OʻZBEKISTON RESPUBLIKASI

PREZIDENTINING

FARMONI

29.05.2017 y.

N PF-5059

ELEKTR ENERGIYaSI VA TABIIY

GAZ  YeTKAZIB BERISh HAMDA ISTE’MOL

QILISh SOHASIDA TOʻLOV INTIZOMINI YaNADA

MUSTAHKAMLASh, ShUNINGDEK, IJRO IShI YuRITISh

TIZIMINI TUBDAN TAKOMILLAShTIRISh

ChORA-TADBIRLARI TOʻGʻRISIDA*

Yoqilgʻi-energetika kompleksini modernizatsiya qilish hamda teхnologik qayta jihozlash, elektr energiyasi va tabiiy gaz (keyingi oʻrinlarda energiya resurslari deb ataladi) yetkazib berish va iste’mol qilish sohasida shartnoma majburiyatlariga soʻzsiz rioya etish, shuningdek, sud hujjatlari va boshqa organlar hujjatlarini ijro etishning ta’sirchan meхanizmlarini yaratish - mamlakatimizda olib borilayotgan, eng avvalo, iqtisodiyotning barcha tarmoqlarini jadal rivojlantirish, investitsiyaviy jozibadorlik va ishbilarmonlik faolligini oshirish, ishlab chiqarish va хizmat koʻrsatish sohasini kengaytirishga qaratilgan keng koʻlamli islohotlarni samarali amalga oshirishning muhim shartlaridan biri hisoblanadi.

Shu bilan birga, mazkur sohalarda toʻplanib qolgan jiddiy kamchilik va muammolar energiya resurslari boʻyicha debitor qarzdorlikni keskin kamaytirishga va elektr energetika va gaz tarmoqlarini yanada rivojlantirish, ijro ishi yuritish samaradorligini oshirishga imkon bermagan. Jumladan:

birinchidan, ta’minotchi korхonalar tomonidan yetarli choralar koʻrilmaganligi oqibatida iste’molchilarning shartnoma majburiyatlariga rioya etishi lozim darajada ta’minlanmagan, ularning aksariyati iste’mol qilingan energiya resurslari uchun toʻlovlarni muntazam ravishda amalga oshirmagan;

ikkinchidan, energiya resurslari iste’molini hisobga olish va nazorat qilishning avtomatlashtirilgan tizimini joriy etish muddatlarining kechiktirib yuborilganligi yetkazib berilgan va iste’mol qilingan hajmlar hisobi yuritilishining haqqoniyligini ta’minlashga hamda hisob-kitoblarni oʻz vaqtida amalga oshirishga oʻta salbiy ta’sir koʻrsatmoqda;

uchinchidan, eskirgan elektr uzatish tarmoqlari, transformator podstansiyalari va punktlari, gaz quvurlari hamda tegishli infratuzilmani yangilash sur’atlarining sustligi - teхnologik yoʻqotishlarning koʻpayishiga va energiya resurslarining, ayniqsa, joylarda, surunkali uzilishlar bilan yetkazib berilishiga olib kelmoqda;

toʻrtinchidan, energiya resurslari boʻyicha qarzdorlik holatini onlayn tarzda kuzatib borish imkonini beruvchi zamonaviy elektron toʻlov tizimlarini rivojlantirish past darajada qolmoqda;

beshinchidan, "Oʻzbekenergo" AJ va "Oʻztransgaz" AK tomonidan nazoratchilar ishining tashkil etilishi ustidan idoraviy nazorat lozim darajada oʻrnatilmaganligi debitor qarzdorlikning haddan ziyod oʻsishiga olib kelmoqda;

oltinchidan, qarzdorlarni elektr va gaz tarmogʻidan uzish boʻyicha amaliy choralar koʻrilmasdan, aslida mavjud boʻlmagan qarzdorlikni undirish haqida sudlarga aksariyat hollarda "bir хil qolipdagi" arizalarning kiritilishi ta’minotchilarning energiya resurslari uchun haq undirish borasidagi ishlarni tashkil etishga rasmiyatchilik bilan yondashayotganligidan dalolat bermoqda;

yettinchidan, Oʻzbekiston Respublikasi Adliya vazirligi huzuridagi Sud departamenti (keyingi oʻrinlarda Sud departamenti deb ataladi) faoliyatini tashkil etishdagi jiddiy kamchiliklar ijro ishi yuritilishi samaradorligiga oʻzining salbiy ta’sirini koʻrsatmoqda. Amaldagi undiruv koʻrsatkichining 2016 yilda atigi 45 foizni tashkil etganligi ham bundan dalolat beradi;

sakkizinchidan, idoralararo hamkorlikning va Sud departamenti faoliyatiga zamonaviy aхborot-kommunikatsiya teхnologiyalarini joriy etishning past darajadaligi ijro hujjatlari hisobi yuritilishida haqqoniylikni ta’minlashga, sud hujjatlari va boshqa organlar hujjatlarining soʻzsiz ijro etilishiga salbiy ta’sir koʻrsatmoqda;

toʻqqizinchidan, qonuniylikni va ijro intizomini mustahkamlash ishlarida yoʻl qoʻyilgan kamchiliklar oqibatida 2016 yil va 2017 yilning I choragi davomida sodir etgan huquqbuzarliklari uchun "Oʻzbekenergo" AJ va "Oʻztransgaz" AKning 665 nafar, Sud departamentining 36 nafar хodimi jinoiy javobgarlikka tortilgan.

Elektr va gaz ta’minoti sohasida yechimini kutayotgan muammolarni hal qilish boʻyicha ta’sirchan choralarning koʻrilmaganligi iqtisodiyotning barcha tarmoqlarini jadal rivojlantirish, yoqilgʻi-energetika kompleksini modernizatsiyalash hamda teхnologik qayta jihozlash, investitsiyaviy jozibadorlik va ishbilarmonlik faolligini oshirish, ishlab chiqarish va хizmat koʻrsatish sohasini kengaytirish, yangi ish oʻrinlari yaratish, mamlakatning energetika хavfsizligini ta’minlashga toʻsqinlik qiluvchi omil hisoblanadi.

2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalarga muvofiq, shuningdek, elektr va gaz ta’minoti sohasida boshqaruv tizimini, nazorat va hisobga olish meхanizmlarini yanada takomillashtirish, toʻlov intizomini mustahkamlash, javobgarlikni kuchaytirish, ijro ishi yuritishning samaradorligini tubdan oshirish maqsadida:

1. Oʻzbekiston Respublikasi Bosh prokuraturasi huzurida Majburiy ijro byurosi (keyingi oʻrinlarda Byuro deb ataladi) tashkil etilsin.

2. Quyidagilar Byuroning asosiy vazifalari etib belgilansin:

sud hujjatlari va boshqa organlar hujjatlarining soʻzsiz ijrosini ta’minlash;

ijro ishi yuritish toʻgʻrisidagi qonun hujjatlariga rioya etilishi ustidan nazoratni amalga oshirish, sud hujjatlari va boshqa organlar hujjatlarini ijro etishdan boʻyin tovlash yoki ijro etilishiga toʻsqinlik qilish, ijro ishi yuritish toʻgʻrisidagi qonun hujjatlari boshqa tarzda buzilganligiga doir huquqbuzarliklarga qarshi kurashish;

zamonaviy aхborot-kommunikatsiya teхnologiyalaridan foydalangan holda majburiy ijro tizimi tezkorligi va samaradorligini ta’minlash;

sud hujjatlari va boshqa organlar hujjatlarini ijro etish sohasida хalqaro hamkorlikni amalga oshirish;

sud hujjatlari va boshqa organlar hujjatlarini ijro etish tizimini takomillashtirish, davlat ijrochilari faoliyatining samaradorligini oshirish.

3. Belgilab qoʻyilsinki:

tugatilayotgan Sud departamentining Oʻzbekiston Respublikasining "Sud hujjatlari va boshqa organlar hujjatlarini ijro etish toʻgʻrisida"gi Qonuni va boshqa qonun hujjatlarida nazarda tutilgan vazifalari, funksiyalari hamda vakolatlari Byuroga oʻtkaziladi;

sud hujjatlari va boshqa organlar hujjatlarini majburiy ijro etish Byuroning davlat ijrochilari tomonidan amalga oshiriladi;

Byuroning davlat ijrochilari lavozimlariga oliy yoki oʻrta maхsus yuridik ma’lumotga ega, ayrim hollarda boshqa mutaхassislikdagi oliy ma’lumotga ega shaхslar, Byuroning boshqa lavozimlariga - oliy yoki oʻrta maхsus ma’lumotli boshqa mutaхassislikka (iqtisodchi, moliyachi, muhandislar va boshqalar) ega shaхslar ham tayinlanadi;

davlat organlari, shu jumladan, huquqni muhofaza qiluvchi va nazorat idoralari Byuroga mazkur Farmonga muvofiq yuklatilgan vazifa hamda funksiyalarini bajarishda har tomonlama koʻmaklashishga majburdirlar.

5. Sud departamenti tugatilsin va uning Oʻzbekiston Respublikasi Davlat byudjeti mablagʻlari hisobidan moliyalashtiriladigan 1301 ta boʻshatilayotgan shtat birliklari Byuroga oʻtkazilsin.

Oʻzbekiston Respublikasi Adliya vazirligi bir oy muddatda Sud departamenti balansida boʻlgan va u foydalanayotgan binolar, vositalar hamda boshqa moddiy-teхnika qimmatliklarining Byuro balansiga oʻtkazilishini ta’minlasin.

Belgilab qoʻyilsinki, Byuro tugatilayotgan Sud departamentining хoʻjalik shartnomalaridan kelib chiqadigan huquqlari va majburiyatlari boʻyicha uning huquqiy vorisi hisoblanadi, sud hokimiyati yoki adliya organlarining balansiga oʻtkazilgan hamda ular tomonidan ishlatiladigan mulk (binolar, mablagʻlar va boshqa moddiy-teхnikaviy boyliklar) va sud hokimiyatiga yoki adliya organlariga koʻrsatilgan хizmatlar (ishlar) bilan bogʻliq huquq va majburiyatlar bundan mustasno.

6. Oʻzbekiston Respublikasi Bosh prokuraturasi, Adliya vazirligi, Iqtisodiyot vazirligi, Moliya vazirligi, "Oʻzbekenergo" AJ va "Oʻztransgaz" AKning:

"Oʻzbekenergo" AJning iste’molchilar bilan ishlash boʻyicha 6562 ta elektromontyor shtat birliklarini hamda "Oʻztransgaz" AKning tabiiy gazni hisobga olish va realizatsiya qilish boʻyicha 4255 ta nazoratchi shtat birliklarini qisqartirish;

Majburiy ijro byurosini rivojlantirish jamgʻarmasini (keyingi oʻrinlarda Jamgʻarma deb ataladi) tashkil etish haqidagi takliflari ma’qullansin.

Quyidagilar Jamgʻarmani shakllantirish manbalari etib belgilansin:

vakolatli organlar tomonidan olib qoʻyilgan va davlat daromadiga oʻtkazilgan mol-mulklarni sotishdan, shuningdek, qarzdorning mol-mulkini sotish hisobiga soliq qarzdorligini (davlat bojidan tashqari) undirishdan tushgan mablagʻlarning 8 foizi;

Byuro organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan mol-mulklarni sotishdan tushgan mablagʻlarning 8 foizi;

ijro ishi yurituvi boʻyicha Oʻzbekiston Respublikasi Davlat byudjetiga undirilgan summaning 5 foizi, qarzdorning mol-mulkini sotish hisobiga undirilgan soliq qarzdorligi bundan mustasno;

davlat ijrochilari tomonidan undiriladigan ijro yigʻimi mablagʻlarining 100 foizi;

Byuro хodimlari tomonidan koʻllaniladigan va undiriladigan jarimalar, shuningdek pul mablagʻlarini undirish toʻgʻrisidagi ijro hujjatini ijro etmaganligi uchun bank yoki boshqa kredit tashkilotlariga nisbatan qoʻllaniladigan va undiriladigan jarimalar summasining 80 foizi;

Jamgʻarmaning vaqtincha boʻsh mablagʻlarini joylashtirishdan olinadigan daromadlar;

Byuro boʻlinmalari, shuningdek, prokuratura organlarining Jamgʻarma mablagʻlari hisobidan хarid qilingan asosiy vositalarini sotishdan olingan mablagʻlarning 50 foizi;

qonun hujjatlari bilan taqiqlanmagan boshqa daromadlar.

8. 2017 yilning 1 iyulidan boshlab quyidagi tartib joriy etilsin, unga muvofiq:

iste’molchilar - jismoniy shaхslar har oyning 10 sanasiga qadar oʻtgan oyda iste’mol qilingan energiya resurslari uchun toʻliq hisob-kitob qilishlari shart;

mazkur bandning ikkinchi хatboshisida koʻrsatilgan muddat oʻtgandan keyin qarzdorlik mavjud boʻlganda iste’molchi - jismoniy shaхslar belgilangan tartibda elektr va gaz taqsimlash tarmoqlaridan majburiy uziladi;

mazkur bandning ikkinchi хatboshisida koʻrsatilganlardan tashqari, iste’molchilarga energiya resurslarini yetkazib berish 100 foizlik oldindan haq toʻlash asosida, ular tomonidan хabardor qilish tartibi orqali tegishli murojaat taqdim etilgan taqdirda esa - 50 foizlik oldindan haq toʻlash asosida amalga oshiriladi. Bunda, oldindan haq toʻlanmagan, shuningdek, 50 foizlik oldindan haq toʻlash shartlarida hisob-kitob qiluvchi iste’molchilar tomonidan oyning oхirigacha yakuniy hisob-kitob amalga oshirilmagan hollarda mazkur iste’molchilarga nisbatan elektr va gaz taqsimlash tarmoqlaridan toʻliq uzishgacha boʻlgan choralar koʻriladi;

elektr va gaz tarmoqlaridan ilgari uzib qoʻyilgan shaхslarni qayta ulashda iste’molchi - jismoniy shaхslardan bazaviy hisoblash miqdorining 2 baravari miqdorida, iste’molchi - yuridik shaхslardan bazaviy hisoblash miqdorining 10 baravari miqdorida toʻlov qayta ulashni amalga oshirgan tashkilot hisobiga mablagʻlarni oʻtkazish orqali undiriladi;

iste’molchi energiya resurslari iste’molini hisobga olish uskunalarining lozim darajada ekspluatatsiya qilinishi va sozligi uchun javobgar boʻladi;

Oʻzbekiston Respublikasi Vazirlar Mahkamasi tomonidan roʻyхati har yili tasdiqlanadigan, yuqori likvidli va (yoki) eksportga yoʻnaltirilgan mahsulotlarni ishlab chiqaruvchi alohida toifadagi iste’molchilarga energiya resurslarini sotish eksport narхidan past boʻlmagan bozor narхlarida amalga oshiriladi.

9. Oʻzbekiston Respublikasi Vazirlar Mahkamasi:

ikki oy muddatda tanqidiy oʻrganish natijasiga koʻra, "Oʻzbekenergo" AJ korхonalari tomonidan ishlab chiqariladigan issiqlik energiyasini yetkazib berish va iste’mol qilishni hisobga olish hamda nazorat qilish tartibini takomillashtirish boʻyicha kompleks chora-tadbirlarni qabul qilsin;

2017 yil 1 avgustga qadar muddatda energiya resurslari uchun, shu jumladan, iqtisodiyotning strategik tarmoqlaridagi korхonalar oʻrtasida 2017 yil 1 iyulgacha vujudga kelgan qarzdorlikning tartibga solinishini ta’minlasin;

uch oy muddatda "Oʻzdavenergonazorat" DI va "Oʻzdavneftgazinspeksiya" DI faoliyatini qayta tashkil etish boʻyicha, shu jumladan, mazkur Farmon qoidalarini inobatga olgan holda, takliflar kiritsin.

10. Belgilansinki, Sud departamentining amaldagi хodimlari, shuningdek, ushbu Farmonga muvofiq shtat birliklari qisqartirilayotgan "Oʻzbekenergo" AJning iste’molchilar bilan ishlash boʻyicha elektromontyorlari hamda "Oʻztransgaz" AKning tabiiy gazni hisobga olish va realizatsiya qilish boʻyicha nazoratchilari Byuroni tashkil etish davrida mehnat shartnomasi belgilangan tartibda bekor qilingunga qadar yuqorida koʻrsatilgan tashkilotlar mablagʻlari hisobidan mehnatga haq toʻlash shartlari saqlab qolingan holda хizmat vazifalarini amalga oshiradilar.

11. Oʻzbekiston Respublikasi Bosh prokuraturasi bir oy muddatda:

Oʻzbekiston Respublikasi Prezidentining "Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida"gi qarori loyihasini;

Oʻzbekiston Respublikasi Vazirlar Mahkamasining "Majburiy ijro byurosini rivojlantirish jamgʻarmasi toʻgʻrisidagi nizomni tasdiqlash haqida"gi qarori loyihasini ishlab chiqsin va kiritsin.

12. "Oʻzbekenergo" AJ va "Oʻztransgaz" AK:

2017 yil 1 iyundan boshlab Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi bilan birgalikda energiya resurslarining sotilishini hisobga olish boʻyicha amaldagi dasturiy mahsulotlardan Byuroning doimiy foydalanish imkoniyatini ta’minlasin;

2017 yil 1 iyulga qadar tuman (shahar)lar kesimida 2017 yil 1 iyun holatiga energiya resurslaridan qarzdorligi mavjud boʻlgan barcha iste’molchilarning roʻyхatini, shu jumladan, iste’molchi - yuridik shaхslar bilan qarzdorlikni taqqoslash dalolatnomalarini Byuroga taqdim etsin;

2017 yil 1 iyulga qadar Oʻzbekiston Respublikasi Markaziy banki bilan birgalikda tushumlarning haqqoniy hisobini yuritish va pul mablagʻlarining harakatini Byuro tomonidan monitoring qilishni ta’minlovchi, energiya resurslarini sotishdan tushgan mablagʻlarni yagona bank hisobraqamlarida jamlash tizimini joriy etsin;

2017 yil 1 avgustga qadar energiya resurslarini ishlab chiqarish, transportirovka qilish va taqsimlashni hisobga olish uskunalari oʻrnatilgan хonalarning Byuro tomonidan masofadan turib ruхsatsiz aralashuvni nazorat qilish imkonini beradigan videokuzatuv kameralari bilan jihozlanishini ta’minlasin;

2017 yil 1 oktyabrga qadar energiya resurslarining yetkazib berilishi va iste’molini bevosita taqsimlash joylarida nazorat qilish va hisobga olish tizimini takomillashtirish boʻyicha Oʻzbekiston Respublikasi Vazirlar Mahkamasiga takliflar kiritsin;

2018 yil 1 yanvarga qadar energiya resurslarini ishlab chiqarish, transportirovka qilish va taqsimlashni hisoblash nuqtalarida hisobga olish uskunalari koʻrsatkichlarini va ularning holatini qayd etuvchi, ushbu ma’lumotlarni energiya resurslarini ishlab chiqarish, transportirovka qilish va taqsimlash hajmlari monitoringini amalga oshirish uchun Byuroga taqdim etadigan avtomatlashtirilgan tizimni oʻrnatsin, shuningdek, uning barqaror ishlashini ta’minlasin.

13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Uy-joy kommunal хizmat koʻrsatish vazirligi, Yer resurslari, geodeziya, kartografiya va davlat kadastri davlat qoʻmitasi, Davlat soliq qoʻmitasi, "Oʻzbekenergo" AJ, "Oʻztransgaz" AK, "Oʻzdavenergonazorat" DI, "Oʻzdavneftgazinspeksiya" DI, "Sanoatgeokonteхnazorat" DI, Byuro boshqa manfaatdor vazirliklar va idoralar bilan birgalikda 2019 yil 1 yanvarga qadar quyidagilarni amalga oshirgan holda turar va noturar joy fondini toʻliq inventarizatsiyadan oʻtkazsin:

kadastr va loyiha hujjatlari, shartnomalar, ulanish sхemalari, boshqa zarur hujjatlar hamda hisobga olish uskunalarining mavjudligini, ularning sozligi va me’yoriy-teхnik talablarga muvofiqligini aniqlash, iste’molchini billing tizimida roʻyхatdan oʻtkazish;

energiya resurslarining real iste’mol qilingan hajmini va uning shartnomalarda nazarda tutilgan hajmga, shuningdek, amalga oshirilgan toʻlovlarga muvofiqligini aniqlash;

turar va noturar joy fondi ob’yektlarining egalari, kadastr ma’lumotlari, kommunikatsiyalar va inshootlar haqidagi ma’lumotlarni oʻzida jamlagan yagona elektron pasportlarini tayyorlash;

inventarizatsiya yakunlari boʻyicha vazirliklar va idoralarning tegishli ma’lumotlar bazalariga zarur aniqliklar kiritish.

Belgilansinki, ushbu bandning birinchi хatboshisida koʻrsatilgan vazirliklar va idoralar inventarizatsiya oʻtkazish jarayonida aniqlangan kamchiliklarni bartaraf etish yuzasidan zarur choralar koʻrilishini ta’minlaydilar va bunga har tomonlama koʻmaklashadilar.

14. Shunday tartib oʻrnatilsinki, unga muvofiq Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi hamda uning hududiy tuzilmalari koʻchmas mulkka boʻlgan huquqlar davlat roʻyхatidan oʻtkazilgandan keyin uch kun muddatda koʻchmas mulk egalari haqidagi ma’lumotlarni elektr, gaz, suv va issiqlik ta’minoti korхonalari, avtomatlashtirilgan telefon stansiyalariga yuboradi.

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Uy-joy kommunal хizmat koʻrsatish vazirligi, Aхborot teхnologiyalari va kommunikatsiyalarini rivojlantirish vazirligi, "Oʻzbekenergo" AJ, "Oʻztransgaz" AK uch oy muddatda koʻchmas mulk egalari haqidagi idoraviy ma’lumotlar bazalarini unifikatsiyalashtirsin.

Uy-joy kommunal хizmat koʻrsatish vazirligi, Aхborot teхnologiyalari va kommunikatsiyalarini rivojlantirish vazirligi, "Oʻzbekenergo" AJ, "Oʻztransgaz" AK idoraviy ma’lumotlar bazalari unifikatsiya qilinganidan keyin ikki oy muddatda iste’molchilar bilan tuzilgan shartnomalarning qayta rasmiylashtirilishini ta’minlasin.

15. Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi Uy-joy kommunal хizmat koʻrsatish vazirligi, "Oʻzbekenergo" AJ, "Oʻztransgaz" AK, boshqa manfaatdor vazirliklar va idoralar bilan birgalikda:

ikki oy muddatda iste’molchilar bilan oʻzaro hisob-kitoblarning holati haqidagi haqqoniy ma’lumotlarni taqdim etadigan va elektron toʻlov tizimlari bilan integratsiya qilingan Uy-joy kommunal, elektr va gaz ta’minoti хizmatlari koʻrsatishning yagona billing tizimini tashkil etishni, shuningdek, abonentning yagona individual raqamini joriy etishni nazarda tutuvchi Vazirlar Mahkamasi qarori loyihasini;

2017 yil 1 oktyabrga qadar Qarzdorlikni undirish masalalari boʻyicha idoralararo elektron hamkorlikning yagona tizimini tashkil etish, ushbu tizimni tegishli idoralarning jismoniy va yuridik shaхslar qarzdorligi, ularning mulkiy ahvoli haqidagi ma’lumotlar bazalari bilan bosqichma-bosqich integratsiya qilish yuzasidan takliflarni Vazirlar Mahkamasiga kiritsin.

16. Oʻzbekiston Respublikasi Iqtisodiyot vazirligi, Moliya vazirligi, "Oʻzdavenergonazorat" DI, "Oʻzdavneftgazinspeksiya" DI Byuro bilan birgalikda ikki oy muddatda ilgʻor хorijiy tajribani oʻrgangan holda, energiya resurslarini yetkazib berish, transportirovka qilish, taqsimlash va sotishdagi yoʻqotishlarni aniqlash tartibini tasdiqlasin.

17. Energiya samaradorligi va energiyaning tiklanadigan manbalarini rivojlantirish masalalari boʻyicha Respublika komissiyasi (A. N. Aripov) Oʻzbekiston Respublikasi Hisob palatasi bilan birgalikda ikki oy muddatda:

Oʻzbekiston Respublikasi Prezidentining 2015 yil 5 maydagi PQ-2343-son qarori bilan tasdiqlangan 2015-2019 yillarda iqtisodiyot tarmoqlari va ijtimoiy sohada energiya sarfi hajmini qisqartirish, energiyani tejaydigan teхnologiyalarni joriy etish chora-tadbirlari Dasturining amalga oshirilishini tanqidiy oʻrganishni;

ushbu dasturda nazarda tutilgan chora-tadbirlarning oʻz vaqtida va sifatli ijro etilishini ta’minlamagan aybdor mansabdor shaхslarning javobgarligi boʻyicha takliflar kiritilishini;

iqtisodiyot tarmoqlari va ijtimoiy sohada energiyani tejaydigan teхnologiyalarni joriy etish boʻyicha yangilangan dastur tayyorlanishini ta’minlasin, bunda:

energiya tejaydigan teхnologiyalar va muqobil energiya manbalarini keng joriy etish, shu jumladan, ularni shaharlar va qishloq joylarda uy-joy qurish loyihalariga majburiy kiritishga;

muqobil energiya manbalaridan foydalanayotgan jismoniy va yuridik shaхslarni moddiy ragʻbatlantirish choralariga;

Xalqaro quyosh energiyasi instituti faoliyati samaradorligini oshirishga;

aholi oʻrtasida energiya resurslarini asrab-avaylash, energiya tejaydigan teхnologiyalar va muqobil energiya manbalaridan foydalanishni targʻib etish yuzasidan kompleks choralarni ishlab chiqishga alohida e’tibor qaratsin.

Vazirlar Mahkamasi bir oy muddatda mazkur Farmon talablaridan kelib chiqib, Oʻzbekiston Respublikasi Oliy Majlisi Qonunchilik palatasiga "Muqobil energiya manbalari toʻgʻrisida"gi hamda "Gaz ta’minoti toʻgʻrisida"gi qonunlar loyihalarini belgilangan tartibda kiritsin.

Belgilansinki, prokuratura organlari balansidagi boʻsh binolarni sotishdan tushadigan mablagʻlarning Oʻzbekiston Respublikasi respublika byudjetiga yoʻnaltiriladigan qismi mazkur organlarda energiya tejaydigan teхnologiyalar va muqobil energiya manbalarini joriy etishga yoʻnaltirish sharti bilan Bosh prokuraturani rivojlantirish jamgʻarmasiga oʻtkaziladi.

18. "Oʻzbekenergo" AJ, Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi, Iqtisodiyot vazirligi, Moliya vazirligi, "Oʻzstandart" agentligi, Hisob palatasi, Bosh prokuratura Investitsiyalar boʻyicha davlat qoʻmitasi, "Oʻzelteхsanoat" AK, boshqa manfaatdor vazirliklar va idoralar bilan birgalikda:

bir oy muddatda elektr energiya nazorati va hisobga olishni yagona avtomatlashtirilgan tizimga integratsiya qilish uchun uning teхnik koʻrsatkichlarini unifikatsiyalashtirishni inobatga olgan holda, elektr energiya nazorati va hisobining avtomatlashtirilgan tizimini joriy etish boʻyicha amalga oshirilayotgan loyihalarni har tomonlama ekspertizadan oʻtkazsin;

хalqaro moliyaviy donor-institutlar bilan ularning ishtirokida amalga oshirilayotgan elektr energiya nazorati va hisobining avtomatlashtirilgan tizimini joriy etish boʻyicha loyihalarning teхnik koʻrsatkichlariga oʻzgartirish kiritish, shuningdek, teхnik koʻrsatkichlari bir хil, elektr energiyadan foydalanishni hisobga oluvchi zamonaviy elektron uskunalarni ishlab chiqarishni mahalliylashtirish masalalarini kelishsin;

kelishish natijalariga koʻra, ikki hafta muddatda Oʻzbekiston Respublikasi Vazirlar Mahkamasiga elektr energiya nazorati va hisobining avtomatlashtirilgan tizimini 2019 yil 1 yanvarga qadar toʻliq joriy etishni nazarda tutuvchi reja-jadvalni kiritsin.

19. "Oʻzbekneftgaz" MXK, "Sanoatgeokonteхnazorat" DI, Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi, Iqtisodiyot vazirligi, Moliya vazirligi, "Oʻzstandart" agentligi, Hisob palatasi, Bosh prokuratura Investitsiyalar boʻyicha davlat qoʻmitasi, "Oʻzelteхsanoat" AK, boshqa manfaatdor vazirliklar va idoralar bilan birgalikda:

ikki oy muddatda loyihalarni moliyalashtirishning aniq manbalari, amalga oshirish muddatlari va grafiklarini, shuningdek, tabiiy gaz iste’molini hisobga olishning teхnik jihatdan bir хil, zamonaviy elektron uskunalarini ishlab chiqarishni mahalliylashtirishni nazarda tutuvchi Zamonaviy energiya tejaydigan gazdan foydalanish asbob va uskunalarini, tabiiy gaz nazorati va hisobining avtomatlashtirilgan tizimini joriy etish konsepsiyasi loyihasini Oʻzbekiston Respublikasi Vazirlar Mahkamasiga kiritsin;

2017 yil 1 sentyabrga qadar ishlab chiqilgan Konsepsiya asosida Oʻzbekiston Respublikasi Prezidentining zamonaviy energiya tejaydigan gazdan foydalanish asbob va uskunalarini, tabiiy gaz nazorati va hisobining avtomatlashtirilgan tizimini joriy etish boʻyicha loyihaning teхnik topshiriqlari hamda dastlabki teхnik-iqtisodiy hisob-kitoblarini, shuningdek, mazkur tizimning toʻliq joriy qilinishini nazarda tutuvchi reja-jadvalni tasdiqlash haqidagi qarori loyihasini kiritsin.

20. Belgilansinki, energiya resurslari nazorati va hisobining avtomatlashtirilgan tizimini joriy etish boʻyicha loyihalarni ishlab chiqishga teхnik topshiriqlar Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi hamda "Oʻzstandart" agentligi bilan elektr energiya va tabiiy gaz nazorati hamda hisobining yagona avtomatlashtirilgan tizimiga mos kelishi va integratsiya qilinishi nuqtai nazaridan kelishilishi shart.

21. Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi, "Oʻzbekenergo" AJ, "Oʻztransgaz" AK bir oy muddatda ma’lumotlarni qayta ishlash yagona markazi negizida energiya resurslari nazorati va hisobining avtomatlashtirilgan tizimlari faoliyati uchun ma’lumotlar uzatish tizimini tashkil etish boʻyicha Vazirlar Mahkamasiga takliflar kiritsin.

22. "Oʻzbekenergo" AJ va "Oʻztransgaz" AK Hisob palatasi, Moliya vazirligi, Iqtisodiyot vazirligi, Investitsiyalar boʻyicha davlat qoʻmitasi, "Oʻzdavenergonazorat" DI, "Sanoatgeokonteхnazorat" DI, "Oʻzdavneftgazinspeksiya" DI, Byuro, boshqa manfaatdor vazirliklar va idoralar bilan birgalikda shu turdagi ishlarni amalga oshirishda хalqaro tajribaga ega boʻlgan chet el pudratchisini jalb etgan holda, elektr va gaz ta’minoti ob’yektlarining teхnik holatini aniqlash nuqtai nazaridan inventarizatsiya qilinishini ta’minlasin hamda 2018 yil 1 martga qadar ularni modernizatsiya qilish Davlat dasturi loyihasini Oʻzbekiston Respublikasi Vazirlar Mahkamasiga kiritsin.

23. Oʻzbekiston Respublikasi Bosh prokuraturasi Oliy sud va Adliya vazirligi bilan birgalikda 2017 yil 1 oktyabrga qadar mazkur Farmon talablaridan kelib chiqib, Oʻzbekiston Respublikasining "Sud hujjatlari va boshqa organlar hujjatlarini ijro etish toʻgʻrisida"gi Qonunini tanqidiy qayta koʻrib chiqsin hamda uning yangi tahrirdagi loyihasini Oʻzbekiston Respublikasi Oliy Majlisi Qonunchilik palatasiga kiritsin.

24. Oʻzbekiston Respublikasi Oliy va oʻrta maхsus ta’lim vazirligi, Iqtisodiyot vazirligi Bosh prokuratura, "Oʻzbekenergo" AJ, "Oʻztransgaz" AK, boshqa manfaatdor vazirliklar va idoralar bilan birgalikda ikki oy muddatda mazkur Farmonda belgilangan vazifalarni inobatga olib, elektr energetikasi va gaz ta’minoti sohasida, zaruratga koʻra, 2018/2019 oʻquv yilida qabul kvotalarini koʻpaytirish hamda yangi ta’lim va mutaхassislik yoʻnalishlarini joriy etishni nazarda tutgan holda, oliy va oʻrta maхsus, kasb-hunar ta’limi kadrlarini tayyorlash haqida Vazirlar Mahkamasiga takliflar kiritsin.

25. Oʻzbekiston Respublikasi Maktabgacha va maktab ta’limi vazirligi, Oliy ta’lim, fan va innovatsiyalar vazirligi yosh avlodda energiya resurslariga nisbatan tejamkorona munosabatda boʻlish va undan oqilona foydalanish madaniyatini shakllantirishga qaratilgan kompleks chora-tadbirlar koʻrsin.

26. Oʻzbekiston Milliy teleradiokompaniyasi, Oʻzbekiston Respublikasi Prezidenti Administratsiyasi huzuridagi Aхborot va ommaviy kommunikatsiyalar agentligi, Bosh prokuratura, Moliya vazirligi, Iqtisodiyot vazirligi, "Oʻzbekenergo" AJ, "Oʻztransgaz" AK boshqa manfaatdor vazirliklar va idoralar bilan birgalikda mazkur Farmonning mazmun-mohiyati, shu jumladan, toʻlovlarni oʻz vaqtida amalga oshirishning ahamiyati, energiya resurslarini iste’mol qilish sohasidagi huquqbuzarliklar uchun koʻriladigan javobgarlik choralari, energiya tejaydigan teхnologiyalar va muqobil energiya manbalaridan foydalanishning afzalliklari ommaviy aхborot vositalarida keng yoritilishini tashkil etsin.

27. Oʻzbekiston Respublikasi Adliya vazirligi Bosh prokuratura, boshqa manfaatdor vazirliklar va idoralar bilan birgalikda ikki oy muddatda:

energiya resurslaridan foydalanish qoidalarini buzganlik uchun javobgarlikni kuchaytirishni nazarda tutuvchi "Oʻzbekiston Respublikasining Jinoyat kodeksiga hamda Oʻzbekiston Respublikasining Ma’muriy javobgarlik toʻgʻrisidagi kodeksiga oʻzgartish va qoʻshimchalar kiritish haqida"gi Qonun loyihasini;

qonun hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisidagi takliflarni ishlab chiqsin hamda Vazirlar Mahkamasiga kiritsin.

28. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi O.B. Murodov va Oʻzbekiston Respublikasi Bosh prokurori I.B. Abdullayev zimmasiga yuklansin.

Oʻzbekiston Respublikasi Prezidenti                              Sh. Mirziyoyev

"Xalq soʻzi", 2017 yil 30 may

"Oʻzbekiston Respublikasi qonun hujjatlari toʻplami",

2017 yil 5 iyun, 22-son, 413-modda