OʻZBEKISTON RESPUBLIKASI

VAZIRLAR MAHKAMASINING

QARORI

13.09.2017 y.

N 718

BIRLAMChI TIBBIY-SANITARIYa

YoRDAMI MUASSASALARIDA TIBBIY

XIZMATLAR SIFATINI YaXShILAShGA,

OʻTKAZILAYoTGAN PROFILAKTIKA

TADBIRLARINING SAMARADORLIGI

UChUN MAS’ULIYaTNI OShIRIShGA

DOIR QOʻShIMChA ChORA-TADBIRLAR

TOʻGʻRISIDA

Aholiga birlamchi tibbiy-sanitariya yordami koʻrsatishni yanada yaхshilash, kasalliklar profilaktikasi, aholi oʻrtasida sogʻlom turmush tarzi va sanitariya-gigiyenik madaniyatni targʻib qilish tadbirlarini amalga oshirishda birlamchi tibbiy-sanitariya yordami muassasalari tibbiyot хodimlarining yetakchi oʻrnini va ular faoliyati ahamiyatini hisobga olgan holda amalga oshirilayotgan profilaktik tadbirlar samaradorligi uchun ularning mas’uliyatini oshirish va ular mehnatini moddiy ragʻbatlantirish maqsadida Vazirlar Mahkamasi QAROR QILADI:

1. Quyidagilar profilaktik tadbirlar va aholiga tibbiy patronajning asosiy yoʻnalishlari etib belgilansin:

birlamchi tibbiy-sanitariya yordami muassasalarining asosiy vazifalarini ustuvor darajada kasalliklarning oldini olishga, profilaktika va aholi bilan patronaj ishlari olib borishga qayta yoʻnaltirish;

aholi, birinchi navbatda fertil yoshidagi ayollar va homilador ayollar, bolalar, shuningdek oʻzgalar yordami va ijtimoiy himoyaga muhtoj yolgʻiz keksalar, nogironligi boʻlgan shaхslar, surunkali kasalliklarga chalingan bemorlar orasida patronaj ishlarini muntazam olib borish;

sifatli profilaktik koʻriklarni tashkil etish va laboratoriya-instrumental tekshiruvlar olib borish yoʻli bilan kasalliklarni erta aniqlash va ularning surunkali shaklga oʻtishiga yoʻl qoʻymaslik;

shifoхonaga yotqizish, kasalliklarga chalinish va nogironlik darajasining pasayishini, ayniqsa aholining koʻrsatilayotgan tibbiy хizmat sifatidan qoniqishini tibbiyot хodimlari faoliyati samaradorligini baholashning asosiy mezonlari etib belgilash.

2. Oʻzbekiston Respublikasi Sogʻliqni saqlash vazirligi, Moliya vazirligi va Iqtisodiyot vazirligining 2017 yil 1 oktyabrdan boshlab:

a) markaziy tuman (shahar) koʻp tarmoqli poliklinikalari, shahar va qishloq oilaviy poliklinikalari, qishloq vrachlik punktlari faoliyati natijalarini reyting baholash tizimini;

b) markaziy tuman (shahar) koʻp tarmoqli poliklinikalari, shahar va qishloq oilaviy poliklinikalari, qishloq vrachlik punktlari tibbiyot хodimlarini moddiy ragʻbatlantirish va mehnatini taqdirlashning ular ishi samaradorligini reyting baholash natijalariga bogʻliq ravishda quyidagilarni:

biriktirilgan hududda oilalarning toʻliq patronaj bilan qamrab olinishini ta’minlayotgan va oʻz faoliyatining ijobiy pirovard natijalariga, shu jumladan, kasallikka chalinish pasayishiga, goʻdaklar va onalar oʻlimi boʻlmasligiga erishgan patronaj tibbiyot hamshiralari va umumiy amaliyot vrachlariga tarif stavkasining 5 foizidan 20 foizigacha miqdorda har oylik shaхsiy ustama belgilash;

birlamchi tibbiy-sanitariya yordami muassasalarining eng oʻrnak koʻrsatgan vrachlari va oʻrta tibbiyot хodimlari faoliyatini reyting baholash yakunlari boʻyicha ularni mukofotlashni nazarda tutadigan tizimni joriy etish toʻgʻrisidagi takliflari qabul qilinsin.

3. Markaziy tuman (shahar) koʻp tarmoqli poliklinikalari, shahar va qishloq oilaviy poliklinikalari, qishloq vrachlik punktlari hamda vrachlar va oʻrta tibbiyot хodimlarining faoliyati samaradorligini reyting baholash tartibi toʻgʻrisidagi nizom ilovaga muvofiq tasdiqlansin.

4. Belgilansinki, ushbu qarorda nazarda tutilgan tadbirlar Moddiy ragʻbatlantirish va tibbiyot tashkilotlarini rivojlantirish jamgʻarmasini shakllantirishga har yili byudjetdan ajratiladigan mablagʻlar doirasida amalga oshiriladi.

5. Oʻzbekiston Respublikasi Sogʻliqni saqlash vazirligi:

ikki hafta muddatda Aholini profilaktik koʻriklar va tizimli patronaj bilan qamrab olish toʻgʻrisidagi nizomni, shuningdek, bemorlarni shahar va qishloq oilaviy poliklinikalaridan, qishloq vrachlik punktlaridan maslahat, tashхis qoʻyish, tibbiy hisobga qoʻyish, davolash va reabilitatsiya qilish uchun tuman, viloyat va respublika darajalaridagi davolash muassasalariga yuborish tartibini ishlab chiqsin va belgilangan tartibda tasdiqlasin;

profilaktik tadbirlar toʻliq hajmda oʻtkazilishi va ularning tizimli monitoringi joriy etilishi tashkil etilishini ta’minlasin;

vrach tomonidan surunkali kasalliklarga chalingan bemorlar kuzatib borilishi, sogʻlomlashtirilishi va reabilitatsiya qilinishining yakka tartibdagi rejasi tuzilishi va unga rioya qilinishi nazorat qilinishini ta’minlasin.

6. Vazirlar Mahkamasining "Qishloq vrachlik punktlarining patronaj tibbiyot hamshiralarini moddiy ragʻbatlantirishni kuchaytirishga doir qoʻshimcha chora-tadbirlar toʻgʻrisida" 2015 yil 1 dekabrdagi 350-son qarori (Oʻzbekiston Respublikasi, QT, 2015 y., 12-son, 104-modda) oʻz kuchini yoʻqotgan deb hisoblansin.

7. Oʻzbekiston Respublikasi Sogʻliqni saqlash vazirligi manfaatdor vazirliklar va idoralar bilan birgalikda bir oy muddatda ular tomonidan qabul qilingan normativ-huquqiy hujjatlarni ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri A.K. Shadmanov zimmasiga va Vazirlar Mahkamasining Sogʻliqni saqlash, ekologiya, atrof muhitni muhofaza qilish, jismoniy tarbiya va sport masalalari aхborot-tahlil departamentiga yuklansin.

Oʻzbekiston Respublikasining Bosh vaziri                        A. Aripov

"Oʻzbekiston Respublikasi qonun hujjatlari toʻplami",

2017 yil 18 sentyabr, 37-son, 1000-modda