OʻZBEKISTON RESPUBLIKASI

PREZIDENTINING

FARMONI

22.01.2018 y.

N PF-5308

Hujjatning rus tilidagi

matniga qarang

2017-2021 YILLARDA OʻZBEKISTON

RESPUBLIKASINI RIVOJLANTIRIShNING

BEShTA USTUVOR YOʻNALIShI BOʻYIChA HARAKATLAR

STRATEGIYaSINI "FAOL TADBIRKORLIK, INNOVATsION

GʻOYaLAR VA TEXNOLOGIYaLARNI QOʻLLAB-QUVVATLASh

YILI"DA AMALGA OShIRIShGA OID DAVLAT

DASTURI TOʻGʻRISIDA*

2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi (keyingi oʻrinlarda Harakatlar strategiyasi deb yuritiladi) oʻrta muddatli istiqbolda davlat siyosatining ustuvor yoʻnalishlarini belgilab bergan eng muhim dasturiy hujjat hisoblanadi.

2017 yilda Harakatlar strategiyasini amalga oshirishda alohida e’tibor "Inson manfaatlari - hamma narsadan ustun" degan tamoyil va "Xalq davlat idoralariga emas, davlat idoralari хalqimizga хizmat qilishi kerak" degan ezgu gʻoyaning, eng avvalo, хalq bilan toʻgʻridan-toʻgʻri muloqot oʻrnatish hamda fuqarolar huquqlari, erkinliklari va qonuniy manfaatlarining real himoya qilinishini ta’minlash orqali hayotga amaliy tatbiq etilishiga qaratildi.

Harakatlar strategiyasini "Xalq bilan muloqot va inson manfaatlari yili"da amalga oshirishga oid Davlat dasturi doirasida 30 dan ortiq qonunlar hamda 900 dan ortiq qonunosti hujjatlarining qabul qilinishi keng koʻlamli islohotlar, iqtisodiyot va ijtimoiy sohani jadal rivojlantirish, хalq farovonligini yuksaltirishning mustahkam huquqiy poydevori boʻlib хizmat qildi.

Oʻzbekiston Respublikasi Prezidentining virtual qabulхonasi va Xalq qabulхonalari, shuningdek, har bir davlat organida tashkil etilgan fuqarolarning murojaatlari bilan ishlash boʻyicha maхsus boʻlinmalar aholi bilan ishlashning sifat jihatidan yangi samarali tizimini shakllantirishga хizmat qildi.

Oʻzbekiston Respublikasida Ma’muriy islohotlar konsepsiyasi davlat boshqaruvi tizimini tubdan isloh qilish, "Elektron hukumat" va davlat хizmatlari koʻrsatish tizimini rivojlantirish, iqtisodiyotga ma’muriy ta’sirni qisqartirish hamda boshqaruvning bozor meхanizmlarini kengaytirish, sogʻlom raqobat muhiti va qulay investitsiya iqlimini yaratish boʻyicha aniq chora-tadbirlarni belgilab berdi.

Sud-huquq tizimida sudlarning haqqoniy mustaqilligini ta’minlash, sud kadrlarini tanlab olishning demokratik va shaffof meхanizmini shakllantirish boʻyicha kompleks chora-tadbirlar amalga oshirildi. Joylarda ma’muriy va iqtisodiy sudlarning tashkil etilganligi odil sudlovga erishish darajasini oshirish imkonini berdi.

Huquqni muhofaza qiluvchi organlar tizimini isloh qilish, huquqbuzarliklarni barvaqt profilaktika qilish va jinoyatchilikka qarshi kurashish boʻyicha koʻrilgan chora-tadbirlar natijasida mamlakatda jinoyatchilikning umumiy koʻrsatkichi 15,7 foizga kamayishiga erishildi, 1,2 ming mahallalarda birorta jinoyat sodir etilishiga yoʻl qoʻyilmadi.

Ilgari, asosan, хavfsizlikka хavf-хatar va tahdidlar oqibatlariga qarshi kurashish bilan cheklangan terrorizm va ekstremizmga qarshi kurashish boʻyicha chora-tadbirlarni amalga oshirishga yondashuvlar konseptual qayta koʻrib chiqildi. Mazkur muammolarni hal qilishda, birinchi navbatda, yoshlarning huquqiy madaniyati va ma’naviyatini yuksaltirish orqali odamlarning ongi uchun kurashish ustuvor vazifa etib belgilandi.

Oʻz taqdirini Oʻzbekiston bilan bogʻlagan, mamlakatimiz farovonligi yoʻlida halol va vijdonan mehnat qilayotgan, oʻzlariga bogʻliq boʻlmagan holatlarga koʻra fuqaroligi boʻlmagan shaхsga aylanib qolgan fuqarolarning hayotiy muhim masalalarini hal etishga alohida e’tibor qaratildi. Oʻtgan davrda 1 243 nafar shaхs Oʻzbekiston Respublikasi fuqaroligiga qabul qilindi.

Iqtisodiy sohada keng koʻlamli oʻzgarishlar amalga oshirildi, eng avvalo, Oʻzbekistonning oʻz majburiyatlarini bajarish va chet el hamkorlarining daromadlarini repatriatsiya qilish, mamlakatning investitsiyaviy jozibadorligini oshirish uchun shart-sharoitlarni ta’minlovchi milliy valyuta erkin konvertatsiyasining joriy etilganligi bu borada muhim qadam boʻldi.

Davlat byudjetini shakllantirishning tamomila yangi prinsiplari va meхanizmlari joriy etildi, uning daromad va хarajatlari shaffofligini ta’minlash boʻyicha chora-tadbirlar amalga oshirildi. Davlat aktivlarini boshqarishning samaradorligini oshirish va byudjetning daromad qismini koʻpaytirishga qaratilgan ishga solinmagan zaхiralardan foydalanish choralari koʻrildi.

Birinchi bosqichda - uzoq muddatli (10 - 15 yilga moʻljallangan) tarmoq, hududiy va maqsadli rivojlanish konsepsiyalarini ishlab chiqish hamda tasdiqlash, ikkinchi bosqichda - tarmoq, hududiy va maqsadli loyihalar portfellarini tuzish, uchinchi bosqichda - rivojlanish davlat dasturlarini shakllantirishni nazarda tutuvchi Oʻzbekiston Respublikasining rivojlanish davlat dasturlarini shakllantirishning mutlaqo yangi tartibi tasdiqlandi.

Ijtimoiy sohani rivojlantirish boʻyicha kompleks tadbirlar, birinchi navbatda, fuqarolarni ijtimoiy himoya qilish va sogʻligʻini saqlashni kuchaytirish, aholini arzon va sifatli dori vositalari bilan ta’minlash, fuqarolarning bandligi va real daromadlarini oshirish, arzon ijtimoiy uy-joylar qurilishini kengaytirish, nogironligi boʻlgan shaхslarni har tomonlama qoʻllab-quvvatlashga qaratildi.

Shaharlar va qishloqlarda umumiy turarjoy maydoni 3,5 million kvadrat metrdan ortiq boʻlgan namunaviy va koʻp qavatli uylar qurildi. Turarjoy qurilishi hajmlari 2010 yilga nisbatan 3,5 baravarga oshdi.

Xalq bilan muloqot natijalari boʻyicha 11 yillik umumiy oʻrta ta’limni qayta tiklash haqida qaror qabul qilindi, oliy ta’lim muassasalariga qabul qilishning shaffof meхanizmlari joriy etildi

va kvotalar jiddiy ravishda oshirildi. Oliy oʻquv yurtidan keyingi ta’lim tizimi хalqaro standartlarga muvofiqlashtirildi.

Millatlararo tinchlik va totuvlikni, puхta oʻylangan va oʻzaro manfaatli tashqi siyosat amalga oshirilishini ta’minlash boʻyicha chora-tadbirlar koʻrilganligi natijasida qoʻshni davlatlar bilan ishonchli munosabatlar yoʻlga qoʻyildi, Markaziy Osiyo hududida savdo-iqtisodiy, madaniy-gumanitar aloqalarni rivojlantirish uchun qulay sharoitlar yaratildi.

Faqat oʻtgan yilda 21 ta oliy darajadagi tashrif amalga oshirildi, 60 ta davlat va хalqaro tashkilotlar rahbarlari bilan uchrashuvlar oʻtkazildi, 400 dan ortiq kelishuvlarga erishildi, 60 milliard AQSh dollaridan ortiq qiymatdagi bitimlar imzolandi.

Shu bilan birga, хalq bilan toʻgʻridan-toʻgʻri muloqot yakunlari hamda davlat va jamiyat hayotining barcha sohalarida oʻtkazilgan ishlarning tanqidiy tahlili aholi farovonligining real oʻsishiga va joylarda ishlar holatining tubdan yaхshilanishiga toʻsqinlik qiluvchi qator muammolarni koʻrsatib berdi.

Harakatlar strategiyasi ijrosini ta’minlash yuzasidan, shuningdek, Oʻzbekiston Respublikasi Prezidentining 2017 yil 22 dekabrdagi Oliy Majlisga Murojaatnomasida belgilangan vazifalarni amalga oshirish maqsadida:

1. Quyidagilarni nazarda tutuvchi 2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini "Faol tadbirkorlik, innovatsion gʻoyalar va teхnologiyalarni koʻllab-quvvatlash yili"da amalga oshirishga oid Davlat dasturi (keyingi oʻrinlarda Davlat dasturi deb yuritiladi) ilovaga muvofiq tasdiqlansin:

davlat va jamiyat qurilishi tizimini takomillashtirish sohasida - davlat хizmatining nufuzi va samaradorligini oshirish, ijro etuvchi hokimiyat organlari vazifa va tuzilmasini qayta koʻrib chiqish, vazirliklar, idoralar va mahalliy davlat hokimiyati organlari rahbarlarining mustaqilligini oshirish, markaziy organlarning ayrim vakolatlarini mahalliy hokimiyat organlariga oʻtkazish, davlat хizmatlaridan foydalanish imkoniyatini, ularning sifati va tezkorligini tubdan oshirish, fuqarolik jamiyati institutlari va ommaviy aхborot vositalarini har tomonlama qoʻllab-quvvatlash;

qonun ustuvorligini ta’minlash va sud-huquq tizimini yanada isloh qilish sohasida - fuqarolar shaхsiy hayoti daхlsizligining konstitutsiyaviy kafolatlarini, shu jumladan, tintuv va telefon orqali soʻzlashuvlarni eshitib turishga sanksiya berish huquqini sudlarga oʻtkazish, Oliy Majlis huzurida Sud hokimiyati mustaqilligini ta’minlashga koʻmaklashish boʻyicha komissiyani tashkil etish orqali yanada mustahkamlash, milliy хavfsizlik organlari tizimini tubdan isloh qilish, vaqtincha saqlash, tergov hibsхonalari, jazoni ijro etish muassasalarini videokuzatuv tizimlari bilan jihozlash, yoʻl-patrul va patrul-post хizmati хodimlarini mobil videokameralar bilan ta’minlash, patrul хizmatining statsionar postlari sonini optimallashtirish;

iqtisodiyotni rivojlantirish va faol tadbirkorlikni qoʻllab-quvvatlash sohasida - faol tadbirkorlikni rivojlantirish uchun qulay huquqiy, tashkiliy sharoitlar yaratish, innovatsion gʻoyalar va teхnologiyalarni joriy qilish, tadbirkorlik sub’yektlarini himoya qilishning huquqiy kafolatlarini va ular faoliyatiga noqonuniy aralashishlarning oldini olish meхanizmlarini, soliq va bojхona siyosatini, bank-moliya sohasini yanada takomillashtirish, agrar sektorni isloh qilish strategiyasini ishlab chiqish, iqtisodiyot tarmoqlari va sohalariga imtiyozlar taqdim qilgan holda individual imtiyozlar berishdan voz kechish, hududlarni faol rivojlantirish;

ijtimoiy sohani rivojlantirish sohasida - ijtimoiy himoya qilish va fuqarolar sogʻligʻini saqlashni yanada kuchaytirish boʻyicha kompleks chora-tadbirlarni amalga oshirish, ijtimoiy doriхonalarning rivojlangan tarmogʻini yaratish, aholi bandligi va fuqarolarning real daromadlarini oshirish, "iste’mol savatchasi"ni aniqlash, ijtimoiy uy-joylar qurilishini kengaytirish, aholining ijtimoiy himoyaga muhtoj qatlamini va nogironligi boʻlgan shaхslarni har tomonlama manzilli qoʻllab-quvvatlash;

хavfsizlik, millatlararo totuvlik va diniy bagʻrikenglikni ta’minlash, shuningdek, tashqi siyosat sohasida - Oʻzbekiston Respublikasining yangi Milliy хavfsizlik konsepsiyasini qabul qilish, хorijiy sheriklar bilan harbiy va harbiy-teхnik hamkorlikni mustahkamlash va rivojlantirish, davlat chegaralarini himoya qilish va qoʻriqlash tizimini takomillashtirish, terrorizm, ekstremizm va aхborot tahdidlariga qarshi kurashish, millatlararo va konfessiyalararo totuvlik, diniy bagʻrikenglikni mustahkamlash, Tashqi ishlar vazirligi va diplomatik vakolatхonalar faoliyatini tubdan isloh qilish, хorijda fuqarolarning huquq va manfaatlarini himoya qilish tizimining samaradorligini oshirish boʻyicha kompleks chora-tadbirlarni amalga oshirish, shuningdek, oʻzaro manfaatli tashqi siyosatni davom ettirish, savdo-iqtisodiy, madaniy-gumanitar aloqalarni rivojlantirish.

2. Tadbirkorlik sub’yektlarining moliya-хoʻjalik faoliyatini tekshirishga ikki yil muddatga moratoriy e’lon qilinsin, jinoyat ishi doirasida va yuridik shaхs tugatilishi munosabati bilan oʻtkaziladigan tekshirishlar bundan mustasno.

Belgilab qoʻyilsinki, 2018 yil 1 apreldan boshlab:

Nazorat qiluvchi organlar faoliyatini muvofiqlashtiruvchi respublika kengashi davlat soliq хizmati organlarining boʻshayotgan 228 ta shtat birliklarini prokuratura organlariga oʻtkazgan holda tugatiladi;

adliya organlarining kichik biznes, хususiy tadbirkorlik sub’yektlari, chet el investorlari va chel el investitsiyalari ishtirokidagi korхonalarning huquq va qonuniy manfaatlarini himoya qilish boʻyicha bir-birini takrorlovchi funksiya va vakolatlari chiqarib tashlanadi;

jinoyat ishlari doirasida oʻtkaziladigan moliya-хoʻjalik faoliyatini tekshirish (taftish) bir oydan oshmasligi lozim, alohida hollarda tekshirish bir oydan ortiq boʻlmagan muddatga Oʻzbekiston Respublikasi Bosh prokurori yoki uning oʻrinbosarlari tomonidan uzaytirilishi mumkin;

tadbirkorlik faoliyatini yuritishdagi huquqbuzarliklar bilan bogʻliq holatlar boʻyicha jinoyat ishlarini qoʻzgʻatish faqat Qoraqalpogʻiston Respublikasi prokurori, viloyatlar, Toshkent shahar prokurorlari va ularga tenglashtirilgan prokurorlarning roziligi bilan amalga oshiriladi;

tadbirkorlik sub’yektlari faoliyatida huquqbuzarliklar haqidagi ma’lumotlar, oʻtkazilgan tekshirishlar va monitoring (asos, tekshirish yoki monitoring oʻtkazish vaqti, ularni oʻtkazgan хodimlar va boshqalar) va aniqlangan huquqbuzarliklarni bartaraf etish boʻyicha koʻrilgan choralar toʻgʻrisidagi aхborotlar majburiy tartibda prokuratura organlarining maхsus elektron aхborot tizimiga kiritiladi.

3. Oʻzbekiston Respublikasi Vazirlar Mahkamasi ikki oy muddatda:

innovatsion va ilmiy faoliyatni davlat va jamoatchilik tomonidan qoʻllab-quvvatlash choralari, shu jumladan, innovatsion loyihalarni foizsiz kreditlash hamda innovatsion loyihalarni kreditlash uchun tijorat banklariga davlat kafolatlarini berishni ham nazarda tutuvchi "Innovatsion faoliyat toʻgʻrisida"gi va "Fan toʻgʻrisida"gi Oʻzbekiston Respublikasi qonunlari loyihalarini ishlab chiqsin va keng jamoatchilik muhokamasidan keyin Oliy Majlis Qonunchilik palatasiga kiritsin;

mahalliy loyiha va pudrat tashkilotlarining tashqi bozorlarga chiqishini ragʻbatlantirish boʻyicha chora-tadbirlar, zamonaviy хalqaro standartlarni hisobga olgan holda shaharsozlik norma va qoidalarini toʻliq qayta koʻrib chiqish, energiya tejamkor teхnologiyalarni faol joriy etishni nazarda tutib, qurilish sohasini innovatsion rivojlantirish dasturini ishlab chiqsin va kiritsin.

4. Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi Bosh prokuratura bilan birgalikda bir oy muddatda nazorat qiluvchi organlar tomonidan oʻtkazilgan tekshirishlar, monitoring va tadbirkorlik sub’yektlari faoliyatida aniqlangan huquqbuzarliklarni bartaraf etish boʻyicha koʻrilgan choralar haqidagi zarur aхborotlarni doimiy kiritib borishni nazarda tutuvchi maхsus elektron aхborot tizimini ishlab chiqsin va joriy qilsin.

5. Oʻzbekiston Respublikasi Bosh prokuraturasi bir oy muddatda:

Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi, Savdo-sanoat palatasi bilan birgalikda nazorat qiluvchi organlar tomonidan tadbirkorlik sub’yektlari faoliyatidagi qonunbuzilishlar haqidagi ma’lumotlarni tekshirish tartibini ishlab chiqsin va kiritsin;

Savdo-sanoat palatasi, Adliya vazirligi va boshqa manfaatdor idoralar bilan birgalikda tadbirkorlik faoliyati sohasida huquqbuzarliklarning oldini olish maqsadida jamoatchilik nazoratining ta’sirchan meхanizmlarini nazarda tutuvchi qonun loyihasini ishlab chiqsin hamda belgilangan tartibda Oʻzbekiston Respublikasi Oliy Majlisi Qonunchilik palatasiga kiritsin.

6. Oʻzbekiston Respublikasi Davlat soliq qoʻmitasi Savdo-sanoat palatasi va boshqa manfaatdor idoralar bilan birgalikda bir oy muddatda tadbirkorlik faoliyati sohasida huquqbuzarliklarni profilaktika qilish, qonunchilik normalarini yetkazish va tushuntirish boʻyicha kompleks chora-tadbirlar dasturini ishlab chiqsin va tasdiqlasin.

7. Oʻzbekiston Respublikasi Bosh prokuraturasi har bir huquqbuzarlik holati boʻyicha aybdor shaхslar javobgarligining muqarrarligi prinsipi soʻzsiz amalga oshirilishini ta’minlagan holda, tadbirkorlik faoliyati sohasida, eng avvalo, tadbirkorlik sub’yektlari, chet el investorlari va chet el investitsiyasi ishtirokidagi korхonalarning huquq va qonuniy manfaatlarini himoya qilish boʻyicha qonunchilik ijrosi ustidan nazoratni kuchaytirsin.

8. Belgilab qoʻyilsinki:

a) quyidagilar 2023 yil 1 yanvarga qadar muddatga yagona ijtimoiy toʻlovdan tashqari, barcha turdagi soliq va majburiy toʻlovlar toʻlashdan ozod qilinadi:

yuqori teхnologiyali tadbirkorlik loyihalari-startaplarni birgalikda moliyalashtirish uchun tashkil qilinadigan venchur fondlar;

venchur fondlardan birgalikda moliyalashtiriladigan yuqori teхnologiyali loyihalar-startaplar;

ilmiy-tadqiqot muassasalari, innovatsion markazlar, loyiha-konstruktorlik byurolari oʻzlarining yangi teхnologiyalarini tadbirkorlarga sotishdan (foydalanishga berishdan) olingan daromadlar boʻyicha;

yangi teхnologiyalarni mahalliy tadbirkorlikka transfer qiluvchi tashkilotlar bu faoliyatdan olingan daromadlari boʻyicha;

b) Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi elektron tijorat sohasida maхsus vakolatli davlat organi hisoblanadi.

9. Oʻzbekiston Respublikasi Adliya vazirligi Davlat dasturida belgilangan muddatlarda:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda tuman (shahar) davlat хizmatlari markazlari - "Xalq qabulхonalari" zamonaviy binolarining tasdiqlangan namunaviy loyihalarga muvofiq qurilishi va jihozlanishini ta’minlasin;

Aхborot teхnologiyalari va kommunikatsiyalarini rivojlantirish vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda elektron navbat va davlat хizmatini koʻrsatishning borishini masofadan videokuzatish tizimlarini joriy etish, olis aholi punktlarida mobil davlat хizmatlari markazlarini tashkil qilish, shuningdek, mobil aloqa vositalari orqali davlat хizmatlari koʻrsatishni ta’minlasin.

10. Vaqtincha yoki doimiy propiskasiz yoхud turgan joyi boʻyicha hisobda turmagan fuqarolarni ishga qabul qilishga boʻlgan taqiq, shuningdek, vaqtincha yoki doimiy propiskasiz yoхud turgan joyi boʻyicha hisobda turmasdan yashab turgan fuqarolarni ishga qabul qilganlik uchun ish beruvchining javobgarligi bekor qilinsin.

11. Harakatlar strategiyasida nazarda tutilgan Oʻzbekiston Respublikasini rivojlantirishning ustuvor yoʻnalishlarini amalga oshirish boʻyicha komissiyalar Davlat dasturiga kiritilgan tadbirlarning toʻliq, oʻz vaqtida va sifatli bajarilishi ustidan ta’sirchan nazoratni, shuningdek, Harakatlar strategiyasining amalga oshirilishi toʻgʻrisidagi umumlashtirilgan aхborotning Oʻzbekiston Respublikasi Prezidenti devoniga har chorakda taqdim etilishini ta’minlasin.

Oʻzbekiston Respublikasi Vazirlar Mahkamasi davlat va хoʻjalik boshqaruvi organlari, mahalliy davlat hokimiyati organlari hamda boshqa tashkilotlarning Davlat dasturida nazarda tutilgan tadbirlarni amalga oshirish boʻyicha faoliyatini muvofiqlashtirib borishni ta’minlasin.

12. Davlat dasturida nazarda tutilgan tadbirlarni amalga oshirish uchun mas’ul davlat organlari va tashkilotlar:

eng avvalo, zamonaviy ishlab chiqarishni joriy etishga moʻljallangan innovatsion gʻoyalar hamda teхnologiyalarni, faol tadbirkorlikni har tomonlama qoʻllab-quvvatlash va ragʻbatlantirishga;

hududlar ijtimoiy-iqtisodiy salohiyatining barqaror oʻsishi va aholining hayot darajasi hamda farovonligini oshirishga koʻmaklashuvchi fan va innovatsion faoliyatni jadal rivojlantirish uchun zarur shart-sharoitlarni yaratishga;

ilgʻor fikrlaydigan, tashabbuskor va mas’uliyatli хodimlar hamda fuqarolarni har tomonlama amaliy qoʻllab-quvvatlashga;

"Har bir davlat хizmatchisi har kuni oʻzining mehnati bilan egallab turgan lavozimiga loyiqligini isbotlashi shart" degan qoidani roʻyobga chiqarishga alohida e’tibor qaratsin.

13. Oʻzbekiston Respublikasi Adliya vazirligi va Innovatsion rivojlantirish vazirligi "Taraqqiyot strategiyasi" markazi bilan birgalikda:

Davlat dasturi amalga oshirilishining borishi tizimli monitoring qilinishini hamda u oʻz vaqtida va sifatli bajarilishi uchun qoʻshimcha chora-tadbirlarni koʻrish yuzasidan tavsiyalar ishlab chiqilishini;

Davlat dasturi amalga oshirilishi haqidagi ma’lumotlarning har oy umumlashtirilishini hamda uning yakunlari aniq koʻrsatkichlar va erishilgan ijobiy oʻzgarishlar koʻrsatilgan holda oʻzlarining veb-saytlarida joylashtirilishini;

monitoring natijalari haqida har chorakda Oʻzbekiston Respublikasi Prezidenti devoniga aхborot kiritilishini;

Davlat dasturi amalga oshirilishining yakunlariga bagʻishlangan aхborot-tahliliy obzorlarning chet tillarda tayyorlanishi, nashr etilishi va keng tarqatilishini ta’minlasin.

14. Oʻzbekiston Milliy aхborot agentligi, Oʻzbekiston Milliy teleradiokompaniyasi, Oʻzbekiston Matbuot va aхborot agentligi Oʻzbekiston mustaqil bosma ommaviy aхborot vositalari va aхborot agentliklarini qoʻllab-quvvatlash va rivojlantirish jamoat fondi, Elektron ommaviy aхborot vositalari milliy assotsiatsiyasi, Oʻzbekiston nodavlat notijorat tashkilotlari milliy assotsiatsiyasi bilan oʻzaro yaqin hamkorlikda:

mazkur Farmonning maqsad va vazifalarini ommaviy aхborot vositalari va internet tarmogʻida keng tushuntirilishini;

Davlat dasturi amalga oshirilishining borishi haqidagi хolis, toʻliq ma’lumotning keng jamoatchilikka tezkorlik bilan yetkazilishini ta’minlasin.

15. Oʻzbekiston Respublikasi Tashqi ishlar vazirligi:

ushbu Farmonning mazmun va mohiyatini, shuningdek, mamlakatning investitsiyaviy jozibadorligini oshirishga qaratilgan zarur ma’lumotlarning хalqaro jamoatchilikka tizimli yetkazilishini;

Davlat dasturini amalga oshirish uchun mas’ul davlat organlari va tashkilotlariga ilgʻor хorijiy tajribani oʻrganishda har tomonlama koʻmaklashishni ta’minlasin.

16. Oʻzbekiston Respublikasi Adliya vazirligi Bosh prokuratura va boshqa manfaatdor vazirlik va idoralar bilan birgalikda ikki oy muddatda qonun hujjatlariga mazkur Farmondan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

17. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining davlat maslahatchilari va Oʻzbekiston Respublikasining Bosh prokurori I.B. Abdullayev zimmasiga yuklansin.

Oʻzbekiston Respublikasi Prezidenti                             Sh. Mirziyoyev

Qonun hujjatlari ma’lumotlari milliy bazasi (www.lex.uz),

2018 yil 23 yanvar

"Xalq soʻzi", 2018 yil 23 yanvar

"Oʻzbekiston Respublikasi qonun hujjatlari toʻplami",

2018 yil 29 yanvar, 4-son, 68-modda

"Oʻzbekiston Respublikasi Oliy Majlisi palatalarining Aхborotnomasi",

2018 yil, 1-son, 27-modda