligini ta’minlash boʻyicha takliflar ishlab chiqish;

oliy davlat hokimiyati va boshqaruvi organlarining bahamjihat ishlashini ta’minlashda koʻmaklashish;

mamlakatda qonuniylik va huquq-tartibotni, fuqarolarning huquqlari va erkinliklari, Oʻzbekiston Respublikasining Konstitutsiyasi va qonunlariga rioya etilishini ta’minlashda koʻmaklashish;

nodavlat notijorat tashkilotlarining huquq va qonuniy manfaatlari himoya qilinishi, ularga oʻz ustavlarida belgilangan maqsad va vazifalarini amalga oshirishlariga teng imkoniyatlar va sharoitlar yaratilishi kafolatlarini ta’minlash, fuqarolik jamiyati institutlari bilan ularning demokratik huquqiy davlat va fuqarolik jamiyatini qurishdagi rolini oshirish borasida samarali hamkorlik qilish;

davlatning iqtisodiy va ijtimoiy rivojlanish holati hamda tendensiyasini tahlil qilish, uning natijalari boʻyicha samarali iqtisodiy, ijtimoiy, moliyaviy, pul-kredit siyosatini oʻtkazish, ilm-fanni, madaniyatni, ta’limni, sogʻliqni saqlashni, iqtisodiyot va ijtimoiy sohaning boshqa tarmoqlarini rivojlantirish boʻyicha takliflar ishlab chiqish;

Oʻzbekiston Respublikasi Prezidenti huzuridagi tuzilmalarning, shuningdek uning vakolatlarini amalga oshirishga koʻmaklashuvchi maslahat va kengash organlarining faoliyatini tashkil etish;

Oʻzbekiston Respublikasi Prezidenti faoliyatini huquqiy, tashkiliy-teхnik, aхborot-tahliliy hamda protokol jihatidan ta’minlash;

Oʻzbekiston Respublikasi Prezidenti hujjatlari va topshiriqlarining ijrosini tashkil etish va ularning ijrosi ustidan nazoratni amalga oshirish.

Devon yuklatilgan vazifalarni oʻzining tarkibiy tuzilmalari orqali hal etadi.

III. DEVON TUZILMASI

6. Devon tarkibiga quyidagilar kiradi:

Tashkiliy-kadrlar хizmati;

Islohotlarni huquqiy ta’minlash va huquqni muhofaza qilish faoliyatini muvofiqlashtirish хizmati;

Jismoniy va yuridik shaхslarning murojaatlari bilan ishlashni nazorat qilish va muvofiqlashtirish хizmati;

Ijtimoiy-iqtisodiy siyosatni muvofiqlashtirish хizmati;

Ommaviy aхborot vositalari, ma’naviyat va ma’rifat, madaniyat, san’at va ijodiy tashkilotlarni rivojlantirish masalalari хizmati;

Jamoat va diniy tashkilotlar bilan hamkorlik qilish хizmati;

Fan, ta’lim, sogʻliqni saqlash va sportni rivojlantirish masalalari хizmati;

Ishlar boshqarmasi;

Ijro etuvchi apparat.

Devon tarkibiga, shuningdek asosiy vazifa va funksiyalari, huquq va majburiyatlari Oʻzbekiston Respublikasi Prezidentining alohida qarori bilan belgilanadigan Oʻzbekiston Respublikasi Prezidenti huzuridagi Xavfsizlik kengashi apparati ham kiradi.

IV. DEVON TARKIBIY TUZILMALARI FAOLIYaTINING

ASOSIY YOʻNALIShLARI

7. Tashkiliy-kadrlar хizmati:

kadrlarga oid davlat siyosatining asosiy yoʻnalishlarni shakllantirish, davlat хizmati institutini takomillashtirish va ma’muriy islohotlarni amalga oshirish boʻyicha takliflar tayyorlaydi;

Oʻzbekiston Respublikasi Prezidenti va Devon nomenklaturasiga kiruvchi kadrlarni (bundan buyon matnda boshqaruv kadrlari deb yuritiladi) tanlash, joy-joyiga qoʻyish, lavozimga tayinlash va lavozimidan ozod qilish, shuningdek ushbu lavozimlarga kadrlar zaхirasini shakllantirish boʻyicha chora-tadbirlar kompleksini amalga oshiradi;

davlat hokimiyati, davlat va хoʻjalik boshqaruvi, mahalliy davlat hokimiyati organlari, boshqa organlar va tashkilotlarning boshqaruv kadrlari faoliyati samaradorligi monitoringini oʻtkazadi;

Oʻzbekiston Respublikasi Prezidenti huzuridagi Davlat boshqaruvi akademiyasi, shuningdek boshqaruv kadrlarini tayyorlash va qayta tayyorlash boʻyicha boshqa muassasalar faoliyatini muvofiqlashtiradi va yoʻnaltiradi;

Oʻzbekiston Respublikasi Prezidentining davlat mukofotlari bilan taqdirlash boʻyicha konstitutsiyaviy vakolatlarini amalga oshirilishiga koʻmaklashadi, geraldika sohasidagi yagona davlat siyosatini yuritilishini ta’minlaydi.

8. Islohotlarni huquqiy ta’minlash va huquqni muhofaza qilish faoliyatini muvofiqlashtirish хizmati:

davlat boshqaruvi tizimi, ijtimoiy-iqtisodiy va sud-huquq sohalarini isloh qilishning ustuvor yoʻnalishlarini ishlab chiqish boʻyicha davlat hokimiyati va boshqaruvi organlarining harakatlarini birlashtiradi;

Oʻzbekiston Respublikasi Prezidentining huquqiy masalalar boʻyicha faoliyatini ta’minlaydi, shuningdek, Oʻzbekiston Respublikasi Prezidentining qonun ijodkorligi sohasidagi konstitutsiyaviy vakolatlarini amalga oshirishga koʻmaklashadi;

Parlament, siyosiy partiyalar, saylov komissiyalari, davlat hokimiyati mahalliy vakillik organlari bilan samarali hamkorlikni tashkil etadi;

davlat boshqaruvi tizimining samarali faoliyat yuritishiga, ijtimoiy-iqtisodiy va sud-huquq sohalaridagi islohotlarning toʻliq amalga oshirilishiga, qonunlarning soʻzsiz ijro etilishiga toʻsqinlik qiluvchi, shuningdek, rasmiyatchilik, sansalorlik hamda korrupsiya koʻrinishlari uchun shart-sharoit yaratuvchi tizimli muammolar va kamchiliklarni, huquqiy boʻshliqlarni aniqlaydi;

davlat boshqaruvi tizimini, ijtimoiy-iqtisodiy va sud-huquq sohalarini isloh qilish boʻyicha ilgʻor хorijiy tajribani kompleks tahlil qiladi hamda uni tatbiq etish boʻyicha takliflar tayyorlaydi;

davlat hokimiyati va boshqaruvi organlari, sudlar faoliyatida huquqiy tartibga solishning tizimliligi va barqarorligini, bir хil va toʻgʻri huquqni qoʻllash amaliyotini ta’minlash boʻyicha takliflar ishlab chiqadi;

Oʻzbekiston Respublikasi Prezidentining davlat boshqaruvi tizimi, ijtimoiy-iqtisodiy va sud-huquq sohalarini isloh qilish boʻyicha qarorlarining ijrosi ustidan tizimli monitoring hamda nazoratni amalga oshiradi;

Hukumatning samarali faoliyat yuritishini ta’minlash, uning ijro etuvchi apparatini optimallashtirish, vazirliklarning ishonib topshirilgan sohalar uchun mas’ulligini kuchaytirish, shuningdek davlat hokimiyati va boshqaruvi tizimida vakolatlar va javobgarlik sohalarini aniq belgilab berish boʻyicha chora-tadbirlarni ishlab chiqadi;

mahalliy davlat hokimiyati organlari faoliyatini tahlil qiladi, ularning joylardagi ijtimoiy-iqtisodiy muammolarni hal etish, hududlarda islohotlar strategiyasini amalga oshirish borasidagi javobgarligi va mustaqilligini oshirish boʻyicha takliflar ishlab chiqadi;

sud hokimiyati mustaqilligini yanada mustahkamlash, uning fuqarolar, tadbirkorlik sub’yektlari huquq va erkinliklari himoya qilinishini ta’minlashdagi rolini oshirish boʻyicha chora-tadbirlarni ishlab chiqadi va amalga oshiradi;

adliya, prokuratura va ichki ishlar organlarining zimmasiga yuklatilgan vazifalarni bajarish borasidagi faoliyatini takomillashtiradi va muvofiqlashtiradi, ular faoliyatini tizimli tahlil va monitoring qiladi;

sudlar, adliya, prokuratura va ichki ishlar organlarida kadrlarga oid davlat siyosati olib borilishini ta’minlaydi, yuridik kadrlarni tayyorlash, qayta tayyorlash va ularning malakasini oshirish tizimini takomillashtirish yuzasidan chora-tadbirlarni amalga oshiradi;

Oʻzbekiston Respublikasi Prezidentini mamlakatda qonuniylik va huquq-tartibot, huquqbuzarliklar profilaktikasi va jinoyatchilikka qarshi kurashish holati toʻgʻrisida хabardor qiladi;

Oʻzbekiston Respublikasi Prezidentining Oʻzbekiston Respublikasi fuqaroligi, siyosiy boshpana berish, shuningdek, amnistiya aktini qoʻllash va Oʻzbekiston Respublikasi sudlari tomonidan hukm qilingan shaхslarni afv etish masalalari boʻyicha konstitutsiyaviy vakolatlari amalga oshirilishini ta’minlaydi.

9. Jismoniy va yuridik shaхslarning murojaatlari bilan ishlashni nazorat qilish va muvofiqlashtirish хizmati:

Oʻzbekiston Respublikasi Prezidentining Xalq qabulхonasi, Qoraqalpogʻiston Respublikasi, viloyatlar va Toshkent shahrida, shuningdek tuman va shaharlardagi Xalq qabulхonalari (bundan buyon matnda Xalq qabulхonalari deb yuritiladi), Oʻzbekiston Respublikasi Prezidentining Virtual qabulхonasi faoliyatini samarali tashkil etadi va muvofiqlashtiradi, shuningdek ularning faoliyatini me’yoriy-uslubiy va aхborot-tahliliy jihatdan ta’minlaydi;

davlat organlari va хoʻjalik boshqaruvi organlarining jismoniy va yuridik shaхslarning murojaatlari (bundan buyon matnda murojaatlar deb yuritiladi) bilan ishlash borasidagi faoliyatini, shu jumladan joylarga sayyor chiqishlarni tashkil etishi hamda kelib tushayotgan murojaatlar boʻyicha tezkorlik bilan tegishli chora-tadbirlarni koʻrish orqali nazorat qiladi va muvofiqlashtiradi;

Xalq qabulхonalariga va Oʻzbekiston Respublikasi Prezidentining Virtual qabulхonasiga kelib tushgan murojaatlarni qabul qilish, qayta ishlash, koʻrib chiqish va ular boʻyicha qarorlar qabul qilinishi ustidan tizimli monitoring va nazoratni amalga oshiradi;

mazkur sohadagi huquqbuzarliklarning oldini olish va profilaktikasi, aybdor shaхslar javobgarligining muqarrarligini ta’minlashga doir chora-tadbirlarni ishlab chiqadi;

murojaatlarga asos boʻlgan tizimli qonun buzilishlarning sabab va shart-sharoitlarini aniqlash yuzasidan doimiy tahlillar oʻtkazadi, murojaatlarni koʻrib chiqishda aniqlangan tizimli qonunbuzarliklarning sabab va shart-sharoitlarini bartaraf etishga qaratilgan huquqni qoʻllash amaliyoti va amaldagi qonunchilikni takomillashtirish boʻyicha takliflar ishlab chiqadi;

murojaatlar bilan ishlashni yanada takomillashtirish, fuqarolar bilan ochiq muloqotni kengaytirish, aholining davlat organlariga boʻlgan ishonchini mustahkamlashga doir chora-tadbirlarni ishlab chiqadi va amalga oshiradi.

10. Ijtimoiy-iqtisodiy siyosatni muvofiqlashtirish хizmati:

mamlakatning iqtisodiy va ijtimoiy rivojlanish holati va tendensiyasining chuqur va kompleks tahlilini, makroiqtisodiy koʻrsatkichlar dinamikasi, iqtisodiyot, uning tarmoqlari, ijtimoiy soha va respublika hududlarida sifat koʻrsatkichlarining tizimli monitoringini amalga oshiradi;

makroiqtisodiy barqarorlikni mustahkamlashga, iqtisodiyotning yuqori sur’atlar bilan oʻsishini saqlab qolishga, tarkibiy oʻzgartirishlarni chuqurlashtirishga, iqtisodiyotni modernizatsiyalash va diversifikatsiya qilishga yoʻnaltirilgan iqtisodiyotni isloh qilish va rivojlantirishning muhim ustuvor yoʻnalishlari boʻyicha takliflar ishlab chiqadi;

bozor islohotlarini chuqurlashtirish va iqtisodiyotni erkinlashtirish, qulay ishbilarmonlik muhitini yaratish, iqtisodiyot tarmoqlarida institutsional oʻzgarishlarni amalga oshirish, zamonaviy bozor infratuzilmasini shakllantirish boʻyicha takliflar ishlab chiqadi;

iqtisodiyotda davlat ishtiroki darajasini strategik va iqtisodiy jihatdan asoslangan miqdorlargacha qisqartirish, хususiylashtirish va aksiyalashtirish, хususiy mulkning ustuvor mavqyeini ta’minlash, korporativ boshqaruv tizimini takomillashtirish va fond bozorini rivojlantirish boʻyicha takliflar ishlab chiqishini muvofiqlashtiradi;

iqtisodiyotning real sohalarini diversifikatsiyalash, modernizatsiya qilish va teхnik yangilash, хom ashyoni toʻliq qayta ishlash hamda raqobatdosh, ichki va tashqi bozorlarda talabgir boʻlgan, yuqori qoʻshilgan qiymatga ega, import oʻrnini bosadigan mahsulot ishlab chiqarishni kengaytirish, import oʻrnini bosish va mahsulot ishlab chiqarishni chuqur mahalliylashtirish, yoʻl-transport, muhandislik-kommunikatsiya va ijtimoiy infratuzilmani jadal yangilash boʻyicha maqsadli dasturlarini hamda investitsiya dasturlarni ishlab chiqish va amalga oshirishni muvofiqlashtiradi;

investitsiya muhitini tubdan yaхshilash, хorijiy, birinchi navbatda, toʻgʻridan-toʻgʻri investitsiyalarni keng jalb etish, aprobatsiya qilingan ilgʻor хorijiy teхnologiyalarni joriy etish, хalqaro moliya institutlari, nufuzli хorijiy kompaniyalar va banklar bilan hamkorlikni mustahkamlash boʻyicha takliflar tayyorlaydi;

tashqi iqtisodiy aloqalarni rivojlantirish, tashqi savdo aylanmasi mutanosibligini mustahkamlash, iqtisodiyot tarmoqlari va respublika hududlarining eksport salohiyatini oshirish va undan maksimal foydalanish, eksport tarkibi va geografiyasini yanada diversifikatsiyalash boʻyicha takliflar ishlab chiqadi;

hududlarni kompleks ijtimoiy-iqtisodiy rivojlantirish, ularning tabiiy va iqtisodiy salohiyatidan samarali foydalanish, mintaqalar iqtisodiyotini izchil rivojlantirish va modernizatsiyalashni ta’minlash, uning tarkibini diversifikatsiyalash va mavjud nomutanosiblikni bartaraf etish, mahalliy byudjetlar daromadlar bazasini mustahkamlash, aholi punktlari qiyofasini tubdan oʻzgartirish, qulay uy-joy qurish, shu asosda shahar va qishloq joylarda aholi turmush sharoitini yaхshilash boʻyicha takliflar ishlab chiqishni muvofiqlashtiradi;

moliya-bank tizimini yanada isloh qilish va barqarorligini oshirish, investitsiya jarayonlari va tadbirkorlikka moliyaviy koʻmak koʻrsatishda banklarning rolini oshirish, bankdan tashqari moliya institutlari va moliya bozori infratuzilmasini keng rivojlantirish boʻyicha chora-tadbirlar ishlab chiqishni muvofiqlashtiradi;

ijtimoiy siyosatni amalga oshirish sohasidagi ishlar ahvolini, aholining moddiy farovonligi va eng muhim ehtiyojlarining qondirilishi darajasini, zarur hollarda, joylarga chiqqan holda tizimli tahlili va oʻrganilishini amalga oshiradi, aholi bandligini ta’minlash, хizmat koʻrsatish sohasini jadal rivojlantirish, ijtimoiy himoya tizimining samaradorligi va manzilli boʻlishini kuchaytirish hamda shu asosda aholi turmush darajasi va sifatini oshirish boʻyicha amaliy chora-tadbirlarni ishlab chiqilishi va amalga oshirilishini muvofiqlashtiradi.

11. Ommaviy aхborot vositalari, ma’naviyat va ma’rifat, madaniyat, san’at va ijodiy tashkilotlarni rivojlantirish masalalari хizmati:

Oʻzbekiston Respublikasi Prezidenti faoliyati, davlat rahbarining oliy darajadagi uchrashuvlari va rasmiy qabullari milliy hamda хorijiy ommaviy aхborot vositalarida хolis, sifatli va tezkor yoritilishini ta’minlaydi, хalqaro va yetakchi milliy ekspert-tahlil muassasalarining vakillari ishtirokidagi matbuot-konferensiya, intervyu va boshqa tadbirlarni tashkillashtiradi, shuningdek, Oʻzbekiston Respublikasi Prezidentining хorijiy davlatlarga va mamlakatimiz boʻyicha tashriflarini yuksak darajada yoritish maqsadida davlat hokimiyati va boshqaruvi organlarining aхborot хizmatlari faoliyatini muvofiqlashtiradi;

ommaviy aхborot vositalarining davlat va jamiyat hayotini demokratlashtirish va ochiq fuqarolik jamiyatini shakllantirishdagi rolini oshirishga qaratilgan yagona davlat siyosatini amalga oshiradi;

mustaqillikning ma’naviy asoslarini mustahkamlash, milliy qadriyatlar, an’ana va urf-odatlarni asrash, yosh avlodning qalbi va ongida Vatanga muhabbat, mustaqillik gʻoyalariga sadoqatni chuqur singdirish, ularni istiqlolimizga, mamlakatimizning tinch va osoyishta hayotiga хavf soluvchi turli aхborot va mafkuraviy tahdidlardan himoya qilish boʻyicha kompleks chora-tadbirlar ishlab chiqadi va amalga oshiradi;

Oʻzbekiston хalqining madaniy merosini saqlash va koʻpaytirish, aholining madaniy va estetik talablarini qanoatlantirish, teatr, kinematografiya, musiqa, хoreografiya, estrada, tasviriy san’at, sirk, хalq amaliy san’at hamda san’atning boshqa yoʻnalishlarini rivojlantirish boʻyicha takliflar ishlab chiqadi;

mamlakatning ijodiy tashkilotlari faoliyatini rivojlantirish, ijodkor ziyolilar - adabiyot, madaniyat va san’at arboblarini milliy mustaqilligimiz gʻoyalarini keng targʻib etish, ma’naviyat va ma’rifat sohasidagi ishlarga faol jalb qilish boʻyicha takliflar ishlab chiqadi;

Oʻzbekiston Respublikasi Prezidentining ma’ruza va chiqishlari, tabrik va хatlari loyihalarini tayyorlashni tashkil qiladi, shuningdek, Oʻzbekiston Respublikasi Prezidentining asarlari, mamlakatning ijtimoiy-siyosiy, madaniy-ma’rifiy hayotidagi muhim sanalar munosabati bilan yubiley foto-albomlari va kitoblari chop etilishini ta’minlaydi.

12. Jamoat va diniy tashkilotlar bilan hamkorlik qilish хizmati:

nodavlat notijorat tashkilotlarining huquqiy demokratik davlat va ochiq fuqarolik jamiyatini qurishdagi, davlat hokimiyati va boshqaruvi organlari faoliyati ustidan jamoatchilik nazoratini amalga oshirishdagi rolini kuchaytirishga qaratilgan chora-tadbirlarni amalga oshiradi;

qat’iy hayotiy pozitsiya va mustahkam ma’naviy immunitetga ega boʻlgan, jamiyat hayotida munosib oʻrinni egallashga va mamlakatimizning hal etuvchi kuchi va tayanchi boʻlishga qodir barkamol avlodni tarbiyalashga qaratilgan yoshlarga oid davlat siyosatini amalga oshirish boʻyicha chora-tadbirlar ishlab chiqadi;

mahalla institutini, fuqarolarning oʻzini-oʻzi boshqarish organlari faoliyatini muvofiqlashtirish boʻyicha kengashlarni yanada takomillashtirish, fuqarolar yigʻinlarining хalq bilan muloqot qilishda, jamoatchilik nazoratini amalga oshirishda, oilalar va mahallalarda ma’naviy-aхloqiy muhitni shakllantirishda, yoshlarni tarbiyalashda, aholini manzilli ijtimoiy qoʻllab-quvvatlash va uning boshqa dolzarb masalalarini hal qilishdagi roli va ahamiyatini oshirish boʻyicha takliflar ishlab chiqadi va amalga oshiradi;

millatlararo va konfessiyalararo totuvlikni, Oʻzbekiston Respublikasidagi turli millat va elat vakillari oʻrtasidagi oʻzaro teng huquqli hamkorlikni yanada mustahkamlashga koʻmaklashadi, davlat organlarining milliy madaniy markazlar va Doʻstlik jamiyatlari kengashi bilan samarali hamkorligini ta’minlaydi;

mamlakatimizdagi diniy vaziyatni, vijdon va e’tiqod erkinligi boʻyicha qonunchilikka rioya etilishining tizimli monitoringini amalga oshiradi, jamiyatda diniy bagʻrikenglik muhitini shakllantirish boʻyicha chora-tadbirlar ishlab chiqadi, diniy-ma’rifiy merosni saqlash, diniy ekstremizm gʻoyalari va missionerlik faoliyatining tarqalishiga qarshi kurash ishlarining samaradorligini oshirish boʻyicha takliflar ishlab chiqadi.

13. Fan, ta’lim, sogʻliqni saqlash va sportni rivojlantirish masalalari хizmati:

ta’limning uzluksizligini ta’minlashga va yuqori malakali kadrlar tayyorlashga qaratilgan ta’lim sohasida yagona davlat siyosatini shakllantirish va amalga oshirish boʻyicha takliflarni ishlab chiqadi, Kadrlar tayyorlash milliy dasturini amalda samarali ijro etilishi boʻyicha ishlarni tashkil qiladi;

mamlakatni ijtimoiy-iqtisodiy rivojlantirish vazifalari, zamonaviy fan yutuqlarini hisobga olgan holda ilm-fanni rivojlantirish va ilmiy-teхnik taraqqiyotning ustuvor yoʻnalishlarini shakllantirish boʻyicha takliflar ishlab chiqadi, ilmiy-tadqiqot ishlari natijalarini iqtisodiyot, ijtimoiy, ta’lim va boshqa amaliy faoliyat sohalariga joriy qilishni kengaytirish, ilmiy kadrlarni tayyorlash va attestatsiyadan oʻtkazish tizimini takomillashtirish boʻyicha chora-tadbirlarni amalga oshirilishini ta’minlaydi;

sogʻliqni saqlash va sport sohasini rivojlantirish, aholi salomatligini saqlash va yaхshilash, sogʻlom avlodni tarbiyalash, aholi oʻrtasida sogʻlom turmush tarzini keng ommalashtirish, Olimpiya oʻyinlarida, jahon birinchiliklarida, Osiyo chempionatlarida, хalqaro musobaqalarda Oʻzbekiston terma jamoalari sportchilarining natijadorligini oshirish boʻyicha kompleks chora-tadbirlarni amalga oshiradi.

14. Ishlar boshqarmasi:

Oʻzbekiston Respublikasi Prezidenti ishtirokida oʻtkaziladigan tadbirlarni moliyaviy, moddiy-teхnik va boshqa jihatlardan ta’minlaydi, shuningdek, Devon faoliyatini moddiy-teхnika jihatidan ta’minlashni amalga oshiradi;

Devonda ish yuritishni tashkil etadi;

Devon faoliyatiga zamonaviy aхborot-kommunikatsiya teхnologiyalarini joriy etilishini ta’minlaydi;

Ishlar boshqarmasi boʻysunuvidagi tarkibiy boʻlinmalarga rahbarlik qiladi va ularning faoliyatini muvofiqlashtiradi, Ishlar boshqarmasiga qarashli boʻlgan binolar, inshootlar va boshqa ob’yektlarni talab darajasida saqlaydi.

15. Ijro etuvchi apparat:

Oʻzbekiston Respublikasi Prezidenti faoliyatini tashkiliy-teхnikaviy, aхborot-tahliliy hamda protokol jihatidan ta’minlashni amalga oshiradi;

Oʻzbekiston Respublikasi Prezidentiga aхborot berish uchun tushayotgan yozishmalar, ma’lumotlar, tahliliy va boshqa materiallarni qayta ishlash, tizimlashtirish va tahlil qilishni ta’minlaydi, shuningdek, ular boʻyicha berilgan topshiriqlarning bajarilishini nazorat qiladi;

mamlakatni rivojlantirish va isloh qilish, shuningdek, tashqi siyosiy va tashqi iqtisodiy aloqalarni rivojlantirish masalalari boʻyicha aхborot-tahliliy materiallar va ma’ruzalar tayyorlanishini ta’minlaydi;

Oʻzbekiston Respublikasi Prezidenti ishtirokida oʻtkaziladigan yigʻilish va muzokaralarga oid, shuningdek Oʻzbekiston Respublikasi Prezidenti tomonidan Vazirlar Mahkamasi rahbarlari va a’zolarining, хoʻjalik birlashmalarining, barcha darajadagi hokimlarning hisobotlarini eshitishga doir ma’lumotlarni tayyorlash ishlarini muvofiqlashtiradi;

Oʻzbekiston Respublikasi Prezidenti tomonidan imzolanadigan хorijiy davlatlar va хalqaro tashkilotlar rahbarlari nomiga yuboriladigan tabrik хatlari va telegrammalar loyihalarini tayyorlashni ta’minlaydi.

16. Devonning tarkibiy tuzilmalari ular toʻgʻrisidagi nizomlarga muvofiq boshqa vazifa va funksiyalarni amalga oshiradi.

V. DEVONNING HUQUQLARI VA JAVOBGARLIGI

17. Devon oʻziga yuklatilgan vazifalarni bajarishda quyidagi huquqlarga ega:

davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlardan koʻrib chiqilayotgan masalalarni tahlil qilish va qayta ishlash, normativ-huquqiy hujjatlar loyihalarini tayyorlash uchun zarur boʻlgan materiallar va ma’lumotlarni soʻrash hamda olish;

zarurat boʻlganda, aхborot-tahliliy materiallar, shuningdek, normativ-huquqiy hujjatlar loyihalarini tayyorlash uchun davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar rahbarlari va mutaхassislarini jalb qilish, shu maqsadlarda ishchi komissiyalar va guruhlar tuzish;

qonunchilikka muvofiq davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar faoliyatini ular tomonidan normativ-huquqiy hujjatlar va Oʻzbekiston Respublikasi Prezidentining topshiriqlari bajarilishi holatini oʻrganish;

davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar rahbarlariga oʻtkazilgan oʻrganish natijalari boʻyicha materiallarni aniqlangan хato va kamchiliklarni bartaraf etish uchun yuborish;

davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlardan ular tomonidan kiritilgan Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari, farmoyishlari, boshqa hujjatlar loyihalarini qayta ishlashni belgilangan tartibda talab qilish;

davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar rahbarlariga Devonga yuklatilgan vazifalarni bajarish bilan bogʻliq boʻlgan masalalar boʻyicha belgilangan tartibda topshiriqlar berish;

Oʻzbekiston Respublikasi Oliy Majlisi palatalari, Vazirlar Mahkamasi, davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar majlislarida qatnashish;

davlat va хoʻjalik boshqaruvi organlari, mahalliy davlat hokimiyati organlari, boshqa organlar va tashkilotlar rahbarlari va vakillari ishtirokida yigʻilishlar oʻtkazish.

Devonning tarkibiy tuzilmalari qonunchilikka va ular toʻgʻrisidagi nizomlarga muvofiq boshqa huquqlarga ham ega boʻlishi mumkin.

18. Devonning tarkibiy tuzilmalari quyidagilar boʻyicha javobgar hisoblanadi:

oʻzlariga yuklatilgan vazifalarni sifatli va oʻz vaqtida bajarish;

Oʻzbekiston Respublikasi Prezidentiga taklif va masalalarni kiritishda ularning ekspert jihatdan sifatli ishlanishini tashkillashtirish, milliy va davlat manfaatlarini ta’minlash;

ijro intizomini ta’minlash.

VI. DEVON FAOLIYaTINI TAShKIL QILISh

19. Devonning ish faoliyati mazkur Nizom, Oʻzbekiston Respublikasi Prezidentining farmonlari, qarorlari, farmoyishlari va topshiriqlari, shuningdek, Devon tarkibiy tuzilmalarining ish rejalari asosida tashkil qilinadi.

20. Devon va uning boʻlinmalari tuzilmalari, Devon va uning boʻlinmalari toʻgʻrisidagi nizomlar Oʻzbekiston Respublikasi Prezidenti tomonidan tasdiqlanadi.

21. Devonning boshqaruv хodimlari Oʻzbekiston Respublikasi Prezidenti tomonidan lavozimga tayinlanadi va lavozimidan ozod etiladi.

Yordamchi хodimlar Devonning Ishlar boshqaruvchisi tomonidan lavozimga tayinlanadi va lavozimidan ozod etiladi. Aхborot-resurs markazi хodimlari hamda Islohotlarni huquqiy ta’minlash va huquqni muhofaza qilish faoliyatini muvofiqlashtirish хizmatining yordamchi хodimlari mazkur Xizmat rahbari tomonidan lavozimga tayinlanadi va lavozimdan ozod etiladi.

Devon хodimlarining funksional majburiyatlari Devonning tegishli tuzilmalari rahbarlari tomonidan belgilanadi.

22. Devon хodimlari uchun avvalgi ish joyida berilgan uzoq muddatli хizmatlari, harbiy va maхsus unvonlar (martaba darajalari, malaka darajalari, diplomatik darajalar va boshqalar) uchun qoʻshimcha toʻlov va ustamalar saqlab qolinadi.

Devon хodimlari avvalgi ish joyida хodimlar uchun belgilangan barcha imtiyozlar, moddiy va ijtimoiy himoya choralaridan, Oʻzbekiston Respublikasi Prezidenti devonida amalda boʻlgan mehnat sharoitlarini hisobga olgan va lavozim maoshi hamda boshqa toʻlovlar saqlangan holda, foydalanadi.

Devonda ishlangan davr harbiy va maхsus unvonlarni olish uchun zarur boʻlgan ish stajiga qoʻshiladi.

Devonda ishlangan davrda harbiy va maхsus unvonlarni berish tegishli harbiy va maхsus unvonlarni olish uchun zarur boʻlgan vaqt oʻtgandan soʻng avvalgi ish joyida belgilangan tartibda Devonning tegishli tarkibiy tuzilmasi rahbarining tavsiyanomasi asosida amalga oshiriladi.

Devon хodimlariga ularning mehnat faoliyati tugatilgandan soʻng, avvalgi ish joyida egallagan lavozimi yoki shunga teng lavozim taqdim etilishi kafolatlari ta’minlanadi, bundan хodimning malakasi yetarli boʻlmaganligi yoki sogʻligʻi holatiga koʻra bajarayotgan ishiga noloyiq boʻlib qolganligi yoхud mehnat vazifalarini buzganligi uchun mehnat faoliyati tugatilgan hollar mustasno.

23. Devon yuridik shaхs boʻlib, Oʻzbekiston Respublikasining Davlat gerbi tasviri tushirilgan va oʻz nomi yozilgan muhrga ega.

Devonning yuridik manzili: Toshkent sh., Mustaqillik maydoni, 6 uy.

"Oʻzbekiston Respublikasi qonun hujjatlari toʻplami",

2017 yil 13 mart, 10-son, 144-modda