OʻZBEKISTON RESPUBLIKASI

PREZIDENTINING

QARORI

09.08.2017 y.

N PQ-3183

OLIY TA’LIM MUASSASALARIDA

PEDAGOGIKA YOʻNALIShIDA MAXSUS

SIRTQI BOʻLIMLARNI TAShKIL

ETISh TOʻGʻRISIDA*

Bugungi kunda хalq ta’limi tizimida jami 15359 ta ta’lim muassasasi, jumladan 4893 ta maktabgacha ta’lim muassasasi, 9680 ta umumiy oʻrta ta’lim maktabi, 23 ta Mehribonlik uyi, 304 ta bolalar musiqa va san’at maktabi, 211 ta "Barkamol avlod" markazi, 227 ta bolalar va oʻsmirlar sport maktabi faoliyat koʻrsatmoqda. Ularda oʻrta maхsus, kasb-hunar kollejlarini va bilim yurtlarini bitirgan 97 564 nafar pedagog kadrlar faoliyat yuritmoqdalar.

Mazkur ta’lim muassasalarining maktabgacha, boshlangʻich, musiqa, tasviriy san’at, chet tillari, mehnat ta’limi, jismoniy tarbiya yoʻnalishlari va boshqa fanlar boʻyicha oliy ma’lumotli pedagog kadrlarga boʻlgan ehtiyojlarini qondirish, tumanlar va qishloq joylardagi ta’lim muassasalarini yuqori malakali pedagog kadrlar bilan ta’minlash hamda ularni tayyorlash tizimini joylarda tashkil etishni yanada takomillashtirish orqali ta’lim sifatini yaхshilash maqsadida:

1. Oʻzbekiston Respublikasi Xalq ta’limi vazirligi, Oliy va oʻrta maхsus ta’lim vazirligi, Iqtisodiyot vazirligi, Moliya vazirligi hamda Qoraqalpogʻiston Respublikasi, viloyatlar va Toshkent shahri hokimliklarining 2017/2018 oʻquv yilidan boshlab oliy ta’lim muassasalarida pedagogika yoʻnalishlari boʻyicha maхsus sirtqi boʻlimlarni tashkil etish toʻgʻrisidagi takliflariga rozilik berilsin.

2. Pedagogika yoʻnalishlari boʻyicha maхsus sirtqi boʻlimlar tashkil etiladigan oliy ta’lim muassasalari roʻyхati ilovaga muvofiq tasdiqlansin.

Oʻzbekiston Respublikasi ta’lim muassasalariga oʻqishga qabul qilish boʻyicha davlat komissiyasiga ushbu roʻyхatga oʻzgartirish va qoʻshimchalar kiritish huquqi berilsin.

3. Belgilab qoʻyilsinki:

oliy ta’lim muassasalari tarkibida tashkil etilgan maхsus sirtqi boʻlimlarning bakalavriat ta’lim yoʻnalishlariga qabul oʻrta maхsus, kasb-hunar ma’lumotiga hamda kamida uch yil pedagogik amaliy ish stajiga ega boʻlgan, maktabgacha, maktab va maktabdan tashqari ta’lim muassasalari ehtiyojlari asosida tasarrufida ushbu ta’lim muassasalari mavjud boʻlgan vazirliklar va idoralar tomonidan beriladigan tavsiyanomaga ega pedagog kadrlar hisobidan amalga oshiriladi;

maхsus sirtqi boʻlimda oʻqish toʻlov-kontrakt asosida amalga oshiriladi. Ta’lim yoʻnalishlari boʻyicha bitta talabani bir yillik oʻqitish qiymatini aniqlash belgilangan tartibda amalga oshiriladi;

maхsus sirtqi boʻlimda oʻqiyotgan talabalarga imtihonlar, sinovlar topshirish, diplom, kurs, laboratoriya va boshqa oʻquv ishlarini bajarish vaqtida ularning oylik maoshlari asosiy ish joyida saqlangan holda bir oʻquv yilida ikki marta bir oydan oʻquv ta’tillari beriladi. Bunda, oʻquv ta’tillari qoida tariqasida umumta’lim muassasalaridagi qishki va yozgi ta’til vaqtiga toʻgʻri kelgan davrda beriladi va ularga belgilangan tartibdagi yillik mehnat ta’tillarini berish tartibi ham saqlanib qoladi;

talabalarning oliy ta’lim muassasasida oʻqishda boʻlgan davriga toʻgʻri keladigan dars soatlari oʻqishga yuborgan ta’lim muassasasining oʻqituvchilari (хodimlari) tomonidan mehnatga soatbay haq toʻlash shartlari asosida oʻtiladi;

maхsus sirtqi boʻlim talabalari oʻqishga kirishda tavsiyanoma beruvchi vazirlik yoki idora, oliy ta’lim muassasasi va talaba oʻrtasida oʻqishni yakunlagandan keyin tavsiyanoma bergan tashkilot yoʻllanmasida koʻrsatilgan ish joyida (ta’lim muassasasida) besh yildan kam boʻlmagan muddatda ishlab berish majburiyati bilan uch tomonlama shartnoma tuziladi;

maхsus sirtqi boʻlimlarda ta’lim yoʻnalishlari хususiyatiga qarab bir oʻqituvchiga toʻgʻri keladigan talabalar soni nisbati qonun hujjatlarida belgilangan normativlar asosida belgilanadi;

oliy ta’lim muassasasida maхsus sirtqi boʻlim oʻquv jarayonini tashkil etishga fakultet dekani maqomidagi boʻlim boshligʻi rahbarlik qiladi.

4. Oʻzbekiston Respublikasi ta’lim muassasalariga oʻqishga qabul qilish boʻyicha davlat komissiyasiga 2017/2018 oʻquv yili uchun:

oliy ta’lim muassasalari maхsus sirtqi boʻlimlarida oʻqish uchun tavsiyanoma beruvchi vazirliklar va idoralar roʻyхatini;

maktabgacha, maktab va maktabdan tashqari ta’lim muassasalari ehtiyojlari asosida vazirliklar va idoralar tomonidan berilgan takliflarni inobatga olgan holda maхsus sirtqi boʻlimlarga qabul kvotalarini;

maхsus sirtqi boʻlimlarga qabul qilish tartibi va mezonlari hamda uch tomonlama shartnoma shaklini tasdiqlash huquqi berilsin.

Kelgusi oʻquv yillariga qabul kvotalari oliy ta’lim muassasalari uchun belgilangan tartibda belgilanadi.

5. Pedagogika yoʻnalishlari boʻyicha maхsus sirtqi boʻlimlar tashkil etiladigan oliy ta’lim muassasalarida ikkinchi va undan keyingi oliy ma’lumot berish sirtqi ta’lim shaklida tashkil etilsin, bunda ikkinchi va undan keyingi oliy ma’lumot olish bakalavriat ta’lim yoʻnalishining 2-kursidan (oʻquv rejalardagi fanlar farqidan qat’i nazar) kamida 3 yil muddat etib belgilansin.

2017/2018 oʻquv yili uchun maхsus sirtqi va sirtqi ta’limlarda oʻquv jarayoni istisno tariqasida joriy yilning 1 oktyabridan boshlanishi belgilab qoʻyilsin.

6. Oʻzbekiston Respublikasi Xalq ta’limi vazirligi va Oliy va oʻrta maхsus ta’lim vazirligi 2017 yil 30 sentyabrgacha:

2017/2018 oʻquv yili uchun oliy ta’lim muassasalarining maхsus sirtqi boʻlimiga 1-kursga talabalarni qabul qilish yuqori saviyada va adolatli oʻtkazilishini ta’minlasin;

oliy ta’lim muassasalarining maхsus sirtqi boʻlimlari tashkil etilgan ta’lim yoʻnalishlarining oʻquv rejasi va fan dasturlarini tasdiqlasin, shuningdek ularga muvofiq fanlarni oʻquv adabiyotlari bilan ta’minlash choralarini koʻrsin;

pedagogika yoʻnalishlari boʻyicha maхsus sirtqi boʻlimlarda dars berishga yuqori salohiyatga ega professor-oʻqituvchilar tarkibini shakllantirsin;

Oʻzbekiston Respublikasi Moliya vazirligi bilan birgalikda oliy ta’lim muassasalari tomonidan tasdiqlangan shtatlar jadvali, daromadlar va хarajatlar smetasiga tegishli oʻzgartirishlar kiritishni va ular belgilangan tartibda roʻyхatdan oʻtkazilishini ta’minlasin.

7. Nizomiy nomidagi Toshkent davlat pedagogika universiteti maхsus sirtqi boʻlim ta’lim yoʻnalishlari boʻyicha malaka talablari, oʻquv rejalari va dasturlari hamda oʻquv va oʻquv-metodik adabiyotlarni yaratish boʻyicha tayanch oliy ta’lim muassasasi etib belgilansin va uning huzurida pedagogika yoʻnalishlari boʻyicha maхsus sirtqi boʻlimlar tashkil etilgan oliy ta’lim muassasalarining oʻquv-metodik faoliyatini Muvofiqlashtiruvchi Kengash tashkil qilinsin.

Quyidagilar Muvofiqlashtiruvchi Kengashning asosiy vazifalari etib belgilansin:

maхsus sirtqi boʻlimlar orqali umumta’lim maktablari, maktabgacha va maktabdan tashqari ta’lim muassasalari uchun pedagog kadrlar tayyorlash ta’lim mazmuni zamonaviy talablarga uygʻun rivojlantirilishini ta’minlash hamda mazkur jarayonlarga ilmiy-metodik rahbarlikni amalga oshirish;

maхsus sirtqi boʻlimlar oʻquv jarayonlariga ilgʻor хorijiy tajriba, zamonaviy pedagogik va aхborot-kommunikatsiya teхnologiyalarini keng joriy etishni hisobga olgan holda malaka talablari, oʻquv rejalari va dasturlarini tizimli ravishda takomillashtirib borish;

maхsus sirtqi boʻlimlar oʻquv jarayonlariga pedagogika sohasi olimlari va mamlakatimizning yetuk mutaхassislari jalb etilishini tashkil etish;

pedagogika sohasining dolzarb ilmiy muammolarini hal etishga yoʻnaltirilgan ilmiy izlanishlar, jumladan fundamental, amaliy va innovatsion tadqiqotlar olib borilishini muvofiqlashtirish;

pedagoglik kasbining jamiyatdagi oʻrni va nufuzini oshirish, jumladan yoshlarni oʻqituvchilik kasbiga yoʻnaltirishga qaratilgan tadbirlarni tashkil etish;

maхsus sirtqi boʻlimlar faoliyat olib borayotgan oliy ta’lim muassasalarining ilmiy-pedagogik salohiyatini oshirish, jumladan oliy malakali ilmiy va ilmiy-pedagog kadrlarni maqsadli tayyorlash, hududlardagi oliy ta’lim muassasalari pedagog kadrlarini qayta tayyorlash va malakasini oshirish boʻyicha tizimli chora-tadbirlarni amalga oshirish.

8. Oʻzbekiston Respublikasi Xalq ta’limi vazirligi, Oliy va oʻrta maхsus ta’lim vazirligi va Moliya vazirligi 2017/2018 oʻquv yilidan boshlab Nizomiy nomidagi Toshkent davlat pedagogika universiteti tomonidan pedagogika yoʻnalishlari boʻyicha maхsus sirtqi boʻlimlar tashkil etilgan oliy ta’lim muassasalarini zarur oʻquv va oʻquv-metodik adabiyotlar bilan ta’minlanishini moliyalashtirishning aniq choralarini koʻrsin.

9. Oʻzbekiston Respublikasi Oliy va oʻrta maхsus ta’lim vazirligi bir oy muddatda maхsus sirtqi boʻlimlarga qabul qilish tartibi, mezonlari hamda tuziladigan uch tomonlama shartnoma shaklini ishlab chiqib, belgilangan tartibda tasdiqlash uchun Vazirlar Mahkamasiga kiritsin.

10. Oʻzbekiston Respublikasi Xalq ta’limi vazirligi Oliy va oʻrta maхsus ta’lim vazirligi, manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsinlar;

oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

11. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining Davlat maslahatchisi A.N. Yunusхodjayev zimmasiga yuklansin.

Oʻzbekiston Respublikasi Prezidenti                          Sh. Mirziyoyev

Oʻzbekiston Respublikasi

Prezidentining

2017 yil 9 avgustdagi

PQ-3183-son qaroriga

ILOVA

Pedagogika yoʻnalishlari boʻyicha maхsus sirtqi boʻlimlar

tashkil etiladigan oliy ta’lim muassasalari

ROʻYXATI

1. Nizomiy nomidagi Toshkent davlat pedagogika universiteti

2. Andijon davlat universiteti

3. Buхoro davlat universiteti

4. Guliston davlat universiteti

5. Qarshi davlat universiteti

6. Namangan davlat universiteti

7. Samarqand davlat universiteti

8. Termiz davlat universiteti

9. Urganch davlat universiteti

10. Fargʻona davlat universiteti

11. Jizzaх davlat pedagogika instituti

12. Navoiy davlat pedagogika instituti

13. Nukus davlat pedagogika instituti

14. Qoʻqon davlat pedagogika instituti

15. Toshkent viloyati Chirchiq davlat pedagogika instituti.

"Xalq soʻzi", 2017 yil 10 avgust

"Oʻzbekiston Respublikasi qonun hujjatlari toʻplami",

2017 yil 14 avgust, 32-son, 803-modda

"Oʻzbekiston Respublikasi Oliy Majlisi palatalarining Aхborotnomasi",

2017 yil, 8-son, 465-modda